誰能逼我將就: Ch.19

「我冇事…唔使對唔住喎。」我不知道如何安慰墨，又不敢再多說。 

「我性格好怪，由細到大都唔知嚇走幾多人。」 

「我唔覺得呀，妳性格都唔錯，起碼肯幫人。」 

「嗯。」墨沒有跟我爭論下去，我們兩個人坐著，良久沒有說話。這情況總得有個人要先開口，我是男的，這動作由我來做是很合理。 

「呢度都幾靚，妳成日嚟坐？」廢話是我專長，但用得其所的時候，廢物也可以好好利用。 





「係呀，由澳門嚟香港之後，我想自己盡快成為一個真正香港人，所以以前會跟同事周圍去，乜嘢地方都會見識下。」 

「我冇妳咁叻…哈…我好求其，我見肚餓就會是但行入一間餐廳，食飽就算。」 

「純，你唔覺得呢個世界好多新事物可以試咩？我以前就係覺得自己成日喺澳門，唔係見到澳門人就係賭仔，個世界好似灰色咁。嚟咗香港，除咗想搵錢照顧好自己同幫屋企之外，我就係想做一個乜都試下嘅人。」 

「咁點解妳會喺社福機構做導師？」我忍不住問 

「呢樣…遲啲話你知丫。」墨一個微笑，把這話題帶開。 





「係喎，上次妳話要做個足球活動，而家搞成點呀？」 

「我搵咗好多資料，等我寫好咗份建議書，等上頭肯批啲經費先算啦。」 

墨妳的人真笨，一個專業而勇敢的職業球員就在妳面前，為什麼妳不來問我？ 

「哦…妳都識足球？」 

「我要嘅資源都係好皮毛，問下身邊嘅朋友都問到。」 





我們的氣氛又變回平靜，就像剛才在赤柱的事沒有發生過一樣。我和墨繼續的天南地北，話題最後又回到我爸那裡。 

「純，不如搵一日我上你屋企，試下同世伯傾下偈，可能會諗到有咩辦法開解下佢。」 

「但……佢會唔會覺得自己係病人？阿媽話阿爸而家個人好敏感，總之一聽到小小唔如意嘅事就會發脾氣。」 

「我知道，好多Man起碼去我地中心都會咁。其實一個男人嘅尊嚴係好重要，特別係佢地做咗領頭羊咁多年，退休之後一下子冇哂生產力，好多案例話畀我地知，呢類Man都會出現性情大變嘅情況，所以我知道點樣去處理。 

反而有一件事你要諗清楚先呀…」 

「咩事？」看見墨壓著聲線說話，我立即好奇的問。 

「如果我上你屋企拜侯世伯同伯母，你點同佢地講，我係你邊個？」 

「朋友囉…」 





「你女朋友上次撞見過我同你食飯喎。」 

墨把問題刮得有點深，但這正好顯出她細心的一方面。換了是我，根本沒有想到每個單位的立場，還有可能。

「其實我講朋友就冇問題。」我細想了一會，再回答墨。 

「好，就咁話啦。」 

我跟墨說好再約一個日子後，很快便各散東西。回家後，阿爸和阿媽也不在，我一個人無聊的開著youtube在隨機播歌，聽著聽著，最後沉沉的睡著了。 

天氣很清涼，這午睡特別的甜，不知道睡了多久，我被一首歌的歌聲慢慢喚醒。 

妳的暴烈 太溫柔 
感情又痛 又享受 




如果我說 不吻妳不罷休 
誰能 逼我 將就 

我覺得這歌很好聽，正想起來看看是什麼歌的時候，電話又響起來。 

「喂…」 

「純？你練完波未？今晚同唔同我食飯？」是英琦。 

「係呀對唔住呀，我唔記得覆妳電話。」我很少會這個樣子，覺得自己有點過份。 

「咁你仲陪唔陪我食飯？」英琦語氣有點不悅，這個我理解，以她的家族脾氣來說，沒有大發雷霆已經很給面子。 

「好…我宜家出嚟，妳喺邊？」 





「我喺銅鑼灣，我行住街等你啦，你出到嚟就打電話畀我啦。」 

「好啦好啦。」 

掛線後，我抽了一口涼氣，下午才由銅鑼灣坐車回屯門，現在又要回去這地方。同樣去一個地方，但我的心情卻有很大的差別。 

我不想英琦等太久，梳理一下自己便跑出門，捱了一個多小時的巴士後，我終於看見英琦。 

英琦今晚帶了我去一間餐廳，她說朋友推薦。走到門口，我腦內有點空白，想不到銅鑼灣有這麼多餐廳，英琦晚上要帶我去的這一間，正正是我下午跟墨喝東西的那一間。