肥宅 點溝女神啊: 第十二章 送我比你?
「係咪應該停啦？」我一直咁問自己。
我就係一個咁既情緒下入睡。
第二朝醒左，我既例行公事都當係攞起放左係右手邊既電話
「３個WHATSAPP傳來既信息」唔知點解每次望到有人找我，個心好似好滿足咁，可能平時都無咩人WTS我啦。
一睇，三個都係安琦發個黎，見到係佢我個人總係感覺安穩。
「喂，原來你未送禮物比我啵！」
「我陪左你咁耐，都係比肉金我囉！」
「都唔應人既(怒)」全部都係三四點發過黎，第一次收到女仔既WTS會令我有曖昧既感覺。
我都唔想得失呢位紅顏知己，馬上我都應返佢。
「琦妹，你成三四點先同我講野，我點覆你啊？」
「你要咩禮物啊？」佢都即刻回左過黎，都唔知佢係咪永遠捕係電話面前
「你送咩我要咩」佢咁答法同問啲港女要食咩有咩分別，送公仔又唔實用，送擺設又話無用。
「你係咪玩野啊？(怒)」
「做咩姐，我講真嫁，你買咩我都岩，不過最好有啲心思啦」
屌，你咪講左個答案囉！成日都要人估。
「ｏｋ！」口頭話就話無問題，其實我仲未諗到。
「我等你啊(心心眼)」除左我媽子同我家姐之外，第一次有人打心心眼比我。
其實禮物呢未野我就從來都無送過比人，一向都係人地送比我。
我打開左我家姐間房，見佢係到溫緊書。
「姐~~」我用嬌嗲既語氣叫左一聲
「做咩姐你？」佢用無奈既眼神望住我
「無啊，有野找你求救！」跟住我就一五一十將我既野講曬比佢聽，我家姐都可以話係信得過，只係有時成日係老豆面前篤鳩我背隻令我有啲不爽。
「哦，大個仔啵！」佢摸一摸我個頭
「係啊，咁點好呢？」
「心思......」我見佢都好似無咩頭緒，睇黎我似找錯人......
「啊！我諗到啦！」當我以為佢有咩驚天動地既構思
「送你自己比佢咪得囉！」佢淺笑
「吓......我都唔係溝女！」
「求其啦！唔知啊！出去出去！」
「啪！」一聲佢就關左對門車，仲以為找佢幫拖實無死！
我隨手打開個whatsapp
「喂，不如我送我自己好唔好！」外加一大埋笑哭
「好......」唔係掛，我講笑咋
「你唔係認真啊？我講笑咋！」再外加一大堆笑哭
「衰人！！！」我講錯啲咩啊！
跟住我找左佢成個朝頭早都找唔到佢，唉，成日發埋啲小朋友脾氣。
「最好係有心思既野......」呢個問題真係煩左我大半日
佢唔會唔會係想要電影入面果啲好撚濕鳩既用花圍個圈然後同佢......表白！！
「屌，我諗左去邊啊！」或許我太過上心，定係我唔想得失呢位紅顏知己？
呢個時候，我老豆間房傳黎叫聲「細老，個黎幫老豆汁野！」
「哦！」我都大聲回應
每次我老豆食完晏晝都會叫我幫，我係佢間房托左個盤出去廚房
正當我執好曬啲野，發現自己執漏左個酒瓶，我老豆好鍾意飲紅酒，所以屋企成日見到啲空酒瓶。
我突然靈機一觸，終於知道有咩野心思野啦！我攞齊要用既野就走左入廁所......
Boxing Day 既夜晚9點，我食完飯我就衝左出門口。
臨出門口個時，我家姐對我舉起手指公，我同樣以手指公回應。
出到Lift，我打開WhatApp。
「喂，琦妹，落一落黎先。」
「做咩啊？人地岩岩食完飯啊，唔制！」
「唉，咁我份聖誕禮物扔左佢算。」
「喂哎，唔準啊！我落啦我落啦！」唉，呢個時勢啲女真難搞，仲要公主病。
等左十幾分鐘，我企到扯lin旗佢都仲未落黎，正正係我想歸去之際，有人嗌住左我......
「喂，死人頭，想走？」係一把妹妹仔既語氣
「無啲耐性，咁樣女仔唔鍾意嫁！」
「嘩......」我見到佢既打扮我簡直係扯到盡，佢睇落係化過妝，仲要係黑絲......
「無啦，扔左啦！咁遲啊啦！」我指住遠處既垃圾桶
「吓......」佢慢慢由失望轉左去哭：「衰人衰人衰人！」佢不斷拍打我膊頭
「喂，傻女，望下先啦。」我將放左係後面既酒瓶做花瓶攞左出黎，上面插左支玫瑰。
佢一手就搶去左我手上既花瓶，係到眼甘甘咁望住，見到佢咁鍾意個花瓶，心入面就會有一份莫名其妙既滿足咁。
「好靚啊！我好鍾意啊！」媽啊，我太聰明啦，只係用左１６蚊買左枝花就哄到條女咁，我唔去溝女仲有咩做啊，奈何我只係個肥宅，我諗呢一步比起我所有既第一次都要大膽。
「多謝......」佢低頭望地下，面上泛紅
「唔洗......」搞到我都有少少尷尬
「我走先啦......」係我轉身個時，佢兩手捉住我雙肩，個頭哄埋黎......錫左
同以往既唔同，佢再唔係錫我面豬登，係嘴對嘴......
安琦既嘴唇好薄，有一絲既暖意，正正我想放口既時候，我feel到對面嘴伸緊條脷過黎......
我一手就推開左佢，氣氛突然唔同曬。
「你唔係話送你比我咩？」佢眼濕濕咁望住我
「你明知我......」我個心入面只係得啊言
「啊言啊嘛，係咪啊！」佢變得好激動，情形就好似係上年平安夜
「佢有咩咁吸引你啊？我有咩比唔上佢啊？點解你地就係要去愛一個佢唔愛你既人啊？」
望見一個女仔比我搞哭，我心底真係好唔舒服。
「但係你明知我鍾意左啊言好耐嫁......」
「你仲記唔記得前日我地係公園個時既事啊？」
我地個晚就好似一對小情侶咁，坐左係公園既一角，你靠住我既肩上，我靠係你既頭上。
「個晚我可能將你投射左落啊言到我先......」
「原來所有感情都係我自己一個幻想出黎！」
「我唔值得你咁去為我傷心嫁，我只係一個無用，只係識打機，讀書唔叻既肥宅黎，我配你唔起啊！」
「我問你，你有無曾經對我有感覺？」
我對安琦既感覺......只係肥宅對女神既果份仰慕？定係鍾意人既果份甜密？我諗其實兩樣都有，做戀人我配佢唔起，做朋友都還可以。
「有，我曾經好想你做我女朋友，你係我身邊既時候可以話係最溫暖，你可以話係第一個對我咁好既女仔，但係我越係鍾意你，我就越係唔想你係我身邊咁糟蹋，你係一個好女仔，應該係由一個好男仔去照顧你，比溫暖你，我只係一個唔想去改變現況，一直逃避既死肥仔，你放過我既同時，等於放過你自己。」
安琦聽完一面眼淚，我唔知點去安慰身邊呢一個淚人，我無諗過我一個平平無奇既肥仔，竟然會去拒絕一個女神交往既邀請。
「咁你明知自己係咁無條件，點解你仲去暗戀啊言？」佢一路哭一路講，睇黎係平伏左小小
「因為我從來都無諗過要同佢開始，佢係一個好好既女仔，曾經有比我好一百倍既男仔不斷係佢身邊出現，我都無法子，我只係一個係佢眼中係一個同學。朋友？戀人？甚至係夫妻？我從來都無幻想過，有時自量係一件好重要既事，所以我唔想同你開始，都唔想同啊言開始，我唔係你既MrRight啊！」
「你真係好鍾意啊言？」佢既眼淚呢個時候已經收番埋。
「係，我係一個好細好細既小粉絲。」
「嗯，咁我以後唔再煩你啦！」佢講完轉身就走，佢既身影比我覺得佢好灑脫，比我成熟得多，我只係識比自己一大堆藉口，但係唔識比自己一個放手既藉口。
我都唔知點解自己會真係整樣野送比佢，可能我渴望要個妹妹，搞到我好想去疼惜呢一個妹妹，最慘既係佢會錯意......
我曾經話過想比人傷，宜家就到我傷人。