用一場穿越籃網的夢想，擁抱妳: 65

教練和我們簡單地Debriefing，檢討比賽的缺失和得著後，Judy便從觀眾席上走了下來。
 
「勁野喎，我批准你做我一日既男神。」
 
「謝主隆恩呀真係。喂，我而家可唔可以打比Gaby？」
 
「唔得住呀。」
 
「點解？」
 




「佢岩岩琴日決定要試美國一隻新藥，呢幾日就會送到香港，我諗都係盡量唔好刺激佢好啲。」
 
「隻藥好work架？」
 
「唔知，好似話從來冇試過係人體身上試。不過係白老鼠身上，有幾多呢──好似係三成，有三成既白老鼠身上既癌細胞完全消失──」
 
只有……三成？！
 
三成──三成的機會率，究竟有多大呢？
 




這刻的我的腦袋完全一片昏亂。一想到失敗的可能性，我便喘不過氣──
 
「一陣再搵你，我過去搵搵佢地先。多謝你今日過黎捧場呀。」
 
「講呢啲，電聯啦。」
 
我向著他們那邊走去，然後和他們湊在一起，圍著躺在地上的輝。
 
他低頭坐在地上，眼神空洞地看著自己的右腳腳腕上的冰袋。
 




「唔好唔開心啦。」我心知這句是世界上最無用的說話之一，卻還是說了出口。
 
「頂！──」輝一腳撐出，踢在計分桌的桌腳上，發出輕微的「嘭」的一聲。
 
「話咁快好返啦。屌講真，打波邊個未咬過柴姐。」炮筒也湊過來說。
 
「兩個星期後就打冠軍賽喇，而家先黎搞啲咁既野──頂，如果岩岩個野唔係比對面條友撞一撞，搞到我要單腳落地──」
 
教練和對方教練寒喧幾句之後，走了過來，蹲下，伸手摸摸輝用背包拓高的腳腕，輝輕聲呻吟，表情十分難受。
 
教練望向他的臉，搖了搖頭。
 
「文豪，你要準備好。輝好大機會下場波打唔到架喇。」
 
文豪有點驚訝，「場波兩個星期後先打，話唔定到時打到呢……」




 
「教練，有兩個星期抖，我OKAY架。」輝也連忙逞強。
 
「如果你出場，令成隊波冇左個盃，個責任係要全隊波陪你一齊負。」他雙手叉著腰說。「睇下下星期練波，你康復情況如何再打算啦。」
 
他說完便轉身離去，大家都沒再說些什麼，只有拍拍他的肩，或是輕輕搥落他的胸口，然後向更衣室的方向走去。男人之間的友誼，大抵如此。
 
我留下來，看著輝無奈的眼神，忽然靈機一觸。
 
我立即跑向自己的背包，從每一個小袋子中翻找。
 
一支只有拇指長度的乳白色液體。
 
我拿到輝的跟前，在他的眼前晃晃瓶身。
 




「拿，我唔包保對咬柴有用架，不過試下唔洗死。」
 
「咩黎架？傑撻撻又乳白色，唔通係──」
 
「係呀，琴日新鮮整出黎架。」
 
說時遲那時快，我已經在他劇烈隆起的右腳腕上塗抹一大灘的液體。
 
「嘩頂！咁涼既！」他嚇得整個人彈了一下。
 
「唔係見血個啲傷應該唔會即時有用，不過你第二朝訓醒睇下點啦。」我說。「放心啦，我地連喇沙呢關都過到，有咩野難到我地。」
 
「Sor，我完全冇擔心過下場輸定嬴喎。」他揚起嘴角說道。「我只係介意，完場慶祝個下我要係觀眾席拮下拮下咁行出黎，連跳下都唔得，好唔爽架嘛。」
 
聽他這樣說，我也笑了起來。




 
「係，我明。」我說。
 
「喂，」他側頭望向我，「你癲架喎，今場有冇入左十球三分？」
 
「痴線，肯定冇啦。」我嘻嘻地笑了起來，回想起半小時前每個誇張的運動視覺畫面。「不過至少都有六七球掛。」
 
「雖然話我冇諗過會輸，但我真係比佢地一開頭打個個run嚇窒左。如果唔係你入成三十幾分，今場波都唔知會點。」
 
「我入幾多分關鬼事咩，我地到最尾一定會嬴。」我語氣十分堅定。
 
我看向顯示板，上面寫著「主隊54：66客隊」。
 
「我真係估唔到，成隊波竟然可以好似以前咁夾得咁好。」他說。「雖然少左蕉仔條粉腸，而且要練足成個月又辛苦到癲，不過好彩當初你搵返我地咋。」
 




室內的氣溫彷如瞬間降了十度，我起了滿身雞皮疙瘩。「你係咪同文豪hehe得太多，搞到講野咁骨痺？」
 
「頂咩，下場都最後一場啦，呢啲說話唔趁而家有mood個陣講，以後都冇機會講架喇。」
 
我笑笑，朝他舉起拳頭。
 
他也笑著，然後兩拳在空中擊撞。
 
「如果你當初想打，好心就唔好同我賭埋哂啲濕鳩成績啦。好彩我天生就係讀書奇材，如果唔係，我輸左搞到隊波冇左個正選Key Man，真係唔知點算。」
 
他雙手後撐，坐直身，把幾乎融光的冰袋拿下。
 
「我唔似你咁硬頸，係都要夾返隊波呀聰仔。我好迷信，我信有命運呢樣野。」他默默地說，「上年咁樣輸法，我覺得有啲野唔係我地既，就點都唔會輪到我地。」
 
我頓住，想起那個曾經十分倔強的自己。
 
我也差點變得和你一樣啊，輝。
 
我回想起在機場的那間房，即使在罹難名單上看到父親的名字，還是不相信他已經死去的事實。
 
直至看到他坐在11 號A的座位上，和那個「1」和「0」的「不祥號碼」之間的關係連結起來，我竟然馬上灰下心來。
 
我很記得自己由那一刻起，竟然確信自己因為要硬要和Gaby走在一起，就會不停地為身邊的人帶來厄運。
 
慶幸的是，現在坐在球場上的我，又再次找回那份倔強的初心。
 
「嘩你條友呀。咁你仲走黎同我賭成績，即係擺明想輕鬆嬴左我之後借天意過橋，說服自己唔打返波姐。」
 
「咁又唔算係喎。」他打了個俏皮的眼色。
 
「唔算係？」
 
「我物理有冇可能得三十幾分呀。」他洋洋得意地說。
 
說起來，我的確沒有懷疑過這點。
 
「你專登考到咁差？」我問。
 
「痴線，見到題題都識要我扮唔識，我點都做唔出。」他回答。「不過我真係題題都唔識咁濟。因為我專登冇溫到物理，諗住天才波，心諗佢點都會出返之前出過既野掛。點知成份卷差唔多全部都係最新岩岩教完個啲，咁我就瀨哂野喇。」
 
我笑了笑，然後說： 「咁其實，根本就係你自己想打返，但又過唔到天意個關姐。」
 
他點點頭。
 
「到最後，都係你自己既意願嬴左天意。」
 
「係呀。有時啲野，唔係話下下坐係到聽天由命，個天就會跌條路比你行。就算佢真係跌，你行都唔願行，咁又有咩用呢。──」
 
我點點頭，十分同意。
 
「──我信架。個冠軍係我地既，就係我地既，冇走雞。」
 
「咁你覺得呢個冠軍，係你既意願，定係天意？」我問。
 
「我覺得呀──」他頓了一頓，「我覺得係個天跌左個金盃落黎，放左係我地眼前，然後我地十個人一齊捧起佢，應該係咁。」
 
我又點點頭，「係，一定係咁。」
 
一個曾經不信命運的人，一個曾經相信命運的人。
 
也許，能讓我們十個人重新走在一起，也是冥冥中的命運安排──
 
第二天，我收到輝的電話，雀躍地說他已經能跑能跳了，一直問我這種藥膏能在哪兒買到。
 
我一直跟他說，這是自己「弄」出來的「乳白色」液體，沒有認真回答。
 
那天晚上，我們便收到了男拔萃書院在四強賽重挫蔡功譜中學的消息。
 
意料中事。
 
於是，我們十個人在餘下的兩個星期之內，針對男拔萃的各種跑位和戰術，密鑼緊鼓地進行部署。
 
事情一直還是好好的。
 
直至距離比賽餘下最後三天，炮筒竟然離奇地失蹤了。