編更編得好既話,我都會早D起身~

我都會Keep住喺某個時間落樓~

我都會Keep住跑步~

我都會Keep住跑去市鎮公園~

我之所以會Keep住跑公園,並唔係全為了健康~





我之所以會喺朝早跑公園,係為左可以遇到嗰個...坐輪椅既女仔~

其實我都已經試過幾次~

我都已經遇過嗰個坐輪椅既女仔好幾次~

呢個星期,我都Keep住黎跑~

而呢個星期以黎,我遇到嗰個女仔都有兩、三次~





每次都係喺個湖邊道寫生~

而我每次一見到佢,我都會離遠咁坐喺佢後面,坐喺佢身後,望住佢...默默咁望住佢...

望住佢既背影...

望住佢既側面…

望住佢好專心咁寫生...





個女仔好專心咁畫...一畫就畫成兩個鐘...

而我呢?我亦都會喺佢背後望住佢畫,望成兩個鐘~

好變態丫呵?

但我真係無惡意架~

我只係純粹想見下佢...望下佢畫畫...

我帶住期望既心情,一路跑去公園~

跑得好快~好心急咁跑得好快~

唔知佢今日有無黎寫生呢?





唔知今日會唔會俾我遇到佢呢?

我一入到公園,就向住湖邊既方向跑~

我一路望住個湖邊,一路跑~

當我跑到見到個湖邊之時,我遠離就見到湖邊有閃光閃下閃下~

係嗰個女仔~嗰個坐住輪椅既女仔~

我離遠都見到個女仔好全神貫注咁望住個湖,隻手就喺本畫簿上郁下郁下~搖下搖下~

我就好全神貫注咁望住個女仔黎跑,跑去佢身處既位置~





我沿住湖邊跑~

跑到去個女仔身後~

跑到去石凳道~

我坐一坐低,坐返之前坐向既位置~

喺個女仔既背後,遠離咁望住佢~

我又再一次好似個變態佬咁,喺個女仔背後偷偷望住佢畫畫~

真係唔敢諗,俾個女仔知道我日日為左想見下佢,專登跑過黎撞下佢,佢會點諗我~

如果你係嗰個女仔,你又會唔會好驚?





會唔會覺得好變態?

會唔會從此都唔會再黎湖邊畫畫?

而如果你係我,你又會唔會明知俾人知道會當成變態佬咁看待,都要Keep住黎見個女仔一面呢?

人...就係咁矛盾架喇~

我都係唔好諗咁多~都係襯住仲有機會,再望真D個女仔先~

我繼續好留心咁望住個女仔...

個女仔轉下轉下手上支筆...喺本畫簿上畫幾筆...再轉下轉下支筆...





我望住女仔手上支筆轉下轉下...又望一望個女仔塊面容...

總係好似...好似缺少左...D乜呢?

其實都唔只一次,已經有好幾次...

已經有好幾次總係覺得個女仔...好似缺少左D...缺少左D乜咁...

但一直以黎,我都係噏唔出缺少左D乜...

只係知...有D唔同...

感覺上有D唔同...

同喺舖頭外見到既佢...總係有D唔同...

但我總係噏唔出...噏唔出...有咩唔同...

或者我唔了解佢掛...

或者我...根本上就唔認識人...

莫講話認識...就連萍水相逢都講唔上...

我又點會了解到佢呢?

我只好繼續喺遠處偷偷觀察佢...

我希望可以了解到佢多D...

我希望可以認識到佢...

我望下望下....都已經望左好一陣子...

就喺呢個時候...

“嗒”一聲響...

個女仔手上支筆就掉到地上...

呢一刻,我突然好有衝動想上前幫佢執返起!

之但係...可能我同個女仔之間既距離太遠喇...

我都未黎得切起身姐,個女仔就彎一彎腰,執返起支筆...

我望住支筆繼續喺個女仔手中轉下轉下...

噢...錯過左一次...認識個女仔既機會添...

唉...真失敗...

不過講返起,雖然話個女仔好似好自然咁執返起支筆,但一D都唔輕鬆...

我見到佢頭先執起支筆既時候,都幾吃力...

彎一彎腰,執一執起支筆,都好似要花上好大氣力咁...

但喺個女仔既面上,就好似唔多在意咁...唔多在乎咁...

個女仔繼續望下望下個湖...繼續轉下轉下手上支筆...

因為已經習慣左?所以唔覺得係乜野一回事?

唔知呢...我真係唔知...

單靠外表,我真係推測唔到D乜出黎...

我亦唔敢貿貿然走去搭下訕...

唯有只好等下一次跌筆既機會啦~

我繼續遠遠咁坐喺個女仔身後...

一直等...一直等...

等下一次跌筆既機會...等下一次搭訕既機會...

但往往上天俾機會世人,就只得一次...

無好好珍惜既話,點等都等唔到下一次...

我等到個女仔深呼吸一口...

再將手上既筆同畫簿放喺個袋裏面之後...

整理一下條裙...鬆一鬆雙手,擰一擰轉張輪椅...

碌下碌下...個女仔靠住自己雙手,坐喺輪椅上碌下碌下...碌下碌下...

我扮晒唔為意...我扮晒只係坐喺道抖梗咁...

個女仔繼續碌下碌下...碌到去我面前...碌過左我面前...

我繼續扮晒唔在意...唔在呼...無留意過個女仔咁...

但其實我扮唔扮都無乜影響...

因為個女仔都係望都無望過我一眼...與我擦身而過後...碌到去我身後...越碌越遠...越碌越遠...

我一個人,繼續坐定定...坐定定...

其實...我係唔係有期望過...個女仔有留意到我呢?

我一個人,繼續坐喺石凳上諗下諗...

其實我係唔係真係有期望過,個女仔會留意到我呢?

而事實上,我都有諗過,個女仔點都會留意下我掛...

計埋呢次既話,話晒我地都喺呢道遇過四、五次喇...

同一個人喺同一個地方遇過四、五既話,或多或少都會有少少印象掛...

但點解個女仔...就連眼尾都唔望我一眼呢?

好似當我透明咁...

我係唔係真係咁唔起眼丫?

唉...

或者我真係咁唔起眼...

或者我就係咁普通...

普通到連正正喺你面前,你都留意唔到...察覺唔到...

唉~

都係時候要返去架喇~

返去沖個涼~換件衫~又要返舖頭幫手~

今日真係唔可以再遲到...

呢個星期都遲到左好幾日...

都已經俾Yuki同Zoe話左好幾次...

如果我今日再遲,佢地真係會罷工都似...

都係唔好諗咁多!快D跑返屋企好過!

我出盡全力咁跑,奧運選手咁跑返屋企!

簡單咁沖返個涼!換返套衫!又急急腳咁趕返去舖頭!

喺急急腳咁趕返去舖頭期間,我都係好唔專心咁四圍望...

我都係期待住會唔知喺邊個街角...邊條後巷...馬路對面...車站旁邊...可以再俾我遇到嗰個女仔...

我是否太過貪心呢?

岩岩先見完咋嘛…而家又想可以再次偶遇...

不過講真嗰句,就算真係俾我遇到咁又點?

人地都唔會留意到我架啦~

唉~~~

我放鬆一下心情,返到黎舖頭~

好彩既係我今日無遲到~Yuki同Zoe都仲未返到~

正當我入一入房仔著返件制服之時...

「咦~早左喎今日~」Yuki同Zoe咁岩就返到黎~

『早你地少少咁啦~喂喂...人地換梗衫架...』我有D唔係咁好意思咁...

Yuki打量一下我:「咩換衫姐?你都係就咁著件制服喺面咋嘛~」

Zoe接住講:「係囉~呢D叫做著衫咋嘛~又唔係除晒衫黎換~」

都...都係姐...

接住,Yuki同Zoe都除一除身上件外套,拎一拎起件制服...

『喂喂喂!你地唔係諗住換衫丫嘛?我係道架!』唔係真係當我無到丫嘛?

Zoe冷眼咁望一望住我:「都話左呢D叫做著衫咯...」

Yuki又冷眼咁望一望住我接住講:「你係怕羞既話就出去先喇...」

我...我...

唉...我都係出去先...

免得俾你地話我性騷擾你地...

我出一出去,接一接Jerry同明仔手~

「咁我地走先喇~拜拜~」

『嗯~小心D喇~拜拜~』

我就企喺個Counter入面,呆下呆下咁...

唔駛幾耐,Yuki同Zoe都著好件制服,由房仔行返出黎。

睇住Yuki點下貨...

又睇住Zoe執下貨...

睇下睇下...望下望下...

「做乜眼甘甘咁望住我同Yuki丫?哦!你視姦我地!你視姦我地!」Zoe谷一谷起塊面豬登睥住我...

『我唔係丫!我唔係丫!』我立即揮揮手,擰擰頭!

「仲話唔係?我留意到你色迷迷咁望住我地望左好耐架喇喎!又望下我地塊面...又望下我地個胸...又望下我地對腳咁...做咩丫你?想點丫你?」Yuki雙手打交叉咁攬住自己...

『我邊有呀?!』係!我係有望佢地!

不過絕對絕對絕對絕對無望佢地個胸同對腳!

「仲扮晒野咁喎!講!做乜鹹鹹濕濕咁視姦我地?!哦!我知喇!係唔係對我地有意思?!」Zoe扮晒成個偵探咁...

「似喇似喇...哦!唔怪之得成日都同我地編埋同一更啦!」Yuki又扮到好似發現新大陸咁...

『編埋同一更又有乜關係丫?』係咯!有乜關係丫又?!

Yuki疑惑咁打量住我:「你無聽過咩?D經理丫~主管丫~老闆丫想食個女員工丫~就會運用自己既權力,編個女仔同自己一更~咁就可以日對夜對,朝夕相對~自自然然就日久生情~食左落肚都唔知啦!」

Zoe又扮晒驚奇咁指一指住我:「哦!係喇係喇!老闆丫~老闆丫~」

Yuki又擰一擰頭:「我已經有個我好愛佢佢又好愛我既男朋友架喇~我係唔會鍾意你架~你都係死左條心去啦~」

Zoe都擰一擰頭:「我都唔會對你有意思架~你都係算罷啦~」

『你地唔好亂講啦...我邊係對你地有意思姐...』呢兩個𡃁妹真係...成日都亂咁噏...

Yuki又冷眼咁望住我:「唔係對我地有意思既話,咁做乜要眼甘甘咁望住我地咁耐丫?快D講!」

『我!我...我只係想了解女仔多D姐...』想了解一下女仔...

想知道女仔係唔係真係察覺唔到一直俾人望住...

岩岩只係望左Yuki同Zoe一陣姐,佢地都察覺得到喇...

而由此可見...你話我對嗰個女仔黎講,係唔係連路人甲乙丙丁都不如呢?

Yuki聽完我咁講,又古古惑惑咁笑一笑:「做乜無啦啦會想了解女仔多D呢?」

Zoe又古古惑惑咁笑一笑接住講:「春心蕩漾呢?」

Yuki又古古惑惑咁笑一笑接住講:「鍾意左人丫?邊個黎姐?我地識唔識架?」

Zoe又古古惑惑咁笑一笑接住講:「唔係我地兩個既話...唔會係Jerry丫嘛?」

Yuki又古古惑惑咁笑一笑接住講:「係Jerry?哦~原來你係鍾意D大波既女仔既~」

Zoe又古古惑惑咁笑一笑接住講:「似喇似喇似喇~唔怪得之前見佢成日都眼甘甘咁望住Jerry對波啦~」

『喂!你地唔好亂講啦!個女仔你地唔識架喇!』真係俾佢地兩個激死喇...女仔黎架嘛…一D矜持都無既...

「哦~原來真係鍾意左個女仔~~~」Yuki同Zoe異口同聲咁講完之後,對望一下,然後奸奸地咁笑一笑…

你兩個...笑得咁衰...想...想點丫...

望住兩個女仔喺道奸笑,我總係覺得唔會有乜好野...

總係覺得...佢地好陰險...

總係覺得...佢地好深不可測...

我成日都覺得,女仔諗野總係同我地男仔好唔同...

佢地會將一D事複雜化...

又認定左一樣野之後,就唔會聽你講...

就算你講既係真理,好似話太陽係由東邊升起,只要佢地認為太陽係由南邊升起,佢地都會指住個東邊話係南邊...

好多時明明就係錯既,但係佢地就會認為係岩既...

就好似大話講夠一百次,就會變成真一樣...

又好多時明明就係岩既,但係佢地就會認為係錯既...

明明你係好愛佢,但佢就係都感覺唔到...

明明你係好留意佢,但佢就無視你既存在...

所有野都好同你相反咁...

所有野都好似同你好唔夾咁...

所以話...你係估唔到女仔諗乜架喇...

Yuki打量一下我,古古惑惑咁講:「係唔係想了解女仔多D丫~」

『呃...』我唔係好知應該點答Yuki...

因為佢既樣話俾我知,一定無好野...

Zoe又古古惑惑咁笑一笑:「唔駛怕羞架喎~」

『我!我邊係怕羞姐...』我只係唔多信你兩個咋嘛…

Yuki又古古惑惑咁行過黎,蹬一蹬起對腳,搭一搭住我膊頭:「嗱~咁就等姐姐教下你啦~」

『呃...』你係姐姐?𡃁妹仔扮咩成熟丫...

Zoe又古古惑惑咁行過黎,蹬一蹬起對腳,搭一搭住我膊頭:「嗱~好好咁聽我地既教導喇喎~」

『呃...』當我小朋友咩...

我就係咁...俾兩個𡃁妹仔夾住...

而且仲聞到...好香...好香...

係由Yuki同Zoe身上散發出黎既香味...

係少女既體香?

平時同Yuki、Zoe一齊做野,都唔覺得佢地係咁香架...

但而家...

可能真係太貼近既關係...

可以好清清楚楚咁聞得到...聞得到佢地兩個都好香...

而呢種香氣...總係會令人...令人...

嗚呀!!!我喺道諗梗乜野丫?!

Yuki同Zoe都唔會係我鍾意嗰種...

Yuki同Zoe唔係話唔靚...

係超級靚!

兩個都係大美人...

之但係...唔知點解...我就係對佢地無嗰種...嗰種...心跳既感覺...

無心跳既感覺...無心跳既感覺...

總之我就唔會對佢地兩個有意思啦!

Yuki又笑淫淫咁望住我:「做乜塊面咁紅丫~未講就已經怕羞喇?」

『我!我邊係...』我係聞到你地既體香而怕羞囉...

Zoe又笑淫淫咁接住講:「怕羞仔~怕羞仔~」

『都話唔係咯...』我係都唔認我係怕羞架喇!

Yuki笑一笑:「其實怕羞又無話唔好既~~~有D女仔都幾鍾意怕羞仔架~~~」

『下?女仔都幾鍾意怕羞仔?』乜真係架咩?

Zoe接住講:「係架~怕羞仔都幾可愛架~你班學生妹Fans都幾鍾意你怕怕羞羞咁~好玩D丫嘛~不過呢~追女仔最緊要都係膽大心細面皮厚~」

『下?追女仔最緊要都係膽大心細面皮厚?』又鍾意怕羞仔...但又要膽大心細面皮厚?

點解好似咁矛盾咁架呢?

不過都係既...女仔就係咁矛盾...

呢樣我係清楚明白的...

Yuki點一點頭:「無錯喇~追女仔要主動D~你無理由要個女仔主動追你架嘛~雖然話我係做主動嗰個...」

『下?你係做主動嗰個?』我一頭問號咁望住Yuki。

Yuki又諗下諗下:「係丫~雖然話係我男朋友同我表白既~之但係...我係做主動嗰一個囉~佢丫!嗰陣時我都做到出晒面架啦!佢都唔敢食丫!搞到我幾咁失落丫...真係講起都嬲嬲地!」

做到出晒面?

唔敢食?

係做左D乜?

又咩叫唔敢食呢?

究竟Yuki同佢男朋友既愛情故事係點架呢?

會唔會係一個甜故黎架呢?

Yuki擰下擰下頭:「算喇算喇~唔好講我喇~講返你先~個女仔係點識架?」

俾Yuki咁樣問一問,我就要諗一諗:『唔...其實我地都未認識...』

Zoe就接住問:「仲未識架?」

我諗下諗下,點一點頭:『嗯...只係見過下咁...』

Yuki就接住講:「咁就更加要主動D去識人啦~」

『下?之但係...會唔會太過唐突?會嚇親人架?』三九唔識柒去識人...人地會點諗丫...

肯定唔係當我係死MK,就係死變態啦...

Zoe又接住講:「咁無人叫你一走埋去就問“小姐受唔受溝”架嘛~你可以留意下佢身上有乜特別野~睇下傾唔傾得到個話題出黎~」

『下?留意下佢身上有乜特別?佢會唔會覺得我變態架?』俾一個陌生人留意到自己有乜特別喎...人地又會點諗丫...

Yuki又接住講:「無人話要你𥄫得咁明顯架嘛~偷偷地𥄫~偷偷地𥄫~」

『變態偷窺狂?!』我已經成日都做架喇喎...

Zoe又接住講:「唔俾人發現係無人知你變態既~」

Yuki又接住講:「無錯喇~仲要扮晒好似咁岩得咁橋咁~好似話“咦?乜你都鍾意呢個公仔架?我都係喎~”又或者“咦?乜咁岩你都係鍾意呢隻色丫?我又係喎~”又或者“咦?乜咁岩又喺到撞到你既~”~總之就俾佢覺得你好巧合咁啦~」

乜咁岩丫…如光陽咩…

Zoe又接住講:「無錯喇~女仔就係鍾意D咁有緣~好似冥冥中自有安排咁~好似命中注定一樣咁~」

有緣?冥冥中自有安排?命中注定?

Yuki點一點頭,又接住講:「無錯喇~女仔就係一種咁講求第六感~迷信~感性主導既生物~」

第六感…迷信...感性主導既生物?

Zoe點一點頭,又接住講:「無錯喇~今日就講住咁多先~等你慢慢消化下先啦~」

Yuki點一點頭,又接住講:「嗯嗯~以你咁蠢黎講,都有排消化架喇~好~做野先~」

Zoe點一點頭,又接住講:「嗯~開工~」

講完之後,Yuki同Zoe都走去做野...

我一個人,呆呆咁企喺道諗下諗...

頭先Yuki同Zoe講過D乜?

點解我好似乜都Get唔到咁架呢?