《相交的平行線》: 第二十三話
「人一但迷醉於自身的軟弱之中，便會一味軟弱下去，會在眾人的目光下倒在街頭，倒在地上，倒在比地面更低的地方。」──生命中不能承受的輕
「嘻嘻，你而家呢個樣好有玩running man個時嘅風範。」 妳突然說。
「唔好講笑住，我地搵左口罩及眼罩先，我諗今晚有機會要係度過夜。」
「Yes Sir.」
然而，我們便去找些物資。香港人反應是很快，不久，已經有人去設立物資站。我們去到物資站，他們便給了我們一些口罩及眼罩。道謝後，妳的電話突然響起。
在你接電話時，我除了緊牽著妳之外，還時刻警惕的凝視著四周，生怕有什麼突發的事故。入夜之後，催淚彈及橡膠子彈的消息四周蔓延，令到示威者的人數隨著時間而增加，示威者亦相繼到達金鐘，與警察膠著。但相反的，有不少政治領袖都出來表示，警察已經使用橡膠子彈，故正式呼籲所有示威者全面撒離，更道抗爭必須保留實力，擇日再聚。
看到這兒，我們已經備受攻擊，但是什麼都爭取不到，就要撒離。我不甘心，同時，落下了一滴淚，為了香港，為了所有示威者，更是為了未來。
「我唔想離開呀，呀單。」
「我都係。」
「我地都真係幾癲，拍拖拍到嚟示威，哈哈。」
「都係嫁，啱啱邊個打俾妳呀？好似好嚴肅咁。」
「係呀係呀，差啲唔記得，係我家姐呀，佢問我而家係唔係係金鐘，家佢地嚟緊搵我地。」
「Oh…okay.」
然而，我們便坐在街頭，與眾多的示威者跟警察對峙，等待著。
「小淇。」 突然一聲劃破了我們之間的沉默，我向音源望去，一個酷像ABC的女生和一名男生走了過來。她雖然不高，更帶點稚氣，但是樣貌十分標緻，無限接近黃金比例般的臉龐，令人有種目不暇給的感覺。
「濋濋姐姐。」說罷，妳們便相擁起來。
「小淇，你冇事就好啦。」
「因為佢，我先冇事咋，個白痴仔為左我，比左毛巾我用，而自己就帶我衝過啲催淚氣體。」
「佢就係你同我提過嘅男朋友呀？」
「係呀，佢就係呀單。」
「呀單你好，終於見到你啦。」 濋濋向我的笑一笑道。
「你好。」 我還在警戒著周圍。
「好似幾可靠咁嘅樣喎。淇淇，呀爸呀媽有冇搵過你？」
「之前係街撞到佢地，但之後又話公司仲有好多嘢要handle，所以會係公司附近住先，未番過屋企。」
「咁你就要去諗點樣解釋你呢個男朋友嘅存在啦，你知佢地要求幾高嫁啦，仲有就係佢地應該會反對我地留係度。」
「濋濋姐姐，我已經諗得好清楚，我係唔會妥協嫁，因為…因為我真係好鍾意呢個傻仔呀。」
「淇淇，你識左呢個人之後果然唔同左。我呢個妹呢，外人見到你就似足一個領導，其實呢，就怕事到極，從來都唔敢反抗。」
「我都知，所以我先要好好保護佢。」 然而，我緊緊的牽著妳手回答。
「係就最好，你仲未知我父母為左淇淇成才會做得出啲咩嘢。」
之後，我們便站在金鐘的街上，佔領著，閒談著還有等待著。未果，便收到消息旺角及銅鑼灣相應發生佔領行動，演變成滿地開花的境況。警方驅散行動失敗以後，示威聲勢愈來愈大，但警方並沒有因此而罷手。
我們二人為了照應，便加入了濋濋一行人之中。原來濋濋的朋友是大學社會學系莊員，現為學聯義工，幫忙在佔領行動的一切工作。然而，我們便幫忙設立物資站。在物資站內，有著各式的口罩，眼罩，以及生理鹽水，的確是為了防備警方進一步的驅散行動。
我看妳已經累透，便叫妳坐在椅上休息。未幾，妳已經睡著了。但這時，濋濋卻向我這邊答話。
「呀單，我唔想淇淇再受傷害。」
「我都唔想。」
「我見你都算可靠，唔怪之得淇淇會睇上你。」
「我其實好懶。」
「懶好呀，通常聰明嘅人先會懶。」
「哈哈。」
「你知唔知點解我會離家出走？」
「因為同父母不和，所以離開？」
「咁淇淇都講左你知，但佢知道嘅並唔係全部。我就將成個故事講你知，希望你可以借鏡，唔好再犯我同樣嘅錯。」
「嗯。」
多聲爆炸聲突然響起！然後，有四周便泛起黃煙。弊哉，拿起數個口罩及眼罩，便衝向妳面前。
「傻豬起身啦，要行啦！」
「天光啦？」 妳睡眼惺忪的問。
我並沒有答妳，只是把眼罩及口罩戴好，背起我們的背囊，然後便拉著妳向灣仔的方向跑去。濋濋他們亦跟了上來，當我們步出帳篷，一個催淚彈射到我們剛才的位置。
「嘩，真係好彩。」 同行的一個男仔說。
「走啦，講咁多。」 濋濋卻說。
今次警方想著大規模的驅散，發放多枚催淚彈，波及範圍之大，連演藝學院也受到影響。大批示威者爭相走避，而我們便退到接近灣仔才停下來。
「淇淇妳有冇野呀？」 我緊張的看看妳。
「冇呀，只係有啲未瞓醒。」 妳便打了個呵欠。
「咁就好。」 說了，我便緊抱著妳。
「嘩，啱啱見唔見到呀，我地一出帳篷，就成個催淚彈飛左入去。」
「見到呀見到呀，好彩走得快，如果唔係食正。」
「多得呀單發現得早，唔係就…」濋濋說。
「係呀，如果唔係見到佢突然跑，我地仲企在係度睇緊，意識唔到。」
我只是笑一笑而已，因為，我知道警方定能取回金鐘。難道要結束了嗎？真不甘心。
「呀單呀，要結束了嗎？」 妳頂著擔憂的臉。
「咁我地等煙開始散就行番去啦。」
「嗯。」
「淇淇，難怪你地係晏畫嘅時候冇事，佢又真係幾可靠喎。」
「係呀，佢仲對我好好添。」
我們看到煙霧散時，便向原來的位置回去了。同時亦有人一同與我們回去，為的，不是領地，不是情緒，而是為了取回我們應有的。
回到原來的物資站，雖然黃煙散了，但還帶點刺激的氣味。我踢走催淚彈剩餘之物。當執拾站內時，便有學聯的人走來，指示此站的物資明日要搬去銅鑼灣支援。濋濋的朋友收到資訊後便示意我們執拾所有，並等待出發至該處。
但出發之前，不少的政治領袖爭相持咪講話。說的盡是徹退，保留實力，為了更長遠的路。
「你想去講話？」 濋濋突然的問。
「唔係，只係唔明白，而家已經聚集到咁多人，只要等待，或者升級，就能進一步邁向成功，到達民主之路。不論戰略係點，都唔係勸退嘅時候。而家民情高漲，唔係淋熄嘅時機。我唔明白，若果退，就真係衰晒。雖然香港嘅政治領袖一向鐘意同群眾講自己受左幾多苦，點為政治犧牲，然後沉醉係自身嘅軟弱當中。如米蘭昆德拉所說，人一但迷醉於自身的軟弱之中，便會一味軟弱下去，會在眾人的目光下倒在街頭，倒在地上，倒在比地面更低的地方。或者係中國文化嘅通病，不以成敗論英雄。但係我地之所以行出黎，只係為左我地所應得嘅，並唔係俾佢地提取政治資本嘅時候。」
「嘩，淇淇，佢真係得喎。」
「係咪呢，我都話啦。」
「嗯，同時又討厭媚俗，成個現代托馬斯醫生（《生命中不能承受的輕》男主角）咁樣。」
「嘻，其實佢有啲似嫁，但係唔同嘅係佢會認為托馬斯醫生好犬儒。」