肥宅 點溝女神啊: 第十一章 俊,邊撚到俊啊
我再次著番今日個件衫，加條頸巾，因為聖誕既夜晚係特別凍。
行到出大街，個個人成雙成對，手拖手，你攬下我，我攬下你咁，幾溫馨。好聽啲就浪漫囉，唔好聽就抽水囉，不過只係我無得抽姐。
「有我抽你水你都要劏雞還神啦！」我諗番起今日同安琦既事，我就覺得好溫暖，雖然我對佢有少少感覺，但係我始於都係鍾意啊言，呢一個無得改變既事實。
我走左去吉野家，找左個位就坐低左。
人流都比平時多，不過角落一個單人位空左，我諗都唔諗就搬左我個一番巨丼牛肉飯去個位到坐低左。
坐係角落既我，被一啲經過既情侶指住我黎笑，不過無法啦，咁我真係''獨''自一個坐左係到。
呢到啲情侶真係多到仆街，個係到手拖手，就好似向我示威咁。我差啲想衝出去用我個一番巨丼兜面打落條仔個頭，係差啲，無做到。
拿拿聲食完就急急腳走左，廢時再比人指三道四。
「喂，係咪黃雞啊？」行行下街無啦啦有人叫我我向後一望，只見一個熟悉既身影跑緊過，跑到我面前，我終於認得佢係邊個！
只可惜唔係女，係我小學同學啊俊，佢都係無點變過，一樣同我咁肥。
「肥仔永遠係最忠誠既同學」呢一句係無錯，因為我都真係幾忠誠，而啊俊都係。
「俊，邊撚到俊啊？睇下睇下，邊撚俊啊我屌你老母！」我當然無咁講啦
我同佢相認番之後，就走左去個公園仔到坐。
「點啊雞哥，睇你一面春風，岩岩同完條女食飯？」世事都給你看透了
「無啊！你呢，自從小學比人拒絕左之後就唔敢溝女？」唔通同佢講我一日同兩條女出街咩
「唉，小學雞既野就唔好再提啦！柒事不堪回首。」呢個傻仔小學個時學人寫信，點知人地就一句就收佢檔。
「咁點啊？宜家有無目標啊？」我唯有轉話題
「有，不過佢唔鍾意我，睇落都係因為我係肥仔啦......」我拍一拍佢膊頭，安慰下佢，因為我都有經歷過.......
「咁有無樣睇？」我對肥仔俊既對象好好奇，因為佢品味不嬲差開
佢就插左隻手入褲袋，攞左佢部好殘既三星S３出黎，打開左個IG
「佢就係我鍾意個個，佢叫啊澄，同我同班既，不過就......」
我一手攞住佢部機，只見佢無follow人地，而人地都較左私密帳號
「屌你咩，個ICON咁撚細，仲細個你條牙籤仔」都番個ICON有野睇。
「唉，怕撚左你。」佢攞番部機，碌左去圖庫，比左啲相
我睇不出我所料，條女真係差啲。
「嘩，咁撚樣衰！」我大笑
「係啊，個個都咁講，所有我都無奈接受，不過人眼裡出西施，我都係咁鍾意佢。」
佢突然咁講，我都比佢既認真震懾到
「我地呢啲死肥西邊個唔想找個長腿大波妹啊！係我地配唔配得佢既問題啊！」
「咁......」我都無言以對
「我要求向來都唔係高啊！係啲女成日都想找個靚仔運動健將，睇唔起我地姐！」啊俊好激動
「暗戀左佢兩年啦，係兩年啊！個個都話我長情，長情把撚咩？條女會見到你長情？佢仲話我係佢背後講壞話，條女痴撚線嫁，唔鍾意我咪講囉，洗唔洗係人地面前講啲咁既野啊！」係佢眼框凝住既眼淚終於一瀉而下。
「我都係差唔多姐，為佢做左幾多野佢根本唔撚知！」
「我成日都諗，就算佢接受我，咁我應唔應該接受佢呢？」啊俊續道
「啊俊哥，你係咪傻左啊？條女自己送上門你都唔要啊唔通？」
「唔係啊！你諗下，遲啲行到出街，同佢手拖手你就好幸福啦，比人見到會點啊？會比人笑啊！笑咩啊？唔撚襯啊！」
佢講完就跑走左，我一路行番屋企就一路諗岩岩啊俊講過既野。
暗戀一個女仔，係咪只係我地平時單單所講既「只要有付出，就回報？」
定係由一開始，我地已經無資格去付出？無資格去攞回報？
或者係我地自視過高？認為只要努力去比個女仔知道自己有幾咁鍾意自己就夠？
其實我地用幾多努力都係徒勞，命運冥冥之中有安排，唔到我地話事。
之前一個同學同我講過：「個女仔鍾意你既，洗咩去追人啊？」
但咁樣就好容易就錯失你同佢既最佳時期
你以為佢鍾意你，佢就會埋黎？我可以同你講，「唔會」
人往往要錯失好多野先會學懂咩係珍惜，我唔想錯失！
我於是行番去既時候，無直接行番屋企，我行到佢樓下。
我好想好想話比佢聽我幾咁鍾意佢，我好想好想同佢講一句「聖誕快樂」
但係我都係無勇氣，係，我係好鍾意佢，咁點啊？
鍾意人大曬？鍾意人就可以亂咁介入人地既生活？
被暗戀個個可能會因為你既一個無腦表白令佢既生活都亂曬有啲野本來可以一齊做，例如一齊玩，一齊做功課，一齊去為一啲野去努力
但最後佢可能因為避你而逃避，本來可以一齊做既野都比一個無腦既表白而破壞
我一直猜疑我係佢心目中係一個咩既人，一個佢鍾意左好耐既人？一個讀書唔叻既人？一個只係日打晚打既機迷？
我宜家先知，暗戀係唔一定有好結果，如果個女仔唔鍾意你，你可能會去傷心，可能會去檢視自己既不足，天真到話要為佢改變，天真到話同佢拍拖之後話要好好咁疼愛佢。
暗戀比人睇得太好，但當你暗戀左一個女仔兩二年，佢突然同你講佢根本唔鍾意你，係你自己一廂情願，呢個打擊，唔好受。