《完美犯罪手冊》 - 為了上進而失去一切的故事: 《盲目》
『唔得，阿沁，你叫我做咩都得，但呢樣真係唔好搞…』
我一有呢個想法，阿Dee就態度凝重起黎。
「阿dee，你放鬆d先…我都係講下姐，你覺得難既話可以唔做。」
『我唔係唔信你呀…我知阿沁你有計劃既話，就算唔係完美都近乎無破綻，但…呢份工唔單止係我一個人做架。』
我諗，我知道阿Dee擔心d咩。
「你係怕你阿爸會知？」
『嗯…唔係怕，係一定會知。』阿Dee望住杯檸茶：『唔單止咁…呢一行其實好細，如果做既話…唔單止我阿爸知，可能全行都知，甚至上埋新聞全香港都知呀！』
「我都明白……」
『阿沁，我唔係信唔過你，但呢ｄ野真係唔好搞喇！唔係好似肥婆咁一兩個人既事，係整間銀行既事啊！』
「但如果成功左，我同你都唔洗再做喎！」我試圖不斷誘導阿Dee。
『如果失敗呢？』
「我唔會失敗。」
『阿沁！我知你凡事都向好果面諗，但你醒下啦！呢個世界唔會有永遠立於不敗之地既人架！』
「我知…」我嘗試緩和一下氣氛：「可能我係第一個呢？」
『萬一衰左，我同你呢一世就玩完架喇！』
「如果成功左，我同你呢一世都唔洗再做。」
『屌，講極都唔明！阿沁你係咪上撚左腦呀？』
「我上腦？」
『我知你呢方面好叻好聰明，但你知唔知咁做你唔淨止係同一班人鬥，而係同成個香港既人鬥呀！到時整個警處既人，重案呀，銀行呀，我公司內部都會查呢件事架！』
「………」阿dee開始激動，而我就選擇沈默。
『你醒下啦！就算你幾醒，幾聰明，只要一個破綻，你就玩撚完架喇！』
「嗯……」
『你覺得你一個人可以諗得哂所有線索咩？就算加埋我都冇可能啦！到時件事通哂天，全香港咁多人，我地點鬥呀！』
「得啦…我明架喇…」
『阿沁，做兄弟我真係唔想見到你死，呢ｄ野唔係唔可以做…但…搵ｄ低調ｄ架啦…』
「好…Sorry阿Dee，我唔應該咁講野。」
『我明白你想快ｄ搵多ｄ錢…但…安全永遠係最緊要。』
「嗯……」
『呢疊錢…』阿Dee指住個信封：『交比你先喇…你覺得時機岩先去『洗返乾淨』佢。』
「好。不過同阿Dee你講聲，你要預返半年後風聲冇咁緊先用到ｄ錢。」
『嗯……』
「同埋多謝你岩岩果番說話。」
『做兄弟，冇計既…你知我為你好先屌醒你就得。』
「呀，係喇，如果你呢排有需要用到錢，同我講，我一定會幫你。」
『好。』
「阿姨身體有冇好返ｄ？」
『有心喇…不過阿媽佢身體愈來愈差…每次做完電療都食唔到野，食完都會嘔返出黎…』
「嗯……有時間我都探下佢…記得中學果時去你屋企佢都會煮埋我飯…估唔到…」
『人生無常…我地都廿幾歲啦…家人開始老，病痛一定會多…』
「喂，時間都唔早，你聽日應該仲要返工？」
『係呀…』
「咁…再約啦！有其他荀野一定搵埋你。」
『嗯。』
「咁下次見。」
『阿沁，你都搵份工做下啦。』
「下…？」
『你仲記唔記得，半年前係澳門返黎香港時你同我講過ｄ乜？』
「半年前……」
老實講，我真係唔記得左。
『果時我辭左職，冇野做，你同我講返到香港唔好hea，個人唔好懶散，如果唔係好易沈淪落去。』
「咁你都記得……」
『點會唔記得啊？你知唔知我一開始真係走去搵d sales既工，但好多見到我份工作證明都唔請…我有諗過放棄，但每次一放棄就諗起你句說話，我怕比你講中呀，所以就算呢份工咁辛苦我都繼續返！』
「哈……」
『你都係呀！阿沁，搵返工邊做邊諗啦，你而家幾個月冇做野，個腦一定實哂，雖然今次強國肥婆單野成功左姐？但我覺得你可以做得更好。』
「做得更好…？」
『係呀，以我認識既阿沁，應該可以做到更不留痕跡。』
「我唔係好明你想講咩？」
『其實你個計劃唔係唔好，只不過有好多地方可以改下。』
「例如呢？」
『好似我故意比肥婆捉住左，拖延佢時間，等你可以爭取時間去碌佢張信用卡咁。』
「你覺得應該點做…？」
『我覺得其實唔洗比佢捉住囉，因為要驚動警方…而且，我仲比人點左相，會唔會有其他辦法可以拖延佢時間呢？又或者扮下sales叫個肥婆做問卷調查…等等啦，當然阿沁你諗既話一定比我好。』
「………你…果時唔講…？」
『因為我尊重你囉。』
「嗯…你講得岩…今日既事的確有好多地方可以再做好ｄ……仲可以令你既風險減低…對唔住…可能我太自私…唔記得左諗你…」
『人腦就係咁架喇！一懶散就會退化。』
「得啦，我知應該點做，喂咁下次見啦。」
『嗯，好。』
呢一晚，阿Dee真係教左我好多野。
原來我不知不覺，被傲慢，懶惰，慾望…等等人類既劣根性佔據左自己。
唔係阿Dee佢點醒左我既話…假如佢蠢少少，盲目咁支持我既，可能我已經出左事。
呀。
唔係可能，係一定出事。
當一個人做一件事愈來愈熟練，愈來愈習慣，自己既謹慎程度反而會大大降低。
相對地，自信，自滿既決心卻一步一步咁增加，到最後成為左一個不折不扣既廢人。
就好似每一間公司入面既老屎忽一樣；
自恃住經驗豐富，資深，有歷煉等等，就唔聽取其他人既意見。
故步自封，不思進取，永遠只係會用返舊有既一套去做人。
到最後害死既，只係自己。
更悲催既係我呢種年少氣盛既人。
比果ｄ老屎忽更加自大，自信，自滿，自負，
我諗呢個時候既我，就好似一架裝滿燃料既火車咁。
不斷係軌道上橫衝直撞，雖然可以撞死好多人，而火車都唔會有事；
但萬一脫軌，爆炸，我呢架火車就會死無全屍。
幸好…阿Dee佢制止左我。
將我呢架火車既速度減慢落黎，再重新計劃應該點做…
諗返起覺得自己真係好好彩，好彩唔係因為我做犯法事冇比人發現；
而係因為我有呢個同我相輔相成既好兄弟。
我同阿Dee，就好似一陰一陽咁。
每次係佢衝動時，我就會冷靜。
但有時我盲目既地方，佢反而又會睇得更透徹。
係…我諗我都係搵返份工，等自己既頭腦郁動一下，再操返好既狀態先算。
岩岩咁比阿Dee講一講，的確我有好多事都計少左。
就以今日果件事黎計，相信我安全既程度大概有90%，但我既拍檔…可能只有60％安全。
至少，我應該做到兩兄弟都唔受人懷疑先係！
『唉～～～～～～～～～』
返到屋企後，我大字形咁達落床度，望住個天花板，不斷回想起阿dee今日講既野。
愈諗…我個人就愈內疚…唉！阿Dee其實比我仲聰明，
甚至今日佢為左尊重我既計劃，都唔好意思去當下落我面教返我做野，
反而係事成之後，檢討時先提出…
為左尊重我，竟然用自己既安全去冒險…
我竟然仲懶聰明咁去諗下一步行動，屌！醒下啦好嘛？
唔係阿Dee…我應該早就死左十世。
而家應該做既，應該係照過日常生活…喇喇聲搵返份新工。
令到自己有返ｄ衝勁先。
話唔定…我係下一份新工又有ｄ咩新靈感呢？