(無甜)上天給我的一個玩笑 (新增外傳): (3)

返到課室，我仍然都係伏係枱到補眠一下
 
突然我聽到旁邊有聲，即刻彈起望一望
 
「嘩!你做咩咁多日都唔返學呀?」我望見係啊螢，不過佢個樣就好似印左唔開心三個字係額頭到「你知唔知無左你日日係到同我嘈交，我呢幾日幾咁苦悶」
 
「關你咩事」佢好冷淡咁應我
 
「算，見你個樣死死地，今日唔同你嘈。」
 




唔知咩事，平日一返到學校就溫書或睇書既佢，今日都伏左係到，完完全全同平時既佢好唔同。
 
同佢鬥左咁多年氣既我亦都唔忍心見到一個咁既佢，平時同佢鬥氣都只係一般嘅吵吵鬧鬧，我亦都無真真正正咁發過脾氣，所以我都好想了解下佢發生咩事。
 
「喂!啊螢，你到底發生咩事，見唔到平日既你，我好唔放心。」
 
「…」
 
「你唔好咁啦，講出黎啦，講出黎會舒服啲，我保證我唔會爆響口。」
 




「…」佢仍然都係唔理我
 
「喂!」正當我準備伏返係到既時候，佢終於出聲
 
「同我…一齊大既MOMO佢…走左」
 
「MOMO?」
 
「係呀…佢係我屋企養左好耐既狗仔黎，都好老下，我都知佢會離開我，但我都估唔到咁突然。」
 




「咁你而家講左出黎有無舒服啲呀?」
 
「嗯」
 
「節哀…」我拍一拍佢個肩頭「但你都唔洗咁多日唔返學掛」
 
「我…同屋企人去左旅行…返到黎無耐MOMO就突然走左…」
 
雖然佢有講出黎，但我始終覺得唔係事實全部，不過算啦，佢肯講已經好好。
 
「唔洗咁嘅」我笑笑口「下個月有聖誕聯歡，到時諗下準備啲咩野玩仲好啦」
 
「哦…」
 
今日既課堂上我都不斷嘗試令到佢笑返…但係佢仍然都係一個頹樣。搞到我連訓覺既心情都無，正係坐係到發呆




 
放學嘅鐘聲響起…..
 
「啊風!今日打團戰呀，返到屋企就開波啦。」四大天王一齊講
 
「唔打啦，無心情呀」
 
「唔係掛，我地唔夠腳喎」城城呆左咁望住我
 
「係呀，唔好煩我」我啤住佢「自己拉多個人打啦你地」
 
「算啦，我地走」啊華一聲令下，四條友拎起書包走左
 
啊螢仍然都仲係一面頹樣咁坐左係到，無走人既意思，但我唔識安慰人，唯有搵班上其他既女同學。
 




「啊恩!」
 
「少有喎，你條友仔會叫我。」
 
「認真，啊螢佢怪怪地，麻煩你地開解下佢，佢啲負能量好勁。」
 
啊恩佢係我地班既班會主席，散發住一個大家姐既氣息，而班上嘅同學亦都有同感，所以好多事情都會睇佢頭，而女生之間能夠和諧相處，無出現任何小圈子，都係靠佢將大家既誤會化解。
 
「你咁樣講又真係好似係堅架喎」佢望一望啊螢
 
「係呀，唔該你丫」我露出好誠懇既眼神
 
「得啦，星期一放包維他奶係我個櫃到我幫你搞店佢」
 
天下間果然係無免費既午餐




 
「無問題」我露出OK既手勢
 
返到屋企咩都無理，食完飯大教訓，見到啊螢出現返，生活又正常返，自然訓得舒舒服服。
 
秋天天氣真係訓覺一流
 
午飯落到籃球場，開開心心打返場波，出一身汗爽呀
 
之後我又去到附近既商場食老麥
 
係遠處聽到兩把熟悉既聲音
 
原來係啊螢同啊恩
 




一身臭汗嘅我，我都唔叫佢地啦，默默地遠處望住佢地兩個係到談心
 
不過啊螢琴日面上既頹氣似乎已經散得七七八八，睇黎校園生活回復正常，吵吵鬧鬧既日子又要返黎啦
 
去到夜晚，晚飯過後，我就落去樓下海旁散步
 
正當我行下行下既時候，望到有一個熟悉既身影一步一步向我走過，不過係低住頭，望多兩眼啊螢黎喎
 
「喂啊螢!」當佢走到我邊個陣我細細聲叫佢
 
佢亦都望住我，不過我見到嘅唔係正常嘅佢，佢個頹樣又一次出現返
 
「HI，咁岩呀」佢講得好鬼細聲
「係呀，食完飯，天氣咁好咪散下步囉」
 
「哦…」佢又低返頭「咁我走先啦，BYE」
 
「BYE…」我望到佢呢個款，又一次擔心起黎
 
「啊螢」我始終都係唔忍心
 
「咩事呀?」佢擰轉頭望住我
 
「呢幾日你到底發生咩事，完全唔似我認識既你」我認真望住佢
 
「我咪同你講左囉我…」
 
我再一次打斷佢既話「我唔信你琴日同我講既野係事實既全部囉，你一定仲有野隱瞞」
 
「唉…咁都比你睇穿」
 
「我同你嘈左幾多年呀?講兩句就知你有古怪啦」
 
啊螢佢咩都無講，一手拉左我去公園到坐低