肥宅 點溝女神啊: 第九章 第二節 上我屋企？！
「係呢雞哥，你覺得打機同我，邊樣比較吸引啲？」
「啦啦啦，首先唔好再叫我雞哥啦，叫番我做啊雞或者黃雞啦」
「嗯...至於你既問題就......」我思考左一陣
「唔通我真係比唔上啲game？」我相信呢個唔止係佢既問題，係全部有男朋友係打機既女仔都會想問，我於是就略略解答下佢。
「其實各有各優點，只係睇個男仔本身對打機有無熱誠，但係有得女朋友既機友多數打機都係唔勁，所以識著啲打機既男友係對女方比較不公。有啲人要打機打唔勁，有女仲要唔理個女朋友，我地啲宅男不知幾想有個女朋友。」我講到頭頭是道。「比著我就一定好錫個女朋友啦」我接道，一講到女朋友就自自然然諗起啊言，唉！
安琦突然一言不發，我就諗住睇下咩事，只見佢低下頭，眼腫腫咁。
「你....你搞咩啊？」我想試下關心佢
「你地班打機既成日就係咁，都唔理下身邊既人。」佢既說話中間仲夾雜抽搐既聲，情緒都開始唔穩定，其他係條街既情侶紛紛報以奇怪既眼光。
「喂，唔好哭住先啦，好多人望住嫁。」
「望咪望囉，起碼佢地有留意到身邊事物啊，好似你班打機咁咩！」佢既語氣就好似一個小公主扭計一樣，個種滲下滲下既語氣滲到落我個心，我個綿花糖心就會溶。
「唉，呵番啦，番到去先哭啦大姐大。」
一路講就行到屋企樓下。
「我走先啦，byebye！」我向佢揮一揮手。
「喂，唔好走住啦，陪我去公園仔坐下先啦！」上年就會所，今年就公園仔，算唔算艷遇呢？定係做多次水泡......
「哦...」我無奈接受，難得有女仔邀請我陪佢，呢個時候有啲感激啊媽子既無心之失。
係路燈既襯托下，安琦面上既輪廓完美影射出黎，再加上佢既３３ｃ，我既小雞雞都開始腫起上黎。
「去個邊長凳坐下啊不如。」我應聲接受。
坐低左之後，我地兩個都沉默落黎。作為男方，我應該主動打破僵局。
「..嗯.......你岩岩你做咩哭啊？講唔講得嫁？」
「我前晚同我男朋友分左手......」佢再開始眼腫腫咁，頭向下望，塊面紅扑扑咁，同上年可以話係一模一樣。
「你講個個ｆ５師兄？佢幾靚仔啊！」
「嗯......」跟住佢既眼淚再度一湧而下，個一刻我有衝動想攬住佢，但係作為一個蕩氣迴腸既真肥宅，絕對唔會乘人之危。
同時作為一個體貼既男仔，我係永遠都帶包紙巾係身，所以我就一手遞左張紙巾比佢。
「你都話有得拍拖啊，比人傷既滋味係點既呢？」我用老人家既語氣，感歎感情。佢抹一抹眼淚，跟住淺笑左一笑。
「你係咪傻嫁？邊有人想比人傷嫁，你被虐狂黎嫁」安琦甜笑住咁講
「傷其實係一段戀愛一定要有既元素，所以要體會戀愛，就要比人傷過。」我總是大條道理，我係咪受左啊軒感染我呢？
「你想比啊言傷啊？」佢對我奸笑左一下。我當堂打個突，唔知點解有聽到啊言個名我就全身都會打個冷震，不過都習以為常。
「你同啊言好熟嫁？」
「我記得我識佢個時係中一迎新個時，佢係迎新大使，好受當時既ｆ１仔歡迎嫁。」
「呢層就緊係啦！」一講起啊言我就開始有啲小激動。
「我同佢成日都分享心事，有咩都攞出黎傾，佢有講過關於你既野。」聽完之後我有啲小開心，佢竟然係同人傾計個時有提起下我，雖然唔知係好係壞，不過我就一於少理，比自己開心番陣先。
「佢仲同我講左關於上年平安夜既事比我聽添。」佢再次露出奸笑。
「你.......你聽到啲咩啊？」我瞪大對眼望住佢。
「無啊，咩’’貧乳臭閪’’個啲囉，我都唔明你，明明係鐘意人咪講囉，都唔明點解你要收埋收埋。」
可能我未識點好好處理一段感情，但係目前我只係一個咩都做唔到既肥宅，係一個無膽既肥宅......
「我........」我突然無言以對，而安琦所言甚是。
「好凍啊。」佢突然咁講，我都不知所措，唔知比咩反應佢。
「咁不如上番樓先啦。」我只係諗到咁講。
安琦突然埃左落我到，佢既３３ｃ簡直係觸手可及，我呢一刻好想縮開，但係我心入面個隻淫魔唔比我縮。
「咁咪取到暖囉，傻仔！」雖然比佢笑，但係我都係覺得好幸福。
「我...我諗...有..有 其他....取暖...既方法...法.既.」我口裏說著不但心裡卻是很誠實。
「無嫁啦，一唔係就同我攬身取暖囉」嘩，我宜家先知我地學校啲女係幾咁開放。
「你...唔好...好..玩..啦....」我開始口窒窒。
我從來無係一個女仔身上得到關懷，就算係啊言為我擔遮都無好似此刻既感覺。
佢轉身係佢個包包到攞左條頸巾出黎，一手圍住我，一手圍住佢自己。
「本來呢條頸巾圍住既令一個就唔係你黎，不過都送唔到出去，就當益下你啦。」佢苦笑
呢一刻就好似電視戲入面日本個啲情人咁，心知自己只係一個肥宅，都無話太大既興奮，不過少少都有嫁啦。
寒風一陣陣咁吹過黎，我開始都頂唔順。「啊超！」安琦突然打左個大黑痴。
「算啦，上去沖番個熱水涼好過啦。」
「其實.......」似乎佢有啲難言之隱
「我無帶鎖匙，哈哈」佢淺笑
「難為你仲笑得出！」我對住呢個小公主，真係有啲無氣，不過我就好享受同佢度過既每分每秒。
「咁.....不如上你屋企啦！」佢面上再泛起紅扑扑既顏色。
「吓，你唔怕我食左你咩？」我講笑咁講
「怕嫁，不過都無計啦，鬼叫呢到咁凍咩。」
「行啦－－」佢推我起身，逼我行。
「唔好啦！男女授授不親啊！」
「益左你啦，仲咁多野講，行啦！」雖然係有幾分尷尬，不過都係幾開心。
但心情難免有啲緊張，呢次係第一次有女仔以朋友既身份上我屋企。高登既甜故多數都係咁開頭，心在暗爽。