過咗月尾,錢終於返嚟了。我幾驚老母唔比錢我,到時要出去返下part time至得。

同一時間,我哋社辯準備工作已經進行得如火如荼,每一日放咗學之後,大家就去m記揼好份稿。

「唔錯,可以改下啲字就最好。康洛文,rebuttal搞成點?」

郭玲玉呢條友真係好痴線,如果你同佢玩辯論,我勸你都係搵第二樣嘢同佢玩,你唔會夠佢做。

佢展現出平時唔會見到嘅領導能力,我同王知秋佢哋佩服到五體投地。



「er... 應該ok架啦,不過你睇下就穩陣啲。」

「好呀,比我望過。又幾ok喎,估唔到你寫稿都有一手。」

「係真唔係呀?你都讚我?咁我咪好犀利?」

「你連校際比賽都玩到添,不過唔係你勁,係我哋學校冇乜勁人。」

「乜你咁樣打擊我自信心架。」



「算啦,你本身都冇乜嫁啦!」連王知秋都加把口嚟笑我。

就係咁,本身應該好嚴肅認真嘅準備工作,每一次都會好歡樂咁結束。

我都幾羨慕 Serena,因為佢就係住友愛,可以係學校行返屋企,而每次都係得返我自己一個搭車返元朗。

「喂,康洛文。」

「做咩呀 Serena。」



「跟埋你一齊搭車?屌,咁驚做乜,我有嘢做要入元朗呀。」

「冇乜嘢,嚇一嚇姐,咪一齊囉。我坐輕鐵個喎,你唔介意?」

「是但啦。」

就係咁,佢坐咗係我隔離。

「你係邊個站落車架?」

「我去咗康樂路先,喺嗰度買啲嘢食,因為我阿媽少煮飯。」

「哦。康樂路,幾啱你呀。」

「屌。」



「咁你呢?」

講完,Serena 捱咗落我個膊頭度,瞓著咗。睇嚟佢呢幾日真係好忙,好攰。

「唔好瞓呀。」

一搭,就搭到去總站。去到呢度,我先夠膽吵醒佢。

「喂,起身啦。」

佢終於肯醒。

「我係咪瞓咗好耐。」



「係。到埋總站。」

「總站?sorry呀,阻到你。你唔係要去康樂路咩?」

「求其啦,呢度都買到嘢嘅姐。」

「點都好,sorry呀,我走先。」

佢攞埋佢個書包,衝咗出去,跟住我就唔知佢去咗邊。

返到屋企,我whatsapp Serena。

「點呀 你係咪呢幾日忙社辯攰得滯?洗唔洗我幫你搞掂啲稿?你瞓返一晚先啦。」

佢隔咗一陣覆返我。「我ok呀 不過你係咪想幫手 我可以比好多嘢你做」



「好呀 你比我做下啦 你唞番一晚 唔好死」

結果,佢send曬啲副辯嘅稿比我,叫我試下一晚之內執一執下佢。

鼎,又真係幾辛苦,我終於明白點解佢會咁攰。

嗰晚,我為咗第二日 Serena 唔好咁辛苦,我做到2點,終於執到份稿靚靚仔仔。

「咦?咁快搞掂啦。真係好快手,叻仔。」

「你唔駛check下咩?」

「唔駛啦,我信得過你,你嘅製成品應該都有一定水準。」



「多謝喎。」

「似乎今日到你有啲眼瞓,你都瞓下啦。」

「好呀。」

橫掂中史而家搞緊宋朝,我一早已經識咗,我就瞓足成堂中史。

咁我啲notes邊個幫我抄?梗係搵一個我幫過佢嘅人啦。

「張依韻,你咁忙嘅?」

「冇嘢呀,抄緊notes姐。你係咪想幫我抄埋呀?唉。」
已有 0 人追稿