用一場穿越籃網的夢想，擁抱妳: 49

嘟嘟，嘟嘟。嘟嘟，嘟嘟。
 
「喂？」電話另一端，一把熟悉的聲線。
 
「喂？係咪阿輝？」
 
「係呀，做咩事？」他語氣不太耐煩。
 
「冇，睇下近排你過成點咋嘛。」
 




「你冇Check e-class咩？開學第二日就有Unitform Test喇，仲可以有咩做呀。」
 
「係咩？我真係好耐冇睇e-class啲野，哈哈。」
 
「斷估你打黎唔會係剩係搵我講無聊野掛。」他很快就築起了防護罩。「唉，如果你又係打黎勸我打返校隊既，你勸啦。我知我阻止唔到你架喇，一向都係咁。不過你都未必說服到我──」
 
「唔係，我唔係黎勸你打返校隊。」
 
「咁係勸我啲咩呢？」
 




我深深地吸了一口，差點把肺撐爆的氣。
 
「勸你同我輸賭一次。」
 
「無啦啦賭乜野，我唔賭錢架喎。」
 
「賭你最拿手既野。」我神秘兮兮地說。「如果，九月二──第二日呀嘛你話？係囉。九月二個Uniform Test，要考幾多科？──五科，好。我地鬥高分，逐科計。」
 
「吓？──」他難以置信地輕笑了兩聲。「係咪呀。」
 




「係。你上次話咩──你最後一年要專心考入Poly呀嘛，我記得。喂，如果你高分過我既科，數量多過我高分過你既科，我以後都唔會再提起籃球隊既野，以前既所有野都當係美好回憶。如果我嬴左，你就爭我一份人情。」
 
他遲疑了數秒。「嘩，人情人情如做戲喎，可以包含十幾萬樣野，你想做咩先？」
 
「你唔係淆會輸掛。你會考成廿七分升上黎，我先十六分岩岩升到原校咋喎。」我努力煽動他小覤自己。
 
「就算點都好啦，你話我輸左要打返校隊都好，其實我就唔覺得我會輸既。」
 
我嘴角上揚。「咁就咁話架啦喎，咪反口呀你條粉腸。」
 
「反口個個就正粉腸。」他也自信十足。