《完美犯罪手冊》 - 為了上進而失去一切的故事: 《女人》
『午安，澳門四季分店，請問有咩幫到你？』
「唔該…我想搵Athena。」
『哦…先生請稍等。』
「好，唔該。」
『Hello，This is Athena。』
「嗨…Athena…」
『你好…請問你係…？』
「我地有半年冇見面喇。」
『你…你…雅先生？！』
「你仲記得我？」
『哈…哈……當然…！當然記得！』
「你真係好記性…athena…」
『邊係喎…？我咪講過冇咩朋友囉…雅先生你係我好重要既一個朋友，我又點會唔記得你喎？』
呢個athena…竟然仲當我係朋友…
「多謝你…其實我今次搵你…係想約你食餐飯…」
『食飯…？好呀～！』
「下？」
『呃…唔係…我既意思係…我今晚咁岩冇野做…所以…就…』
「冇事冇事，我仲以為你好忙…所以有ｄ意外姐…」
『唔唔，唔會呀…我通常都好準時收工既～』
「咁今晚我請你食餐飯呀，不過澳門我唔係好熟，你有冇咩好介紹？」
『嗯…咁我book位啦～就係……』
「呀…等等先…」
『嗯…？』
「by the way，可唔可以唔好係你公司附近ｄ酒店度食？成日比人望住好有壓迫感架嘛…」
『呀…哈哈…唔好意思呀…上次嚇親你…』
「唔緊要，我都冇擺係心度。」
『咁…咁我訂定位呀…就係觀光塔既360cafe好嘛？』
「嗯，好。」
『咁…今晚見…』
「今晚見。」
估唔到Athena一口就答應左我既相約，等我仲以為佢會好忙…唔得閒應酬我添。
諗起返上一次，athena同我講；我係佢唯一既朋友，初時我仲以為佢係講笑，
但從岩岩既態度我聽得出，佢真心當我係一個朋友…
咁即係話…佢仲未知道我呃左公司錢既事啦…？
唔知點解，我總係覺得athena好似對我有d唔尋常咁。
唔通係因為佢對我仲有疑心？係因為上次果件事？
不過算啦，既然佢當我係朋友，相信我問咩佢都會答到我。
趙政祺…我就睇下你咩料。
『Hello Sir, Welcome to cafe de 360。』
「唔該…我訂左位。」
『哦，先生，請問留左咩名同埋幾號電話？』
「電話呀…我都唔知喎…不過應該係留athena。」
『let me see …athena…table for two，先生呢邊，請跟我黎。』
「好，唔該。」
傍晚，我從大陸返香港換左套衫後，就立即過左澳門。
估唔到Athena揀既呢個環境都幾靚…梗係啦，呢度係全澳門最高既觀光塔；
氣氛好不突止，連餐廳既風格，侍應既服務都好到完美。
更加唔少得既，就係呢度可以飽覽整個澳門半島既夜景。
諗返轉頭，自從同Hyuna分左手之後，我已經好耐冇用女仔一齊食飯喇。
唔知…佢過成點呢…？
會唔會掛住我…？定抑或同果隻肥佬纏綿緊…？
唉，屌。
呢種女人根本唔值得我咁，冇左咪算柒數囉，何必再諗佢呢？
『先生，』
「下？」我想得入神。
『前面果間房就係。』
「前面…？」我一望：「哦…vip房…」
侍應離開左之後，我一直企左係房既門口躊躇著，遲遲未能打開門入去。
除左係因為我剛剛想得入神，仲未ready之外，我就好似電影入面既男主角咁；
唔知第一句開口應該講咩。
話就話我係約athena食飯，但諗深一層，其實我同佢真係唔係好熟…
只係見過一次面，我應該講ｄ咩好？
唔通我一入去就單刀直入講：「喂，你知唔知邊個係趙政祺？哦？唔知？好，咁拜拜。」
咁樣咩？！
傻的嗎？
如果對方唔係一個女仔，我都仲可以放鬆一下。
但佢唔止係一個女仔，佢仲要係一個好靚好可愛既女仔…！
要我同一個咁既女仔食飯…我真係想唱一句：難道沒練習太耐…
唉，死就死啦！
啪。
係我握住門柄既同一時間，我感覺到有人拍我。
『嗨…雅先生…』
我一轉面athena竟然成個棟係我面前！
「下…？你…唔係係入面咩？」
athena搖搖頭：『唔係呀…我頭先去左toliet嘛…』
「哦…哦哦…」我有風度地幫佢開門：「咁…入去……」
『唔該…』
甫進vip房之後，迎面而來既係一塊特大落地玻璃，係五十四樓既高處，
整個澳門就好似係你腳底咁君臨天下。
房內既佈置高貴之餘帶點優雅，有幾張長形既餐台，加上浪漫既蠟燭，
柔和既燈光，還有幾對情侶係度撐台腳，我諗，呢度應該係拍拖聖地。
「呢度…」我目瞪口呆。
『係咪好靚呢～？』
「嗯嗯…你眼光…都好好…」
『嘻…多謝你既讚賞。』
去到呢ｄ地方，我成個人就好似上左身咁，表現得好唔自然。
幫女仔拉凳，談吐輕聲，舉止斯文…
我真係好唔慣。
妖，早知道就叫佢去大排檔食啦…不過佢呢種千金小姐又點會食得慣丫。
『係呢…？雅先生。』Athena望住窗外既夜景。
「上次咪話叫我阿沁咪得囉……」
『嗯嗯…』Athena凝視著我：『阿沁……』
「………」
我望住佢果雙水靈靈既大眼…就好似湖水咁空洞且深不可測，
長長既睫毛將我整個人既靈魂都勾左去咁際…
仔細一望…原來Athena今日經過飾心打扮，稚氣既臉龐畫上高貴既妝顏；
凹凸有緻既身材穿上修身黑色短裙，長長既秀髮加上微微既卷繞…為佢增添左幾分成熟既味道。
乍看之下，有邊個想像得到呢個只係一個二十歲左右既女仔…？
『我…塊面係咪有咩野…？』
「唔係…你今日好靚。」
『……』athena怕醜得臉上泛起兩朵紅暈。
「你岩岩想講咩…？」
『岩岩……』她想了一下：『呀…想問你…想食ｄ咩……之嘛…』
「哦，普通set dinner得架喇。」
Athena點點頭後，就立即叫waiter過黎，用一口流利既英文點完餐後就一語不發，好緊張咁雙手捉住個水杯。
比著第二個用英文點餐我一定覺得果個人好扮野，但係athena身上完全冇違和感。
我都係時候單刀直入。
「其實……」
『嗯～？』
「其實我今日約你食飯…係有ｄ野想問你。」
『係咩事～？』
有個侍應行埋黎：『Caesar salad with parma ham.』
「係咁既…你認唔認識一個人叫趙政祺？」
啷噹－－－－－－－－－－－
「喂你點做野架！？Athena你冇事嘛？！」
『冇…冇事。』
「好彩水黎姐，我有紙巾…你抹一下。」
『好…唔該…』
「我頭先講果個人…你認識佢嘛？」我追問道。
『唔識。』Athena冷淡道。
「哦…」
唔識…？！
頭先我一講個名之後，我留意到athena有一剎那呆左…
然後個侍應放低沙律撞跌杯水之後，佢既態度就完全唔同左。
明明本身望住我…我仲感受到幾分親切，但杯水倒瀉之後，唔係，應該係我講完「趙政祺」呢個名之後，athena既態度就一百八十度轉變。
到底點解佢會有咁大反應…？
係巧合…定係athena真係唔識呢個人？
話係巧合既話…唔合理，所有野都唔合理。
直覺話比我知，Athena一定認識趙政祺，就算唔認識，佢同呢個女人都一定有關係。
即係話佢有野隱瞞。
如果係咁就弊。
因為如果要係一個唔願意講秘密既人口中，去迫佢講既話。
除左用刑之外，單憑言語去說服，機會可以話微乎其微。
但除左Athena，我根本唔知趙政祺係邊個，要我冒險同一個來歷不明既人辦事…
我諗我成世都食唔安訓唔落。
假如我同一個呃阿婆棺材本而置富既奸商做野，唔單止我原諒唔到自己，連我老豆都會係棺材跳出黎打我。
既然佢唔願意講…我只能利用另一個方法。
一個對女性有效、既簡單又白痴既方法…
溝左佢。