＜無甜後宮＞唔係呀？二十歲先黎讀番中學！？: 遇見

早會就係一班學生罰企係操場聽校長同老師講廢話既重要還節，更可況係開學日……所以校長特別長氣，如果我無遲到，我可能會受到更長時間既精神虐待。
三十分鐘過後，終於可以放人番上班房。

「遲到既同學，請留步」老師道
大部分學生已經番緊課室，一把雄厚既聲線命令遲到既同學「你地男一邊女一邊，拎本手冊出黎比我，一陣會比番你地班主任。」
咁有威嚴，一定係訓導主任。
正當我拎手冊出黎時，有把熟悉既聲音向訓導主任求情「對唔住丫黃sir，因為媽媽突然病左，所以……」
「我唔要聽任何解釋，任何藉口，遲到就係遲到。」
「但係……」
「唔好但係，手冊！」


我望向該名女生，嚇左一跳，唔敢相信自己對眼，有一個女神出現係我眼前。
眼大大又水汪汪，可憐既眼神有種想保護佢既感覺（唔知係咪因為比人鬧完先流露依一種眼神），烏黑修長既秀髮，白晳無瑕既膚色，仲要有條小蠻腰，胸部目測應該有C，最重要係我喜愛既美腿，又長又白，無論粗度、長度，都係黃金比例。
法官大人，條腿可以玩成晚啊！

女神係佢係粉紅色書包拉開掛住鬆弛熊既拉鏈，拎出學生手冊。
「個書包咁面善既……」我諗左一陣「咦！佢咪就係岩岩差啲比車撞果個女仔！！」
我同女神相隔約兩米，我不禁打量數秒，女神突然望向我，嚇到即刻望番正面。
搞完一大輪終於可以番課室，但因為第一日番學既關係，所以要去校務處問自己係編左去邊一班。
「唔該，請問可唔可以幫我cheak下我係邊一班？」我非常有禮貌地問
「你叫咩名？中幾？」


「駱梓軒，中四」
「等一陣」姑娘禁左幾下電腦「4B班，係五樓，不過要叫 Miss Chan即係你班主任落黎接你上去」
「咁好啦」
「陳美琪老師請到校務處」姑娘開咪呼喚班主任落黎，5分鐘後終於見到班主任既身影
「你好丫 駱同學，我係你既班主任Miss Chan，我地依家上番班房先，開學有好多野要安排」
「好丫，麻煩你喇」
Miss Chan睇落好後生，我諗都係24-5歲左右，外貌都唔錯，如果係又老又醜既老虔婆的話，我真係會崩潰到跪係到喊orz

上樓梯途中，Miss Chan打開話題「估唔到我地班會出現一個美男子」
「下，係咩，Miss你誇左啲」我尷尬地說


「唔係丫，我無誇大嫁，你又白又有幾分似泡菜仔，都算係一個靚仔，一定會好受女仔歡迎！」Miss Chan不斷讚美我
「多謝Miss Chan你咁睇得起我」我微微笑著「其實我都估唔到有個又靚又nice既班主任」
「你都咁覺得丫？？其實人少少講你知丫，有幾個丫sir同時追緊我，嘻嘻」
其實係咪我講錯野呢，不過算啦，由佢自high，如果得罪佢，我黎緊既日子有排捱。

上到五樓後，
「你想跟我入去定叫你入黎？」Miss Chan問我
「當然係叫我入黎，跟埋入去好似好怪咁」
「好，咁你企係到等一陣」Miss Chan溫柔地說
「知道！」

Miss Chan入到課室，因為打開門既關係，我可以聽到佢地入面既對話內容
「各位同學，現在要宣布一個好消息，今日有位新同學加入我地」
「Miss，咁係男定女丫？？」一個男同學問
「係男仔」Miss Chan回答


「下…………」多名男生失望地大嗌
「班入面已經好多女仔，你仲嫌唔夠多？」
「女邊有人會嫌多嫁，Miss」
睇黎呢班都算融合
「事不而遲喇，請新同學入黎同大家見面啦」Miss Chan行到門口示意我入課室「駱同學，入黎啦」

我走進課室，雖然全部人都唔識，但我都無乜點覺得緊張。
「大家好，我全名叫駱梓軒，以後叫我軒仔得喇，請多多指教」我望向全班同學自我介紹
「幾靚仔喎」「白白淨，成個泡菜仔咁」「太好喇，終於多番個男仔，仲要幾靚仔tim」幾個女仔細細聲咁講，但都係比我聽到……
都係好事黎既，我仲暗爽左幾下

突然有個女仔大叫
「係你！！！？」