《完美犯罪手冊》 - 為了上進而失去一切的故事: 《出賣》－下

『我被人…跟蹤？』



阿dee即時停下所有動作，然後向四周打量。

不過周圍都冇咩可疑既人，因為全部都係準備去夜蒲既年青男女。

阿dee此時心想，唔通係出面？






絕對有呢個可能，因為阿dee頭先出門口時非常急忙，所以無留意到自己身邊有咩人。

的確，人總係會被眼前既誘惑所蒙蔽。


阿dee壓低聲線：『阿沁…你點知…？』

『我唔同你，我而家唔見得光，所以我唔會露面。』阿沁冷靜且沈著。






『你唔會露面…？』阿dee滿腹狐疑：『咁你約我出黎做咩？』

『其實我……』阿沁遲疑了一下：『我想確認一件事。』

『咩事？』


『本身我係想問趙政祺有咩部處，但而家…阿Dee，我想確認你…仲係唔係我認識果個阿dee。』





『下？』阿dee大感錯愕：『你咁講…咩意思？』

『你老實同我講，你而家係咪企係趙政祺果邊？』

『唔係。』阿dee憑感覺回答。


『咁點解你要出賣我。』阿沁單刀直入。

『下！？』阿dee聽到後開始激動：『我幾時出賣你！？』

『你肯定無？』阿沁問道。

『無！！！』





阿沁繼續追問：『一刻都無諗過？』

『無！！阿沁咩事呀！？』阿dee內心充滿著不安。

『咁點解……』

『下？』

『點解你要錄我音？』

『……』阿dee無話可說。


－－－－－－－－－－－－－－－－－－－






一小時前。


『喂？』

『阿dee…係我…』
『阿沁…？咩事？』
『無…你得唔得閒出一出黎飲杯野…』
『下？』
『係咪唔得閒…？你有事忙就由佢…』
『唔…唔係！梗…梗係得啦！兄弟叫到一定出！』
『嗯…』『我係尖沙咀，咁老地方等啦…食少少野再去飲酒…』
『老地方…？』『哦，茶餐廳。』
『幾驚你唔記得…咁轉頭見啦…bye…』






阿dee係見到阿沁來電既一刻，就已經被金錢充昏頭腦。

即使未決定出賣阿沁，阿dee潛意識早已打算將阿沁既行蹤報告畀趙政祺知道。

所以，係阿沁於聽筒中發出「喂」一聲時。

阿dee已無聲無色地按下屏幕上既錄音鍵。


係貪婪既影響，定係作多一手準備都好，阿dee呢一步都係迫不得已。

甚至，阿dee根本無諗過自己會咁做，根本無做呢個行為既打算；





但隻手…卻不由自主咁按下去。


就好似你拎住把刀，有人想衝過黎殺你，呢個時候因為＂本能反應＂你就會做出自衛既舉動。

你唔想傷害人，但你確實傷害左。


當時既阿dee，正正就身陷呢一種境況之中。

若非阿沁再次提出，阿dee都可能唔記得自己做過呢件事。


－－－－－－－－－－－－－－－－－－－－－－－－－－－－－


『你…點知…明明無聲音……』阿dee呆立當場。

阿沁冷冷的道：『有，有聲音。』

『下…？』

『係屏幕被手指觸碰既聲音。』

『但…點解我聽唔到…？』阿dee問道。

『呢種輕微既聲音只有通話既另一方聽到，係阿dee你接左我電話之後，你未出聲前我已經聽到好細聲既＂噗＂一聲，你自己可能聽唔到，但電話另一方既我，收音就收得非常清楚。』


阿沁好似司空見慣地解釋道，更令到阿dee無地自容。

『但你憑咩話我錄你音！？』阿dee仍不服。

『阿dee…點解你仲唔知錯？』

『知咩錯？』

『我係話…唉…』阿沁續道：『正常聽電話係接通左之後，就好自然會放係耳邊，有邊個會仲撳個屏幕？一係你就開擴音，一係你就錄音，點解你仲唔認？』

『………』阿dee默然不語。



阿沁繼續道：『我頭先問你位置，係因為我想確認我見到果個人到底係咪真係你；問你部手機係咪屬於你，係因為我發覺呢部並唔係你之前用果部手機，呢部手機係趙政祺畀你既，係咪？』

『………』

『阿dee，你醒下啦好嘛…唔好相信趙政祺，你認為人佢真係會放過你？』


『……』阿dee遲疑左半秒，打算反客為主：『喂…阿沁…唔好講呢啲住，你而家係邊？』

『我已經走左。』

『走左…？走去邊？』

『我唔知有幾多人跟蹤你，係打畀你之前我已經離開左。』阿沁回想起趙政祺跟蹤自己一事。


阿dee作狀道：『我明阿沁你係怕趙政祺害我，係想我好，我明白架！雖然我係有錄你音，但你一定要相信我！』

『相信你咩？』

『其實阿沁你唔搵我…我都打算搵你架啦，不過我又冇你而家既聯絡方法…我有啲好重要既事要同你講。』

『咩事。』

阿dee見阿沁開始感興趣，便直白道：『係關於hyuna。』

『hyuna……？』阿沁腦海中閃過她臉龐：『佢咩事？』

阿dee聲線轉為低沈：『hyuna佢…』

『有咩就講！』

『我一定要同你面對面講，阿沁，求下你信我多一次。』

『阿dee，唔係我唔信你，係你畀唔到一個值得我相信你既理由呀。』



阿dee自知難辭其咎，因為的確被阿沁發現左自己有不義之心，

此時阿沁就好似驚弓之鳥咁對人防範，再加上佢而家身陷險境，對所有事都加倍小心，

但阿dee此時彷彿將一塊肥豬肉放到口邊，唔想佢白白流走一樣；

準備用盡所有辦法都要引到阿沁出黎。


『呀！一係咁！』阿dee突地一聲。

『點？』

『一係阿沁你指示我去一個地方，我全程同你講住電話，咁咪唔怕囉？』

『唔得，你一樣會被人跟蹤。』

『點會呢？我識隨機應變架嘛！我可以跑上的士，又或者去坐地鐵，一樣可以擺脫到果班人。』

阿沁冷冷的道：『無可能，我曾經都試過被跟蹤，我用盡方法都甩唔到，而且對方唔止一人，你未必發覺得到。』

『咁…咁…咁不如偏僻既地方？！荒山野嶺佢地要跟都未必跟到！仲有…又或者……』


『夠喇！！』阿沁忽然大喝一句。

『下…？』


『阿dee…到底點解你會變成咁架！？』

『我…？我變成點？』


『你根本唔係以前果個阿dee！』

『咩…咩啊…我不嬲都係咁呀…我係你好兄弟呀…阿沁！』


阿沁忍痛道：『我認識果個阿dee，係會考慮所有後果既人，絕對唔係只貪一時之好處就偏執埋一邊既人黎架！』

『我偏執…？』阿dee縐著眉。

『到底趙政祺畀左幾大利益你？！要你咁死心塌地咁去賣命！？』

『……』


『阿dee！我願意同你講咁耐野！我已經畀左好多次機會你，係因為我仲當你係兄弟呀！』

『……』


『我真係唔想再見到你錯落去，就算你有得益，你良心會好過咩！？』

『………』


『你自己諗下，由我一打畀你到而家，你每一句都係想引我出現，無錯，我係好想知hyuna既現況，但點解唔可以係電話度講？而要親自見面？』

『咁…咁面對面講…唔怕畀人偷聽到嘛…』


『怕偷聽！？』阿沁理直氣壯：『你怕偷聽你敢打畀我？』

『……』

『你知唔知我而家冒住幾大風險同你講呢次電話？全因為我當你係兄弟！』

『夠喇，真係夠，阿沁。』阿dee語調轉變。

『夠…？』


『唔好再教訓我。』

『阿dee…？』


『係，你講得岩，趙政祺係畀好大利益我，我的確曾經係想引你出黎。』阿dee和盤托出。

『你果然…』

『但，我有問過自己，係咪真係要咁做呢？咁做好可能會害死你，所以我有同趙政祺討價還價。』

『咩討價還價？』阿沁問。

『而家你自己一個＂著草＂，點解唔返黎同我一齊合作幫趙政祺手？』

『返黎…？點返？你知唔知佢點對我呀？！』


『趙政祺同我保證佢唔會傷害你，佢只係想你幫手做野，係真架！』

『要做啲咩。』


『呢層我唔知…但…你信我啦，你返黎既話，趙政祺會保證到你既安全，因為佢仲需要你既幫助，絕對唔會有人傷害到你架！』


『咁幫完呢？』阿沁即時反問。

『……幫完…咪…』

『放我走？』

『係！係…！好可能會架！』阿dee笑逐顏開。

『阿dee…』阿沁糾正道：『唔係，劉一二。』

『下…？』


『你已經無藥可救。』




嘟－－－－－－－－