我地係墾丁最後一日既旅程,就隨著第二朝太陽升起而結束。
 
亦即係話我地接下來要去既地方,就係又多野食又多野行又多野玩既台北!
 
我地先坐出租車去高雄,然後再搭高鐵去台北。
 
輾轉搭左成個上晝之後,我地終於到西門町喇!
 
當然我地要做既第一件事就係check in 。
 


今次要住既係一幢新起無耐,所以價錢會平d但地方照係咁靚既酒店。
 
一入到房,影入眼簾既係兩張大到pk既雙人床。


 
唉……咁我就再無藉口到星瑤訓喇……
 
「嘩!」就係我為此事苦惱緊既時候,星瑤突然大叫左一聲。
 


於是乎我隨聲音既方向望過去,就見到星瑤好驚訝咁望住個廁所。
 
「搞咩?」我好奇走過去。
 
首先係到同大家講下整個房間既設計先 :
 
        [睡床1]  [睡床2]  |[浴缸]   [洗手盆] [馬桶] | [門口]
 
        「個…個浴缸……」星瑤口都窒埋咁講。
 


        於是乎我隨星瑤視線一望過去,當堂眼都凸埋。
 
        事關分隔開睡床同浴缸既,竟然係一塊玻璃窗。
 
        而且,呢塊玻璃窗仲要係內外都無窗簾可以拉!
 
        亦都即係話,沖涼既時候就會變到無遮無掩,任人觀賞。
 
        難道呢種設計,就係人地所謂既「調情酒店房」?!
 
        咁我咪即係要同星瑤肉帛相見?!
 
        雖然係好爽,之但係好明顯呢個又係老母既計謀!
 
        死人老媽子……又俾你玩左一局添……


 
        不過望真d個陣我就發覺,原來有兩條頗闊既橫向磨沙線係塊玻璃上面,睇個款可以岩岩好遮住d重要位置。
 
        於是乎我就同星瑤開始商議起上黎,然後好快就達成左共識!
  1. 沖涼個陣廁所唔開燈,出面淨係准開走廊燈!
  2. 雙方承諾唔准望對方沖涼!(er……我對此有保留)

 
傾好晒之後,我地就落左去行街。
 
        俗語有云 : 台灣西門町,香港旺角中。
       
        果然唔黎過呢到行一轉,真係不識盧山真面目。
 
包羅萬有的美食,價錢便宜既商品,真係多到眼花撩亂,目不暇給。
 
行下行下,原來已經夜晚。


 
於是乎我同星瑤就開始搵飯店食野,不過行左幾間都無心水。
 
就係呢個時候,有個成米九既男人突然截住左我地。
 
「情人你們好!」個男人笑容相當親切。「你們要不要試一試我們餐廳的情人套餐?只要每人250台幣就可以享受非一般的鐵板牛扒!」
 
我同星瑤聽完之後對望左一下,然後同時露出一個「咁撚平?!」既表情。
 
反正又諗唔到食乜,何樂而不為呢?
 
於是乎我同星瑤就跟左呢個男人上去樓上扒房鋸扒。
 
台灣人真係好好客,對待客人均係以禮貌、笑容、專業為先,所以呢一餐我地都食得好開心。
 


食完之後,個個男人就過黎同我地傾計,傾傾下先知道原來佢就係呢間野既老闆!!!
 
「哈哈!」老闆睇起上黎好開心。「我們這麼投契,不如我就請你們喝些酒吧!」
 
「這個......」我苦惱道。
 
的而且確係依家呢個咁高漲既氣氛裡面飲酒係好正,之但係......
 
小弟我係唔識飲酒架!
 
「好呀好呀!」星瑤打斷左我既說話,然後望過黎我呢邊。「其實我未飲過酒架!我一直都想試下!」
 
「咁......」我反覆思考左一陣。
 
其實只要我唔飲咁多,應該都可以照顧到星瑤既!


 
「好吧!」我笑了一笑。「給我們兩杯酒!」
 
老闆轉過頭就攞左三個冰杯同一枝酒過黎。
 
「這個是上等貨呀!」老闆說。「是我珍藏的伏特加!」
 
我飲左一啖,然後即時feel到個喉嚨好似燒著左咁。
 
之但係星瑤就好似無咩事咁,一野隊左成杯!!!
 
「嘩!」我十級驚訝。「乜你唔覺好嗆架咩?!」
 
「係咩~~~?」星瑤雙眼碌碌咁望住我。「又好似無乜喎~~~哈哈~~~!」
 
「......」
 
劉星瑤小姐,你唔係已經醉左下話......
 
「這位小姐也太強了吧!」老闆舉起手指公。「先生,你才不要輸給她!」
 
我望下手中個杯酒,再望下星瑤同老闆一臉期待既眼神。
 
唉!死就死啦!
 
「咕嚕------」我一野將成杯酒隊晒落肚。
 
咦?點解會咁既?
 
原來成杯一下飲晒既話,喉嚨真係唔會痛!
 
而且個陣淡淡既酒香味仲會係口腔內陪徊,真係好正!
 
結果飲呀飲,飲呀飲,我地每人都飲左三杯。
 
「謝謝你!」我同星瑤向老闆道別。
 
「謝謝你們!」老闆笑道。
 
於是乎我地番番去酒店,然後一野就訓左落同一張床到。
 
望住個天花板,我開始係到諗,
 
究竟......
 
我地係點樣行番黎架呢?
 
「咦......」望下望下,我眼裡面既事物好似開始轉起上黎。
 
我側頭望向星瑤,發覺佢已經攤左係到訓到冧一冧。
 
星瑤每噴出一口氣,都好似一個初生既BB咁。
 
好可愛。
 
我微微伸頭向前,吻了一啖星瑤的嘴唇。
 
「嘻嘻,」我將星瑤一擁入懷。「傻妹。」
 
眼皮越黎越重,於是乎我徐徐閉上眼,腦海隨之變得一片漆黑。
 
「唦唦......唦唦......」
 
朦朧之下,我被一連串的水聲弄醒。
 
我微微睜開眼,就發現星瑤已經唔係我隔離,得番我一個人係張床到。
 
「星瑤?」我嘗試撐起個人,點知就發覺個頭好Q重,重到我用盡力先郁得個少少。
 
屌,早知會咁痛,咁日就唔飲咁多啦!
 
水聲依然持續發出,於是乎我就隨聲音既方向望過去。
 
點知一望,我就見到呢個世界上最正既野!!!
 
我眼睛凸到無得再凸,淨係識眼甘甘咁望住眼前既事物。
 
事關,星瑤依家係到沖緊涼!
 
而且仲要係開左燈!FUXXXXXXXXXXXXXXXXXXK!
 
因為開左燈既關係,所以星瑤既身體就完美咁呈現左係我面前。
 
不過由於最重要既部位都俾D磨沙遮住左,所以我望到既只係星瑤既輪廓。
 
但係豐滿既上圍,纖細的腰部,圓潤既下盤,縱使只有輪廓都已經睇到我目瞪口呆!
 
星瑤佢係到洗緊頭,所以暫時睇唔到我望住佢!
 
濕透既髮絲,加上濃濃的水蒸氣,以及星瑤肌膚上的流水,我心跳不由得超加速起上黎。
 
不過人呢就真係要見好就收,唔好望咁耐!
 
如果咪?下場咪會好似我咁!
 
由於我望得太入神,所以沒留意原來星瑤已經洗完頭!
 
星瑤不經意咁望左出黎,然後就雙眼就與我接上!
 
「呀!」星瑤立即用手掩護身體。「衰人,拎轉面呀!」
 
屌!今次PK了,俾人發現左添!
 
「啊知道!!」我轉過頭去望住一面牆。
 
好快星瑤就沖完涼,然後走左出黎。
 
星瑤穿了一身T恤短褲,憤怒咁站在我面前。
 
「馬...家...樹...」星瑤的雙眼仿佛可以殺左我。「你乖乖地同我講,你究竟望到D咩!」
 
「我......我......」諗番起頭先個D情景,我真係口都窒埋。「我淨係望到你D輪廓,其他乜都望唔到!」
 
「你講真?」星瑤一野勁大力咁捏住我耳仔。
 
「係呀係呀!」我連忙發誓道。
 
「好,信住你先!」星瑤繼續問。「咁你究竟望左幾耐!」
 
「er......」我完全唔敢講大話。「係你岩岩開始洗頭個陣......」
 
「咁你做咩要望!」星瑤用埋第二隻手捏我耳仔。「明明講好左唔望!」
 
「咁我地夠講好左要熄燈!」我反駁。「你無熄到,我一望就望到!」
 
「咁...咁......」星瑤一時間答不上話。「咁我好頭痛,所以想光猛d麻!」
 
原來星瑤都頭痛!唔知佢沖完涼好番d未呢?
 
於是乎我伸手輕輕按著星瑤個額頭。
 
「咁你依家仲有無頭先咁痛?」我關懷咁問。
 
點知星瑤聽到呢句之後,居然臉紅起上黎!
 
「無...無咩事喇依家......」星瑤緩緩放下雙手。「衰人,明明我地鬧緊交架麻,你做咩無啦啦關心我......」
 
「傻妹黎既!」我坐在床邊,然後雙手按在星瑤的腰間 (星瑤企左係床邊)。「男朋友唔係應該要無時無刻都關心自己女朋友架咩?」
 
星瑤聽完之後,臉更是紅過紅雞蛋。
 
「賣口乖啦你!」星瑤雖然好似怪責咁講,但上揚的嘴角早已出賣左佢。「其實呢......如果你想睇既話......」
 
「嗯?」我不解道。「睇d咩?」
 
「妖!」星瑤一野推開左我。「無野喇衰人!衰人衰人衰人!」
 
「下......」
 
乜我又做錯野咩?
 
落去酒店飯堂食完個早餐再番去訓左個回籠覺之後,我同星瑤個頭都總算無咁痛了。
 
由於今日大家個狀態都收收地皮既關係,我地就一致同意決定揀d休閒舒適既活動去玩。
 
「之但係去邊到好呢?」我個腦仲係處於零運行模式。
 
「嘻!」星瑤笑了一笑。「我諗到。」
 
「嗯?即係邊到?」
 
「那一年,那些年。」
 
於是乎我地就用左成個幾兩粒鐘既時間,由西門町搭捷運去台北車站,然後再轉台鐵去瑞芳,最後再搭多幾個站,終於都去到我地既目的地------
 
你不要現在就告訴我,請讓我繼續喜歡你。
(平溪 菁桐 ------ 那些年,我們一起追的女孩 拍攝地點)
 
我與星瑤拖著手,沿車站走向市集到處逛遊。
 
一路上所經過的街道,幾乎都佈滿一群又一群的人係到製作緊孔明燈。
 
「不如我地又放囉!」我興致勃勃咁拉星瑤過去一間賣孔明燈既店舖前。
 
「唔要!」星瑤立即企左係到。
 
「下?」我不解道。
 
「唔要!」星瑤捉番我過黎。「唔要依家放!」
 
「咁幾時放?」
 
「嗯……行多陣先啦!依家先三點幾!」星瑤故作關子道。
 
於是乎我地就決定先去行下街。
 
其實平溪呢個地方就好似晚上既墾丁大街咁,到處都有好多小食店紀念品店等等,如果要每間舖頭都買d野黎食下既話,應該都會飽到唔洗食晚飯。
 
經過一間腸仔店個陣,一股誘人既炭香味把我吸引了過去。
 
我拉著星瑤的手,一鼓作氣就塞左入去人群之間,然後就見到一排排放左係烤架上面滾轉緊既腸仔。
 
「嘩~~~」星瑤個樣已經流晒口水。
 
「想食?」我望向星瑤。
 
星瑤望番住我,燦爛一笑。
 
「嗯!」
 
買完之後,我地每人咬住一條腸仔,緩緩繼續前進。
 
「真係好好味啊!」星瑤話咁快就已經食完,然後係到回味緊。「一陣番轉頭一定要買多條!」
 
「食咁多,肥死你!」我取笑道。「死肥妹!」
 
星瑤鼓起腮望著我,不甘示弱道 : 「你夠係囉,死肥仔!」
 
「肥妹!」
 
「肥仔!」
 
「肥肥妹!」
 
「肥肥仔!」
 
我地沿著火車路一直走,不知不覺間已經離開了平溪,走到寧靜的菁桐街上。
 
菁桐街係位於「平溪車站」同「菁桐車站」之間既一段山林路,呢個地方遠離繁喧的市集,身在此處會有一種撫平心靈的感覺,實在值得黎走一趟。
 
我與星瑤依舊拖著手,但就再沒有談話,只是默默地用其餘四個感官來享受呢個舒適的環境。
 
然後我地就走到菁桐駅。
 
「平溪出天燈 菁桐出許願竹筒」,相信好多人都聽過呢句說話。
 
事關菁桐車站呢到,幾乎係每一個籬笆或者欄杆上,都會掛滿了一個個寫上了願望的竹筒。
 
「家樹,不如等我考下你!」星瑤撓著我的手行行下突然道。「你知唔知道點解呢到會盛行許願筒?」
 
「唔知喎!」我答道。「有故仔聽?」
 
於是乎星瑤就徐徐向我道出一個故事。
 
「聽講以前呢到有一對情侶,男孩係鐵道員,女孩係小食店既店員。佢地彼此相愛,但係由於男孩要跟車工作既關係,唔可以成日留係菁桐呢到。」
 
「所以女孩就決定用留言既方式,係車站的鐵欄上掛上一張張愛的紙條,希望男孩一番到黎就可以望到。」
 
「好可惜女孩之後發生左意外,等唔切男孩番黎就死左。結果男孩番黎之後,就只可以每日將個d紙條攞出黎睇,藉此紀念女孩。」
 
「後來有人為左紀念呢個愛情故事,就將竹筒取代紙條,當作一個許願的方法,希望天下有情人永結同心,同偕共老。」
 
「故事講完喇!」星瑤笑一笑。「問你一條問題啊,你覺得成個故事最慘既係邊個?」
 
「嗯……」我諗左一諗。「我諗係個女仔掛,苦苦等左男仔咁耐,但就發生意外,最後臨死都見唔到男仔一面。」
 
「個女仔的確好慘既,」星瑤說。「不過,我覺得個男仔更加慘。」
 
「嗯?點解?」我好奇道。
 
「因為…….」星瑤蹲下來望著別人掛在欄杆上的竹筒道。
 
「因為女仔等待男仔最多都只係幾年,但男仔要等待女仔既時間卻係一輩子。所以如果可以俾我修改呢個故事既話,我寧願男仔可以放低女仔,重新找尋一段屬於自己既愛情。」
 
此時一陣微風吹過,帶動起星瑤及肩的頭髮,使之隨風飄逸。
 
我地再度啟程,先去了情人橋一趟,然後走到火車站對出的車軌上。
 
呢個地方,亦即係柯震東陳妍希《那些年》玩平衡木般走過既路軌。
 
我地就好似沈佳宜同柯震東咁,係路軌上左搖右擺地行走。
 
「家樹啊,」星瑤一路走,一路展開雙手望住地下平衡自己。
 
「嗯?」我回應道。
 
「如果俾你揀多次,你仲會唔會揀我做你女朋友?」
 
「星瑤,」我笑一笑。「呢個問題應該調番轉問先岩。」
 
「如果俾你揀多次,你仲會唔會揀我做你男朋友。」
 
「點解咁講?」星瑤停了在原地望著我。
 
「點解?」我認真咁望住星瑤。「因為無論俾我揀幾多次都好,我都會係同一個選擇。」
 
「我馬家樹,一定會揀你劉星瑤做我女朋友,好好保護你,愛惜你。」
 
星瑤聽完之後,雙眼居然變得通紅起來。
 
「做咩喊啊!」我立即走過去攬住星瑤。「無事啊麻?」
 
「我……」星瑤緊緊攬番住我,逐漸飲泣起來。我……」
 
「有無咁感動呀!」我輕撫著星瑤的頭髮。
 
「家樹,」星瑤抬起頭來,臉頰泛紅的與我對望著。「如果俾我揀一千次一萬次都好,我都一定會揀你做我男朋友!」
 
「哈哈!」我輕輕吻了星瑤額頭一下。「傻妹。」
 
星瑤望著我,抿嘴一笑。
 
我地兩個從對方眼中回神過來之後,才發現天色早已經開始變得通紅。
 
「死喇死喇!」星瑤驚訝道。「快d行番去平溪,我地要趕係日落之前放孔明燈!如果咪影相就唔靚!」
 
原來星瑤就係為左影靚相,先唔肯咁快放天燈!
 
當我仲係到思考緊既時候,星瑤已經立馬捉住我既手,往回頭路狂奔!
 
Btw,我地又係趕日落!?
 
幾經辛苦,跑到身水身汗,終於番到黎!
 
我地搵左一間出名d既舖頭,然後係裡面買左一個紅藍雙色既天燈。
 
老闆娘將天燈夾左係一個座地式既長方架到,然後我就同星瑤各自攞住一支筆,走到天燈的左右邊開始寫上自己的願望。
 
我諗左一諗,然後就係天燈的藍色位置寫上 :
 
身邊既人個個都身體健康,事事順利!可以與劉星瑤執子之手,與子偕老。
 
等到星瑤都寫好之後,老闆娘就為我地點火,然後為我地拍左一張相。
 
「星瑤,」係差唔多放燈之前我問道。「你寫左d咩?」
 
星瑤望著我笑左一笑,然後示意我將孔明燈放上天。
 
於是乎我地就同時間放手,天燈隨之慢慢升高,飄到半空中。
 
我與星瑤抬起頭望著天燈逐漸變小,火焰最終成了一個小光點。
 
「你仲未答我喎!」我再次問道。
 
星瑤仍然望著天空的那一點光,仿佛若有所思道 : 「孔明燈飛左上去,似唔似一粒星?」
 
「嗯?」我重新抬頭仰望。「又幾似既。」
 
「我既願望就係,」星瑤低下頭來望著我笑說。「希望呢粒星以後可以繼續守護住你!」
 
「係咪架?」我半信半疑。「乜你個願望咁空泛既!」
 
「其實唔空泛架!」星瑤反駁道。「因為粒星星就係代表緊我!」
 
「er……」我思考左一陣。「唔係好明。」
 
「哈哈!」星瑤勁大力彈左我額頭一下。「死蠢!」
 
「啊你咁大力!」我不甘示弱地唧星瑤條腰。
 
「哈哈哈~~~!」星瑤俾我搞到嘻哈大笑,然後為左逃離我魔掌就開始跑起上黎。「捉我呀笨!死蠢死蠢死蠢!」
 
「咪走呀!」我裝作金魚佬咁講。「等哥哥我捉到你就知死!」
 
我地無視著身邊的人和物,樂於享受屬於我地自己的世界。
 
        這個世界,大概就係嘉琪同阿溢口中,希望我能夠重新認識的那個吧。
 
 
 
 
 
「希望呢粒星以後可以代表我,繼續守護著你。」

***

 
甜蜜溫馨的時光,總會俏俏地於分秒之間一點一滴流走。
 
餘下來數天的台灣之旅,就係歡笑聲中飛快地過去,眨眼間就到左番香港的日子。
 
我同星瑤為左唔執輸,於是乎整個朝早既時間都用左黎係西門町Shopping!
 
衫褲鞋襪啦、日常用品啦、化妝護膚啦,幾乎每一樣野都涉獵在袋!
 
逛左幾粒鐘,我地對腳都已經跛左咁濟,於是乎就去左殺你呀媽食野。
 
計起上黎,呢餐都應該係我地係台灣既最後一餐lu。
 
「家樹,」星瑤口裡面咬住一塊pizza道。「話咁快就七日囉可?」
 
「嗯,真係好快。」我望住出面人來人往的大街。「我開始有d掛住呢到。」
 
「哈哈,傻仔黎既,都未走就話掛住!」星瑤亦望左去出面。
 
「我諗,」星瑤正看得入神道。「我掛住既會係呢段回憶多d。」
 
「嗯?」我笑了一笑。「乜你講野咁玄既?」
 
「遲下你就會明架喇!」星瑤望番住我笑道。「嗯,遲下。」
 
食完野之後我地番上酒店執行李,然後就搭的士去左桃園機場。
 
等緊飛機既時間,我同星瑤就坐左係sofa到督手機。
 
「DoDo~~~」就係呢個時候嘉琪突然間wtsapp我。
 
一打開,就見到一張嘉琪同阿明係香港機場既自拍,然後下面附上一段文字 :
 
哥,你地今日番黎喇可?我同阿明今日飛去韓國玩7日呀!
咁又可以俾你同星瑤獨處多幾日喇,係咪應該要多謝我先?!
 
啊你個死妹釘,我去台灣你去韓國?!唔公平呀!!!
 
不過算啦,見在你有最後個句,我今次就放過你!
 
我將段信息遞左俾星瑤睇,然後星瑤就一臉失望咁講 : 「我好掛住嘉琪啊!仲諗住番去可以見到佢添......」
 
「唔怕啦!」我撞一撞星瑤膊頭。「有我呀麻!」
 
「車!」星瑤捏住我的臉微微一笑。「對足你七日仲唔夠咩!」
 
「咁你中唔中意先~~~?」我將臉哄到星瑤臉前。
 
「嗯......呢層就......」星瑤輕輕吻了我嘴唇一下。「中意~~~<3!」
 
「既然咁中意既話,即係可以解番IG個block啦!」我笑說。
 
「咁又唔得喎!」星瑤用一把裝高音既公主聲講。
 
「點解啊~~~?」
 
「嗯......」星瑤思考左一陣。「因為未係時候。」
 
上左飛機之後,我同星瑤一直係到傾計,不知不覺間就番到香港。
 
輾轉搭左幾程車之後,終於都番到屋企!
 
「嗚呀!」我一野攤左落張久遺既睡床上。「始終都係自己屋企張床最舒服!」
 
「屋企張床......講起上黎原來我已經離開左屋企成個月有多。」星瑤坐我係我床邊,輕撫著床鋪淡淡然道。
 
聽著星瑤的說話,我腦海裡先開始記番起------
 
係喎,星瑤佢只係黎呢到住兩個月。
 
換言之,半個月後暑假既最後一日,星瑤就要離開我番去考鋼琴試,然後就去外國讀書,而且讀幾耐仲要係未知之數。
 
一諗到呢到,我既心情就莫名其妙咁沉鬱起上黎。
 
「星瑤......」我坐起身拖著星瑤的手。「就算你去左外國都好,我地都會一直保持聯絡架可?」
 
「如果可以既話,我一定會。」
 
始終今日頻頻撲撲都搞到成身散晒既關係,沖完涼之後我都想早d訓。
 
「咁我去訓喇!」我向坐係sofa既星瑤道。
 
點知星瑤只係神情愣忽咁緊握住部手機,根本聽唔到我講野。
 
「星瑤?」我拍一拍佢膊頭。
 
「嗚呀!」星瑤俾我嚇左一嚇。「做...做咩事?」
 
「我話我去訓喇!」我沒好氣咁講。「呆下呆下咁,係到諗緊咩啊!」
 
「喔......無野呀。」星瑤企左係身。「你攰就快d訓啦!」
 
「咁好啦!」我摸了一摸星瑤的頭頂。「有咩事記得同我講啊,知道嗎?」
 
星瑤聽完之後雙眼瞪大了一下,然後抿了一下嘴唇。
 
「係喇家樹!」星瑤突然醒起d野,然後跑左入房。
 
過左一陣之後星瑤就走番出黎,不過佢手中就多左一個木盒。
 
「呢樣野......送俾你架!」星瑤遞上個盒俾我。
 
於是乎我打開一睇,發現裡面係一條頸鍊。
 
呢條鍊設計好簡單,就係一條黑色既繩,吊住一個啞黑色既星形鍊咀。
 
不過所謂簡單就是美,呢條鍊正正得合男仔既要求,所以我望落去第一眼就中意左。
 
「好靚!」我興奮道。「你買架?」
 
「一半一半啦!」星瑤笑說。「個陣係墾丁我咪入左去間手飾店既,其實我咪就係入去買材料!」
 
「傻妹,做咩無啦啦買野俾我咁晒錢!」我一手搭住星瑤膊頭。
 
「咁我之前整爛左你條鍊,點都要賠償既~~~」星瑤說。「點姐,中唔中意先!」
 
「你買既點會唔中意!」說罷我就帶起左條鍊。
 
「哈哈,好襯你!」星瑤從上而下打量我,然後捉住我雙手講。「你中意既就好,嗯。」
 
「多謝你。」我吻了星瑤的額頭一下。「晚安喇。」
 
「嗯,」星瑤望著我的眼神非常複雜,但總括黎講就係愛。「晚安喇。」
 
講完晚安之後,我就戴住條鍊重新攤左係張床上面,徐徐進入夢鄉。
 
星瑤用右手輕撫著我的臉頰,雙眼早已泛著閃爍的淚光。
 
「家樹......」星瑤哽咽說。「好多謝你帶俾我呢一個月黎既回憶,我一定會好好記住佢。」
 
說罷星瑤便吻了我的嘴唇一下。
 
「再見喇,傻瓜。」
 
「啊!」我一野彈左起身。「又係發夢......點解會成日發埋d咁既夢架......」
 
我望向窗外,太陽早就已經升到半空中。
 
好啦,搵星瑤食個早餐先!
 
於是乎我緩緩走下床,行到星瑤的房門前。
 
「咔嚓!」敲左兩下門之後我就打開了房門。「星瑤,不如我地落去......」
 
然後,我再說不出話來,只有呆滯的站在門前。
 
屬於星瑤的所有野......
 
全部都唔見晒。

「點...點會咁架......」我望住空無一物的房間,內心崩如鹿撞。
 
係呢一刻,我腦海中竟然浮現出一個諗法------
 
唔通,咁耐以黎我都只係發夢,事實上根本就無星瑤,更加唔存在我地彼此間既回憶?!
 
於是乎我立即檢查自己身上仲有無星瑤送既項鍊,結果......
 
星形鍊咀依舊安然無恙地掛了在我的頸上。
 
然後我再仔細搜索整間屋,發現其實仍然存在著一些星瑤的痕跡。
 
星瑤訓過既床單,我買俾佢既牙刷牙膏,佢借我地屋企既拖鞋,一一都留左係到。
 
換言之,無左既就只有原本星瑤帶黎既野。
 
所以亦即係話......
 
星瑤佢係執包袱走左。
 
「唔會既唔會既,星瑤明明仲有半個月時間先走!」我完全唔相信呢件事會發生。「一於打俾星瑤問下先!」
 
我立即攞出手機,然後按下撥出鍵。
 
「do...do......do...do...」
 
刻板的待接鈴聲,不斷在我耳邊徘徊。
 
「快d聽電話......快d聽電話......」我內心焦急的情緒早已經在我臉上表露無遺。
 
「對唔住,你所打既電話暫時未能接通,請你遲d再打過啦!」
 
最後換黎既,只係一把耳熟能詳既電話錄音。
 
「無可能架!」我仍然唔相信結局會係咁,於是乎再打多左幾次。
 
但好可惜,星瑤一概都係無接聽到。
 
此刻我內心有一種煩躁不安既情緒不斷湧出,令我思想被沖昏得唔能夠決策。
 
我坐左係sofa到雙手抱頭,腦海裡只剩下星瑤一人。
 
就係呢個時候,突然有一個想法係我腦海中飄過!
 
「無錯喇,直接去長洲搵星瑤咪得囉!」我抖擻精神道。「到時我一定要面對面問清楚星瑤佢究竟發生左d咩事!」
 
於是乎我迅速梳洗更衣,然後往長洲進發。
 
一路上我都為住星瑤離開呢件事而找尋一個合理的原因,之但係我始終都係諗唔到一個理由去解釋,點解星瑤佢要瞞住我自己偷偷地走左去。
 
諗下諗下,不知不覺間我就已經到左目的地------長州碼頭。
 
暑假的長洲,縱使並非週末日都好,始終都係能夠吸引一眾旅客或者本地旅客前來玩樂。
 
所以今日都唔例外,我一落到地面,就已經被熙來攘往的街道包圍著。
 
加上依家正值下午3點幾,氣溫同人潮都差不多達到最顛峰既時間,所以要係茫茫人海當中搵星瑤出黎真係一件唔容易既事。
 
而且最重要既係,直到今時今日,我先發覺自己係唔知道星瑤既確實地址......
 
唉,我點做人男朋友架!!!
 
不過為左搵到星瑤,就算手頭上資料有幾少,搜索起上黎有幾困難都好,我都一定會全力以赴!
 
望住白色帳篷既方向,我依稀記得當初黎同星瑤交收個陣,星瑤最後係轉右番屋企!
 
換言之星瑤佢係住西提個邊!
 
「好啦!」我將目標範圍收窄到張保仔洞既方向。「星瑤,我一定會搵到你!」
 
說罷我便踏出第一步,開始掃視身邊的一切。
 
***
 
「喂!」當我經過一間茶餐廳既時候,我聽到裡面既老闆係到呼喚緊佢既伙記。「差唔多轉晚餐餐牌喇!」
 
「收到老細!」員工聽罷點了一下頭,然後將下午茶的餐牌徐徐拿下。
 
呢個時候我先發覺,原來不知不覺間我已經搵左成兩個幾三粒鐘,天色都已經變得泛紅,就快被黑夜取代。
 
由於我一直都係雜亂無章咁搵,所以成效根本就不足,搵左咁耐仲係一d線索都無。
 
於是乎我坐左係球場旁邊既凳上稍作休息,希望重新諗下接落黎應該要點做。
 
黑色的夜幕漸漸籠罩著整個天空,於是乎我抬起頭來,漫無目的地望向上方一閃一閃的星宿。
 
「你究竟去左邊啊......星瑤......」我崩潰既心情早已經變成一股掛在眼眶底的水份。「我唔可以無左你架......」
 
就係呢個時候,一段鋼琴聲從不遠處傳來。
 
鬱香的音調,落魄的旋律,醉人的節奏......
 
嗯,唔會有錯。
 
呢首歌,係陳奕迅既------
 
《沙龍》。
 
 
 
 
 
『雖則那 即影即有售罄 菲林都已拆走,』
        『但是衝動用完 又再有。』