晨早流流,我又去到市鎮公園跑步。

我一個人跑,喺冷風吹送下跑。

今日既天氣都幾凍...

天氣開始凍了...

我所指既凍,當然就唔係零下幾十度嗰種~





我都唔係西伯利亞人~更加唔係高登仔~

其實我都係同一般人一樣,都係怕凍架~

之不過就算係幾凍,只要時間許可,我都會走黎跑返幾轉~

我一路跑,就一路諗...

諗返起上星期Yuki同Zoe講既野...





都已經過左一個星期...

我都已經諗左成個星期...

但就係...諗唔明...諗唔通...

乜野女仔都幾鍾意怕羞既男仔...點樣膽大心細面皮厚...

乜野巧遇…又乜野第六感…又乜野感性主導…





真係複雜過相對論...

我終於都開始明白,點解當時愛因斯坦選擇研究宇宙,都唔去研究女人...

因為研究字宙相比起研究女人係容易得多~

女人...真係好難理解架...

我繼續一路諗...又一路跑...

跑左好多個圈...已經圍住個市鎮公園跑左好多好多個圈...

點解我會跑左咁多個圈?

點解我唔係坐定定喺石凳上,遠遠咁偷窺住個喺湖邊寫梗生既女仔呢?





因為個女仔都無黎到...

無錯喇...湖邊並沒有出現閃閃發光既女仔...

都已經有成個星期...

已經有成個星期,無遇到嗰個女仔...

Keep住一個星期喺市鎮公園裏面兜圈...

一跑就跑左兩個幾三個鐘...

但就係見唔返嗰個坐輪椅既女仔...





個女仔去左邊呢?

點解無再黎呢?

係唔係已經畫完幅畫呢?

係唔係唔再需要黎湖邊呢?

係唔係以後都再見佢唔到架喇?

我有D失落...有D灰心...

呢道已經係我最容易遇上佢既地方...

假如連呢道都遇唔到,都唔知可以喺邊道遇到...





諗深一層...會唔會係因為察覺到我成日都喺佢背後,偷窺佢...

佢覺得好恐怖...好驚...所以先唔再黎呢?

唔係真係咁丫化…

如果係咁既話,就仲慘...

俾人當係變態佬咁睇...

當咩野姐?根本就係!

係自己先會覺得好似情聖咁,係人地背後默默咁守護住人。





但喺別人眼中呢?

根本就係跟蹤狂!偷窺狂!死變態!

唉...我明既~我明既~

係我嚇親人~我明既~

我再喺公園裏面跑多幾個圈之後,返返屋企。

沖個涼~換件衫~又要返舖頭了~

我一返到去舖頭姐,就已經見到Zoe叉住條腰,企喺面前:「尹曉揚!你捨得返黎喇咩?!」

『Sorry~Sorry~遲左少少...遲左少少...』我鞠住躬咁Say Sorry認錯。

Yuki又行左過黎,叉住條腰咁講:「遲左成個字都叫做遲少少丫?!你係唔係想做死我地兩個靚女丫?!」

『Sorry~Sorry~我緊係唔係想做死你地兩個啦...』邊有咁易做得死丫...

呢個鐘數都算係時間尚早...

都無乜人黎買野,又唔會有貨要收...

最多咪打掃一下,點下貨咁...

Zoe谷一谷起塊面豬登:「你呢排做乜丫?成個星期都遲到!係唔係唔知醒丫?駛唔駛我地打俾你,叫你起身丫?」

『唔駛唔駛...我都唔係唔知醒...』仲好早就已經醒左添...

Yuki又谷一谷起塊面豬登:「你就想呀!我先唔會打俾你叫你起身!我只會做我男朋友既人肉鬧鐘~」

Zoe立即笑到衰衰咁望住Yuki:「嘿嘿嘿...你會點樣整醒你既男朋友呢?」

Yuki立即面紅紅咁:「唔話你知~唔話你知~等你心思思~」

Zoe繼續笑到衰衰咁:「嘿嘿嘿...用手...定用口呢?」

Yuki塊面超紅咁:「緊係用巴口啦~唔係點叫佢起身丫~」

Zoe笑到直頭淫笑咁款:「嘿嘿嘿...好口技~好口技~」

Yuki又怕怕羞羞咁:「你諗左去邊丫~鹹濕婆~」

我聽住佢地兩個女仔,喺道你一句~我一句咁講淫野...

『我都係入去換返件制服先...』都係快D遠離呢個地方...

我入返間房仔,換返件制服,出返黎舖面幫手...

幫下手執下野...幫下手點下貨...幫下手增下值...

不過我就好心不在焉咁...

我不時都會望出去出面...

望下有無人經過...

望下有無一大班人經過...

望下嗰個女仔有無經過...

我真係好唔專心...勁唔專心...

『睇睇餘額...』好唔專心咁幫個阿嬸增值...

「五十?我明明俾左五百蚊你入!你幫我入得嗰五十?!」個阿嬸怒睥住我...

『呀呀呀!唔好意思...唔好意思...阿嬸...我立即幫你再增值返...』我立刻再幫個阿嬸增值...

「嬸你老母丫?我未嫁架!叫我小姐!都唔知係唔係有心呃錢架...以後都係唔好黎呢間七仔增值...」幫個阿嬸增值完之後,佢就口噏噏咁行出門口...

Zoe行到埋黎我身邊:「喂!你搞乜丫?增值都可以增錯既?唉...走走走!你都係去幫Yuki手執下貨!」

『哦哦...』我只好死死地氣行過去Yuki身邊...

我由個膠箱仔裏面,拎起D麵包,放到上架...

拎下拎下...放一放下...

Yuki突然拍一拍我隻手:「喂!呢D貨係過左期,我岩岩先拎落黎架咋!你又同我放返上去!你搞乜鬼丫?玩野丫?」

我望一望手上包麵包...睇清楚個日期:『呀呀呀!對唔住丫...對唔住丫...一時無留意到添...』

Yuki谷起塊面豬登:「一時無留意到...一時無留意到...你知唔知你呢一時無留意到有幾大鑊丫?俾D客買左既話,你分分鐘要賠錢兼坐監丫!你呢排做乜野丫?成日都心神不寧咁!又遲到!又成日做錯野!」

『我...我無丫...無野丫...』唔通我思春又講你聽咩?

Yuki推一推我:「你都係返入去房仔,好好反省啦!」

既然你都咁講...

『好啦...』我只好入去間房仔道...好好反省下啦...

正當我起一起身,轉一轉身之時...

「哈哈哈~~~」

我聽到有笑聲喺門外傳入黎...

「哈哈哈~痴線啦~~~」

仲唔止一個...

「哈哈哈~我先唔信你丫~~~」

而係一班人...

「哈哈哈~真係好假囉~~~」

一班人喺出面…

「哈哈哈...唔信就算...哈哈哈...」

有一班人喺舖頭出面嘻嘻哈哈...

我擰一擰轉頭,望一望...

「哈哈哈~好心你就正經D啦~成日亂咁噏~」

我望到出面有一大班人...

「哈哈哈~我唔成日亂咁噏丫~你又點會咁開心丫~」

我望到出面有一大班人圍住...

「哈哈哈~係丫係丫~多得你,我先會咁開心架咋~~~」

圍住個坐喺輪椅上既女仔...

喺個個輪椅少女丫!

終於都...終於都俾我...俾我再次...遇見佢喇!

我立即扮晒執貨咁,偷偷咁望出去...

我偷偷望住出面,坐輪椅既女仔...

「哈哈哈~你兩個真係好衰丫~」個坐喺輪椅上既女仔笑得好燦爛~

好燦爛...真係好燦爛...

就好似天真無邪既小妹妹咁...笑得好燦爛...

好燦爛既笑容...

而呢種燦爛既笑容...喺湖邊寫生時候既佢...係從來無出現過...

無錯喇!我而家終於知道,喺湖邊既佢缺少左D乜喇!

就係一個燦爛既笑容!

就係呢一個天真無邪既燦爛笑容呀!

我再偷偷地偷窺佢地...又偷偷地竊聽佢地講梗乜...

「Stella~你想飲D乜丫?」一個高高地既男仔問一問個輪椅少女。

Stella?

原來佢叫Stella~

Stella…Stella…

又令我諗起Gundam SEED Destiny裏面嗰個Stella...

Gundam SEED Destiny裏面嗰個Stella唔單止唔可以同到深愛既人一齊...

而且仲要俾基拉殺埋...

真係夠晒可歌可泣呢...

「唔...我想飲...可樂~~~」Stella指一指住張海報。

可樂?Stella鍾意飲可樂?

「可樂無益丫~飲其他啦~」個男仔擰擰頭...

「唔~我想飲可樂~我想飲可樂丫~」Stella捉住個男仔隻手,搖下搖下,嗲下嗲下。

佢地兩個...好似咁親密咁既?

唔通嗰個男仔...係Stelle既男朋友?

唔通佢地...係情侶關係?!

「唔得唔得~你嗲我都無用架喇~我唔係你男朋友,有免疫能力既~」個男仔堅決說不!

哦~原來唔係情侶關係~

嚇得我丫~

嚇得我?

點解我會話“嚇得我”架呢?

另外一個企喺Stella身邊既女仔,摸一摸Stella把秀髮:「Stella聽話啦~飲可樂真係對身體無益架~飲過第二樣好唔好~」

「唔...」Stella諗左一諗,「好啦~咁我就要支綠茶啦~」

個男仔拍一拍Stella個膊頭:「咁好啦~等我去幫你買啦~」

Stella帶住燦爛既笑容點點頭:「唔該晒~」

個男仔行入黎...

我就繼續留意住喺出面既Stella...

六、七個男男女女圍住Stella有講有笑咁~

好似真係好開心咁~

Stella都笑得好開心咁~

有一大班朋友圍住自己,嘻嘻哈哈咁過活,真係好開心呢~

我一直都留意住Stella既笑容~

一直都俾Stella既笑容吸引住...

吸引到我...眼都唔眨...眼定定咁...望到Stella實一實...

Stella真係好吸引...

天真無邪既笑容...天使般既面孔...散發出陣陣溫暖光芒既佢....真係好吸引...

正當我望到失晒魂...痴痴迷迷之時...

Stella突然望一望入黎!

我地四目相對左好一陣子...

大鑊!被發現了添!

我立刻擰一擰轉頭,扮晒執貨咁!

我一路執下執下...一路喺道諗...

死啦死啦...俾佢發現左我偷偷地咁偷窺佢添...

死啦死啦...呢次死啦...

都唔知人地會點諗添架...

會唔會覺得我好變態?

會唔會因為俾個變態佬偷窺而感到唔舒服?感到難堪?感到委屈呢?

死啦死啦...

佢會唔會驚到以後都唔黎架喇?

我會唔會以後都再見唔到佢架喇?!

我越諗就越驚...

越驚就越焦急...

我真係唔想自此就再見唔到佢...

我真係唔想佢從此就由我既生命裏面消失丫!

我一路諗...一路驚...驚住黎咁將D貨係咁放上架上...放上架上...

我係咁放...係咁放...放過不停...

就喺呢個時候,Yuki大嗌起上黎:「喂喂喂喂喂呀!尹曉揚!你放錯晒喇!!!D薯片唔係放喺呢一層架!係上面嗰層架!哎呀!你做乜將D蜜蜂糖同朱古力餅放埋一齊呀?!真係丫...𥄫女𥄫到失晒暈!」

我一聽到Yuki咁講,立即撳住佢個嘴:『唔好咁大聲呀!』

Yuki擺一擺動身體:「唔唔唔!嗄...怕咩姐?人地都走左啦~」

走左?

我再望一望返出去...乜人都無晒...

果然...原來已經走左喇...

呢一次既離開...會唔會係最後一次呢?

會唔會以後都...以後都唔可以再見到佢呢?

「又唔駛咁失落既~」Zoe由個Counter裏面行到埋我身邊,「總有機會會再見架嘛~」

『我!我...我邊係失落呢?』下次下次...下次真係可以?

我都唔敢肯定會唔會有下次...

有時遇唔遇到,都好講緣份...

亦都好多時都係...有緣無份...

「仲話唔係失落?哎丫~有人思春丫~」Yuki陰陰嘴咁笑...

『我!我...邊係思春丫...』我邊有你講得咁衰丫?

Zoe又接住講:「仲話無~仲話無~嘴角都含晒春咁啦~」

『痴線架!男人老狗含咩春丫?』真係好鬼核突架!

「係囉係囉...」Yuki走到去Zoe耳邊,細細聲講...

「哈哈哈...」Zoe大大聲笑後,又喺Yuki耳邊細細聲講,「咁咁咁咁...」

「哈哈哈~~~」Yuki聽完Zoe細細聲講後,又大大聲笑...

我望住佢地兩個,係咁細細聲講,又大大聲笑咁...

有乜咁好講...又有乜咁好笑喎...

成個中午,Yuki同Zoe都古古惑惑咁望住我...

久唔久又偷偷咁笑一笑…

笑到衰衰咁...

久唔久又咬下耳仔...

吱吱聲...吱吱聲...又大大聲“哈哈”咁笑...

細細聲講...大大聲笑...

細細聲講...大大聲笑...

哎呀!!!呢兩個八婆仔真係好鬼死煩呀!!!

人仔細細既佢地,點解可以咁煩架?

女人係唔係天生就咁八掛架姐?

係唔係咁鍾意講人地既野架姐?

偷偷地喺你背後講都算喇~

又要喺你面前講!又要扮晒唔想俾你知但又要你知係講梗你咁!

就唔可以大方D一齊講既?

哎呀!!!真係好煩丫!!!

我都係唔好理佢地兩個八婆仔咁多,繼續做野!

我繼續執下貨~又點下貨咁~

不過好多時,我都會偷偷地望一望出面...

我會偷偷地望下...佢地又會唔會再經過我地門口...

佢地會唔會再黎幫襯...

會唔會...可以俾我...再見下Stella...

Stella…呢個名真係好好聽...

我一邊偷望...一邊執貨點貨...一邊諗下諗...

諗下Stella既燦爛笑容...

諗下由Stella身上發出既光芒...

諗下諗下...執下執下...望下望下...

一路諗又一路執又一路偷望咁唔專心就緊係會做錯野啦~

仲要係咁不停做錯添...

「尹曉揚呀!你做乜將D啤酒放左入去汽水嗰邊呀?!」俾Yuki話...

「尹曉揚呀!你做乜將D麵包放入雪櫃裏面呀?!」俾Zoe話...

「尹曉揚呀!你做乜將D雪糕放入暖櫃道呀?!」又俾Yuki話...

「尹曉揚呀!你做乜將D 100毛放喺汽水機道呀?!」又俾Zoe話...

「尹曉揚呀!你都係返入房面壁思過唔好出黎搞住晒啦!!!」又不停咁俾Yuki同Zoe係咁話...

唉...唔專心真係好難工作呢...

『哦...』我只好聽聽話話,走返入房靜思一下...

我入一入房...坐一坐喺張摺凳上...

托住個頭...望住塊鏡仔...諗下諗...

諗下笑得好燦爛既Stella...

只會喺舖頭門外先見到燦爛笑容既Stella...

係咯…點解呢?

點解就只有喺舖頭出面,先見得到Stella笑架呢?

嗰幾日喺湖邊,我都係無見過Stella笑得咁燦爛...

應該話,就連絲絲笑意都無掛過喺面上...

只有好專心咁望住個湖...望住本畫簿...畫下畫下...畫下畫下...

係咯~或者人地專心梗~專注梗呢~

唔似得我成日都分晒心咁呢~

人地係一個好女仔黎架嘛~

認真做一件事,就會好專心咁做落去~

唔會諗其他野~

又唔會俾身邊既事物影響到~

所以先會笑都唔笑下...一面認真樣~

嗯!應該係咁~一定係咁!

我就一個人喺間房仔裏面,不斷咁諗住Stella~回想起Stella~

一直諗左好幾個鐘~

一直諗到去夜晚~

「咁我走先喇~拜拜~」Zoe向我同Yuki揮揮手~

「拜拜~」我同Yuki都向Zoe揮揮手~

我望住趴喺個Counter上,㧌住個頭既Yuki...

『又等你男朋友黎接你丫?』我打量一下Yuki。

「嗯~佢今晚有D野做~要遲D先黎到~」Yuki甜絲絲咁笑一笑~

咩叫嘴角含春?

Yuki呢個甜樣就真係嘴角含春喇~

『你男朋友都幾好架喎~晚晚都黎接你放工~』我望住Yuki個含春樣,笑一笑佢~

「嘻嘻~佢真係對我好好架~佢好錫我~又好寵我既~」Yuki越笑越甜~

『不過照我睇,你男朋友都應該養得起你啦~你可以專心讀大學,唔駛做Part Time咁辛苦~』我又打量下Yuki,諗一諗。

Yuki既男朋友架車雖然話係日本車,但而家呢個年代要養車真係一D都唔易~

養得起架車,即係話經濟都唔差~

應該都足以養得起Yuki有餘啦~

「我先唔要佢養丫~」Yuki甜絲絲咁笑一笑,擰擰頭。

『點解呢?』而家D女仔,唔係都鍾意俾人養多架咩?

尤其係Yuki呢種年紀~

尤其好似Yuki呢種咁靚既女仔~

俾人養~唔駛做~幾咁好~

「自己有手有腳,緊係想可以盡自己既努力賺錢養自己架啦~」Yuki理直氣壯咁點點頭~

『哦...』雖然唔明,但好似好有道理咁...

「到第時結左婚,我都會出黎做野賺錢~」Yuki面紅紅咁笑笑口,點點頭。

『結婚?!你咁細個就諗結婚架喇?』Yuki都係岩岩十八無耐架咋喎...

不過都係既~D小妹妹係特別鍾意講結婚~講嫁人~

總係唔會諗清楚~總係會一時衝動~

「有D野好難講既~嗱!你又唔好睇我係一時衝動丫!我好識諗架喇~我而家呢個男朋友係好好男人黎架~嫁得過架~唔早D綁住佢,就真係走寶喇~」Yuki咬一咬唇。

『哦...』係唔係真架?

係唔係真係會俾你咁易遇到個好男人丫?

又係唔係真係有你講得咁好丫?

定係你一廂情願既想法咋?

抑或係你俾人呃左都唔知咋?

你知架啦,呢個世界有好多騙案架嘛~

真係俾人呃左都唔知咩事架…

特別係好似Yuki呢種情竇初開既小妹妹...

「唔好講我喇~講下你啦~點姐?係唔係鍾意人姐?」Yuki又古古惑惑咁打量下我...

『下?』突然咁樣俾Yuki問一問,我都唔知佢問乜添...

「係唔係鍾意左嗰個坐輪椅既女仔丫~」Yuki繼續Keep住古古惑惑咁望住我...

『唔好亂咁講啦...』俾Yuki咁樣講一講...我又有少少怕怕地羞...

「係既話咪認左佢囉~男人老狗咁大個人仲咁怕羞~追唔到女仔架~」Yuki恥笑我咁擰一擰頭…

『十畫都未有一點...』都唔知仲有無機會見...

「如果你真係對人有意思既,就放膽D去識下人~」Yuki認認真真咁點一點頭。

『咁唐突...』會唔會嚇親人架...

「唐咩突姐?咩年代呀?」Yuki冷眼望一望我...

『都係姐...』一陣人地以為我係死變態咁就大鑊...

「都咩係姐?你唔係想人地女仔主動識你丫化?」Yuki繼續Keep住冷眼望住我...

『呃...』你頭先先話咩年代...而家又話唔係想人地女仔主動識我...

你講晒啦...

「呃乜鬼野姐?總之有機會既話,就主動D去識下人啦~我男朋友到左喇~係咁先~拜~」Yuki揮揮手,跳下彈下咁跑去架灰色Honda道...

『哦...拜拜...』

望住Yuki上左車,灰色Honda都駛離...

真係要…主動D...去識下人?