一個人,追一個女神: 第四章 苦惱
幾日之後,悲鳴繼續頹,但係今次既原因唔同左。佢上次用五秒衝入廁所既事幾乎全校都學知,仲比人喺facebook既secrets到封為「香港保特」,有人求悲鳴既facebook名,亦有人求片。悲鳴不禁感謝"學校內不能使用手提電話"呢一條校規,如果唔係呢條校規既話,佢應該上左高登,被人起埋底。
悲鳴頹得嚟又帶點怒火,佢曾經諗過帶水喉通返去扑濕言已,但係佢唔會因為小小事而打人,更唔會因為打人而被警察拉。悲鳴覺得,要打,就喺無咩人既地方打。一黎唔會比老師見到,二黎唔想比人見到佢唔夠大大力既言已打,所以攞武器,第三仲要因為自己衰貪心食人地條雪條在先。所以佢立即打消呢個想法,由得自己頹下,順其自然。
但係又點會咁簡單吖,secrets既人唔知咩事姐,實有同班既人睇到既!包括霜心!同女神班既人,嗰班賤人!女神嗰班既人同悲鳴都幾熟,亦都知道悲鳴做左佢隻兵幾年。喺奇妙既巧合又或者唔係奇妙既巧合之下,悲鳴既女神知道左佢「香港保特」既稱號,亦都知道佢點解跑得咁快。曾經有套戲話過,女性對屎尿屁呢D事特別反感,女神知道悲鳴跑出世界紀錄當然驚訝,但係因為急屎而跑。唔好話女神,係女既,都會覺得好污穢,好核突。
有一日悲鳴喺走廊遇到女神,平時佢地都會打聲招呼。但係今次,女神知道悲鳴既醜聞,悲鳴知道女神已經知道。兩個人都唔出聲,大家都避免眼神接觸。係經過既嗰一秒,悲鳴已經感受到女神同佢既距離已經分開左好遠,大既有地球既半徑咁遠。係遠處睇到此時此刻既言已同公子,「你睇下佢。哈哈,今次我贏緊啦!」言已笑住咁講,「又唔好咁講,其實佢都好慘既。最衰都係你條雪條!」公子邊嘆氣邊講,「咩呀,佢自已話要食架!」言已無奈咁講。其實佢地,都好想幫下悲鳴,但係男人老狗仲要咁熟,點出聲都似個女人啦。
悲鳴返到課室之後,伏係枱面已經係指定動作,有幾個女仔唔知有意定無意咁喺佢身邊講佢做飛人既事。悲鳴用佢最大既忍耐力將已經上左頭頂既怒火禁返落去,好成功咁避免左一單校園暴力事件,香港又少左個罪犯。悲鳴聽到言已同公子返左課室,估佢地會行過嚟串自己,所以佢手握枱腳,準備喺佢地講野之前用一招先發制人收佢聲。點知佢兩個無串悲鳴,行開左。仲有人放左個包喺悲鳴張枱上面。唔知佢兩個行開左既悲鳴心諗「個包,一定有問題!你兩個木嘴想睇我做多次飛人?睇我點收你地皮!」悲鳴單手攞起張枱,準備一下扑落去既時侯。佢發現喺佢面前既係,佢最愛既......女神大人!
「你成日都唔食野,食個包先啦!」女神親切咁講,悲鳴仲未相信眼前既一切,佢呆左一秒之後,先睇到自己仲攞住張枱。「多...多謝你!」悲鳴改唔到對住女神就有漏口既習慣。女神離開悲鳴既課室之後,悲鳴先將張枱放低。言已同公子即刻衝過黎攞起悲鳴個包,「嘩,雞排包喎,你的最愛喎!」兩個人異口同聲咁講。悲鳴心裡面視包為無物,因為佢一次急屎,一次攞枱兇女神,佢既心入面,無半點溫暖,只有苦惱!