異塵餘生香港2277: 65 為戰爭準備
MR的基地被搗破後，正勢力派出一些成員和醫療人員把被MR囚禁的廢土居民解救出來，並把剩下的餘黨清除和回收他們的物資。而四眼得悉政府軍的真正身份為殘黨，而且更勾結滅絕人性的MR後，便毅然決定離開政府軍，加入正勢力。
「諸位辛苦啦，你地做得好好。能夠剷除一直危害香港廢土嘅MR，簡直係功德無量。」正先生讚揚說
「可惜攞唔返伊甸園創造器．．．」接受過自動醫生的治療並休息了數天，流主的傷勢已經大致痊癒了
正先生說：「的而且確，伊甸園創造器落入政府軍．．．殘黨手中，無論對我地抑或香港廢土都非常不利。」
四眼說：「我對佢地嘅一切都比較清楚，潛入調查亦係我嘅強項，我地可以去查下佢地究竟想做啲咩，順便睇下會唔會有機會偷返伊甸園創造器。」
「雖然你地嘅作戰能力不容置疑，宜家仲要有一位超級變種人幫手，但係．．．」正先生憂慮說：「我相信四眼你都好清楚，殘黨同MR有天壤之別．．．只有你地幾位，實在太危險．．．」
眾人也都沉默下來。
正先生凝重續說：「其實，經過我依幾日慎重考慮，我認為，我地都都差唔多時間要同佢地開戰。」
阿寶不禁緊張起來：「終於都要開戰啦．．．」
正先生說：「但係以我地宜家嘅軍力，即使回收左MR嘅物資，我地能夠打嬴殘黨嘅機會依然微乎其微。」
四眼點頭認同：「的確係，如果無十成把握，依場仗一輸，就咩都輸晒。」
「所以，我有一個重要嘅任務想拜託你地。」正先生說
流主想了一下說：「．．．招攬其他勢力？」
「完全正確。」正先生微笑說：「閣下喺廢土上嘅名聲我早已經有所聽聞，我希望可以拜託你去游說其他勢力喺依場仗入面幫我地。」
「我會盡我所能。」流主欣然接受任務
正先生高興說：「咁就太好啦，我地正勢力不勝感激！」
離開會議室後，流主首先來到醫療室。
「汪！汪！汪！」狗肉看到流主，頓時高興得不停擺動尾巴
「狗肉！」流主也高興得抱著牠
治療狗肉的醫生說：「佢嘅生存意志真係好強．．．明明已經有一半骨骼斷裂、大部份肌肉同內臟受捐．．．都竟然可以撐得住．．．」
鎖匙萱撫摸著狗肉的額頭說：「肉肉好叻叻呀！」
「汪！」狗肉十分高興
醫生說：「因為佢嘅骨骼已經殘缺不堪，所以我地唯幫佢嘅骨架改造成合金，相信將來佢無咁容易會受傷。」
流主道謝說：「多謝醫生！」
醫療室的另一邊，數個醫生和科學家正在替豆作身體檢查，還有抽取各種基因樣本研究。
「豆豆！你好好嗎！」鎖匙萱溜到豆身旁
「啊．．．萱萱．．．」豆有點害羞
阿寶問正在抽取樣本的科學家：「我地唔係一早已經有超級變種人嘅基因樣本咩？做咩又抽呀？」
一個較年長的科學家說：「我地之前嗰啲樣本都係嚟自死左嘅超級變種人，既然宜家有機會，就當然要拎返啲活生生嘅樣本。」
阿寶疑惑：「．．．有分別嘅咩？」
科學家想了一下說：「．．．理論上無，不過仍然有研究嘅價值。」
另一個科學家接著說：「係呀，鷹頭先搵過你地，佢叫你地去軍火庫搵佢。」
豆的身體檢查完成後，他們便再走到軍火庫找鷹。
「喺MR大本營拎返嚟嘅M72高斯步槍已經修理好啦。」鷹把M72高斯步槍交給流主
「哇．．．有依支嘢，真係咩都唔怕啦．．．」流主汗顏地接過武器
「不過你要好好錫住佢，佢所用嘅零件同2mm子彈喺香港廢土都唔常見，要修理亦都唔容易．．．你真係要就住嚟使，每一槍都要開得有價值。」鷹叮囑說
站在流主身後的阿寶問：「咁．．．我呢？」
「你無喎。」鷹斬釘截鐵說
「點．．．點解呀．．．」阿寶對與女性交談仍然感到有點勉強
「你都知我地正勢力無幾多能量武器架啦，偏偏你又唔鍾意用實彈，我都無計架。」鷹說著，續咧嘴奸笑：「而且上次同巨獸打嗰陣，係邊個係咁鬧我！」說著，她又再用手指不停戳阿寶
阿寶立即全身發毛，眼有淚光走避：「喂！．．．咪戳．．．喂呀！！」
孖根搭話說：「妳真係唔同我地一齊去？」
「唔啦。」鷹的眼神流露出一點悲傷：「我想幫鐵膽處理身後事，話晒佢同我都拍擋左咁多年．．．」
流主說：「我地好快就會返嚟，到時再一齊去拜祭鐵膽。」
「一言為定。」鷹有點不捨說
流主他們接受了數天的治療後，即使傷勢並未痊癒，他們也決定盡快起行。由於四眼決定留在金鐘總部協助正勢力調查殘黨，所以流主他們只餘下流主、孖根、鎖匙萱、阿寶、豆和狗肉執行招攬各勢力的任務。
而可幸的是，流主他們借來了一輛小型貨車代步。
坐後座的阿寶既無奈又不安的樣子說：「其實．．．我地一定要搵佢地咩？佢地又唔係特別幫得手．．．」
正在駕駛的孖根說：「我反而覺得佢地比正勢力啲人更加幫得手。」
「嗱，我唔準妳咁講呀！」阿寶認真說
「咁幫手緊係愈多愈好架嘛．．．」坐在前座的流主苦笑
「我唔理！」阿寶任性地說：「總之唔去Bitch Kingdom！」
其他人都靜了下來，不過駕駛的孖根並沒有在意，她繼續悠然自得地向Bitch Kingdom駛去．．．
「停車呀孖根姐．．．我唔要去Bitch Kingdom呀．．．」阿寶拉著孖根的肩膀苦苦哀求
孖根卻無情地甩開他的手：「咪撚煩！」
此時，阿寶突然一臉凝重大喝：「停車！有古怪！」
但是其他人仍然不理會他．．．
然後鎖匙萱說：「你啲演技真真慘不忍睹。」
阿寶無奈說：「喂呀．．．．．．」
其他人仍然繼續沉默．．．
「好，係你地迫我，你地唔好怪我啦！」阿寶把心一橫拔出電漿手槍
「豆豆！」鎖匙萱見狀馬上召喚豆
豆二話不說便把阿寶給制服了．．．
流主從倒後鏡看著，不禁會心微笑。
孖根看到流主的表情，說：「．．．好似一家人咁。」
「嗯。」流主一如往常，淺淺微笑著。不過，眼裡卻多了一絲傷感
由於駕車的關係，流主他們省卻了不少時間，沒多久便來到了Bitch Kingdom。他們把車子慢慢駛至城門前，兩個BK守衛馬上上前查看。
「．．．啊！你咪係流主！」BK守衛一眼便認出流主，續說：「你返得嚟合時啦！」
「啊？做咩事呀？？」流主十分好奇
「唔好講咁多啦，你地即刻去見女皇先啦！」另一個BK守衛立即打開城門
他們在BK守衛的指引下把車慢慢駛進Bitch Kingdom，並隨便停在一旁，然後便鬆容下車。
流主再三問道：「．．．你真係唔落車呀？」
「我係唔會屈服。」阿寶眼神堅定、語氣散發著一股高傲氣派．．．地窩在車子的一角發抖說．．．
孖根沒好氣說：「咪理佢啦，行啦。」
於是，他們把阿寶留在車上，便慢慢向Bitch Kingdom中央的醫院步行過去。然而，沿途他們卻發現一眾BK的面色都白如死灰而且精神呆滯．．．