＜無甜後宮＞唔係呀？二十歲先黎讀番中學！？: 醉後生還

我起身發現自己已經訓左係張床，
我只係依稀記得自己唱完痴心絕對，
之後既記憶就無左。
我每次飲到斷片都會啟動自動導航番屋企，
仲會沖埋涼，今次都唔例外。
我拎起手機，原來已經12點幾，
仲見到一大堆倩怡既未接來電同whatsapp，
點解仲要關心我……？
我沖多次涼，就諗住番學，
但個口仲係好大陣酒味，而且仲有啲宿醉，


不過都係算啦，番左學校先。

到左學校門口，都唔知個天係咪玩我，
係門口見到倩怡，仲要同個男仔一齊，
應該就係果個Alan，我想扮睇唔到佢地，
但倩怡叫停我，仲叫Alan番去先
「梓軒……做咩依家先番黎？」
「我訓過籠之嘛」我逃避佢既視線
「你……真係無事？」
「無丫……你都係番去陪……」真係有無咁巧合丫，Ice突然出現左！


「駱梓軒！你捨得番黎喇咩！叫左你唔好飲咁多嫁啦！」Ice係我背後大叫
「你琴晚去左飲酒？」倩怡問
「咦…倩怡你都係到既，你知唔知佢琴晚為左你……」
「講夠喇，我走先」我打斷Ice既說話

其實我個句語氣都幾重，嚇到倩怡同Ice呆左，
我無理咁多，只係去左約舞蹈組組長傾陸運會出show既事，
傾完之後我連堂都無上就鎖左自己係會議室一個人靜下，
放學都無出過黎，時不時都聽到有搞門聲。
我全日只係望住個窗發牛豆，最後都諗通左……


我要抽離對你既情感……
＿＿＿＿＿＿＿＿＿＿＿＿＿＿＿＿＿＿

我會發著呆 然後忘記你 接著緊緊閉上眼
想著那一天 會有人代替 讓我不再想念你
＿＿＿＿＿＿＿＿＿＿＿＿＿＿＿＿＿＿

六點幾我出番黎，見到Ice自己一個人企左係門口，內疚感就不斷涌出來
「做咩唔番去先」我講得好細聲
「成日抦埋自己一二邊又收收埋埋咁，你知唔知人地擔心你嫁」Ice手指篤我心口
「嗯……我知」我像一隻被順服既小狗……
「應承我，以後唔好收埋自己，唔好要我擔心」
「嗯，我應承你」
「勾手指尾先！」Ice舉起手指尾
「仲細咩……」


「咁你勾唔勾！」Ice微笑著說
「勾……」我地手指尾慢慢緊扣著
「乖喇，嘻嘻」我有少少感動……
「我會慢慢忘記佢……」我攬實Ice
「識咁諗就叻仔喇，如果想喊就喊啦」Ice溫柔地說，並雙手放在我腰後
「我先唔會喊」
我地又再一次擁抱，
我見到倩怡係遠處望到我同Ice之後就跑走左，
我有猶豫過追唔追上同佢解釋，
但係覺得無咁既必要……

因為那個人……已經不是屬於我……
我會慢慢忘記你……做回最普通的朋友……
＿＿＿＿＿＿＿＿＿＿＿＿＿＿＿＿＿＿



過左幾日，我同倩怡開始有番交流，
仲有講有笑，但感覺已經唔係好似以前咁，
相反同Ice感情愈來愈好，有時互相捉弄大家，
有時嗌下小交，有時比佢發下小姐脾氣咁，
Ice已經係我生活中佔左唔少位置。

另外佢地近排已經開始練舞，
所以Ice有時會夜晚七八點先番，
我亦開始我既「秘密訓練」，為陸運會做好準備。