那年玩社，四位靚女: 二十一

而家，又有Yvonne姐幫手抄notes，我真係發咗達，日日上堂度稿，份稿一定會係驚天地，泣鬼神咁勁。

寫下寫下，開始覺得我應該可以應付到副辯呢個職位。而且我諗論點同論據駁人個方面都幾出色（人哋話嘅，係咪真係勁我唔知），所以我對自己都有少少信心。

不過比賽呢家嘢，冇話百分之一百會贏嘅，未落到場，會發生咩事都唔知。

「喂，文哥，今晚歐聯曼聯對拜仁，睇唔睇？」陳天元屋企又係村屋，有部大電視，好過睇imax。

「聽講你老豆老母唔喺香港喎，係咪上你屋企先？」





「梗係啦，我搵埋申屠同白文翰架啦。」

「申屠上你屋企搵你個妹姐。」

「屌。」

「咁如果我搵埋嘉瑜去o唔ok架？」

「佢肯去咪得囉。」





我即刻問我前面嘅嘉瑜。​「喂，嘉瑜姐，你去唔去呀？」

「去睇波？ok呀。」

「我又要去！」

「Serena？你都有睇波嘅咩？」

「少少啦，不過最主要係想同你汁下份稿姐。」





「又要搞公事，唉。」我真係命苦，難得搵到嘉瑜一齊睇波，我都要用埋呢啲時間去做公事。

「你唔驚我聽晒你哋份稿咩？」嘉瑜即刻好得戚。

「係喎，Serena，你要睇就唔好帶啲稿上嚟啦。」

「哦，好囉。」

都係嘉瑜醒目。

「喂，咁姐係你哋個個都去啦？我買定啲嘢上嚟，其他你哋自己搞掂佢啦。」

就係咁，5B班最大睇波團上線啦。

我打個電話返屋企。「阿媽，我今晚要上同學屋企做project呀，今晚應該要通宵。」





「咁姐係唔返嚟食飯啦，咁我煮少份啦。」

「好，聽日見。」

老母真係好。

我，嘉瑜，Serena，白文翰，同埋Yvonne（唔知點解最後加入咗）就係學校附近食咗啲嘢，之後成班人喺兆康站都等等，等天元接我哋上去。

點知，天元突然打電話比我。「文哥，我有啲嘢做緊，你識路，你帶佢哋上嚟先啦。」

結果，我搵咗一陣路，先去到佢屋企。

上到去，見到天元係度執緊嘢。





「到啦？而家仲好早，眼瞓嘅入房訓下先，除咗最大個間房唔入得之外，其他隨便入。」

Serena第一個入去訓。「我頂唔順，瞓陣先，開波個陣叫我。」

「咁唔眼瞓嗰啲呢？」

「過嚟啦文哥，我哋等埋申屠過嚟，早場有一場莫斯科對馬體會，直踩兩場。」

「好，challenge accepted。」

過咗冇幾耐，申屠都過埋嚟，再加上嘉瑜捱眼瞓都要同我睇，咁就四個齊腳，等第一場開波。

開波冇幾耐，馬體會已經壓住嚟打。

「屌！哥斯達呢球都唔入？冇人mark喎！」申屠睇到扯晒火。





我氣定神閒咁渣住罐雪碧。​「係呀，應該比你射就會入，你去打馬體會啦。」

「佢哋肯請我，我咪去囉！」

最後，雖然哥斯達入返球，但係後防唔爭氣，失返一球，一比一打和，好彩馬體會一分都夠出線。

「屌七十分鐘打後馬體會條防線真係危到禁爆平安鐘。」申屠仲未回神。

「唔係個俄佬前鋒把握力差，馬體會一分都冇。」

吹吓吹吓，啲女人都開始醒，我哋一早開晒嘢食嘢飲迎接佢哋。

歐聯夜，實在太好玩。