《情困之時，我遇上了自稱情性的情聖》: [Case 14－我的米奇] PART 05

我一邊玩下對腳仔～又一邊好認真咁做野～

咁認真咁做野，都係為左幫飛揚BB分擔工作～

等飛揚BB唔使咁辛苦～

唔係既話你估我真係為左幫嗰個勁衰既姑丈咩？

同飛揚BB一齊努力咁工作～開開心心又幸幸福福咁就做到十二點半～



「Emma～你肚餓未丫？」飛揚BB開口問一問我～

『我OK丫～可以食得落～』飛揚BB真係好細心呢～

果然係一個好識得照顧女仔既好男人～

「咁...你想食D乜？」飛揚BB再問一問我意見～

仲要識得問我意見～真係好體貼呢～



『我無所謂架～你平時食開D乜？』我就踢下踢下對腳仔咁答～

「我丫...」飛揚BB諗下諗下，「我平時都係叫盒外賣叉飯，一邊做野一邊食...」

叫外賣丫？

唔得！難得第一次同飛揚BB撐檯腳喎～緊係要食好D先得架啦～

食好D...食好D...



『唔...呀～係喎～我表姐喺呢頭岩岩開左間餐廳～叫我去試食～不如一齊啦～』我放低手上既工作～行過去飛揚BB身邊～

「之但係...」

『唔好但係啦～行啦～』我就拉住飛揚BB隻手衝出門口～

我拉住飛揚BB行左幾條街～仲偷偷Send左個Message俾表姐話我同個男仔去梗佢間餐廳道試菜～

表姐仲Send左句“我識做呢～”俾我添...

呢個表姐丫～古古惑惑咁～又唔知佢喺道諗梗乜啦～

一直拉住飛揚BB行～又過左幾個街口～

「喂喂喂～唔駛拉住我啦～都行到黎呢道，我唔會逃走既～」飛揚BB鬆一鬆開～



『嗱～你講架～唔準逃走架～』我向飛揚BB伸出一隻手指尾～

「OKOK...」飛揚BB同我手指尾一勾，我再用隻姆指掂飛揚隻姆指～

其實呢個動作...係飛揚BB教我既～

亦係我第一次...第一次同飛揚BB親密接觸～（雖然嗰陣時佢係戴住左隻米奇手套～）

我係唔會忘記～唔會忘記我應承過你D乜～

過左幾條馬路～轉多幾個彎～就黎到表姐間餐廳～

表姐間餐廳外面既廚窗用上深啡色十字木窗框～門係用上深啡色木製拱門～



睇黎都真係幾浪漫咁喎～

而且表姐間餐廳仲係要食法國野～

法國喎～浪漫之國喎～仲唔係浪漫加上浪漫～

岩晒我同飛揚BB黎撐檯腳啦～

我同個接待員講左一聲：『我地係老闆娘邀請黎試菜架～』

「哦～我地已經預備好～請跟我黎～」接待員就帶左我地入間房～

我同飛揚BB入到一間散發出一陣陣清幽香氣既房間裏面～

一張舖有珍珠白皮檯布既正方餐檯上，放左兩支紅色玫瑰花～



坐喺張歐陸式凳上面，呢種氣氛...就好似...好似約會一樣～

就只有我同飛揚BB單獨相處既約會～

一個Waitress放低左兩份Menu之後，企喺我地身邊...

『麻煩你幫我同Chef講整佢最拿手野俾我地。』我溫文爾雅咁講一講～

Waitress點點頭後，收起我地份Menu就行左出房～

Waitress走左之後，就真係無晒人～就只得我同飛揚BB～我同飛揚BB二人世界～

『呢道既環境O唔OK丫？』我托住個頭～情深深咁望住飛揚BB～



無人之下...果然係會大膽D...係會容易D唔覺意咁表露左一絲絲既心跡出黎～

「OK～好好呀～」飛揚BB都好似好滿意～

『咁我照實答我表姐架喇喎～』我一直盯住飛揚BB～唔捨得將視線離開～

只要係飛揚BB話好...我都會話好～

就係我一直情意綿綿咁望住飛揚BB之時...

“咯咯咯...”有人敲一敲道門...

頭先個Waitress拎左兩隻玻璃杯加一支紅酒入黎～

『老闆娘知道你地今日會黎，所以特別為你地開支紅酒，已經抖夠氣，請兩位慢用。』Waitress倒過酒後，離開房間～

呢個表姐丫～唔怪之得佢話識做啦～

紅酒喎～都唔知裏面會唔會落埋迷藥架～

你唔好話丫～我呢個表姐出名古惑架～

聽講佢個老公都係咁樣俾佢迷姦返黎架咋～

我拎起杯紅酒望清楚D～

「飲紅酒...會唔會唔係咁好丫...」飛揚BB就望住我～

『唔緊要啦～一兩啖OK既～Cheers～』我就舉起酒杯～

應該唔會真係有迷藥既～

同飛揚BB食左一餐幸福既Lunch～

『嗱～我真係飲左一兩啖咋～係唔係好聽話先？』我放低酒杯...

我扮晒醉醉地咁～扮晒講醉話咁～

實質...我係有少少想借醉行凶～

「聽話～聽話～」飛揚BB好溫柔咁氹一氹我～讚一讚我～

『我一直都好聽你話...』我面紅紅咁望住飛揚BB...

我真係好聽你話...

一直都好聽你話...

好聽你話...唔再任性...

一直我都無再任性...

一直都係因為你既一句說話...我唔再任性...我唔再任性...

唔再任性...唔再任性...

『好喇～飲飽食醉就返去喇～』我變返清清醒醒咁起一起身～

「ER...張單未埋架喎...」飛揚BB傻下傻下咁～

我轉一轉身：『表姐請得我地黎試菜就唔駛俾錢啦～你醉喇～嘻嘻～』

我唔可以再任性...

喺飛揚BB唔係單身...仲有女朋友...仲係人地男朋友之時...我唔可以咁任性...

咁任性咁搶人男朋友！

返到公司之後，大家都繼續做野～

我都好俾心機～好努力～好投入咁做～

只要係為左飛揚BB既，我乜都願意～

做下做下野～完全無理過時間～

同飛揚BB一齊，總係唔知時間在流逝～

「Emma，我出出去見個客。放工我都未返到既話你就走先啦。」飛揚BB拎好公事包準備行出門口...

『喂喂～你去邊道見客？』我叫一叫停飛揚BB～

「我要去葵芳嗰頭...石籬囉。」

『係丫...你搭地鐵去？』

「嗯，地鐵轉巴士。」

「但荃灣線發生信號故障...成條荃灣線都塞滿晒人喎...」我望下望下個Yahoo新聞...

又會咁岩既～

「唔係呀化？又信號故障？非繁忙時間都塞滿人？」飛揚BB有D嬲嬲豬咁～

『係丫～新聞係咁講...睇黎仲有排搞添...』我指一指個Mon～

不過地鐵成日都壞架啦～

我唔搭既都知啦～

「死喇...唔通要搭紅VAN？但又唔知會唔會等好耐先開車...」飛揚BB又有D焦急咁～

『不如我車你啦～』我轉下轉下張凳～

「下...你車我？」飛揚BB好似唔係好信我咁...

『做咩丫～信唔過我？』我谷起塊面豬登！

我手車好好架囉！

喺日本都係咁揸架啦！

返到黎香港我都成日揸架啦！

睇我都知我唔係笨手笨腳架啦！

飛揚BB咁睇我架！

「唔係...但你岩岩先飲完酒...」飛揚BB尷尷尬尬咁揮揮手...擰擰頭...

哦～原來係擔心我岩岩飲完酒姐～

『都過左咁耐啦～咩都散晒啦～行啦～』我拉住飛揚BB走～

我又邊有咁易醉先得架～

我拉住飛揚BB行～行過幾條街～我就拉住飛揚BB去到朗豪酒店停車場～行到黎我架被黑色車套蓋住既Lamborghini Aventador LP 700-4 Roadster前～

我一手打開車套～

就好似平時一樣咁豪氣～

習慣黎架嘛～習慣左就係習慣左～咁先係我～

『飛揚～做咩呆晒呀？』我打量一下身邊既飛揚BB～

飛揚BB好似發晒呆咁～

「你揸Lamborghini...丫？」飛揚BB仲係有D困惑咁既口吻...

睇黎飛揚BB好似仲係唔係好信我咁喎...

哎丫...呢個飛揚BB丫...點可以對我咁無信心架！

『信我啦～我手車好好架～』我掀開鍘刀式車門～

我知道講係無用既～

最重要都係用行動去證明！

飛揚BB手震震咁掀開鍘刀式車門...

使唔使驚到手都震埋丫～

不過咁都真係幾可愛既～

等到飛揚BB坐上真皮跑車座椅～扣好埋安全帶之後～

我就掀開紅色蓋～按落個發出紅色光既“START ENGINE STOP”字樣既黑色掣道～

“吼！”一聲響～

有飛揚BB坐喺身邊，就連架Lamborghini Aventador LP 700-4 Roadster都好似特別兇猛D～

“依...我一俾油，LP 700-4 Roadster就衝住去！

“吼～吼～吼～ 吼！”

喺旺角既橫街窄巷，路上既司機都好禮讓～

之前返到黎香港，其實我都有D擔心～

因為成日聽見香港D司機都好惡～

尤其係D搵食車～個個都好似車手咁～

我始終都係女仔...有起事上黎好蝕底架嘛…

不過又好彩喎～而家揸左咁耐，又無話有D乜野喎～

D搵食車又唔會話抽頭就抽頭～仲會打晒燈咁～

有時出大路，仲會讓我出先添～

唔好話司機，行人都好禮讓～

D行人望一望我，又會笑笑口點點頭讓我行先～

有時泊架車喺街邊既時候，又會有D途人走黎問我可唔可以一齊影相～

其實香港都唔係咁差姐～

“吼～吼～吼～ 吼！”

好快，我地就衝左上高速公路～

而喺一路上，雖然話我都好專心咁揸車～但其實我都有留意下飛揚BB～

我發現到...飛揚BB不時都會偷偷望一望我對髀～

雖然話開左蓬～但唔知點解D風係無吹到入車廂裏面～

更唔好話有風吹起我條短裙仔啦～

雖然我條短裙仔就無吹起～無乜野睇～但飛揚BB就係不時都會偷偷望一望...望一望我對髀...我條短裙邊～

我對腳一收一放，大髀上既粉紅色短裙就越攝越入～

攝下攝下，攝左一條溝出黎～

飛揚BB對眼又望得落D...望得入D咁...

而且我條短裙仔攝得越入...就拉得越高...

我對大髀就展露喺空氣之中...

喺陽光既照射下...仲散發住陣陣白色光芒...

喺直路上我再留意多D飛揚BB...留意下佢對眼...留意下佢對眼望下望下...再望上D...

飛揚BB對眼...應該望到去我個...我個三角位...

睇黎我條短裙仔都攝得幾入...攝到有少少...露左個形出黎...

睇黎…飛揚BB唔單止對我對腳...仲有下面都...

唔知飛揚BB會唔會係D鍾意睇女仔裙底既人黎呢？

我喺日本既時候，都有研究過D男仔既性癖～

有D會對女仔既氣味有興趣...有D就會對個胸有興趣...有D會對屁股有興趣...有D會對對腳有興趣...有D會對裙底特別有興趣...

只要俾佢地見到佢地有興趣既地方...佢地就好容易扯起上黎...

而照我睇...飛揚BB係對腳同裙底都好有興趣～

唔...好啦～等我好好咁記住佢～

第時一定有用得著既時候～

“吼～吼～吼～ 吼！”好快就轉到上山～

好快就黎到飛揚BB要黎既地方～

“咔”

「唔該晒。你返公司先啦，如果到放工時間我都未返黎既話，你可以走先。熄燈就得架喇。」飛揚BB閂埋道鍘刀式車門後，望一望我...對腳～

『唔駛我接埋你返去？做咩丫～仲係唔信我手車？放低架車俾你揸喇～』我正要準備Dom條車匙俾飛揚BB～

「唔係唔係！你手車好好～只係...踩一踩油都唔見幾十蚊，無謂晒錢啦～我自己返去得架喇～你返去先啦～」飛揚BB尷尷尬尬咁笑笑口～

踩一踩油都唔見幾十蚊？無謂晒錢？

我好認真咁望住飛揚BB：『你真係好特別...好啦～唔好咁夜返喇～Bye～』

飛揚BB行後兩步...

“吼～吼～吼～ 吼！”

我就踩一踩油～

呢個飛揚BB～思考模式真係好特別～

有邊個揸得Lamborghini...會諗踩一踩油唔見幾多錢～又點會覺得係晒錢架～真係好特別～