＜無甜後宮＞唔係呀？二十歲先黎讀番中學！？: 萬聖節晚會

萬聖節

每年10月31日學校都會舉行萬聖節晚會，6點鐘開始，都吸引到百幾人參與，每個人都會妝扮自己，有部分人更會化妝。
有喪屍、紅衣女鬼、科學怪人等等多不勝數，
但有啲我都唔係好明……點解會有護士、空姐，仲有個美少女戰士……
究竟係萬聖節晚會定cosplay晚會……

今次萬聖節係我負責，之前我設立既行動組都有二十幾人既，
我就叫佢地著十八世紀既砲兵服裝，我著黑色燕尾服扮吸血鬼，
因為我勝在夠白，唔洗點化妝都可以，


而Ice同倩怡就夾埋著日系女巫裝，Ice以藍色長裙女巫服配上佢本身既冰冷外表，添加了不少味道，真係絕配！
倩怡著上紅色短裙系列，令佢一雙白皙美腿表露無遺，再加上雪白既過膝襪做襯托……
媽！佢犯規丫！
佢地兩個本身係學校已經係全校男生焦點，
今晚係連女生都比兩位女巫吸引住。
我仲feel到全部男仔都用仇視目光望我，
因為……我一直都企係佢地兩個格離……

今晚係行動組負責當值，但突然有一班風紀不請自來，陳柏翹帶頭，身後有十幾人
「會長！我地又見面喇」佢向我揮手


「Hello~做乜過黎都唔通知聲丫？」我也揮手回應
「唔歡迎？」
「當然唔係啦，但過黎玩都要合乎氣氛先得嫁，個個都著校服咁，唔係好掂喎」
「我地過黎唔係玩嫁，係怕你地搞唔掂先過黎幫你地手，依啲野都係比番我地專業既去做好啲，有咩突發事咁點算」陳柏翹笑著說
「我唔覺得我班人唔專業喎」我戚起咀角
「咁要試過先知」佢身後有幾個男仔行上前
「係咪要試？」我講完之後，劉志傑行前並手握配劍
「我講下笑姐，唔洗咁緊張」陳柏翹揮手示意身後幾個男仔退後，接著說「我地今晚都會係到，有咩要幫手咪出聲囉，我好樂意幫你」
「我諗無依個機會」我笑笑口咁講
講完一大輪野佢地就轉身離開，見到有兩個熟悉既背影……



我命令其他人去各個地方守候
「你地分A B C Team ，
ATeam去球場既攤位游戲，
BTeam去禮堂個大鬼屋，
CTeam睇住風紀個班人，我硬係覺得佢地會搞事」
佢地各自去自己既崗位
「倩怡，Ice你地去玩啦，有咩事我會打比你地」
「但係……」Ice有點擔心
「我會搞得掂！」我一面認真
「咁好啦」Ice唯有聽我講
之後佢地身影慢慢離去，我就上左去二樓既走廊，
二樓因為無攤位同鬼屋，基本上係唔會有人，所以成層都好寧靜，
由二樓望落去都可以好清楚睇到下面既人流，
見到其他同學玩得咁盡興，我已經好滿足。


眼見倩怡拖住Alan周圍玩，話就話會抽離，但邊會咁快可以完完全全忘記，
不過當我情聖又好，聖人又好……佢開心就夠。

突然全校既燈熄哂，下面仲有女仔尖叫，
本身仲以為係Ice既特別環節，過左幾秒就覺得唔對路，
如果係遊戲既話會有人係廣播台通知，
之後我打比Ice，佢都話唔知咩事只係知停電，
我再打比各Team既隊長，叫佢地維持好秩序，令場面無咁混亂。
我下意識覺得成件事無咁簡單，一定係同風紀班人有關。
我係漆黑既樓梯跑回學生會會議室，發現本來鎖左既木門依家半開半掩，相當有可疑！
我慢慢地推開門，見到文件櫃旁邊有兩個黑影，
我立即關門並鎖上，就算見唔到樣都知道係兩個女仔，
因為兩個都係著裙同埋都係長頭髮。

「你地係邊個！」我行上前


佢地擰轉面但無回應，
佢地分別係戴上狐狸面具同骷髏頭面具，
戴狐狸面具果個就二話不說跑上前，
腰微微彎曲提高右腳向我膊頭位踢落去，
但我好彩反應快，捉實佢隻腳
「女仔之家唔好踢咁高啦，你仲要著裙，睇到哂喇」我放開左佢
「變態！！！」佢大嗌，但把聲係邊到聽過呢？
之後佢地諗住走，但我比佢地快一步走到門口，
我捉住其中一個人隻手，
仲比我除左個骷髏面具，雖然個環境都有啲黑，
但我係唔會認錯人……

「雪兒？」我感到諤然
「你識佢？」女狐狸對著雪兒說
「嗯……」雪兒點點頭說


「咯……」木門發出開鎖既聲音
門被打開後，見到Ice同四個男仔企左係門口
「你地走唔甩嫁喇」Ice指住雪兒
雪兒同女狐狸都只好乖乖就范
「你！同我除左個面具」Ice指住女狐狸大聲呼喝
女狐狸除左個面具大力掉落地下，並雙手抱在胸前「超」左一聲。
此時電力咁岩恢復正常……

依個臉孔，我一定唔會忘記，因為我地曾經零距離額頭貼額頭，
仲比佢騎過我，最重要既係……係一位靚女
「又係你？」我指住佢擘大個口得個窿
「你地見過面？咁點解個陣又問我拎相？」Ice問
「你咁講即係佢就係唐詠雯？」我望住Ice
「係丫」Ice答
「死變態！」詠雯斜視我


「唔講依啲住！你地鬼鬼祟祟過黎做乜」Ice好有氣勢咁講
「我地係唔會答你！」詠雯寧死不屈
「你地咪試下唔講囉，我地大可以話你地過黎偷野，睇下其他人會點睇你地」Ice說
佢地兩個唔出聲，睇黎硬既唔得要用軟

「雪兒，我知你本身份人唔壞，你講啦，我地唔會話比老師知」我坐到雪兒旁邊，撫摸著佢頭部
過左陣佢終於講野
「其實我地過黎係要偷陸運會選手名單同資料，目的係要制造混亂，令你地係學生心中留下壞印象，
同埋岩岩停電都係風紀委員長既計劃，話要造成恐慌令你地不得不向我地求助……」雪兒dup低頭唔直視我
「雪兒！你做乜講出黎！」詠雯激動地企左起身
「蚊蚊，我地無得揀！我唔想比人知我地做啲咁低裝既野」
「你真係信個變態佬唔講出黎？」詠雯指住我
「我信！因為佢唔係啲咁既人」雪兒望住我
我向雪兒點點頭，其實我就真係講得出做得到，因為我有個秘密比雪兒知道左
「Ice，你同佢地出去先，我有啲野想同雪兒佢地傾」我同Ice講

Ice同幾個男仔係出面等，我就除左件西裝褸然後拉高衫抽
「你……你……你唔好亂黎丫變態佬！」詠雯好慌張咁講
「你睇埋落去先啦」雪兒好似知我想點咁
「我唔知你會唔會信任我，但都比你知我個秘密先，當係比痛腳你揸手」我解開繃帶，
露出手臂紋身接著說「我一直綁繃帶係因為有個紋身，如果比學校知我要被迫退學」
「雪兒你一早知？」詠雯望住雪兒
「嗯......」雪兒點點頭
「唔怪得你咁信佢」
「點解你地入到黎？」我問雪兒
「因為委員長比左條鎖匙我地」雪兒拎出鎖匙
「咁如果委員長知道你地失敗左會點？」
「我諗佢唔放過我地，仲當我地係叛徒看待」雪兒好認真咁講
「有無咁誇丫！」我笑左笑
「佢係一個機心好重既人，就算我地無同你接觸過都失敗既話，佢都會覺得我地幫緊你」

我起身去文件櫃拎出幾張紙影印，之後將正本交到雪兒手上
「嗱！正本就比你地，之後條粉皮信唔信呢就唔關我事」
「你會咁好死幫我地？」一直沉默既詠雯終於出聲
「我幫雪兒咋！」我望住雪兒接著說「雪兒，我之前講既野你決定好未？」
雪兒搖搖頭，從佢眼神可以睇得出佢好迷惘，覺得自己幫邊一個都好，都只不過係一隻棋子。
「咁你地走先，Ice個邊我會搞掂」拍拍雪兒膊頭
我送佢地到門口，Ice見雪兒手上拎住幾張紙就拍左一下落我個頭到
「你真係放佢地走？仲比啲咁重要既野佢地？」
「我應承過佢地嫁嘛」我沒好氣地說
「咁之後點做？你教我喇！」Ice好激動咁講
「我有影印嫁！」我拎住副本

晚會繼續進行後，
CTeam亦向我報告停電前風紀當中有幾個人鬼鬼祟祟唔知走左去邊，
我有一點諗極都諗唔通，
究竟雪兒佢地點解會有鎖匙，條鎖匙又點得黎既呢？
諗左陣我終於知道真相了……