『沁仔,你係打算…係度留宿到聽日?』社工姑娘問。

『嗯,我暫時留一陣,聽日就走。』阿沁拎住個裝得鼓起既袋回答。

『哦…雖然唔知沁仔你因咩事要留係度…』社工想了想:『不過都無問題既,巡例登記返就可以…』

『好,麻煩哂你。』

『咁…』社工拿出一塊登記板:『你係呢度寫返名同電話就可以…』




阿沁放低個袋係地下,拎起支筆飛快地係登記板上面填資料。

但想深一層,如果填真名既話一樣會被人查到,所以保險為上,都係填個假名就算。

選擇去社區中心留宵,而唔係去酒店既阿沁,好清楚明白到每間酒店大堂都會有錄影機,

更勿論要真名登記既手續。萬一有人要查起上黎,自己到時插翅難飛。

唔單止咁,賓館、時鐘酒店、食肆等統統都有錄影機。



所以,社區中心就係唯一既去處。


『咁…應該ok喇可?』阿沁拎起袋問。

『嗯…』社工望一望覺得有唔妥:『沁仔…你個名…?』

『有咩問題?』阿沁拎出身分證反問道。



『哦…哦…』社工無再追問:『無野喇。』

『咁我今晚再返黎得唔得?』

『無問題,未來24小時你都可以返黎架…』社工欲言又止:『沁仔…你屋企係咪有咩事?』

阿沁隨便搵個籍口:『無咩,同屋企人鬧交姐。』

『哦哦…』社工面露親切的笑容:『其實同家人嗌下交好平常架咋…好似我咁,我成日都會同我啲家姐細妹鬧交架~』

『哈…係呀…』阿沁敷衍著。

『嗯嗯~不過呢,真正既家人,到左第二日就無事架喇。』

『真正既…家人…?』



『係啊~唔理係朋友又好,家人又好,只要對方畀到你一種知己、又或者係兄弟姊妹既感覺既話,就算鬧交都好,感情深厚好快就無事架啦~』

『哈哈…』阿沁苦笑著:『社工姐姐即係社工姐姐。』

『邊係呢?分享下之嘛。』社工莞爾一笑。

『嗯,我明既。』阿沁點頭言謝:『多謝你。』

『傻既…客咩氣呢,沁仔你要知道…首先道歉果個唔一定係錯,而係覺得段關係比尊嚴更加重要,只要互相體諒,無野係解決唔到架!』

『互相體諒……』

『呀~唔講呢啲住啦~我夠鐘巡房,沁仔你自便喇下。』



『好…唔該。』



阿沁拎住既袋,入面裝住既全部都係現金,仲有一部notebook,不過阿沁都無為意,

只係企係原地發呆,腦海中不斷想起社工既說話,同埋阿dee、hyuna之間既事。

唔通自己真係要體諒一下佢地?

雖然好多人會諗:「我體諒佢,邊個體諒我呀?」

但想深一層,做兄弟既…係咪真係要咁計較呢?

「首先道歉唔一定係錯,而係覺得段關係比尊嚴更加重要。」



社工姐姐既呢一句深深地刻左係阿沁腦海之中。


嘟嘟嘟嘟---


『喂,阿dee,係我。』阿沁離開社區中心後,即時聯絡阿dee。

『阿沁…?』

『係…』阿沁唔知點開口。

『你去左邊呀?趙政祺話你失左蹤,你冇事丫嘛?』



『我…無事…』

『果晚我知道你聽到哂我同趙政祺講啲野…但…兄弟,對唔住…你知我……』

『得,』阿沁打斷阿dee:『我明白你既處境,我都有唔岩。』

『咁你而家係邊?趙政祺有冇對你不利呀?』

『我唔太方便講…只係暫時仲安全。』

『阿沁你冇事就好,』阿dee把聲音壓低:『我聽到趙政祺琴日派左好多人去監視你…聽講仲諗住今日朝頭早有警察去拉你…但,你係點走得甩架?』

『趙政祺果然想陷害我…』阿沁嘀咕著。

『趙政祺而家嬲到飛起呀!我都係偷偷地鼠出黎先打到比你咋。你係點走甩架?』阿dee再三追問。

『哦……我係…飛走既…』阿沁冷靜道。

『飛走!?』阿dee目瞪口呆:『咪玩啦!點飛啊!』

『講笑咋死仔,』阿沁笑了笑:『其實我係天台走既。』

『天台?』阿dee好奇一問。

『嗯,本身我偷走過一次但唔成功,後來我返到屋企…周圍搵左一次發覺根本無監視器;然後就扮訓覺,再搵野掩護自己,之後迅速執拾少量物品就從天台走。』

『下…天台點走啊?』

『咪就咁行囉!你唔記得我棟大廈係唐樓黎架咩?天台全部都係相連架,我去左另一棟大廈就出返去地面。』

『阿沁…』阿dee佩服不已:『你果然好細心。或者我之前應該聽你講……』

『唉…唔好提呢啲喇。』阿沁不堪回首:『總之阿DEE,你一定要相信我,就算你幫到趙政祺做野,未去到最後,你都唔知佢會點對你!』

『你係話趙政祺會殺人滅口?』阿DEE問道。

阿沁冷靜回答:『好有可能。』

『咁…阿沁你下一步諗住點做…?』

『我暫時可能要四圍走…免得被趙政祺搵到。』

『下…』阿Dee甚感擔憂:『咁警察果方面你點搞啊?』

『放心…佢地未拉到我返去,仲未有證據起訴我…我都未算係通緝犯既。』

『咁你小心啲…我返去開會啦,再聯絡。』

『你都係…』阿沁準備收線前:『呀,係呀,hyuna佢而家點?』

『佢……』阿dee欲語還休:『佢都係咁啦…經常幫趙政祺做野,聽講佢之後好似有重要任務…』

『重要任務?!』阿沁心中一愕:『如果有咩事你再sd e-mail比我,我會每日都睇,用電話我怕被勾線。』

『嗯,做兄弟,明既。』阿dee爽快回答。

『拜拜。』


阿dee掛上電話後,百般無奈地望著身邊既人。


『喔?原來是從天台上走的呀…我真走漏眼。』趙政祺道。

『趙小姐,』阿dee恭敬的說:『而家我地唔知阿沁係邊,應該點做?』

趙政祺搖著手中既紅酒:『一隻過街老鼠幹不了什麼事的,只要有誘利,他就會自動出現。你懂嗎?』

『係…明白。』

『我說呀,』趙政祺詭異的笑著:『想必他死也想不到,你這個好兄弟居然會出賣他到這種程度吧?』

『我都只係…為左我身邊既人…』阿dee含淚回答。

『好,下個禮拜hyuna會有任務去接近銀行的高總,而你就負責指揮清理佔中的人製造混亂,將會有會議要你去,清楚了嗎?』

『明白…但…點解hyuna既事都要同我講?』

『還用說嗎?當然是你告訴她了。』趙政祺說道。

『我去話佢知?』

『沒錯,走吧。』


雖然阿dee唔知點解趙政祺要單獨同佢見面,甚至將其他人既任務都交託畀自己。

想必趙政祺一定會懷疑hyuna對阿沁仍然有感情,怕會誤左大事,所以唔再信任佢,

反而改為信任阿dee,因為趙政祺有十足既把握可以威脅到阿dee。

而阿dee亦深切明白呢一點,所以先得到趙政祺既信任。

被委派重任既感覺令到阿DEE精神毫不能放鬆落黎,一切,都只能順應趙既意思而行。





一星期後。




『成件事就係咁…總之趙政祺就係想你埋去果個高總身邊,我雖然唔知果個係邊個,但趙小姐咁講我照轉達畀你聽…』


阿DEE在一間咖啡室同Hyuna對望而坐。

『嗯……』hyuna縐著眉點頭:『咁…有冇話要我做啲咩……?』

『呃…呢層…』阿dee想不起來:『冇呀,趙小姐淨係叫你埋佢身……』

『哦,咁我明白喇……』hyuna苦笑著。

『咁…』阿dee拎出一張卡片:『呢間中環既私人會所,係果個高總逢星期五都會去既地方,果度有好多o靚模,趙小姐會安排個agent轉介你入去…』

『係呀……』hyuna支支吾吾:『又要做果啲事……』

『Sorry…』阿dee甚感無力:『幫唔到你啲咩……』

hyuna擺出一副樂觀的表情:『唔緊要…我慣左喇…』

『不過…』阿dee忽地想起:『你頭先講既"又要"係咩意思?趙小姐之前要你做過同樣既事咩?』

『無…無啊…』hyuna尷尬地立即轉換話題:『係呢,果度咁多靚女…趙小姐點知高總一定會揀到我?』

『哦,』阿dee毫不驚訝:『正如我頭先所講,果個高總成日都會去果間私人會所,基本上果度咁多女都被佢揀過…如果有新臉孔…正常男人都一定會…』

『嘻,阿dee你好似好熟咁喎。』hyuna笑著說。

『邊…邊係!』阿dee擺出一本正經的表情:『係呀,你都仲未答我,你之前仲幫過趙小姐做呢啲事咩?』

『我……阿dee…你都係唔好問啦…都過左去…』hyuna逃避著對方的眼神。

可惜咁樣令阿dee更加想知:『你講啦!我保證唔會同人講出去。』

『但……』

『唉,你咪當我係朋友咁囉,有時屈屈埋埋啲私密係心…的確好唔舒服既。』

『我可以同你講,但你唔可以話畀阿沁知。』
『阿沁…?』阿dee分析了一下道:『哦…我明白你唔想阿沁知你做呢啲事既。』

『唔單止咁…』hyuna欲言又止。

『下…?』

『當初…其實都係我令佢同我分手…』hyuna眼角閃著淚光。


阿dee呆一呆,回想起:『你令阿沁同你分手…?!你指張經理果件事!?』

『嗯…』hyuna無奈地點點頭。

『但…?點解?我唔明呀。』阿dee臉色凝重。

『你仲記得當初佢成日捉啲女同事入房嘛?』

『梗係記得啦!』阿dee忿忿不平。

『其實好多人都投訴過張經理,甚至果時趙政祺作為分區經理都有收到呢啲投訴而召見過張經理…』

『then!?』阿dee緊張起來。

『不過張經理當時手上有公司既洗黑錢證據…所以趙政祺先奈佢唔何…仲經常加佢人工…』

『下!?』阿dee感到驚訝:『公司洗黑錢既證據?!』

hyuna解釋:『嗯…趙政祺當時利用自己私人戶口,去幫公司買貨返黎,再用公司既錢過數比返自己。』

『咁肥佬張經係點發現架!?』阿dee立即追問。

『佢留意到公司既來貨單,入數既戶口同平時唔一樣…一查之下好輕易就查到係趙政祺既戶口…』

『所以佢就肆無忌憚咁係公司做土皇帝!?』

『嗯…』hyuna遠眺著窗景回想:『但張經理又唔想升職,因為升職會多好多工作,所以就不斷威脅趙政祺加佢人工…甚至忽略所有投訴。』

『即係話…係果時你已經識得趙小姐?』阿dee問道。

『嗯…』hyuna如實作答:『然後趙政祺就要我埋佢身…做佢女朋友,然後有次同佢去澳門旅行…趙政祺安排左一班人禁錮左佢係黑沙灣…迫佢簽左張借據…等佢返左香港…就不斷被追數…到最後家破人亡…』

『咁……下?…係咪真架…?』阿dee不敢相信呢一切。

『嗯,對唔住呀…一直呃住你地…』hyuna低頭回答。

『咁…?你其實一直都仲鍾意阿沁?!』

『我無變過…』

『喂…你講笑咋嘛…你一個女仔…點承受到咁多野呀…?』

『我無辦法唔咁做…因為當時我唔幫趙政祺,阿沁就會有危險…你知道嘛?你係我…你會點做?』

『我…Sorry呀hyuna…』阿dee衷心道歉:『我一直都怪錯左你…』

『唔緊要…最緊要你同阿沁都無事。』hyuna破涕為笑。

『呢層…阿沁佢………』阿dee支吾以對。

『嗯…?』


『唔講呢啲住啦!等成件事完左,希望你地可以係返埋一齊!』阿dee祝福著。

『阿dee…求你一定要幫我守秘密。』

『嗯,promise。』阿dee爽快答應,續道:『不過,我都有件事想同你講。』

『咩事…?』