《完美犯罪手冊》 - 為了上進而失去一切的故事: 12
『先生？』
「下？」
『冇…我見到你出哂汗咁…你坐低等等，我叫人斟杯水比你。』
我摸一摸額頭：「係…好…唔該。」
我已經完全分析唔到，就好似一隻坐以待斃既獵物咁，準備被猛獸吞噬。
『對唔住呀先生…因為呢排冷氣維修緊，煩請先生你將就一下。』
「嗯…」
『咁先生你等一陣，我去幫你處理張單，一陣會有人拎水比你，請稍等。』
「好，唔該…」
我因為緊張，已經出汗出到成個額頭都係…
個女仔要去邊？去搵證據？去聯絡香港分店…？
咁我而家應該走…定唔走好…？如果走既話，萬一撞到警察咁點算？
頭先一開始幫我果個Sales…到底…
『喂你點做野架？』
「唔…唔好意思！」
聽到遠方放錶果個陳列區，好似有人係度鬧交咁。
於是，我就望過去八卦一下。
『你都唔係第一日返工架啦？做少少野都可以做到咁既？』一名女售貨員道。
「對唔住…」另一名女售貨員不斷低頭道歉。
我認得呢個女仔，就係我岩岩入門口幫我果個！
『唉，頂你唔順！好彩你冇整到我ｄ客咋！如果唔係一定寫花你份P！』
「對唔住Connie姐！…我而家即刻抹返…」
『快手啦！個客仲等緊架！』
寫花佢份P…？
「P」呢個字好似係邊度聽過…
我記得喇，係岩岩入職時果份Portfolio！
呢份野係評核員工頭三個月既表現，去衡量比唔比新員工過試用期既表格！
換句話講，果個幫過我既女仔果然冇講大話，真係新入職既員工。
咁樣既話，即係話我而家仲係好安全…
而果個總經理…應該係真係幫我處理緊…
咁樣既話我就可以繼續安心咁慢慢等。
『先生，請喝杯水…』忽然有人拎住個盤過黎。
「呃…好…唔該…」我拎住杯水飲左一口。
『先生你……』女員工停左下：『你識講廣東話既…？』
「係，其實我都係香港人黎，因為我慣左係大陸生活，加上我朋友都係呢度既員工，只不過佢係大陸分店工作…所以我岩岩先會講國語…」
我將一連串籍口合理地串通埋一齊。
『哦哦……』
「同埋…」我接住講：「你知啦，係香港澳門講國語，你地既招呼都會好ｄ架嘛？」
『哈…』新入職女仔害羞地笑了笑：『先生你…仲未辦理好退款？』
「嗯，你地經理幫我處理緊。」
『哦…咁我去忙先啦，先生你有需要再叫我。』
「等等。」
『嗯？』
「我想問下…果個總經理…」
弊，我應該點問好…！？
『總經理…？』她打斷道：『哦，佢好好人架。』
「好好人？」
『嗯…不過佢好少會出店面既…』
「咁點解佢……」
『因為今日經理放假，而且其他日常既主管…一唔係就放大假…一唔係就請假…所以…唔好意思呀…係咪我有咩做得唔好…？』
呢個女仔好似怕左我問佢經理既事係想投訴佢咁。
「呃，你放鬆啲，我唔係要投訴你，只不過係退款咁少事，估唔到要麻煩到你地既總經理之嘛？」
『哦…唔好意思呀…因為我新入職…希望你唔好見怪…』
「哈哈…傻啦，點會呢？同埋你唔洗再講唔好意思啦，再講就真係到我唔好意思喇。」
『先生你真係好人～』
「呀，我岩岩咪話要退款再買既？」
『係～？』
「唔知你可唔可以幫我Keep住d貨先呢？我聽日叫埋我朋友黎買。」
『可以呀。』
「咁你咪可以開大單囉？」
『哦……係喎…』
當然，我唔會返黎買啦。
我未至於飢渴到做呢ｄ野都會對一個女仔「沈船」…
不過，可以氹下女仔開心，都係男人既天性黎既。
忽然間。
有個著住制服，年約四十幾歲既女人行埋黎。
『Connie姐…』
如果我冇估錯既話，呢個女人就係岩岩話要寫花佢份評估果個女人，亦即係佢既Trainner。
職位應該係同我係香港分店既阿Ma一樣。
『先生你好，請問有什麼需要嗎？』個女人完全冇理自己同事，淨係同我講野。
「我識講廣東話。」
『噢，Sorry…』呢個叫Connie既女人擰轉面細細聲咁同個新入職同事講：『仲唔去執倉？！』
而果個新入職既女仔，就好可憐咁比佢點左入倉做野…
然後我就開口：「但係果個女仔岩岩幫緊我……」
『果個女仔有野做，佢交低左比我幫先生你，請問先生係咪有需要Keep貨？』
屌，明明係你迫走佢…
「係啊，呢袋。」
『但…』Connie望一望個袋：『呢袋應該係埋左單既…？』
「所以話你唔知頭唔知路，幫乜鬼我丫？我而家黎退貨既！聽日再搵員工朋友黎買返！妖，又要我講多次！」
其實我都明白既，一間競爭咁大既鋪頭，恰新人係好正常既事。
但好似呢個女人恰得咁出面既，就真係好少有。
我好慶幸…我係香港係跟Maria，如果跟著呢件咁既中女…真係唔洗有運行都似。
『好好好！先生一於交比我，我一定幫你keep得靚靚仔仔！』Connie雙眼發光，十分雀躍。
「唉，是但啦。」
『咁我幫你辦退款先？』
「唔洗喇…」我望一望遠方：「呢個女仔幫緊我辦。」
『邊個？』Connie一擰轉面：『Ath…Athena…』
Athena拎住一個信封行埋黎：『先生要你等唔好意思。』
「唔緊要。」我淡定回答。
同時Connie即刻開聲：『咁…我去做野先…』
『唔洗住，』Athena繼續講：『你繼續幫呢位先生，我幫佢辦埋退款你可以繼續跟。』
『好…』Connie好尷尬咁回應。
『先生，麻煩呢邊。』Athena禮貌地示意我去收銀處。
「好，唔該。」
我望住Athena手上面既信封。
如果我冇估錯，果個信封應該…應該…應該就係錢！
因為店入面冇咁多現金，所以佢會去帳房簽現金出黎，
仲搞到我岩岩鬼死咁騰雞，唉，我終於明白咩叫作賊心虛。
當我去到收銀，Athena就負責按電腦，而Connie就企埋一邊等幫我Keep起我帶黎既貨。
呢個場面，十足十好似非洲大草原上，一隻獅子獵食，而身旁企左隻獵狗一樣。
『先生，我地需要Check一Check 啲貨，麻煩等等。』Athena續道：『Connie，你幫我手』
「隨便。」
個Connie搏哂老命咁檢查，仲不斷笑笑口，難掩佢內心既興奮。
梗係啦，呢度成二十萬單，差不多等如佢一個月既業積，唔開心就奇。
反而Athena只係巡例就咁望一望就算。
唔知點解，呢個Athena從帳房出完黎之後，就好似變左另一個人咁。
明明岩岩仲好Nice，但一做正事就變左一個冷酷無情既人一樣。
唔通呢個就係佢認真mode個樣？
定係面對下屬既上司本色？
估唔到佢細細粒…做起野黎咁有威嚴…
『先生，呢度總共三十條圍巾，每條6,800蚊，總數係二十萬零四千蚊。』
「嗯。」
『睇返你果時既payment，係現金，咁我地而家會退返現金比你。』
「好，唔該。」
Athena打左幾下電腦，就拎出信封。
冇錯！就係錢…！
『我先數一次比你，然後你再數一次確認，有冇問題？』
「OK。」
Athena一邊數，我就一路望住佢個樣。
唔知點解，佢咁可愛既樣，做啲咁認真既事反而好唔襯佢…
我諗佢返工要負起咁大責任一定好累架喇…又要同成班男人開會，又要睇住ｄ細，又要擔心生意，又要擔心員工表現…
忽然間，我好想借個膊頭比佢…係佢收左工既時候比佢依靠一下…
等佢可以做返一個簡簡單單既女仔…一齊行街食飯睇戲咁，你話幾幸福？
不過，我估佢都應該有好大負擔，只係唔顯現係人前。
我同Athena都一樣，內心都有好大壓力，所以，我亦感覺到佢內心既想法。
雖然好想照顧佢，不過呢種感覺…
一瞬即逝。
『係，呢度港幣二十萬零四千蚊，先生麻煩你數一數。』Athena一邊講，旁邊既Connie雙眼發光。
「唔洗，我信得過你。」
『之但係…』
「就算我有咩問題都唔會追究，況且我聽日仲會返黎買返架嘛，放心。」
呢個時候，Connie就出聲。
『咁…先生先生，不如我幫你keep起ｄ貨先？』
「好，」我扮野望一望手錶：「我大概聽日夜晚七點左右黎。」
『好，咁留返聯絡資料？』
「我姓雅。」當然，呢一個係假名。
『雅？』Connie同身邊既Athena都呆左一呆。
「係，優雅果個雅，電話係6xxx xxxx。幫我keep好少少。」
『雅先生…咁我幫你留起啦。』connie笑到見牙唔見眼。
「好。」
『呀～唔好介意啊先生，』Connie追問：『點解你買咁多圍巾既？』
憑你呢個波大冇腦既中女想試我？
「因為我做水貨既。」我故意扮到唔想比人知：「有問題？」
『無無無…咁多謝雅先生你先。』
我一邊收埋ｄ錢，一邊講：「嗯，咁聽日見。」
『聽日見喇雅先生，黎黎黎，我送你！慢慢行。』
就係咁，呢個Connie就好似蜜蜂見到蜜糖一樣，萬分不捨咁送我走。
唔好話我話，佢聽到我係水貨客，我相信佢真係出哂水。
我指口水。
梗係啦，我地做sales既，最希望就係遇到有水貨客幫襯。
但耐何水貨客好少有，就算有都比ｄ老屎忽變哂佢地做熟客，所以真係可遇不可求。
難怪Connie見到我會咁既。
之後，我笠低頭，露出萬惡般如惡魔既微笑，將信封，慢慢放入單肩袋中。
終於…
終於……
計劃成功。
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
「雅…先生……」
『Athena…你呆左咁企係度做咩…？』
「冇事…Connie…」
『哦～頭先果個雅先生真係唔話得啊！我地好耐冇開過咁大張單啦！』
「唔通……」
『Athena，你講咩？』
「冇…你去做野先。」
『哦…咁我去keep埋ｄ貨去客留區先。』
「唔洗喇。」
『下…？』
「散哂啲貨佢，佢唔會返黎買。」
『咩話…？點解啊…？』Connie抱住一大堆貨發呆。
「散哂佢，散唔哂就擺返入倉，唔洗幫佢留，你照做就得。」
『之但係……！』
「如果佢返黎買，我幫你拎返出黎比佢。」
『咁又唔洗…我邊敢…但…Athena你點解肯定佢唔會返黎買…？』
「呢層…」Athena縐著眉：「你唔需要知。去做野啦。」
『哦……』
當connie走左，Athena亦返入自己經理房。
成間店又變返一片繁華，每個人都各有各忙。
呢個時候既Athena坐係度，一邊咬住原子筆，一邊思考。
「雅先生…Athena…雅典娜…？佢咁做…係取笑我？」