誰能逼我將就: Ch.21

「結婚？點解無端端講結婚？」我錯愕的問 

「無端端？」英琦放下餐具看著我，續說：「你就嚟三十歲，我都差唔多喇，我地唔係應該打算下我地將來咩？」 

「打算將來…都唔應該係由妳爸爸提出。」我百思不得其解，這是什麼開場白？ 

「爸爸只係擔心我地冇錢結婚，佢知道你踢波…」英琦欲言又止，沒有再說下去。 

「我知妳想講乜嘢，我踢波嘅錢唔會夠我地結婚。」 





「我唔係咁嘅意思。」英琦開始皺眉，這是她開始失去耐性的表現。 

我喝下一口開水，稍稍冷靜過後，再開始組織自己想說的內容。 

這個時候，「它」又來了。 

它：「純，你想唔想結婚？」 

我：「我…唔知道。」 





它：「冇得唔知道，呢個女人叫李英琦，同你拍拖八年，你冇得揀唔知道呢個答案，因為佢嘅生命一直都依附喺你嘅生命上面。」 

我：「我需要負責任？」 

它：「呢個世界只有實踐嘅責任，冇責任係必需要負。」 

我：「我唔想因為自己嘅選擇，因為英琦爸爸而加速時間。」 

它：「不如我咁問，如果唐爾墨冇出現過，你今日嘅諗法會唔會有唔同？」 





我：「………………」 

它：「你要盡快答我，你一直唔出聲，英琦只會睇得出你有古怪。」 

我：「係，阿墨出現係有影響。」 

它：「咁你唔可以用呢個心情去結婚，先截斷英琦呢個話題。」 

我跟「它」的對話框像關掉的一剎，思維便立即回到現實。眼前的英琦還在等我說話，我手上還拿著一個水杯。 

「妳上次去我屋企，阿媽有冇同妳講，我阿爸要落實退休嘅事？」我轉個語調，將阿爸的事來作討論，總好過在我們需不需要立即結婚這個難題上硬磨較好。 

「世伯點解要退休？」英琦緊張的問 

「佢腳有事，唔可以太操勞。」 





「上一次去你屋企，唔怪得佢心情好似唔係太好。」 

「唔係點會鬧得我咁勁…」說到這裡，那一天的情況又出現在我的腦海。我的臉上閃過不悅，英琦聽得出我的意思。 

「佢只係想你成熟啲，識得揀自己將來。」 

「但佢唔記得咗自己教過我乜嘢，係佢教我要揀自己想揀嘅路。」 

咁都唔係差唔多三十歲人都一事無成…」英琦一時之快，把這一句說了出口。 

但我不意外，無論是她的家庭教育所灌輸的價值觀，又或者是在家中的耳濡目染影響，都令我從來不敢奢望，英琦會以我為傲。 

「我唔舒服，我走先。」我站起來，由第一次在英琦家裡，我因為她兩位哥哥的胡言而拂袖而去開始，我知道自己還可以選擇。 





「唔好次次一唔高興就走咗去好唔好呀？咁你到底想唔想結婚呀？」英琦在餐廳大聲叫出來，整個餐廳的人也向我們投注目禮。 

「唔想。」說完，我頭也不回的，離開了餐廳。