《完美犯罪手冊》 - 為了上進而失去一切的故事: 《背囊》

2014年9月29日上午9:30a.m.



一棟唐樓內某個單位。



『喂兄弟，我黎替你班，』一名男子拎住盒外賣：『食唔食？』





『呵…欠……』另一名男子一伸懶腰：『喂…好，唔該。』

『話時話，對面果條係乜水黎？做乜大佬會叫我地監住佢？』

另一男子答：『屌…鬼知咩，阿公落order我地就照做架啦。』

『哈，』男子笑笑口：『不過我又唔明，點解唔直接係佢屋企裝監視器？而要係樓梯轉角位裝？』

另一男子面露厭惡：『你以為而家拍緊死亡筆記呀？醒少少啦！』





『下？全面監視住唔係更好咩？』

『你都傻既…做到全面監視就唔洗我地係對面偷偷摸摸啦！你諗下咁多監視器啲水電要駁幾耐先啦！』男子續道：『再加上間屋咁細，要搵鏡頭有幾難呀？佢要拆我地吹佢唔脹架嘛。』

『係喎，哈哈，睇上腦添。』

『拿，同你交接返先。』男子指住部電視：『呢部CCTV就影住啲樓梯轉角位，一共三個鏡頭，頭先凌晨五點幾果時，對面果條友偷走過一次架喇，好彩被我地發現到，即時聯絡地面果班人。』

『點聯絡？』





『用呢部對講機。』

『哦…』剛來的男子續問：『咁…果班係咩人黎？』

『屌，點知呀？可能係大佬請返黎啲人掛，見佢地著哂西裝咁。』

『哦…咁我地要睇到幾時呀？』

『收到風話中午前可以收工，你就爽啦，黎睇一陣就收一千蚊。』男子笑言。

『喂兄弟咁唔該哂你先，但…你仲唔走既？』

『食埋個早餐先嘛，喂，你喇喇聲用望遠鏡監視先啦！一陣條友走左你就大獲喇。』

『哦…』剛來的男子走近望遠鏡：『無咩特別丫…條友仲係張床度訓緊。』





另一男子狼吞虎嚥：『條友好古惑架！睇緊啲啦！』


未幾，剛來的男子發現有些異樣。

『喂，兄弟你過黎睇下！』

『咩事啊？』

『有…有皇氣！』

『下！？』






兩名男子不約而同地立即靠近窗戶，遠眺著路上的街景。

果然，從街口處有一輛警車高速地駛近唐樓。

而且警車旁仲尾隨住兩架CID既私家警車。


『喂？點算啊？』

『唔撚係啊…閃！撇呀！』

『屌！』

語畢，二人立即拔足狂奔打算逃離現場。





但忽然間。

『喂！』原來的男子拉停另一人：『走咩啊走？』

『屌！仲洗講，有皇氣啊！』

『你傻左呀？我地都無犯事？你咁驚做乜鳩？』

『我地…？』剛來的男子回復平靜，笑道：『又係喎可。』

『屌，過返去睇下咩環境先啦。』


二人再次靠近窗戶，觀察住街上既動態。





警車果然唔係單純咁經過，而係以呢條街為目的地而停下。

車子停定後，警車兩邊隨即打開閘門，車上既警察亦魚貫而出。

約有七名軍裝，四名CID不約而同地躍下車，且同時向對面既唐樓打量。


『睇黎…佢地係搵果條友。』

『下？』剛來的男子大驚：『唔通佢報警call警察救佢？！』

『唔知……』男子縐著眉：『我地繼續監視果個單位，睇下班警察係咪入去先。』

『好。』


話音未落，二人已果斷緊守崗位；一人走近座地式望遠鏡，另一人拎起手提望遠鏡，

同一時間往一直監視既單位靜靜觀察。


雖然有層窗簾隔住唔太清楚，但監視緊既目標仍然躺係床上，無論係眼鏡等既裝束都同一開始時無分別。

明顯目標仍然係熟睡當中，二人亦屏息靜氣地等待警察既行動。

『喂，你睇下！』

『睇咩？』

『電視呀！』


二人將視線轉移到監視器之上，可以清楚見到一班警察不斷沿唐樓既樓梯往上而行。


『洗唔洗報告畀下面班人知？』剛來的男子道。

『唔洗住…』另一男子指著街道：『你睇佢地開始渣車駛走。』

『又係喎…點解既？佢地怕被人拉？』

『應該唔係，睇怕佢地一直都等緊呢班警察黎捉人。』

『嘩…條友都幾把炮喎，要黑白兩道捉佢。』

『唔好講呢啲住，睇返個單位先。』


兩名男子立即離開監視用的電視，往回窗台邊利用望遠鏡觀察對面屋內狀況。

不過，對面仍然未有任何異樣，警察仲未開始進入。

而靠近窗台張床既目標仍舊似係熟睡當中。

呢個時候，設於樓梯間既錄影機開始接收到現場既聲音。


[Sir，單位鎖死左開唔到門。]

[咁call爆破組，要五分鐘內到達。]

[Yes sir！]


『喂喂…』剛到的男子拎住望遠鏡問：『你聽唔聽到？警察好似要用出動爆破組。』

『奇怪……』另一男子續道。

『有咩奇怪？』

該男子站於座地式望遠鏡前，露出擔憂既眼神：『點解………』

『咩啊……』

『仆街！』男子立即將座地式望遠鏡zoom近對焦：『大獲！』

『下？！』

男子推開望遠鏡，立即跑到對講機的位置，焦急道：

『喂喂？收唔收到？！喂喂！！』結果未有回覆：『仆街！佢地走出左對講機聯絡範圍！』

『喂…咩事啊？你冷靜啲先…有啲咩唔妥？』剛來的男子仍未察覺。

『你諗下，警察上門搵人會點呀？』

『咪…咪撞門囉？』

『屌！係敲門啊！』男子焦急不安：『你再睇下對面果條友！警察敲左咁耐門都仲係張床上面！』

『下……』剛來的男子拿起望遠鏡：『係喎…但…佢會唔會暈左咋？』

『無啦啦暈乜鬼！你用大果部望遠鏡睇下啦！床上面果個唔係人黎架！』

『唔係人！？…』剛來的男子即時換上另一部望遠鏡：『明明有個灰灰地既物體…睇得唔係好清楚…』


『係個登山背囊！』男子續道：『眼鏡、帽、假髮住部都係掩飾黎！條友將個背囊塞係個被竇入面扮有人訓覺呀！』

『咁…咁佢去左邊？』

『你幫我打畀大佬！我去翻睇錄影帶！』

『收到！』


一直監視阿沁既男子，立即趕到電視機前面翻睇整晚既錄影帶。

但男子一直都監視住阿沁，到底阿沁係點樣走甩！？

而且，從阿沁偷走之後，男子亦加倍留神注意，從阿沁一返到住宅發脾氣自暴自棄後，

阿沁就一蹶不振，完全放棄咁一覺訓天光。

係過程中男子一刻視線都無離開過，除左…


望唔到既死角位。


『喂兄弟，個電話打唔通喎！』

『屌！繼續打啦！』


男子不斷翻睇樓梯轉角既錄影帶，可惜完全一無所獲。

整棟大廈只有三層住宅，出出入入都係普通市民，完全無一個類似阿沁蹤影既男子走過。

甚至連位處於三樓樓梯轉角既錄影機，都影唔到半個人影出入。

『唔通係部機壞左？！』

男子立即改返去正常live錄影狀態，但三部錄影機功能一切正常。

因為仲可以見到警察徘徊係阿沁住宅門口。

此時，電視傳來聲音。


［sir，爆破組到左。］

［收到，大家clear，一入屋即時拉人］


錄影機拍攝到爆破組利用工具向阿沁住宅道門進行爆破，

入屋後眾警員都拔槍戒備，同時將槍準心對准阿沁張床。

其中一名探員撳起張被，果然，露出只係一個戴有眼鏡、假髮等一切易容裝備既登山背囊。

現場既人都面面相覷，目瞪口呆。


係警察、趙政祺手下、黑道古惑仔等三方圍攻…

仲有錄影機、車輛截查、商鋪戒備等封鎖既情況…

按常理就連一隻烏蠅飛過都留意到，但呢一刻…


阿沁竟然不知所蹤。




-------------------------------------------


另一邊廂

咔嚓－－－




社工看見大門打開踴躍迎接：『哎呀～～沁仔咁耐唔黎呀？』

『唔好意思…呢排忙左少少…』

『今日又黎買野食探啲露宿者呢？』社工笑言。

『社工姑娘…唔係呀…我係黎投宿架…』

『下？』