《完美犯罪手冊》 - 為了上進而失去一切的故事: 《崩潰》

『你咪郁啦…』剛剛接觸過阿dee的少女續道：『細b哥叫我幫你抹一抹身…』

『唔…唔該哂…』口臉俱腫的阿dee說。

『你…真係唔認得我…？』少女遂問道。


阿dee竭力地張開眼，仔細咁望清楚呢個女仔，但可惜仍然想唔起。

『我真係唔認得你…』阿dee注視著少女的臉：『你塊面…都紅左…』





『唔…我慣架啦…』少女掩著臉。


剛剛細b一下狠狠地痛打左一巴掌係少女臉上，掌印亦因白皙的肌膚而顯得格外通紅。

對於呢個女仔接二連三問同一個問題，阿dee本身都以為對方係認錯人，

但對於佢呢種執著，卻又有一股莫名既親切感。






『我…』阿dee欲語還休。

『做咩…？』少女停左手上既動作。

『係咪真係識你既…？』

少女淡然一笑，輕聲道：『當然識…』

『係幾時…？點解我會冇印象…？』





『你有冇聽過……』少女同阿dee四目交投：『如果你真係鍾意一個人…即使到左下一世，你都會記住佢個樣…』

『鍾意…一個人？』阿dee感到莫名奇妙。

『唔……』少女搖搖頭，說笑道：『可能我上一世鍾意過你啦…哈哈…你唔記得就算喇。』

『上一世……』阿dee天真地問：『有可能咩？』

『哈…傻仔。』少女逃避阿dee既眼神。


『可能我真係傻啦，』阿dee望住少女既側臉：『你問左我幾次…真係搞到我好似識你咁…』

『既然你唔認識我，就當我冇問過你喇。』






阿dee心底好唔明白，點解呢個女仔會咁執著自己係咪真係認識對方。

定抑或…係自己以前去蒲果時one night stand過既女仔？

唔會，點會呢，好似佢咁靚咁可愛既女仔，仲要咁後生，如果＂食＂過一定會有印象。

而且實會keep contact啦，加上對方係黑幫既阿嫂，呢個機會更加係微乎其微。

但佢呢種執著…



啪！－






包廂房既門傳來一聲巨響，令在場所有人都即時望住門口。


『阿dee！』


開門既係趕到身水身汗既阿沁，而且阿沁手上仲拎住舊錢。

阿dee一望就知，果舊錢應該就係上次偷信用卡賣金時所得既現金。

而且…見到阿沁，終於可以鬆一口氣。

『阿沁…』阿dee輕聲呼叫。





阿沁望到阿dee所在之位，立即跑過去：『dee！無事丫嘛！？』

少女仍坐係阿dee身旁：『放心…佢無咩事…』

『咁都仲話冇事！？』阿沁怒喝：『你地郁過佢黎？！』

『我…』少女被嚇一嚇。

『阿沁…唔該你…』阿dee輕拍阿沁膊頭：『我冇咩事…』

『你畀人打到咁都仲話冇事？！』

『無事…算啦…係我唔岩在先既…』阿dee內疚得無地自容。






呢個時候，門外亦有幾個身影接近。


『你就係大佬喇下嘛？』阿沁站起一臉泰然。

『係，我花朵細b。』細b想保持威信，但係阿沁詞鋒銳利既氣勢之下卻只能如實回答。

『細b哥，』阿沁怒道：『你搞到我兄弟咁撚樣，佢得罪你啲咩！！？』

『細路，你咪咁多嗲，你擺低錢即刻走！』細b反擊道。

『搞成咁仲想我擺低錢！？我都未撚叫你賠醫藥費呀！』阿沁不甘示弱。


此時身邊幾名小弟護主心切：『你老味你咩料啊！？』

『仆你個街咁同細b哥講野！？』

『細b我幫你郁佢！！』


細b怒喊：『全部收聲！』

『…………』身邊既小弟立即安靜。

細b走到阿沁身邊，在耳邊細說：『比幾分薄面，唔好迫我同你攬炒。』


『好，』阿沁心領神會：『細b哥，呢度十萬，你點點佢。阿dee，我地走。』

身旁一名小弟：『十萬！？』

『咪嘈！』細b叫停：『開門畀佢地走。』



阿dee立即取回銀包，係阿沁既攙扶之下一拐一拐地走出大門。




『大佬，佢係咩人？點解要放佢地走！？』

細b臉有難色：『咪撚理，總之唔好惹佢地，一陣為呢啲小事驚動＂阿公＂就唔抵。』


＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


灣仔告士打道酒吧外。



『喂，點啊你？無事丫嘛。』阿沁問。

『無…』阿dee苦笑著：『Sor呀兄弟…又麻煩左你一次…』

『你都識叫我兄弟，做兄弟邊有麻煩對方架！』

『唉…我爭你既…一定會還…』阿dee答。

『喂，』阿沁話題一轉：『你去果度為左咩？平安夜既事？』

阿dee點點頭：『嗯……我諗住用果間酒吧既後門畀你…………』


阿dee將計劃一五一十地講哂出黎。


『咁又係…』阿沁聽後亦同意：『如果到時只係跌個箱出黎，而啲錢無散落係馬路…無人知就等如無效…賠了夫人又折兵。』


『係…所以我先冒呢個險…對唔住…』

『傻啦…』阿沁笑言：『你都係想幫我姐…做兄弟…明既！』

『唉…』

『咁你有冇發現到啲咩？』

『無啊…』阿dee無奈：『我又唔可以光明正大咁講借酒吧…到時租佢地方又留低證據…又唔可以同其他人講計劃，怕愈多人知愈不利…我頭先盡哂力都只係搵到後門…但我以為道門無鎖時，竟然仲有一道鐵閘…！』

『哦…唔怪得你畀人打到豬頭咁…』

阿dee輕歎：『總之而家冇咩事就好…』

『咁都仲叫無事啊？』

『唉，唔講呢啲住啦…』阿dee想起：『喂，係喎…你點令到果個黑社會咁順攤？』

阿沁露出笑容：『哈，好簡單姐。』

『簡單？』阿dee一頭霧水。

『你唔記得左…』阿沁靈機一觸：『我地都係半個黑社會咩？』

『下？我地…？』

『趙政祺。』阿沁解答。

『佢…？』

『哈，係呀。』

『但果個黑社會識佢架咩？』

『當然識，趙政祺係台灣係新幫主黎，要黎香港做野，當然會聯絡本地既黑幫。』

『咁即係……』阿dee恍然大悟。

『即係話頭先果個叫細b既，係趙政祺面前都只係一隻卒仔，你諗下，趙政祺分分鐘高佢幾班呀！』

『原來係咁…唔怪得佢地對你咁客氣啦……但…你仲畀錢佢既？』

阿沁凝重起來：『咁對方都係古惑仔黎既，俗語有句話，唔好趕狗入窮巷，一陣被佢反咬一口就弊，話哂對方都係古惑仔，你知啦，有啲為上位連大佬都會殺啦，佢地求財姐…咪畀佢地囉。』

『但…大拿拿十萬蚊…真係唔緊要…？』

『嘩！』阿沁驚道：『你第一日識我？錢夠用就得啦！況且…你有咩事我都會有生命危險架。』

阿dee誠懇道：『多謝你，阿沁。』

阿沁笑一笑後就繼續攙扶著阿dee。


就係呢個時候…


［就這樣愛你愛你愛………］

『又有人打黎既…』阿沁拎起電話：『阿dee！？』

『咩事？』阿dee回望。

『唔係呀…』阿沁畀個手機阿dee睇：『個來電係你打黎架喎。』

『下…』阿dee摸摸褲袋：『呀！漏左係岩岩間酒吧！』

『咁…你聽啦。』

阿dee接過電話後：『喂？』

『喂…』耳邊傳黎一把女仔既聲音。

『你係？』

『你唔記得拎部電話呀…我手快幫你keep住左…』

『唔…唔該哂你…』阿dee答謝後續道：『咁…你係？』

『又唔記得…？』

『哦！』阿dee立即想起：『原來係你…唔該哂你呀…』

『唔洗客氣…咁，我地聽日見面畀返你啦。』

『下…』阿dee想了一想：『但我聽日要返工…』

『你公司係邊？我黎搵你喇…』

『不如下星期我放假……』阿dee突然醒起萬一趙政祺打黎點算：『好好好！我公司係長沙灣………』

『嗯～』少女爽快答應：『咁…聽日見。』

『好，聽日見，呀仲有呀。』

『咩事～？』

『萬一…如果有人打黎…你記得唔好聽……』

『嗯…我知架喇…尊重你私穩嘛？』

『好，咁…拜拜。』



『點？』阿沁立即問：『邊個黎？』

『冇……頭先酒吧個女仔姐…』阿dee如實作答。

『頭先……』阿沁回想後：『哦，坐你隔離果個呀？』

『嗯…』

『屌，靚仔大哂咩？就連被人捉左去打都溝到女，真係服左你。』

『咩啊…我都無溝佢……』

『唉，慣架啦，啲女自動埋身丫嘛？慣架喇～～』

『妖…講呢啲…』阿dee立即拉開話題：『你又點呀，同hyuna？』

阿沁立即表現得十分尷尬：『無…無咩點。』

『係返埋一齊未？』

『無…更加唔會啦…我諗…』

『唉，』阿dee無奈輕歎：『做兄弟既，你郁下條尾就知你想點啦，鍾意人咪溝返人囉。』

『咁易咩…而且…而家都未係時候…我地仲有咁多包袱係身…』

『所以話呢，呢個世界感情呢樣野真係好麻煩。』

阿沁諷刺道：『你估我係你咩，換女朋友快過換底褲…！』

『屌…唔講呢啲住啦。』阿dee苦笑著。

『咁…』阿沁打量一下阿dee傷勢：『你得唔得啊…？洗唔洗送你去醫院？』

阿dee立即擰頭：『唔洗唔洗，我返去搽啲鐵打酒冇事，夜喇，你都返去先啦。』

『咁…有事再call我。仲有後門既事我會幫手諗下，下次有咩行動叫埋我，我地兩兄弟一條心架嘛！』

『嗯，阿沁，今晚麻煩哂你。』

『屌…又講呢啲。走先。拜。』



阿dee望住阿沁遠去既身影，內心不自覺地歎息起來。

總係覺得自己好似拖佢後腿；做人做到好似自己咁…真係好失敗。

諗深一層，其實阿沁無左自己，做所有事既可能成功率會更大都未定…

只係一句「兄弟」，就令到全部人都置身係生死邊緣。





唦－－－唦－－－－－

『嗚……嗚……嗚呀呀呀！！！』


八九月既天氣飄忽不定，儘管上一秒天色晴朗，下一秒都會變成滂沱大雨。

發呆般的站在告士打道既阿dee，唔知係因為自己雙腿已經累得不能動彈；定抑或被打至痛入心肺；定還是覺得自己無力得連行步路都做唔到。

阿dee唔知道，佢只係知道自己好無能，失敗感令到阿dee既精神終於崩潰，

從小為左自尊阿dee都唔會係眾人面前流一滴眼淚…

但今晚，伴隨著雨聲落下…阿dee終於可以解放自己，係呢場無情既大雨中盡情哭訴一場。


人總會經歷無數既失敗，但每一次既失敗都係一種教訓，係通往成功既必經之路。

而且失敗仲會令人變得成熟，令人本身既傲慢，自負，都會因為失敗而消失得蕩然無存。

或者阿dee，唔係，係失敗既人應該興幸自己係年青時嚐試過失敗。

年輕時鬱鬱不得志，總好過一朝得志語無倫次。

所謂塞翁失馬，焉知非福；太早既成功，有機會係帶你上絕路既誘利。

做人就係，以今日既失敗去換取他日既成功。

縱使崩潰過、痛哭過，淌著淚既阿dee都體會到：「我，已經唔再係琴日既我。」