(無甜)上天給我的一個玩笑 (新增外傳): (9)

我落到海旁，跨過圍欄，坐係海邊吹風飲酒，自己一個靜靜咁思考人生
 
但腦海出現嘅並唔係咩人生目標，未來計劃，反而出現嘅係之前我係到撞到啊螢並開解佢嘅畫面，播到我送左佢返屋企後又出左我上去佢屋企準備材料同聖誕聯歡嘅畫面
 
一幕幕咁係我嘅腦海不斷重演…
 
而我拍一拍自己塊面想令畫面消失嘅時候又回想到我當時係聖誕聯歡時嘅心情，因為當全班人話我地拍拖嘅時候我嘅內心無抗拒過呢種講法
 
我再拍一拍面，腦海中又浮現返啊螢屋企張相，又諗起啊螢笑得好甜嘅樣
 




啊螢不知不覺間已經係我生命中佔左一個幾重要嘅位置，我聽講過中學嘅朋友會係一世嘅朋友，而我同啊螢係呢段時間由水火不容變到越黎越親近，大概佢會成為我中學不能忘記嘅一個人
 
「死火啦，我係咪飲醉左呀」我係到自言自語
 
我搖一搖頭，想比自己更清醒
 
「呀!!!」突然後面發出一聲尖叫「你地唔好埋黎呀」把聲好似似曾相識WOR
 
「走開呀!!!」把聲…好似係啊螢黎WOR
 




「唔係掛，我真係飲醉啦，有幻聽呀」我又一次自言自語並且向住尖叫嘅地方望去
 
原來真係啊螢，我即刻跑過去睇下咩事
 
「喂啊螢，做咩事」我向佢揮手
 
「啊風… 我好驚呀…」佢指住前面三隻金毛尋回犬，雙腳都係到震
 
個三隻狗好熱情咁圍住啊螢，嚇親佢，當我過左去之後，狗主人都即刻拉開三隻狗同啊螢講「sorry呀，我好耐無帶過佢地出街，所以一見到其他人就好熱情架啦」
 




啊螢佢撓實我隻手，睇黎佢真係好驚狗
 
我拍一拍佢隻手「唔洗捉得我咁實WOR，佢地走左啦」
 
「頭先…我…真係好…驚呀」啊螢口震震咁講
 
「乜你呢個正義嘅化身原來係驚狗」我忍住笑咁講
 
「唔得咩…以前細個就比狗嚇過，所以一直都好驚」佢慢慢鬆開捉實我嘅手
 
「得，無話唔得嘅」
 
「咦，你好大陣酒氣呀」啊螢用手撥一撥「好臭呀」
 
「係屋企無聊咪落黎海皮飲酒吹風囉」我望住佢「岩岩飲完就聽到你把聲，我仲以為自己醉左有幻聽」




 
我伸個懶腰「咁你呢，做咩又咁夜自己一個人係海旁呀」
 
「無呀，溫書溫到悶悶地咪落黎行下囉」
 
「唔係掛，我就話唔想出去同人迫啫加上又唔想同四大天王出去啫，啊恩佢地無約你出去咩」
 
「有呀，但我想溫書所以無出去呀」
 
「唔係掛溫少一日半日會肥佬咩」
 
「你理得我」
 
我望一望手機，而家個時間係十一點半，距離聖誕節仲有半個鐘
 




「啊螢，仲有半個鐘就聖誕，去唔去食糖水倒數呀」
 
「是但囉」
 
「行啦」
 
就係咁…就成為左我同啊螢第一次嘅單獨約會
 
我地兩個去到附近一間堂水鋪到坐底左，我一早就諗好食咩，相反…啊螢好似有選擇困難症咁，諗左好耐都唔知食咩好…
 
「…」啊螢不停咁睇個餐牌「食咩好呀…不如你幫我揀啦…」
 
「伙記…一碗楊枝甘露同椰汁西瓜西米露」我揚一揚手
 
「收到，請等等」




 
「嘩你洗唔洗咁快呀，唔洗問下我想唔想食架咩」佢瞪大隻眼望住我
 
「問得你黎有排問啦，你都揀唔到食咩咪求其叫兩款放係到比你揀囉」我一面不屑望住佢
 
「糖水到」伙記拎住兩大碗糖水過黎
 
「Um…」啊螢一手拎走碗楊枝甘露「我食呢個」
 
我的天呀，佢拎左我碗楊枝甘露呀，算，總好過佢仲係到諗緊食咩
 
「你呢個假期有無去溫書呀」啊螢食得津津有味
 
「有，就係溫左一輪，覺得有啲乏味我先落海皮行下，咁就又一次撞到你」我亦都開始食我碗糖水
 




「撞到我唔好咩」啊螢笑笑口咁望住我「我又要試下你個西米露」啊螢用隻匙一野就插左落我碗糖水到
 
係呢個年代，大家可能覺得無咩問題，但係我其實係一個怕醜仔，係呢一刻我有些少尷尬，不過我仍然保持個樣，等佢唔發覺我尷尬，但係係呢一刻我都仲係無言
 
「喂喂喂，睇下而家幾點，準備倒數啦」啊螢突然一臉興奮咁望住我
 
「等我睇下先」我拎手機出黎「仲有兩分鐘…」
 
係呢短短兩分鐘，我地兩個咩野都無講，啊螢靜靜咁睇住手機嘅時間慢慢等時間嘅流逝，場景靜到連啊螢嘅呼吸聲同我嘅心跳聲都浮現哂出黎，而我就一直凝視著啊螢，望住佢個對水汪汪嘅大眼睛，佢真係吸引住我嘅目光
 
又一次啊螢又感覺到我望住佢，呢一刻佢都望住我
 
「喂，你又做咩望住我…我會好尷尬」啊螢塊面開始紅紅地
 
「無野」我亦都回過神黎，準備倒數
 
5
 
4
 
3
 
2
 
1
 
!
 
「聖誕快樂!」我地大家互望住
 
聖誕節終於來臨啦!