＜無甜後宮＞唔係呀？二十歲先黎讀番中學！？: 不能說的秘密
「點解會係你嫁？」
「點解唔可以係我？」雪兒不爽地說
「算……你搵我做咩？點解知我番緊工？」十萬個為什麼上身
「唔記得左你同個兩個女仔傾計個陣，我係你格離？」
「做乜偷聽人地講野」我戚起咀角笑
「第一，我唔係偷聽，係你講得大聲。
第二，我今次黎係因為Miss Chan」
「人少少，唔怕認喎！講啦，做乜咁留意我姐」
「妖，溝通唔到」雪兒擰轉身走
我行前幾步，諗住阻止佢
「喂，我講下笑姐，唔好走……」捉住佢手腕
「放手！！」個手字都未講完，已經一拳打落我手臂到……不過又無乜痛既感覺
「咁你唔好走先」我依然捉住佢
之後佢停低腳步，我亦放開左佢隻手。
「你未講搵我咩事喎」
「因為………………」
一一一一一咕咕咕咕一一一一一
雪兒肚子發出微弱打鼓聲，打斷佢既說話
「你仲未食野嫁？」我疑問
雪兒沒有回答，只是默默地點一點頭
「跟我黎啦」我再次捉緊佢手腕，拉著她走進我工作既地方
「做咩丫？」雪兒一臉震驚
「去食野囉！唔係仲可以去邊」
「你痴線嫁？無啦啦拉人去食野」
「放心喎！我又唔會食左你既」我笑笑口咁講
我拉雪兒到卡位坐，並遞上餐牌
「想食咩就隨便叫，我請」我拍拍自己心口
「咁做你會唔會比經理鬧嫁？」
「點會呢，經理好錫我嫁！加上以前係到都做過一官半職，飛單都唔係啲咩難事」
「但係……」
「唔好但係喇，快啲叫野食啦」
「咁好啦」
雪兒最後點了一個龍蝦汁海鮮意粉，和一杯凍莫加咖啡。
等野食既時候，我坐左去雪兒對面既空位
「喂，你番緊工都可以坐既咩」
「其實我已經收左工，
入番正題，你過黎做咩」
「放學個陣我幫Miss Chan拎野落去教員室，佢落到去先記得未比新入學學生資料同手冊你……」
「所以你就代佢過黎比番我？」
「無錯！」
雪兒係佢既書包拎出我本手冊同一個file放係枱面
「學生資料個到佢叫你填完要認真檢查有無錯漏，尤其是紅色字個啲
聽日一定要交嫁喇，仲要家長簽名，如果聽日交唔到佢話會比人鬧死」
「哦，咁好啦，唔該哂你」
我同事將一碟美味既意粉放左上枱面，佢講完「小心熱，慢用」後就行開左，仲比我見到佢對住我奸笑……
「食野先啦，我入去換衫」我企左起身
「岩岩……你話你以前……係到做……，
咁個“以前”……即係咩意思？」雪兒邊食邊講
我心諗「死喇，講多左tim，仲要比佢留意到……」
「哈哈……無丫，無咩意思，我只係話我以前一直係到做part time咋嘛，哈哈……」我唔敢直視佢，怕比佢睇得出我講大話，但事實上佢都係睇得出……
「你講大話！你個樣同你講既野已經出賣左你」雪兒指住我
「唉，你贏，你食埋野先同你講，換衫先」我沒好氣地說
我換完衫出黎，佢已經食完野，坐係到等聽我既故仔。
「喂，邊行邊講」我望望手錶，已經九點半
「去邊丫？」
「送你番去囉，話說點解你仲著緊校服，同埋你又知我係到番工既」
「因為風紀委員會要開會，四點幾先放學，番去途中先醒起未比野你，所以衫都無換就出黎市中心。
出到黎行過幾間餐廳嫁，最後到依到見到你身影」
「哦……」
此時，雪兒望住我手臂呆左，睇黎已經留意到我個紋身
「你……手臂個到……係真嫁？」雪兒目定口呆
「嗯，都紋左好耐」我目光放在手臂
「咁都番到學？」
「所以我番學先包啲繃帶之嘛，應該無人知既」
「壞人！！」雪兒冷眼望住我
「紋身就係壞人？無見識……」
雪兒沒有回應，一支箭咁行，我只好跟實佢
「我係時候講我既故仔，是咁的……」
「一陣先啦，我唔想咁快番屋企，陪我去屯門碼頭吹陣風，到時再講」佢打斷我既說話
「唔似你喎，一身乖女形象竟然話唔想番屋企？」
「你識左我好耐咩？係你自己咁覺得姐」
「但個到好多“古惑仔”喎，你唔怕？」
「依到都有個啦」佢指左我一下，繼續講「同埋我住附近嫁，唔覺有啲咩好驚，定還是你驚咋？」
「哼！我會驚？唔通我一個打十個又要話你知？」其實我真係驚，係驚撞到熟人，到時有排煩……
「嘩！好威威喎！到時記得比人打到豬頭咁都要保護我喎」……佢係咪挑釁緊我？
話咁快就到左海邊，我同佢坐左係其中一張長凳，我坐係右邊，佢就坐係左邊，
中間隔左一個身位，坐低之後佢攬住個書包放係大脾，以免校裙被風起，防止走光。
但風向突然轉係左邊吹黎，比剛才大少少，吹到雪兒啲頭髮周圍飛，佢連忙整理頭髮。
我見到依個情況就企起身，然後行到佢左手邊坐低，手臂貼手臂，
之後用我既身體為雪兒阻擋一部分既強風，並幫助雪兒整理頭髮，我手指托著瀏海，輕輕到撥到耳背，
令她稍微過長既瀏海不再擋住眼睛，佢突然望向我，我手仍然未放下，我地四目相投，時間仿佛停頓了好幾秒。
「喂，軒仔，乜咁錯蕩丫」突然背後出現一個不速之客，我趕快收回觸摸雪兒頭部的那隻手
雪兒回神過來，尷尬地望回前方，然後目光慢慢放在大腿，並輕輕搖動著踏不到地的雙腳。
「文傑？你帶咁多人有咩搞」文傑係我老死之一，亦係不折不扣既古惑仔，佢身後仲有五六個所謂既“”
「無野做咪出黎周圍hea下」文傑笑左一笑又說「本身見到你想坐低吹下水，不過都係唔阻你拍拖拖」
「同學黎咋！」我冷眼望一望文傑
「點都好啦，星期六我條女生日記得黎」
「知喇，但去邊先得嫁」
「當然去我個場啦！咦，可以叫埋丫嫂黎喎」文傑望住雪兒笑一笑
「屌！都話係同學！到時見啦」我無佢咁好氣
「好啦好啦，到時見啦，哈哈」文傑不斷笑
文傑走個陣仲聽到佢狂笑，話左比人見到有排煩嫁啦。
依個時候，都係同雪兒講番自己個故，但講得好簡短，只係講自己幾多歲，點解讀番書，同埋係餐廳做左幾耐咁。
到十一點，我就送佢番屋企，真係住得好近，路程不到十分鐘，成程路都無對話。
到佢屋企樓下，佢終於開聲
「梓軒呀，發覺你都唔係咁黑人憎姐……」佢終於叫我個名喇，之前一直都係用“喂”黎叫我
「當然，係你一直對我有偏見之嘛」
「只不過係少少改觀咋，你依然都係黑人憎」雪兒整左下鬼臉
「車！你講哂啦！記住唔好同人講我個秘密丫」女人……我愈來愈望唔透……
「盡量啦，我走喇，再！見！」佢講完就行左入大堂，連拜拜都無比機會我講
之後我就獨自番屋企
＿＿＿＿＿＿＿＿＿＿＿＿＿＿＿＿＿＿
我訓左係張床到，諗番起同雪兒四目交頭個刻，佢其實真係算唔錯，幾可愛，不過都係比唔上倩怡。
正當我期待聽日小息又可以同倩怡一齊既時候，我不知不覺就訓著左。
＿＿＿＿＿＿＿＿＿＿＿＿＿＿＿＿＿＿
＜我多麽幸運 人海中能夠遇見你＞