＜無甜後宮＞唔係呀？二十歲先黎讀番中學！？: 告白

放學後……
我，Ice同倩怡去到學生會會議室打掃，我地用左一個鐘去打掃，真係亂到呢……
「其實你地識唔識跳舞？」我問
佢地點點頭，然後回答
「以前都有學過既」倩怡回應
「我係以前學校入過舞蹈組……」Ice自豪地說
「咁就好喇，我突然諗到要為大家舉行一個特別既運動會，
今年社際啦啦隊比賽加入特別環節，就係你地兩個出去跳隻舞」
「下……」佢地異口同聲
「放心啦，我會揀隻簡單又得民心既舞比你地練嫁喇，


所以我聽日會搵舞蹈組合作，嘻嘻」我奸笑時，佢地用一種鄙視既眼光望我

我用眼神對Ice示意叫佢行開一陣，比我同倩怡獨處，Ice亦好快明白我用意，所以離開左會議室。
「倩怡……」屌，好緊張……
「嗯？」
「其實一直以黎都好多謝你，無條件咁幫我做我既書記，仲要你同風紀作對」屌……我講緊咩……
「傻啦，你之前都對我咁好，我今次幫番你都係應該既」倩怡有點臉紅
「其實我仲有野想同你講」
「咁岩既？我都有野想同你講喎，不過你講先，嘻嘻」倩怡笑著說
佢都有野想同我講？不過算啦，表白要緊……


「其實以前對你咁好只不過想多啲接近你，第一眼見你已經比你吸引住，
我起初都唔覺得係因為啲咩，
但慢慢發現我……我……我諗我鐘意左你，
可唔可以做我女朋友丫……倩怡……」我已經豁左出去
倩怡dup低頭沉思左幾秒
「梓軒……我其實一直都對你有好感……」Yes！今次仲唔得米！？
倩怡接著說「不過我唔可以同你一齊……」What！！？
「點……點解？」我一臉恐慌
「我岩岩咪話都有野同你講既，
今日Alan話好掛住我，


佢之前只係一時衝動先同我分手，
依家發覺仲係好愛我，
佢想番我一齊……我已經應承左佢……」
「今日……？」
「嗯……對唔住……梓軒……」倩怡抬頭望我，仲要眼泛淚光
「我……我無野喎，恭喜你，我會祝福你地」嗚呀！！！其實我心痛緊，又有邊個知？
「梓軒……」佢捉住我隻手
「我夠鐘番工喇，再唔走就遲到嫁喇，聽日見啦，拜拜」我強顏歡笑地說
我頭都無回咁走左，出到門口見到Ice企左係到，佢應該聽到哂，但我無理，離開左先算
＿＿＿＿＿＿＿＿＿＿＿＿＿＿＿＿＿＿

我番到去訓左係張床到，想狠狠咁喊一場，但最後我忍住無咁做。

「呯！呯！呯！」Ice敲門既聲音，佢敲完就入左黎。
「你唔係要番工既咩」Ice問


「……」我依家無心情理你……
我背向住佢，聽到佢腳步聲愈來愈近，之後佢訓左係我張床，
仲要係訓係我面前，我成個人呆左，同上次Ice唔小心撲向我跌落張床既距離差唔多，
隔左陣佢終於講野，仲雙手抱著我頭部，慢慢拉向佢胸部對上位置
「傻瓜，我知你個心好痛，
我知你想一個人靜下，
我知你想喊但唔想比人見到，
我知……我真係知道嫁，
上次你保護我，今次比我保護番你，
你依家盡情喊出黎啦，我唔會偷望你嫁」Ice非常溫柔地安慰我

係依一刻我覺得好窩心，上一刻我覺得自己好似身處係一個無限地獄，
下一刻發現有一位天使伸出手將我拉出地獄，並投進天堂之中，
即使天使身體冰冷，但我都覺得非常溫暖。
就係咁，我係Ice懷裡流下男兒淚，


我地不知不覺咁訓左一陣，我訓醒已經八點，眼見Ice仲訓緊我都唔諗住叫醒佢。
我沖左個涼之後落街買飯番黎比Ice醒左可以食，之後係枱面留下「我今晚會夜番，醒左就叮番熱黎食」既字條，
因為我先前打左比文傑叫佢出黎陪我，之後係屯門newny等。

我入到K房見到我一眾好耐無見既老死同一班初次見面既女仔，
文傑仲話知道我唔開心所以叫左一班靚女黎陪我，
我無講過啲咩就知我唔開心，能夠識到文傑真係三生有幸……
之後佢地叫左四五支大酒，我就獨自飲左幾杯齋lit，
飲完就同佢地玩骰，玩左陣文傑坐到我身邊
「究竟發生咩事？」文傑問
「我失敗左……」我又飲左一杯
我同文傑講哂成件事既來龍去脈，我亦已經開始醉醉地
「哈哈哈，以前果個情聖軒少去左邊，今次小小事就搞到你咁，你好鐘意果個女仔？」
「嗯……」
「嗱！你自己感情事我就自問幫唔到你啲咩，但我勝在多女，係依到睇中邊個我一定幫你媾上手」


「多謝喇，真係唔洗……」

講完無耐突然有人whatsapp我
＿＿＿＿＿＿＿＿＿＿＿＿＿＿＿＿＿＿

Ice：你去左邊丫，唔好去做傻事丫（10:54）

我：我去左同朋友飲酒咋，你食左野未丫？（10:56）

Ice：依家去食（10:57）

Ice：咁你唔好飲咁多喇，傷身丫（10:57）

我：知道喇，你都早啲訓喇（10:59）



Ice：嗯（11:01）
＿＿＿＿＿＿＿＿＿＿＿＿＿＿＿＿＿＿

我Whatsapp完發現文傑一直係到偷睇
「係咪岩岩講個件事既女主角黎？」文傑邊笑邊問
「唔係佢，朋友黎咋」我又飲左一啖

傾左一陣，K房喇叭插出「痴心絕對」既前奏，我拎起支咪，準備唱出我心聲……

「想用一杯Latte把妳灌醉　好讓妳能多愛我一點
暗戀的滋味　妳不懂這種感覺　早有人陪的妳永遠不會

看見妳和他在我面前　證明我的愛只是愚昧
妳不懂我的　那些憔悴　是妳永遠不曾過的體會

為妳付出那種傷心妳永遠不了解　
我又何苦勉強自己愛上妳的一切
妳又狠狠逼退　我的防備　靜靜關上門來默數我的淚

明知道讓妳離開他的世界不可能會　
我還傻傻等到奇蹟出現的那一天
直到那一天　妳會發現　真正愛妳的人獨自守著傷悲……」

唱完之後，視線亦漸漸模糊起來……