用一場穿越籃網的夢想，擁抱妳: 10

這個鐘聲，讓我想起了三年前的中三暑假。
 
「鈴──」
 
聽到鐘聲，大伙兒都往樓梯方向散去。突然有人一手搭在我完全被汗浸濕的肩膀上。我轉過頭去，是大舊。他正微笑著，舉起捏成拳頭的手。
 
「又嬴，輕鬆到震。」我也跟著舉起拳頭。擊拳的一剎，一種叫作默契的物質從指骨之間相互穿插，於是嘴角便自然地上揚，會心微笑。
 
我踏上樓梯間，某人正在後方竊竊私語著。「輕鬆？一陣個統測肥佬就唔荒唔輕鬆啦。升唔到中四就大檸樂。」我回頭一望，是大汗淋漓的肥杰。
 




「傻仔，比人大炒個個就升唔到中四。」我哈哈大笑著。「返去練下你啲籃板啦，你搶得嬴我就升到中四架啦，傻閪，哈哈。」
 
突然之間，整條樓梯間的人都停了下來，不發一語。我望向上方，體育老師銘sir正瞧著我看。
 
「黃佑聰，一陣午讀時段落黎特別室搵我。」
 
他說完之後，便冷冷地從我身旁走過。身邊都人都噤聲不語，躡手躡腳地繼續行走。我的聽覺突然變得靈敏，雖然沒有聽出竊笑的聲音，我卻自覺被當旁掌摑，臉頰發燙。
 
走進特別室，銘sir正站在投影機螢幕前，藍色的螢幕光覆蓋著他。
 




「過黎坐呀。」他語氣不見怒意，而我卻早已手心滲汗，四肢忽然僵硬得不聽使喚。
 
他見我無動於衷，便露出一臉和藹的微笑，臉上泛起的皺紋和頭上灰白的髮絲，讓我想起一個風塵僕僕地下班回家，抱著女兒被她胡亂親吻著的好爸爸。「唔洗驚喎，我唔係叫你過黎比我鬧既。」
 
「……你……你唔係想話我講粗口咩？」
 
「粗口呢家野，我幼稚園都識講啦。」
 
於是，我竭力走前兩步，才驟覺小腿重得有如被綁上千斤石頭。
 




「佑聰，你係個叻仔，你呀sir我係唔會睇錯人。不過，你有心魔。同一般中學生一樣既心魔。」他煞有介事地說。
 
我不明所以，只覺得可笑。心裡想著：「銘sir，近排撞邪？」
 
「籃球唔係咁打架。」他用手指指著自己胸口，「你已經就黎升中四，但你呢度入面，乜都冇。好快有一日，你打打下波，就會突然問自己，究竟我做緊乜野。」
 
叫我入黎就係同我講道理？憨鳩，我每朝出既汗，仲多過呢到任何一個人晏就食既飯呀。
 
「銘SIR，你呢番說話真係令我獲益良多。」我低頭看著拋光過的綠白色地板，地板反射著螢幕映出的光。「我打波既時候，個腦空白一片，咩都唔諗，剩係集中係每一球上面。其它野都唔諗。我覺得打波應該係咁。」
 
他笑笑，拉出收在桌下的椅子示意我坐下。「你真係咩都唔諗咩？你而家靜靜地諗下，你輕鬆嬴左對方，同你比人炒蛋，你呢度諗緊啲咩野？」他又指著胸口位置。「唔係個腦，係呢度。個腦會呃人，甚至會呃埋你自己，但呢度唔會。」
 
房間裡陷入短暫的寂靜狀態，時鐘的秒針在滴滴嗒嗒地轉動。不，那不是時鐘。那是來自我內心悸動的聲音。但我什麼都想不起來。什麼都想不起。
 
他十指扣起放在桌上，身子微微彎前，我忽然有種被警察盤問的恐懼，像心裡面緊緊蓋著一切秘密的那塊布，此刻正被一雙怪手毫無保留地掀開。




 
「佑聰，你打籃球為左啲咩？純粹為左開心同快樂？如果你可以靜靜地一個人，夜晚對住塊鏡，洗個面，再慢慢諗，就知呢個唔係真正答案。你好怕輸，好怕失敗，我知道只要你持續地、不停地輸，你就唔會再鐘意打籃球。呢個就係問題。將籃球當成一種將自己凌駕於其他人既工具，就好似一粒雪花，係雪山越滾越大，停唔到，直到比另一個比你大好多既雪球一下打散。」
 
他稍稍定神，便繼續說下去：「籃球對你黎講，唔係一項運動，係你成個人既意志。我睇得出，亦知道你既故事。我想話你知，勝利帶黎既快感、認同感，就好似競技比賽入面既毒品，好易就會令你上癮。但由你上癮個一刻起，你既快樂，都只係取決於外在既事物，例如你身邊既人。」
 
「記住，打籃球，係一個探索自己既過程。」
 
我想起了自己的囂張跋扈，想起了自己的狂莽自大，想起了自己勝利後那不可一世的氣焰，和落敗後像喪家犬般垂頭的愁容。我輕輕搖頭，希望把這些正侵蝕著思緒的念頭甩開──
 
「千其唔好唔記得最初打波開開心心既自己呀，佑聰。」
 
「你講野好似幾矛盾喎銘sir ──咁究竟，打波應該係為開心，定係為左探索自己？」我問。
 
他輕笑兩聲，「都話你係個聰明仔。或者你咁理解，你一路打落去，就會發現身邊有好多野都會嘗試令你迷失自己，令你唔記得左當初點解想打籃球。包括勝利帶黎既自大、失敗帶黎既恐懼，甚至係學業壓力，屋企人比你既壓力，諸如此類。」
 




「你意思係，無論發生咩事，我要時刻都保持住當初為左開心而打既諗法？」
 
「正確。但千祈唔好欺騙你自己喎。正如我岩岩所講咁，你個腦會呃你，但你個心唔會。你想像下自己既內心係一杯清水，而你一路打落去既過程入面，外界會不停咁嘗試將你杯清水整到黑蚊蚊。你要意識到，然後抵抗佢地，而唔係呃自己個杯已經黑過墨汁既水仲係清水。」
 
「但係你叫我過黎，唔係就係因為我入面杯水已經黑哂喇咩。」
 
「唔係，我睇到既係一杯清到不得了既水。」他語氣十分堅定。「只不過，你而家係完全冇意識到，外面好多野開始嘗試整污糟佢。」
 
我看著投影機投射出的一片藍光發呆。
 
「今日呢番說話，你而家未必好明白。但你相信我，係不久既將來一定會對你好有用。你就照袋住先啦。」
 
不知不覺間，我對被銘sir召來的恐懼消散得無影無蹤之餘，心裡還添上好幾分內疚。
 
「多謝銘sir，我諗我返去真係會好好反省。」




 
他對我豎起大拇指。
 
「銘sir後生啲個陣，都係個好自大既人。年少輕狂，邊個未試過呀。不過，我真係唔想你行返我舊時條路。如果一早知道自大會令我後悔成咁，我寧願一世都做縮頭烏龜……」
 
聽到他突然如此偏激，我有點嚇倒。
 
「後悔啲咩咁誇張？」
 
他低下頭，眉頭用力皺起，眼尾的皺紋於是顯得好深好深。
 
「如果我有得揀，我唔會行呢條路。但我冇。由個一刻開始，所有野都唔到我決定──
 
「──等我話你知，我個女點死。」