『大家繼續幫客人,距離今日既Target仲爭三十萬!』 



Athena剛踏入店鋪,親切地同新入職女員工打招呼後,就對住店內既全體員工訓話。 

佢對待下屬時整個嬌小身軀所散發出黎既氣場,可謂絕對不下於三國長板橋既張飛。 

然而Athena見到一號收銀處有客人,即係「我」係度用緊時,佢就去左近門口既二號收銀。 



而我當然擰轉面,唔想同佢有眼神接觸。 

至於我…點解仲唔走? 

唔係我唔想走,而係我走唔到。 

因為二號收銀處就位處於門口既右手邊,只要我一行出門口,就會同佢撞到正一正! 

假如我就咁行去,果個Athena一定會叫門口既保安截住我。 



我別無選擇。 

所以,我係大家不約而同咁望去門口時,我就立即同身邊既阿嬸Sales開口。 


「呀,對了,我想挑一件生日禮物給我女朋友,請問你有什麼推介嗎?」 


果個阿嬸被我一反常態既語氣嚇左一跳,臉上有少少難以致信既表情。 



不過,基於有總經理黎到,而眼前既呢個人又有咁多錢,個阿嬸一定心諗佢自己可以sell到我買更多野,從而補返今日退款條數。 

所以,佢冇覺得有咩異常,立即就幫我諗。 

『先生請問您的女朋友平常是什麼打扮呢?』 


呢個時候,我背對住所有人,淨係面向住一號收銀處。 

而一號收銀處就只係有阿嬸Sales一個人。 

理論上Athena應該察覺唔到我既存在… 

一定係咁!所以佢先去左二號收銀處睇今日既營業額。 




「我女朋友……」 


的確…我唔一定要買野,只要慢慢同呢個阿嬸Sales一邊吹水,一邊等時間既話… 

果個Athena應該好快就會入經理房,又或者離開呢間鋪。 

到時候我就可以光明正大咁行出門口。



『先生?』阿嬸呆左咁望一望我。 


「我女朋友…」我回過神來:「她長得不高…身材很嬌小…算是那種可愛的風格。」 



『可愛風…那跟我來這邊吧,我介紹一些很適合你女朋友的給你。』 

「不用了。」 


而家行過去容乜易比佢見到?! 

唔得,我一定要拖時間… 

比果個Athena見到,一定水洗都唔清。 


「我趕時間,你拿幾件圍巾過來給我挑一下就行了。」 




而家呢個情況可謂非常尷尬… 

第一、係Athena未離開店鋪之前,我都唔可以行出去呢個門口,因為會撞到正。 

第二、我要拖延時間,等Athena行開,再從而離開佢視線之下走人。 

又或者,我可以搏一搏。 


『好,那請你稍等。』 

「嗯。」 

等佢慢慢去拎貨時,我就企係收銀處玩手機。 



咁樣我就可以拖延時間。 

係佢走左之後,我偷偷地用眼角既餘光望左門口一眼。 

由於我身處既一號收銀處,係係正門既左邊較後既位置;而二號收銀處,即Athena而家既位置,就係門口右手邊。 

望左一眼之後,果然…佢仲係果度撳電腦。 

頂佢個肺,到底幾時先走架佢…? 

佢一日唔走…我一日都離唔開呢度… 

點算好…



『先生~』阿嬸Sales拎住一大堆圍巾過黎:『您挑一下吧!』 


「嘩…那麼多…」 

『這幾款跟你之前買的完全不一樣的!質料沒那麼厚,而且比較時尚一點,一定很適合您的女朋友的。』 

「好…我看看…」 


我企係收銀台度一邊揀,一邊係度拖延時間。 

我送比女朋友…會送邊款呢…? 

女朋友…… 

有喇! 

既然佢唔肯走既話,我就令佢走!我可以黎多次反客為主! 


「對了,我剛不是說我女朋友身材很嬌小,長得很可愛嗎?」 

『是的,先生。』 

「那為什麼你拿過來的款那麼的成熟?」 

『喔…不好意思,』阿嬸慌忙道:『我立即幫你換一批!』 

「這樣吧…」我四處張望:「我女朋友…就像…對了,就像那邊那位女生。」 

阿嬸探頭出來張望:『那邊…』 

「對,就是她。」 

『但是…』 

「不用但是了,你叫她到試衣間,把圍巾衣服搭配一下後全試上,如果適合我就全都打包了!」 

『呃…先生…她…不是我們店的員工來的…』 

「不是你們店的?那她為什麼在你們的收銀台內工作?」 

『她…她是…』



「那就是你們公司的人吧!」我立即打斷。 


『那…我問一下她…請你稍等…』 

「嗯,那我去男裝那邊逛逛。」 


搞掂! 

因為佢係公司既總經理,基於「客人永遠是對的」呢個原則底下, 

雖然佢睇緊盤數,但有客人有要求佢做既事佢都一定會做! 

記得係香港分店做野時,都試過有男客人叫我地啲女Sales試穿效果睇下,從而判斷適唔適合買黎做禮物送比女性。 

所以,我估Athena一定唔會拒絕,因為佢要為左做生意做個好榜樣比其他同事睇。 

而我…就可以係佢入左試身室換衫時,立即行出店門口! 

我絕對…唔會坐以待斃。 


『先生…』 

「怎樣?」 

『那位小姐說樂意答應幫你試穿一下效果…現在她去試衣間了。』 

「喔…是嗎?」 


我望一望門口右邊既收銀處…果…果然! 

Athena唔見左! 

即係話而家Athena入左試身室,呢個係我逃脫既最好時機! 

「那好,我先上一下廁所,待會回來。」 

『那……』 

「你怕我不回來嗎?」 

『我不是這個意思…』 

「放心吧!有什麼事情比女朋友生日更重要呢?」 

阿嬸放鬆笑了一下:『對對對…那你慢慢,待會回來找我就行了,謝謝你。』




成功! 


終於成功喇! 

我呢一刻既心情,好想狂奔出去門口! 

但唔得…我要忍住…要抑壓住… 

我以正常既速度,慢慢離開男裝部,再轉身面向正門口。 

我一望過去正門,就只有一開始幫我果個高瘦女仔係度摺衫,仲有幾個客人都有人幫緊。 

依現場氣氛黎睇,Athena已經離開左呢個範圍。 

即亦係阿嬸Sales已經同Athena講左有客人想佢試身! 


一切一切都依我既計劃進行,而且仲好順利地每一步都係我計算之內。 

我摸住袋入面疊錢…內心既興奮令我身體不斷微微顫抖。 

我同門口摺衫既女仔,好有禮貌咁互相微笑點頭。 

然後,我準備踏出大門,離開呢個地方! 


哈,我仲見到阿Dee係門口等緊我。 

一見到阿Dee,我立即露出璨爛開懷既笑容。 



當我正想同佢揮手之時。 


咪住。 

點解阿Dee明明見到我…都木無表情既? 


正常我地平時同朋友見面,第一時間都會露出一個熟悉既微笑。 

呢一點每一個人都會,亦係分別出陌生人同熟人既舉動。 

但點解…阿Dee同我眼神交流左之後,反而望去另一邊?而且仲低頭睇返手機? 

唔妥… 

唔對路… 

當我準備望一望後面既時候。 


啪。 


有人…拍我膊頭? 


『雅先生。』 


呢一聲,從我耳後邊傳出。 


「………」 


我雖然非常驚訝,一剎那之間我已裝作冷靜。 

我轉過頭來,面對果個… 



既熟悉又陌生既人。 



『嘻嘻,我地…又見面喇~』 




點解會咁…