第366天 - 玩弄與被玩弄, 傷害與被傷害, 從來都是一個循環: 10000餐飯

「聖誕又嚟喇…… 又係Lonely Christmas……」Noel躺在床上呻吟說。
「Lone咩ly呀, 又唔係無人追, 阿a, 阿b有約你咖, 你唔去之嘛。」
「大佬, 見到都反胃啦你去埋我嗰份啦! 」她邊說邊擺出一個極賤的表情。
 
「約Jason出街囉。」
「痴線, 你知我唔會主動開聲咖。」
「其實你地發展到咩地步呀?」
「無啦，得閒send吓message囉。無斷過但係……唔密囉。」
「無斷過咁都幾好啦! 講啲咩先?」
「平時做咩嗰啲無聊嘢咋…唔知呀, 我覺得佢好收埋自己, 唔敢同佢講啲太deep嘅topic…」


「慢慢嚟啦, 有keep住傾已經幾好啦…」
「點慢慢喎, 下星期已經係聖誕節喇…」
「係呀, 時間好緊迫咖咁你快啲約啦!」
「都話我唔會做主動咯!」
「咁你等佢約你囉… 你地呢排日日咁傾都算幾close吖, 可能佢會約你呢?」
「唉, 我覺得佢唔會。」
「咩呀, 我feel到佢對你都ok 咖喎, 有機呀。」
「佢唔會, 佢嘅性格一定唔會。 比起我我覺得你有機啲囉, 佢有無約你呀?」
「你講邊個佢呀……」
「呀係喎, 我唔記得Jannie姐你收兵收得多到排隊排到中環。 梗係Owen啦, 唔通係阿男咩, 你講咗話見完就要放低佢咖喇。」


「放…緊…咖…喇…講起就嬲, 佢又潛咗水, 兩個星期前send message比佢到今日都未覆, 我唔想理佢! 即使佢出現返我都唔會理佢咖喇今次! 」
 
影完畢業相之後我就沒見過HE了。通過幾晚電話之後，他就好像一直都很忙, 我偶爾問他去不去看電影，他都說有工作在手沒有空。兩星期前, 我send了一句過去「你忙完未呀……」，但他看了之後連一個字都沒有覆我。真的太過分了，任你再忙也好，你總可以擠出時間回覆一兩個字吧。反正我的世界不止你一個人, 你就消失吧。
 
「你次次都係咁講咖啦, 然後呢…... 我唔係想知阿男呀, 我想知Owen呀…」
「唔知呀… 我都唔知佢會唔會主動約我…… 我唔敢約……」
「你之前約睇戲嗰啲咁爛嘅藉口都講得出, 咪扮嘢啦。」
「咩喎就係覺得自己之前太chur所以唔敢再亂嚟……」
「唔係喎, 佢會主動text你同約你喎而家。我覺得非常有機。」
「吓… 唔知啦……佢對我嗰種好……我唔識分係gentlemen定係朋友定係鍾意…… 咦, 不如……」


「不如咩?」
「我地賭一鋪。」
「吓, 突然賭咩呀?」
「你鍾意Jason但唔sure佢點諗, 你覺得佢唔會約你但我覺得佢會。 我鍾意Owen但唔sure佢點諗, 而你就話佢聖誕有機會約我…… 咁咪應該賭一鋪睇吓佢地會唔會約我地囉! 」
「哈哈, 賭咩先!」
「10000餐飯! 」
「你痴線咩! 玩到咁大!」
「喂, 如果佢真係約你聖誕節呀, 咁即係一定有嘢啦, 咁其實都抵請吖吓話。」
「咁你又啱嘅……」
「一於咁話, 我要食窮你!」我們不約而同對著對方大喊。
 
然後第二天, 我和Owen剛好談到聖誕節的話題, 想到和Noel打賭的10000餐飯, 我當然不會放過這個機會。
 
Owen: 你聖誕有咩做呀?
我: 未知呀…… 都未有人約


Owen: 哈哈, 我都係
我: 你係毒毒呀嘛, 你講嘅
Owen: 係呀, 我係唔出街, 唔同人溝通, 淨係上網同打機嘅死毒毒, 我返去打機先
我: 喂吔! 講吓啫…… 咦! 你上次咪話考完試不如叫埋Jason同Noel出嚟玩嘅?
Owen: 係呀
我: 不如就25號啦
Owen: 都得呀, 玩咩?
我: 我有幾樣嘢想玩好耐喇…… 溜冰, 睇燈飾,去AIA嘉年華, 食好嘢。你揀做邊樣喇。
Owen: 一日咁長… 做晒都得啦。
我: 係咪呀? 好呀好呀! 我約佢地啦咁!
 
最後, 因為出cheat的關係, 我和Noel的賭局不了了之。雖然她一直都說我很奸詐, 要我倒賠10000餐飯。但有沒有出cheat, 要不要賠10000餐飯都不是重點, 重點是聖誕節那天，我和她都可以和我們的「他」一起過。