《完美犯罪手冊》 - 為了上進而失去一切的故事: 《付出》

阿dee一邊拎住部電話，另一邊望住車廂後面既elise同hyuna。

趙政祺竟然係呢個時候打電話黎完全係阿dee意料之外，本想載兩個女仔返屋企休息一下，但而家忽然要突擊報告？

不過其實諗深一層都好正常，因為清晨時份基本上可以肯定hyuna已經完成左要做既任務，但阿dee只係估唔到趙政祺會咁快行動，連抖氣既時間都冇。

但忽然要hyuna聽電話，以佢而家呢個完全放空既狀態…唔好話報告啦，講野都未必得！

點算…點算…阿dee內心不停嘀咕著。






『怎麼樣？』聽筒傳來趙既聲音。

『呀……』阿dee隨機應變道：『hyuna佢去左洗手間…一係趙小姐你十分鐘後再打黎…』

『洗手間？』趙續道：『那你為什麼呆那麼久才說？』

『欸………冇計啦，我通宵左成晚唔夠訓嘛。』阿dee再次掩飾。

『別裝了。』





『……』

『叫她來聽。』

『趙小姐…但…』

『快！』






阿dee聽到趙政祺一聲怒道，心底不寒而慄，只能死死地氣地下車再往車廂走去。

無辦法，根本無辦法。

阿dee唔知係自己掩飾得差，定係趙政祺真係睇穿自己一切，要隱瞞佢根本係無可能既事，就如hyuna任務失敗一樣，趙政祺遲早都會知。

頃刻，阿dee已打開後座車門。


『………』阿dee無言以對望住兩個女仔。

『做咩？』elise懷抱著hyuna問道。

『有電話…搵……佢…』阿dee無奈地支支吾吾。





Elise擺出一臉討厭既表情：『邊個黎架？！』

『係我地既＂老闆＂…即係今晚呢個行動既話事人……』阿dee百般無奈道。

『妖！！』

『…？』阿dee呆一呆。

『你係咪男人黎架！？明知hyuna唔舒服又問長問短又拎電話畀佢！煩唔煩？』elise稚氣怒道。

『Sorry…我都係迫於無奈…』

呢個時候，阿dee低著頭道歉，elise就襯機會一手搶左佢電話。

『妖！等我聽！』





『喂…！』阿dee阻都阻唔切。


『喂？邊位呀！？』elise拿起電話就講。

『你是誰。』趙政祺冷冷的道。

『強國人？你又係邊個呀！？阻住本小姐休息！』

『真沒禮貌，叫阿dee來聽。』

Elise望阿dee一眼：『唔得喎！你唔係要搵hyuna咩？我就係hyuna啦！有咩就講～！有屁就放！咪阻住我訓覺豬添呀！』

『你…！』趙政祺呆左一下，因為從來無人敢咁無禮貌同佢講說話。





阿dee即時勸阻：『喂…！阿螢…！』

Elise推開阿dee隻手：『無野講喇嘛？係咁先～拜拜！』

『你敢！？』趙急忙道。


嘟－－－－－－－－－－－－－－－－－


靜哂。

趙政祺最後果一句大聲到整個車廂都聽到佢把聲，但elise呢一下cut對方線完全出乎所有人意料之外。阿dee亦目瞪口呆地望住部電話。





『喂…！』阿dee驚慌道：『阿螢！你傻左咩…！你知唔知咁做好大獲架！』

『我唔知～！我咩都唔知～！我淨係知而家hyuna好需要休息！啲閒雜人等cut佢線又點？鬧爆佢都仲得呀！』

『喂…但係你都唔洗cut佢線架…大佬…』阿dee搶回電話，擔心不已：『死啦…仲要無來電顯示…點打返去呀…』

『妖！無鬼用！』Elise天真無邪的道：『而家我重要啲定係電話入面個人重要啲呀？』

『Er……』


阿dee聽到呢個問題後，本來既擔心都被尷尬既感覺所掩蓋。

雖然二人尚未正式係埋一齊，但兩個人之間都感受到對對方既好感，只係一直未開口講出黎，

但阿dee忽然間被elise咁問，就好似捉棋中被將一軍一樣。


『即係我重要啲啦～？』elise笑嘴角上揚，笑裡藏刀。

『咁…』阿dee仲未講完之際。

『劉司機，開車～！』

『下…？去邊？』

『入大埔啦！』

『入大埔…？hyuna都唔係住大埔既？』阿dee問道。

『去我屋企嘛！』

『……去你…屋企…？』阿dee臉紅耳赤地望住elise。

『喂，你咁望住人地做咩？死咸濕仔亂諗野！我想照顧hyuna咋！』

『哦…哦…』


阿dee吃過閉門羹後便沒趣地走回司機座。

呢個時候，雖然阿dee好擔心趙政祺唔知會有咩反應，竟然被elise咁樣落佢面。

但另一方面反而好佩服elise竟然夠彊cut對方線。


都唔知話elise做野無分寸，定係話佢有膽色好。

但某程度上黎講…elise就係憑住呢一份天不怕地不怕既稚氣，先唔會受任何人束縛。

好多事都可以隨心所欲，呢點的確令到阿dee十分欣賞。

最起碼佢敢呀？你敢唔敢？阿dee不斷反問自己。


回想返轉頭，我地細細個既時候做好多野都會比長大後更果斷，更直接，唔會轉彎抹角。

但人大左，生活同工作上都會受到好多既束縛，令到自己應有果份信念同純真都會蕩然無存。

愈接觸得呢個殘酷既社會耐，愈被呢份束縛所吞噬。


雖然elise唔知對方係咩人，所以先敢口出狂言，但換轉自己呢？

換轉阿dee既話，都一定問清楚對方係咩人先敢回答，因為怕得罪唔應該得罪既人。

其實換個角度睇，呢種＂衝動＂某程度上黎講都係好難能可貴既一件事。



概歎完一番後阿dee腳踏油門，便於中環大街上揚長而去。

一個鐘後，電話忽然又再響起。


『嘩…唔係打返黎找晦氣嘛…』


正係阿dee一邊揸車一邊擔心時，望到個來電後終於鬆一口氣。


『喂，邊位？』阿dee問道。

『係我。』聽筒傳來一把男聲。


『你…你係…』

『我地見過一面架呢？唔記得喇？』男人問道。

『你…』阿dee想了一想：『你係搞叔…？』

『嗯。』


阿dee仲記得搞叔把聲同個樣都只係趙政祺大宅入面見過，

雖然呢排準備佔中清場既事，但一直都係用短訊交流，所以阿dee一次都未直接用電話聯絡過對方。今次搞叔親自打黎拉自己，令到阿dee大感錯愕。

『有咩事？』

『你上次既計畫，我同班兄弟已經搞掂。』

『咁快！？』

『挑那星，梗係啦！』

『咁唔該哂你……』阿dee客氣道。

『咁下一步你想點做。』

阿dee分析了一下：『我記得上次係叫你地班兄弟乘機混入去佔中班人，然後係半夜搞事係咪？』

『嗯。』搞叔冷靜的道。

『今次……』阿dee把車停下來：『我留意到好多警察都好憎佔中，甚至會幫埋你地一份，呢個係好既現象黎，你地可以再去得盡啲。』

搞叔聲線低沈：『再盡啲…？』

『既然警察都唔理，你地仲怕乜野？』

『咁…得，收到。』搞叔準備收線。

『記得半夜入黑先做。』


收左線後，部車亦都停定左係大埔廣福道附近。

阿dee跳下車後，從認真嚴肅既表情轉回溫柔：『懶訓豬，落車喇。』

『嗯……？』Elise同hyuna相偎而睡，雙眼半開半合道：『到左喇…？』

『係，洗唔洗扶你地上去？』

Elise打起些少精神：『唔洗喇…你都攰…返去休息下先啦…』

『咁佢……』阿dee望住hyuna。

『我地得架喇……』elise輕拍hyuna一下：『hyuna…落車喇。』


Hyuna張開眼後仍然好冇精神，而且仲面青口唇白咁，甚至甫下車後著地都企唔穩。

『喂…佢真係冇咩事嘛？』阿dee擔憂著。

『應該訓返覺就無事…掛。』elise猶豫的道。


hyuna此時用微弱既聲線道：『阿dee…有心…我無事…』

『但你…』

『有…有件事想拜託…你…』hyuna辛苦地吐出一句。

『咩事？』

『…如果…你聯絡到阿沁…千祈…千祈…唔好同佢講…包括我同你講過既所有事…』

阿dee愁容滿臉：『咁點得呀！？』

『當我…求…求下你…』

『但你應該好需要阿沁既關心呀？』阿dee煩惱著。

『我已經…無面目見佢……』hyuna虛弱地呼吸。

『hyuna………』在一旁既elise好明白hyuna點解會咁。


『唔得！』阿dee一口拒絕：『你為佢做左咁多野！點解唔可以同佢講！？最起碼你為佢付出既要畀佢知呀！』

Hyuna苦笑地搖搖頭：『真正為一個人去付出…根本…唔需要畀佢知…』

『但係！』

『就當…阿沁一直認為我係貪錢既女人…總好過…見到我咁…令到兩個人都心痛…係咪？』

『………』

hyuna流著淚：『阿dee…求下你…可唔可以答應我呢件事…？』

『嗯…我應承你唔同阿沁講。』阿dee回望elise：『咁你地上去先啦…』

hyuna破涕為笑：『多謝你…』


『阿dee你都返去休息下喇～！』elise貼心的問道。

『嗯，再call你。』



阿dee呢一刻好矛盾，一個咁好既女仔…竟然為阿沁付出左咁多而不求回報。

做所有事都為左對方…但點解會落得呢個下場？

不過如果阿沁知道左，恐怕唔單止係一個人崩潰，一個係朋友，一個係兄弟，

阿dee為左阿沁…亦為左hyuna既願望，都只能將呢個秘密一直保守下去。


可以解開兩個人之間既結，就只能靠阿沁自己用心去感受一切hyuna為佢做既事。

假如阿沁仲愛hyuna既話，就算唔講，都一定會感受得到。