《完美犯罪手冊》 - 為了上進而失去一切的故事: 《逮捕》
我望住誠哥，同elise，兩個人我都唔知幫邊面好…
唯有拎住杯酒比elise，等佢慢慢飲算喇。
始終大家都唔係咁熟…幫佢頂又好似真係唔係咁比面咁既。
「你慢慢飲啦…」我細細聲係elise耳邊講。
『嗯…』
『屌你咩！』榮sir望實elise：『你唔係養金魚下話？即係唔撚比面姐？』
「喂…你地唔好迫佢喇，人地小妹妹可能唔係好識呢？」
『唔緊要……』elise向我搖搖頭：『我飲…。』
話口未完，Elise已經拎起杯酒咕嚕咕嚕咁飲哂，一滴不留。
『喇，咁先係架嘛！』
唔知係咪佢地呢班老粗即係老粗，我係一邊都睇到嬲嬲地。
平時佢地醜陋既性格，係飲左酒之後更加原形畢露哂出黎。
『嗯……』
忽然Elise按住額頭，溫柔婉若咁挨左係我膊頭。
「你冇事嘛…？」我問。
『嗯…個頭…好暈…』
「Sorry…我應該幫你飲左杯酒佢。」
『唔係…唔關你事…』Elise微微合上眼：『係我自己酒量淺…』
「咁…你休息下…」
我望住佢白裡透紅既臉龐，凹凸有緻既身材…
仲有佢果雙豐盈既雙唇…
好似係度誘惑緊我咁樣…
唔知係酒精影響，定抑或係精蟲谷上腦定點，我一時間膽粗粗一下錫左埋去…！
Elise比我既舉動嚇左一下…微微張開雙眼，但絲毫冇抗拒我。
於是我就借勢攬實佢，舌尖不停來回短兵相接，慢慢，我地兩個就好似旁若無人一樣纏綿。
打完車輪後，Elise嬌羞地好似一隻貓咁挨住我。
『我好暈…想…休息一下…』
「嗯…我係度，你放心。」
我望住佢…我諗…我真係愛上左佢。
『喂，喂，阿dee。』誠哥攬住一條醉左既女叫我。
「做咩？」我仍為佢想隊醉elise既事而不滿。
『冇，你應該多謝我啦！』
「多謝你？」
『挑～唔撚係呀？唔係我隊佢飲酒佢會冧得咁快？』
「屌…真係多謝哂你喎。」
『睇你既語氣好似好鍾意條女咁喎？』
「咩呀…講左去邊啊？」
『咪扮傻啦，打哂車輪咁，仲話唔係起痰？』
「出黎玩…好正常之嘛…舞池一對人係度打車輪啦。」
『冇～我想提醒下你姐。』
「提醒我？」
『哈，係呀，』誠哥望一望elise：『呢條女你應該唔會唔知佢係係度『搵食』架嘛？』
「搵食…？」
『梗係啦，一睇就知佢係出黎做果ｄ女啦。』
「佢…」我橫了身邊既elise一眼：「係咩…？」
『所以話你入世未深，要搞去廁所好喇，我地一陣仲要去揼骨架。』
「痴線…我點會啊…」
『屌，講到咁瀟灑？既然你唔想食，咁我地走啦？』誠哥望住手錶。
『係喎，差唔多夠鐘去揼骨。』榮sir道。
「哦…咁…」我視線仍然停留係elise身上。
『走啦，洗咩擔心呢ｄ女丫，好快有佢ｄ朋友黎架喇。』
「嗯…」
『定抑或…你當左佢係你條女呀？』
「冇…邊有！」
『諗都唔好諗啊你，教精你咋，一陣染埋ｄ唔知咩病就仆街啦。』
『喂阿誠，』陳仔開口：『呢句由雞蟲黎講，好似冇咩說服架喎。』
『咪講經啦，走，過去揼骨把喇。』
「行咪行。」
我跟住佢地三個人身後，離開呢個煙花之地。
雖然我最後都冇帶elise走，但我回頭望左佢一眼…
想諗返起佢同誠哥既說話…
『唔係啊…其實我ｄ姊妹今日生日…佢地帶我上黎玩架咋…』
『呢條女你應該唔會唔知佢係係度「搵食」架嘛？』
到底邊個講既野先係真…
我真係唔識分，不過，話哂誠哥經驗比我多，返大陸又返得多，
再加上我識左佢咁耐，佢又教左我咁多野…我諗，都應該信佢既。
話哂，呢個女仔都係我第一日識佢…
可能佢想呃我都未定……我曾經都聽過好多女出黎玩係為左偷錢…
唔通…Elise一副天真無邪既外表底下…埋藏住咁虛偽既內心？
『喂我去買包煙先，你地入去先。』誠哥望住間便利店。
『嗯，得啦！』榮sir道。
之後榮sir就帶住我地去左皇室假期既後門。
奇怪，點解我地唔係正門入既？
而且，仲有一個大陸人係後門把守住。
『三個。』榮sir望住果個守門口既男人。
『三百塊。』
果個男人講完呢句之後，榮sir就掏出三張百元人仔比佢。
然後就帶我地入去…但點知一入到去竟然唔係大堂。
而係廁所！
『這裡穿出去就是澡堂了。』
『好，我們知道了。』
原來呢條秘道係直通骨場沖涼既地方…？！
「榮sir…呢度……點解…」
『你想問點解唔係正門？』
「係啊…」
『傻既，萬一有咩事都可以即刻走人丫嘛！正門入既話，會比佢地扣留回鄉證，走時先可以拎返。』
「哦……」
陳仔加把嘴：『係呀，有時公安黎掃場，我地都可以即刻走嘛！』
「原來係咁……」
我地沖完涼就一行三人上返去骨場內既按摩區內，
見有少少肚餓，我地就叫左幾個宵夜一齊食，邊食邊按腳。
『丫…果個阿誠丫，咁撚耐都唔見人既？』陳仔問。
「係喎…誠哥佢仲未返黎…」
『挑，咪撚理佢啦，可能沖緊涼呢？又或者佢鳩癢癢走左叫雞都未定喇。』
『又係呀可，都有可能，算，咪理佢喇都係。』
『喂，陳仔，阿dee，夠鐘揀女女入房。』
「下…？我唔洗喇……」
『屌你啦！』榮sir燥燥地：『你入房揼骨都要有人幫你揼架？！唔鍾意咪搵男人幫囉！』
『哈哈，榮sir你咪玩佢喇，阿dee你唔洗揀女，淨係揀港式按摩就得啦。』
「哦……」
過左冇幾耐，我地三個就比一個公關帶住入房，
我地去果層係位於地牢三樓，比較僻靜，而且裝潢仲好豪華。
『喂，咁聽日晏就三點係返骨場個影院區度等啦！』
『好！聽日見。』
「聽日見…」
忽然正當我地入房之際。
『喂你班友仔唔等埋我架喎？』誠哥忽然沖哂涼換左衫出現。
『屌，買包煙買到去左邊呀你。』榮sir問道。
『冇呀，』誠哥拎住部電話：『岩岩去左揀女嘛，咪遲左囉。』
『屌你去邊揀啊，做乜唔見你？』
誠哥陰陰嘴笑：『梗係去搵經理mark返件正野喇，喂屌唔講住，入房先！』
結果人齊後大家各自入房開始揼骨，
雖然我第一次黎，但我都唔太鍾意比人按來按去，又唔係特別舒服，
都唔知做乜鳩？
無錯，有條女幫你推下油，係幾爽既，
但不如我推返佢會唔會更加爽ｄ？
如果唔係班同事，我都唔會黎呢ｄ地方……
早知道同Elise一齊仲好喇…唉，唔知…佢點呢？
死喇，我可能真係鍾意左佢…
仆街！
唔記得抄佢牌添！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
翌日
『喂早晨喎屌你。』
「嘩…而家先兩點咋喎…你地咁早起哂身既？」
『見餓餓地，咪出黎食個早餐囉～點知就撞到呢兩條撚樣喇。』
同佢地傾左陣，然後去沖涼準備離開之際。
『喂，阿Dee，一陣行返後門走就得架啦！』榮sir邊吹頭邊提點我。
「下…？咁揼骨果ｄ小費呢？唔洗比咩？」
『挑，所以話你老實得制～』陳仔加把口：『琴日帶我地入場果條友呢，就係呢間骨場既經理黎既，佢收我地錢，我地梗係唔洗比其他錢啦！』
「嘩！？咁咪好抵？一百蚊都唔洗？」
『係啊，所以你個傻仔琴晚唔叫條女多ｄ服務咪蝕左囉！』
估唔到咩地方都可以用錢賄賂ｄ員工…
唉，不過有咩出奇丫？這就即中國丫嘛。
諗諗下，其實我去超級市場買野都可以用呢招喎！
用錢賄賂ｄ收銀阿姐，然後叫佢過機果時唔好收我錢／淨係收我一件貨既錢。
屌，肯定係近得阿沁多，比佢傳染左呢ｄ思想比我。
「喂，咁我走先啦，要返屋企煮飯比老豆食。」
我地離開左骨場之後，我就一個人搭車返返香港。
沿途中不斷回想起琴晚既事…
先係幫公司唔知運ｄ咩…
然後返屋企拎回鄉證…再一齊返大陸…之後係club識到Elise…
唉～～真係好掛住佢…
睇佢個樣又唔似係出黎做果ｄ人…因為果種氣質，唔好話同其他同場既女比啦，
根本出街都好少遇到呢ｄ女仔，尤其佢唔洗點化妝都咁透紅既肌膚…
真係幾正下。正所謂一白遮三醜，加埋佢身材…仲要後生，仲要係學生。
不得了。
『咁早既？返黎喇。』
「嗯…你唔洗返工咩？」
『唔洗呀，今日放假。』
同老豆講左幾句之後，我立即打開電腦。
因為，我搭搭下車忽然想起榮sir偶爾同我提過既一句。
「我想知最後果件貨係咩黎？」
『我唔方便講，要知你聽日睇新聞就知。』
新聞…冇錯！
但我搵來搵去都搵唔到，不過，我上youtube比我見到一段蘋果動既新聞。
於是乎，我就打＂失竊＂呢個字眼去搜尋…
終於比我發現到ｄ蛛絲馬跡。
蘋果日報訊：「灣仔港灣道君悅酒店發生名畫失竊事件。拍賣會一名31歲姓唐負責人，昨午3時14分報警求助，報稱在清理拍賣場地時，發覺有一幅作為拍賣用途的畫作不見了，警方派員到場調查後列作盜竊， 案件交灣仔警區重案組第二隊跟進調查，暫時無人被捕。
根據資料，拍賣會在本月6日及7日一連兩日假君悅酒店舉行春季拍賣會，有近2,000件拍賣品。據悉，在拍賣會過後失去名畫名《山色蒼茫釀雪天》，為著名書畫家崔如琢的作品，成交價為2,875萬元。有消息稱，名畫懷疑是被清潔公司職員誤當垃圾運走。名畫去向是被人偷竊、抑或被當垃圾運走，有待警方調查。」
呢一單…係四月既新聞…到而家六月都仲未搵得返。
唔通…果幅咁大既野…就係呢幅畫？
冇錯…無論係大小，價值，同隱秘程度都極之相似！
如果係真係既話，
即係話，有人收買左清潔人員同垃圾車，再借機會運走名畫！？
咁我…咪係幫兇？！
［咯咯咯咯咯！］
『邊個敲門啊？』
「唔知呀…」我繼續望住電腦。
『你去開門啦！』
「我忙緊呀！老豆你去啦！」
［咔嚓－］
『請…請問你地係…』
『先生，請問劉一二係度嘛？』
『喂！阿仔，搵你呀！』
頂…明明做緊正經野，到底邊個咁唔通氣搵上黎。
我行出房間，當我接近門口時，驟見…好似有一大班人係門口等我…？
發生咩事…？
『你就係劉一二先生喇下嘛？』
「係…我係。」
『我係西九龍重案組第五B隊隊目，李sir，而家懷疑你同一單洗黑錢既案件有關；你有權保持緘默，但你所講既一切都將會被筆錄，日後或有機會成為指控你既呈堂證供。』
「下…？」
『呀sir你地查清楚未架，唔會架！我個仔唔會做呢ｄ事架！』
『劉生。』便衣警員將我鎖上手扣：『請你跟我返差館協助調查。』
「………」
我一臉錯愕。
有冇人可以話比我知…
到底…而家…發生緊咩事…