用一場穿越籃網的夢想，擁抱妳: 57

放學後，只剩兩個人的班房。
 
夕陽柔黃的光穿過玻璃窗，打在稍微歪斜不齊的桌椅上，黑板上的塗鴉沒人願意擦去。
 
「Jimmy，你會唔會考慮下入籃球隊？」我問。
 
「唔記得左幾耐之前你咪問過我一次囉，我唔打喇。」他堅拒。
 
我不肯放棄，「你真係唔打算最後一年搏一搏？而家真係差你一個咋喎。」
 




「唔好勸我啦……」
 
「你唔試過點知姐？」
 
「剩係諗下都驚啦，點打姐……」
 
「冇人叫你諗呀，你直接打可能就會冇事呢？」
 
「連諗都驚，落到場點──」
 




「屌！」我一手把粉擦扔落地上，爆出一大撮粉塵。「你淆咩姐其實？你知唔知，最有資格淆個個係我呀！係我比你守到次次一分都拎唔到呀！我最淆係咩呀？最淆係最後一年都勸唔到你入黎打波呀──」
 
我激動如此，他卻別過臉去，沒有回話。
 
我一掌拍落教師桌上，「頂──我真係唔明。最多用你三個月時間打個波姐，你又一向唔洗點溫書都唔愁成蹟既，我真係諗唔明你。」
 
「我有一個呀哥。」他突然開口。
 
我望向他，他卻看著空氣中的虛無。
 




「由細到大，無論呀爸呀媽又好，親戚又好，都好鐘意拎我地兩個比較。──」
 
我立即冷靜下來，仔細地聽著。這大概是我見過Jimmy最多話的時刻。
 
「只要我成蹟差少少，佢地就會即刻拎呀哥黎講，話咩『點解你呀哥咁叻你就咁蠢』、『學下你呀哥啦』、『養舊叉燒都冇咁嬲』……」
 
我想，他的哥哥若然不是哈佛學生，就是進了劍橋。
 
Jimmy的名字，和文豪一樣，幾乎每年年末都掛在頭二十名的總成績排行榜上啊。
 
「所以細細個你就好驚同人比較？」我問。
 
他點了一下頭。幅度很小，但我還是能看見。
 
「把口生係佢地到，佢地想點講咪點講囉，理得佢姐。」




 
「最弊係，慢慢連我自己都會係咁同其他人比……」他的頭低低的，夕陽把他的半張臉打成陰影。「一直以黎，我都好驚輸，我驚連我自己都覺得自己比唔上人地──」
 
「傻既，點會呀。係學校你打到識飛架喎。」
 
「係學校打下玩下，我可以好有自信。但如果出到出面，面對啲勁十倍、勁廿倍、勁三十倍──」
 
「哦！──」我刻意拉長語氣。「把砲喇而家啲人。」
 
他抬起頭，一臉迷惘。
 
「你而家，即係笑鳩我地學校校隊廢啦？」我刻意用力戚起雙眉。
 
「吓？」
 




「你而家，即係笑鳩我地學校校隊隊長廢啦？」我表情十分誇張。
 
他噗哧一聲笑了，我也笑了。
 
「我敢寫包單，如果你守到而家既我，你出到出面就無敵架喇。」
 
他笑得很開懷，「把砲啦而家啲人。」
 
「岩岩個個月，我跟左個以前台灣國家隊既人練波。」我回想著那塊大石頭被我擋開的情境。「我今時唔同往日喇。如果你而家都仲守到我既話，你就冇野需要擔心啦。」
 
「認真打？」
 
「認真打既話，我怕我嚇親你喎。」
 
「唔認真唔打。」他自信滿滿地笑著。




 
「好，認真打就認真打。但係你會唔會連我都淆埋先。」
 
「痴線。」他輕蔑地笑了一聲。
 
對，盡情輕視我吧。這才是我心目中最強的防守大鎖才配擁有的自信心啊。
 
「而家落去？」他問。
 
「Why not?」我也答得很爽快。
 
於是，我們便下了樓梯，往籃球場走去。
 
我其實很是掙扎。
 




一方面，我真的覺得自己進步很大，我怕以Jimmy以前的防守強度來看，就算我沒有很輕鬆地打敗他，總而言之，他最後也真的會被我打敗。
 
而另一方面，我的確很想試試以自己現在的實力，能否在Jimmy面前得心應手地得分。
 
這兩把聲音在體內交戰著，直至我站在三分線外，籃球從他的手上彈落地板，再回彈到我的手中。
 
他的眼神，充滿了把鬥志燃燒到極限的戰意。
 
那一刻，我明白了什麼。
 
籃球場上，不談謙讓。
 
無論如何，拿出自己最真的實力，才對得起籃球，才對得起對手。
 
才對得起，自己流過的每一滴汗。
 
那麼，開始吧。
 
「黎架啦喎。」我自信地說。