《完美犯罪手冊》 - 為了上進而失去一切的故事: 《不安》

［嘟……嘟………］


「喂？」

『喂，阿DEE呀？』

「係呀…榮SIR有咩事？」

『你轉頭返總部門口，今晚我地有Order。』





「下？」我望一望屋企個鐘：「而家夜晚十一點喇喎…同埋我聽日放假…應該唔洗開工…」

『屌，咪咁多聲氣啦！公司接左個緊急Project，機密黎，總之你11:30係總部等，係咁。』

「但我……」

『唔好但喇！總之計返OT鐘比你啦！』








機密…？

到底係咩事？

今次，係榮sir第一次係我工作時間外打比我。

一見到個來電顯示，仲以為我做錯左ｄ咩所以佢打比我…





等我仲約左阿沁出去飲野添…失驚無神要返工…唉屌！

本身假期已經少架啦，而家仲要無啦啦緊急召回我，真係當我唔洗抖咩？


於是，我就立即換衫幸返去公司。

我份人比較準時，為左唔好遲到，我都立即飛的趕返去。

大概二十分鐘到，就去到公司門口。

係我去到公司門口果時，誠哥，榮sir，陳仔三人已經係車外準備好。


『阿dee，唔洗入公司，直接出車。』榮sir一見到我就講。





「但…我唔洗睇下表，知道有咩工作先咩？」

『唔洗，我一陣會同你講。』

「明白。」


語畢，榮sir就打開車門上左前座，而我同誠哥就係後座。

唔知係我多疑定乜野，唔知點解，我覺得成架車既氣氛怪怪地。


『人齊，開車。』榮sir邊攬安全帶邊講。





『嗯。』陳仔收到指令立即開車。


奇怪…

非常奇怪…

我望一望身邊既誠哥，佢平日明明好多野講，成日撩我傾計，

但今日竟然一反常態。唔單止咁…

佢平時係車上都一定會玩手機，用果ｄ交友apps去溝女，睇ｊ圖咁；

但今日佢竟然冇，只係合埋眼訓覺。






唔係，係扮訓覺。


我坐係誠哥隔離，其實果個距離係好近，我可以清楚咁聽到佢既呼吸聲比平常沈重。

而且，仲留意到佢眼皮不斷跳動，應該係瞇起眼偷望我。

點解佢要咁做？

時間已經接近凌晨，街上既店鋪陸陸續續收鋪，街燈亦都減少。

車內平日熱鬧喧嘩既氣氛，都變得死寂。






雖然，我明知有唔妥，但…我唔敢開口問。

不過應該冇事既，話哂都係係公司做野之嘛？

但…點解成個rundown隊長竟然唔同我講…


疑心終於令到我忍唔住問口。


「榮sir。」


我一開聲，陳仔立即將車速減慢，誠哥亦即刻醒返，兩個人好似等待睇戲咁。

而榮sir本來係望住前方，一聽到我講野，就從倒後鏡中直視我雙眼。


『點？』

「請問…」我望出窗外：「我地而家去緊邊？」

『去到你就知道。』

「但，我地今日既order要做咩？公司唔夠人咩？點解會叫我返黎OT？」

『幫銀行押運，其他唔洗理。』

「…………」


呢個時候，坐我旁邊既誠哥拍一拍我，我即刻同佢對望，然後誠哥搖搖頭，

示意我唔好再問。


佢地愈係咁，我就覺得愈奇怪。

不過，作為一個新仔，我只能忍氣吞聲。

當我一望出窗外，打算平靜一下不安既心情時…

發現愈來愈唔對路。


因為，我見到我地部車行緊天橋，而天橋對出正正面對住一個海。

呢ｄ都唔係重點，重點係，我地去緊貨櫃碼頭。


岩岩榮sir話，我地今日既order，係幫銀行做押運。

根據我做左半年解款員，如果幫銀行押運現鈔，應該只會去金庫…有咩理由會去貨櫃碼頭？

我不斷係度諗，銀行有咩野會用「水路」既方式去運戴？

文件？設施？

唔合理…太唔合理，一係就太細，一係就太大，而且唔係ｄ咩貴重物品，

應該唔會需要到我地出馬。


就係我費煞思量之時。


『到location。』


榮sir一聲令下，陳仔立即煞停部車，而誠哥亦都迅速咁開車門。

唔知係我未慣咁夜做野定點，個人呆下呆下，慢慢咁跟住誠哥落車。

落左車後，迎面而來既係一個意想不到既境象。


係我面前，係一個四十五尺既紅色大貨櫃，而唔尋常既地方就係，

呢個貨櫃係獨立咁放左係場內既一個角落地方，而且…四野無人。

幫銀行押運…？

唔係應該有銀行職員架咩？

萬一出左事點算？

仲有登記，落薄，點算，入箱…等等既程序都要我地同銀行既職員一齊做。

但…竟然一個人都冇。


呢個時候誠哥見到我縐哂眉好似諗緊野，佢又再拍一拍我膊頭，示意我唔好理咁多。

陳仔係車上，而我地三個就繼續係貨櫃外等待。

到底…等緊咩？

我唔知。


只見榮sir拎住槍枝，不停咁望手錶。

見到佢望，我都望一望…時間係…11時59分。


當搭正十二點，榮sir既電話就即刻響起，而且，係用震機功能。

榮sir接左電話，一句野都冇講。

甚至，連個「喂」字都冇。

大概傾左…呀唔係，係聽左十幾秒之後，榮sir就收線。


『開工。』


榮sir望住我地講左呢句，我仲未回得切神，誠哥一個箭步就上前。

佢同榮sir一齊打開左個貨櫃。


果道門慢慢咁打開…

入面…到底會係咩黎…

唔通…入面既軍火…？毒品…？走私貨物？

我唔知，只係知道，貨櫃一向比我既印象都唔係咁好。

尤其受到電視電影荼毒，見親貨櫃都一定係犯法野。


『阿dee，過黎幫手搬上車。』

「哦，係。」


我加快腳步行近貨櫃，由於天色入黑，貨櫃內又唔開燈，

令到我完全望唔清楚入面到底裝住ｄ乜。

當我一踏入去貨櫃，擺係我面前既…係一個又一個既箱。


紙皮箱。


「點…會……」


我喃喃自語，可能一般人見到紙皮箱會覺得好正常，運野就梗係用紙皮箱架啦！

但唔好唔記得，我地運既都係同金錢掛勾既物品。

用紙皮箱裝住既話…第一，保險可能唔會賠；第二，風險會極高。

而且…我眼前有…二…四…六…八…十…二十…三十個！

三十個紙皮箱…！

太唔尋常…銀行一定冇可能會全部都用紙皮箱裝野。

更加唔會用水路運錢！

我諗下諗下諗到入哂神，完全冇哂動作。當我回過神來時，立即回頭望一望榮sir既身影。

榮sir竟然唔係望住我地…亦都唔係望住d貨。


作為一個隊長，一定要確保員工，同貨物既安全！

呢個係鐵則，一眼都唔可以望少，因為係關乎金錢。

而榮sir呢一刻…竟然唔係望住我地…

係因為開始信任我地？所以懶左？定係佢唔夠訓…所以閉目養神？

可惜佢背對住我…我望唔到佢個樣…

而且，今日既榮sir同平時好唔同。


佢既狀態明明係比平時更認真，但做出黎既野係同平時完全相反。

就以我岩岩落車為例，佢平時一定第一句就破口大罵，粗口橫飛。

但今日…竟然粒聲唔出？


奇怪…太奇怪…


加上榮sir而家……

已經有兩分鐘時間，榮sir既視線冇望住我地，甚至係貨櫃。

佢呢個狀態…硬係好似似曾相識…

係咩呢…

好似…


明明係好專心，但視線卻唔係集中係應該專注既地方…

呢點…

……

…

…
…

！！！！！




榮sir佢係…






「睇緊水」！