愛．限期（真人真事）－續集: <<第十一集>>

2014年5月27日 星期二

經過連日來既瘋狂message同埋煲自殺式明明第二朝要返工但係都傾電話傾到好夜之電話粥仲有放工點都見一見，我地既感情進展得快過火箭。但係聽日開始，我地將會有一個新既突破！

今日我俾佢睇左我自己整既早餐既相之後，我問佢想唔想試下。鍾意食野既Miki當然唔會話唔想啦，但佢答我想既同時，佢補多左一句「如果你肯來我屋企樓下陪埋我搭巴士返工就好啦」。佢其實之前都已經同我表示過坐巴士既時候唔鍾意有人坐佢隔離，如果我肯既話，佢就解決左有陌生人坐佢隔離依個問題啦。

當我聽到依個要求之後，第一個反應係...當然好啦！第二個反應係...咁港女既！第三個反應係...真係好sweet！對上一次為女仔做依d咁瘋癲既野，已經係八年前以上，雖然係癲，但好甜。

我計一計，嘩！聽朝要六點就起身，整埋早餐咁出門口！但係只要佢要求，我就會鍾意，我諗我已經傻左...整早餐拎到咁遠俾自己鍾意既女仔，又要好食，又要唔怕凍，咁就只有好少選擇。我去超級市場買左方包同蕃茄，加埋屋企仲有好多既雞胸，整雞胸蕃茄三文治。用蕃茄既水份中和雞胸乾燥既口感，既好味又健康。



倒數最後21日。