《完美犯罪手冊》 - 為了上進而失去一切的故事: 《終章》 - 伍

－－－－－－－－－－－－－－－－－－－－－－－－－－－－－－－－－－－－－－




『喂，Dee，早晨。』

『早晨。』






上午11:30分，阿dee非常準時地返到公司，榮sir亦同樣準時，因為二人都知道今日既行動同平時既解款唔一樣。即使二人口上無講，但亦心照不宣。

相反，誠哥同陳仔今次並唔知情，所以未夠鐘都未見人影。

『榮sir，咁我去拎物資先。』

『嗯，好。』


被趙政祺安排係同一個更既阿dee，心入面不斷想住接下來既行動，





就好似電影咁一幕又一幕係心入面重播，緊張感令阿dee思緒不寧、忐忑不安。

戴上頭盔、換上制服、拎起對講機，阿dee已準備開始今日既行動。


不消一會，亦見到誠哥同陳仔既身影出現，連同持有散彈槍既榮sir，一隊人整裝準備出發。

係出發之前，榮sir一如平日同大家開一個簡短既會議。






『大家早晨。』榮sir一貫隊長既口吻。

『早晨！』阿dee三人異口同聲。

榮sir拎住份報告讀出：『今日既order係到金庫幫中國銀行押運，我地連同b team、c team，一共三車人去押運十億現鈔以供聖誕新年，銀行同提款機既需求，b team c team會用裝甲車，我地會用輔幣車去運送。』

『下？！』誠哥立時覺得不妥：『點解淨係我地用＂細車＂？』

榮sir神態自若：『因為附近有賣旗活動，有裝甲車被召用去押運善款，所以我地用輔幣車。』

『哦……』

榮sir接著說：『由於所運送既現金唔少，保安問題公司會有＂辣更車＂隨行。』





『明白。』

『咁而家對錶，中午12時03分，A team出發。』


此時，阿dee心中一凜，千算萬算竟然算漏左有「辣更車」呢件事！

「辣更車」同普通解款車唔同，佢唔需要押運任何物品，相反，佢既外表只係一部普通不過既私家車。

而辣更車既作用，就係位於解款車既前後開路，以免有不法之徒乘虛而入駛近解款車。

同時辣更車上既人，全部都係公司內較高層既人員，可以監視住公司有冇監守自盜既職員。

「辣更車」係保安公司既第三重保安。






『仆街…有辣更車點算……』阿dee心想著。


榮sir係開會既時候，講到最後一句時有同阿dee對望左一眼。

二人都知道若果有辣更車既話，事情既進展可能冇咁順利，而且仲極有可能失敗。

假如有辣更車尾隨，即使跌左錢都好，就算解款車上既人無發現，後面既辣更車既人都一定會知道！

呢個時候所有事都會功虧一簣，製造唔到市民執錢既現象！亦即係話趙政祺既計劃會失敗…自己條命亦凍過水！

想到呢一點，阿dee額角開始冒汗，不時望住榮sir想知對方有咩打算。

但此時阿dee見到榮sir既眼神，竟然無一絲既不安，相反更處之泰然、胸有成竹的樣子。





『榮sir…你有咩計…？』阿dee心想著。


雖然唔知榮sir有咩方法，不過呢一刻既阿dee只能相信於榮sir既下一步行動。


一行四人浩浩蕩蕩登上輔幣解款車後，以為同平常一樣既誠哥、陳仔亦拿起手機玩，完全被蒙在鼓裡一樣。


『喂！你地琴日有冇去公司個週年晚會？』誠哥問。

『有呀！』陳仔立即答：『我仲抽到部ipad比個女呀！』

『唔撚係下話！？咁好彩？』誠哥揶揄道。





『哈！可能呢排旺啦！馬仔都成日中！』陳仔一邊渣車，一邊望身旁既榮sir：『榮sir有冇去？』

『我？』榮sir續道：『冇，琴晚好早就訓左。』

『哈，你唔去就蝕啦！』陳仔笑逐顏開。

誠哥亦玩著手機問阿dee：『dee，你呢？』

『無呀…我琴晚去左陪女朋友。』阿dee隨口編了一個大話。

『挑～～～～』誠哥不屑道：『溝咩女丫，正正經經跟我去叫隻雞好過啦！』


車內既氣氛由誠哥帶動起來，就好似平日一樣咁融洽，只有榮sir同阿dee二人有擔憂、不安既感覺。

阿dee經過上一次運送黑錢之事後，去到今日終於明白，點解當時車上既三人都唔同自己講有咩秘密既行動。

因為只要唔同佢講，佢就只係做緊自己既份內事，就算將來出左咩事都好，因為唔知情，所以好輕易就會無罪釋放。

假如同左佢講，第一要佢保密，呢一點已經唔係咁易做到，假如被警察問兩問好容易就會和盤托出。

第二係犯法既事，當然係愈少人知愈好，萬一知道既人愈多，風險就愈高。

所以，榮sir同阿dee此時都守口如瓶，決不會泄漏半點風聲。



阿dee坐係車上面，望住車窗外高架天橋上既大海景色，一切就好似趙政祺既計劃一樣精確。

解款車正以路面最高時速八十公里於東區走廊上行走，相信大概仲有十分鐘便可到達金庫。

雖然時間的確係好準確，但位於前後開路既解款車同辣更車就令到阿dee既內心坐立不安。


到底點先可以擺脫到辣更車既跟隨，甚至係可以剩下一部解款車獨立行走？

除左要諗方法之外，更重要係要令人唔會懷疑。

因為假如利用方法去令自己部解款車獨立行駛，繼而發生跌錢咁大件事，事件巧合到咁，相信冇人會覺得係意外。


要搵出一個合理、而又可行既方法…的確唔係一時三刻可以諗到。

回望坐於車頭座位既榮sir，只見他一直合上眼閉目養神，毫無半點懼色…阿dee心想…到底榮sir有咩打算？


阿dee邊思考，邊遠眺車外…未幾，便到達目的地。


「金庫」。



三輛解款車一齊並排於金庫既停車場入口，車上既解款員不約而同地甫出車外。

一行九人動作迅速且有默契，先打開車箱從車箱中取出必需的物資和槍械。

再配載對講機以作隨時通訊，更確保解款過程萬無一失。


三輛解款車上都有一把司機把守崗位，當中亦包括阿dee一team人既陳仔。

而榮sir、阿dee、誠哥三人就落車準備報道，榮sir更手執槍械戒備著。


不消一會，三隊九人已經準備就緒，位於金庫門外守侯主管到臨。

辣更車上既主管同時躍下車，走向九名解款員前。


『大家跟平時既流程就可以，每隊既隊長作指揮，而家大家先登記，隊長拎晶片卡，分批進入，每架車拎三十箱，現在時間12:30p.m，大家開工！』


接到指令後大家就開始分批排隊於門口登記自己身分，然後隊長就拎晶片ID卡準備進入保安極其嚴密既金庫之內。

根據阿Dee既記憶，一直以黎要進入金庫既只有隊長，將錢箱從金庫入面利用唧車將幾十箱既錢拎出黎，所以阿dee同誠哥登記完後就去到門口等待榮sir。


『喂。』榮sir走近二人忽然開口：『阿dee你跟我入去。』

『下？』阿dee呆一呆。

『點解？』誠哥亦問：『唔係隊長先可以入去架咩？』

榮sir回答：『平時係，但今日運既錢太多，所以要兩個人，阿dee比較大隻，所以我需要佢幫忙。』

『哦……』

『好，明白。』

榮sir解釋：『阿dee你打醒精神跟我黎。』

『係。』


面對突如奇來既行動，阿dee一啲都唔意外。

因為今次同平時既行動唔同，所以已經預左會有突發既事。

再加上係榮sir親自開口要求自己去幫忙，相信亦係想擺脫誠哥，從而可以交談到。

阿dee一直跟緊榮sir身後，離開左大門第一層防線，便立即進入左金庫範圍。

經過一片空地後，就見到金庫固若金湯既鋼製大門。


大門位於金庫既後方，顏色與金庫外牆無異，唔仔細睇絕對唔會發覺係金庫既門口。

榮sir同阿dee企左係大門外，見到四方八面有十數部cam影住自己，二人都不禁感到渾身不自然。

榮sir將晶片卡拍上去大門旁的感應器後，上方既錄影機便開始對準二人鑑定。

確定係解款人員後，大門才隨即打開。

阿dee見到保安嚴密到可謂無孔不入既程度，可想而知要打劫金庫係一件幾難既事。


大門敞開，金庫內部便亮於眼前。


打開門後，阿dee都係第一次見到金庫既內部結構。

同耳濡目染、印象中既金庫唔同，並無閃閃生輝既黃金、現鈔、金條等，金庫大門既後面，只係另一個保安中心。

就如剛剛門口登記一樣，進入金庫後，需要係類似接待處既保安面前，再登記一次。


『你好，』榮sir開口道：『我地係解款員，呢張係我身分證，同埋晶片卡。』

保安核對手中的表格：『係…明白，兩位解款員，請跟我黎。』


四周沒有音樂，沒有任何聲音，密閉、陌生既空間令到阿dee緊張感由然而生。只係一味跟緊榮sir既步伐。

阿dee一邊行過一條長長既樓梯，一邊發覺自己不斷往下層移動…

奇怪。

明明金庫有五、六層高，放置大量黃金現鈔，本以為已經好足夠…但勢估唔到，原來金庫仲有地牢一層。

大概行左三分鐘左右，阿dee黎到另一個光猛，開揚，截然不同既空間之內。


『兩位請係度登記指模，一陣出入都會靠保安系統識別。』

『明白。』


嚴密、嚴密、除左嚴密之外，金庫既保安都係嚴密。

阿dee此時心諗：到底仲有幾多重保安要通過…？

雖然金庫內冷氣好大，但緊張感已使得阿dee開始冒汗。


登記左指模後，榮sir就熟練地走向另一邊，阿dee亦不敢怠慢，果斷跟上。

原來金庫內唔比使用任何通訊工具，所以地牢有一層除左係登記指模外，更有一個locker room比解款員放低對講機同電話。

咁做既目的，係怕有人會監守自盜，因為打金庫主意一定會需要通訊聯絡，所以放下通訊設備就成為了保安重要的一環。

終於孑然一身後，阿dee同榮sir就隨保安走向附近的升降機，送二人到達現鈔的樓層。


升降機門打開後，入面有足足四部錄影機於上方四角設置，保安森嚴得誇張。

阿dee同榮sir二人雖然好想討論如何擺脫辣更車，但奈何現場有無數錄影機拍攝，恐怕都係有口難言。只能按兵不動。


叮－的一聲後


升降機終於到達存放現鈔的樓層。

本以為會係放住金光閃閃既現鈔，但可以同阿dee既想像中有好大既出入。

因為每一疊既現鈔，早已經整整齊齊地放哂入去保安嚴密既「煙箱」入面。

而係旁邊既，又是另一名保安。


榮sir透過閘外的孔對話：『你好，我地係a team既解款員，三十箱A係我地運送。』


保安沒有即時回話，只係不斷望住二人，然後又望回電腦中的屏幕，似是核對二人的身分。

未幾，保安取出一個白色長方形，中間有一紅色透明小長方形的物體。


『請打指模。』


榮SIR將食指放上去，過了幾秒後慢慢聽到一聲「嘟－－－」，然後阻隔二人既鐵閘立即打開。

然後阿Dee同榮sir就開始入去搬動一箱又一箱既現鈔上去木板上，然後再用一部送貨物既唧車，將三十箱既現鈔全數運到升降機內。

每一個箱都係用保安公司一早命人準備好既「煙箱」，而煙箱基本上係無可能將入面既錢跌到出黎，因為只要有些微損壞煙箱既舉動，煙箱內既保安系統都會觸發，令到箱入面既銀紙全部染為綠色。

不過，榮sir同阿dee早料到有此一著，並無太大既擔心，只係等適當既時機開口。


當搬到第十五箱時，榮sir終開口道：『同事，有啲野要問一問你。』

『咩事？』金庫保安反問。

『因為我地今日有三部車，其中有兩部係保安最嚴密既裝甲車，但有一部係載輔幣既解款車，所以我想請問我地既煙箱夠唔夠用，如果唔夠用我想將用膠箱裝既現鈔放係我地果一team入面。』

『膠箱？』保安露出猶豫既神情，然後查看電腦中既資料，得知今日黎押運既車輛的確有一架係輔幣車。

因為輔幣車保安無咁嚴密，所以就必需要採用保安最嚴密既煙箱，而榮sir問左呢個問題，雖然冇話自己果部就係輔幣車，相反，金庫保安以為榮sir一team人係保安嚴密既裝甲車，所以就爽快回答：『好，入面有幾箱膠箱，同事你地先交換運送。』

榮sir客氣道：『唔該。』

銀行托付押運公司所運載既現鈔，每一綑都有記認，但有一漏洞之處就係邊箱由邊架解款車運送並無限制。

因為解款公司既裝甲車於聖誕期間經常唔夠用，所以交換運送既時都經常發生，榮sir咁做只係按平常本旨辦事，絕無異常。


然後，金庫保安就入去倉庫入面，拎左幾箱膠箱裝住既現鈔出黎，準備交托畀二人。

不過保安係交托畀二人前，係膠箱上面貼上封條，然後再係電腦做資料輸入。

當所有放有現鈔既煙箱、膠箱運哂入去升降機後，榮sir同阿dee亦打指模簽名準備離開。


當二人完成後準備進入lift前，榮sir把聲線壓至僅阿dee能夠聽到既音量，開口道：『dee聽唔聽到。』

阿dee稍稍將頭低下：『聽到。』

『一陣我會搵籍口離隊，你自己執生。』

阿dee心感困窘，好奇道：『離隊…？』

榮sir沒有回話，只係默默地走進充滿監視器既升降機空間之內。

而阿dee，只係滿臉猶豫地看著對方。

叮－的一聲後，升降機門再次打開，二人再度經過重重保安，終把三十箱現鈔運送到金庫門口。

早係門口久等既誠哥，一見二人回來便打起精神，上前準備幫忙。

『誠，你同阿dee搬野上車先。』榮sir道。

『咁你呢？』誠哥問。

『我去廁所。』

誠哥並無異樣：『好，阿dee，咁我地搬上車先。』

『嗯。』阿dee望榮sir一眼：『明白。』


於是，二人就將一箱又一箱既現鈔各自搬上解款車之內。

而同行既其他team隊員，亦同樣做緊一樣既事，每個人都專心係自己既押運物上，並無好似阿dee咁留意其他人做緊啲咩。

當箱搬哂上車後，辣更車上既主管亦開始每部車檢查，作最後既核對保安。

確認數量正確後，眾人各自關上車門，主管亦登上辣更車，準備以最快速度離開，不再久留。


當關上車門時，阿dee發覺有不妥之處。


『喂，誠哥。』

『咩事？』

『道門…好似關唔實…』阿dee支支吾吾。

『關唔實！？』誠哥呆一呆：『唔係掛……』

『係呀！』阿dee回應著：『你睇我地同裝甲車一樣搬三十箱，但我地用既係輔幣車，車斗根本就無裝甲車容量咁大。』

『下…咁點算？』誠哥問道。

『唔知，睇個樣車後面最多放到二十七箱。』阿dee分析著。

『咁……』

『同主管講。』阿dee單刀直入。

『都好。』


此刻阿dee明知要做犯法既事，但竟然夠膽搵主管處理，因為，阿dee早就知道會有呢件事發生。

因為公司好少會用輔幣車去運載現鈔，更加少情況去運載咁多現鈔，所以同銀行協商時，根本唔知道輔幣車裝唔哂３０箱既貨，但卻承諾托運三車九十箱既現鈔…發生左呢啲情況，好自然第一步就係搵主管處理。


阿dee走近解款車旁既辣更車：『主管。』

『咩事？』主管拎住份表回頭一望。

『係咁既，今日我地team咪用輔幣車去運錢既？』

『係呀，做咩事？』

『冇，』阿dee裝作平靜：『因為我地部車唔夠裝三十箱錢，所以…想問問你點處理…』

『下？』主管聽到後聞言色變：『你第一日返工呀？』

『唔係……』

『咁你唔撚識點做架咩？！』主管怒道：『冇位就執位啦！再冇位咪放係側門條通道囉，唔撚洗教下話？』

阿dee道著歉：『係…係既…唔好意思……』

『爽手啦！出車架喇，你係咪想累到全部同事平安夜都要OT呀！』主管活像吃了炸藥一樣。


阿dee即時回頭走回自己既解款車的方向，雖然表面係被痛罵一頓，但心底卻盡是痛快。

因為習以為常既舉動，令到主管大安旨意地覺得唔會出事，為左唔洗遲收工，保安亦較平常鬆散。

正常途徑，係應該聯絡銀行，通知銀行解款車誤報可載貨數量，然後待銀行批示，到最後主管更因為估算出錯，而需要寫上報告。

阿dee走去問主管，同時亦擺明話主管做錯事，估算錯貨量，係主管既威嚴下，當然唔會承認錯誤，只想盡快完成工作就算。

呢一點，正正係上級既漏洞同疏忽。


『誠哥你上車先，我轉頭搬比你。』阿dee續道。

誠哥習以為常：『好。』


然後，阿dee望住車斗入面一箱又一箱既煙箱，迅速地搬開後數個截然不同既普通膠箱就出現於眼前。

『接住！』阿dee將一箱藍色既膠箱傳遞畀誠哥。

誠哥謹慎的問道：『膠箱？做咩唔擺煙箱？』

『係主管既意思。因為27個煙箱岩岩好夠擺係車後面，反而如果要擺三個煙箱係側門會唔夠位擺。』

誠哥不虞有詐：『哦…』


主管當然無咁講過，只係話可以將箱子放在側門通道，但同主管對話既，就只有阿dee一人，所以阿dee講咩，都只會成為「主管既責任」。

當所有野搬哂上車後，三人就係車上等待最後一個人……隊長榮sir。


陳仔望一望手錶：『榮sir咁耐既？』

『係囉係囉！』誠哥不屑道：『屙個尿都咁耐！』

『………』阿dee擔憂著卻沒有回話。


到底榮sir去左邊…點解會無啦啦去廁所都有……阿dee心想著。


嘟嘟嘟－－－嘶－－沙－－－－


『辣更車calling A team。』忽然，車內既對講機突然傳來主管既聲音。

『係係係。』陳仔立即拎起對講機：『A Team收到。』

『你地齊人未？』

『未，差榮sir一個。』

『屌，佢去左邊撚度呀。』

『呀……佢…去左廁所……』

『唔撚係啊？』主管聽後大罵：『去個廁所去咁耐？！打比佢啦！』

『呢層…頭先入金庫佢關左電話…』陳仔支支吾吾。

『屌！唔等啦！』主管一聲令下：『B team C    team出發，A team自己返總部，然後同榮sir講返去寫報告，我會出封warning letter比佢！』

『但……』陳仔欲言又止。

『但咩係！』主管怒言：『收到貨即時返總部係鐵則！絕對唔可以等任何人，更勿論要幾team人一齊等佢！係咁！』


當整個車廂仍縈迴著主管討厭的聲音時，陳仔、誠哥同阿dee同時面面相覷，不知所措。

不過阿dee終於明白，榮sir點解要忽然去洗手間…原來，係為左擺脫辣更車。

榮sir為左今次任務成功，竟然犧牲自己良好既記錄，恐怕…都係怕左趙政祺既狠毒手段。


不消一會，榮sir既身影終於出現係眾人面前。