「我地揸的士既,其實成日撞鬼....時運高既,可能瞓一覺就冇事,時運低,撞車意外死都有行家試過....我撞到鬼,通常就會見一見佢,幫我掃走些衰氣。」的士司機續說。



「咁佢即係.......驅鬼專家?」



「唔可以叫驅鬼既,總之你地搵佢啦,佢應該幫到你地,你講係細輝介紹就可以啦。」的士司機說。







「原來係細輝哥,失敬失敬!」



「咁我走先啦,你快去搵返你個朋友,祝你地好運啦!冇咩都唔好再搵我啦!」細輝哥轉身便走。







是的,換著是我,我也不想與一班撞鬼的人再聯絡,我把細輝哥給我的電話號碼儲存好後,便致電阿耀看看他們現在在什麼位置。



「喂!阿耀,你地響邊呀?追唔追到力宏呀?」我說。



「我地而家響力宏間屋度,你快啲上黎啦!」阿耀說。







「咁力宏有冇事?佢而家係咪俾隻女鬼上左身呀?」我一邊往力宏的家跑去,一邊與阿耀通話。



「佢而家響間房度鎖門困住自己,我地都入唔到去唔知點算好!我地叫佢佢又唔肯出來,剩係響度大叫!」阿耀說。



「你地唔好亂咁黎,啱啱的士司機介紹左個道士俾我,我而家就打俾佢睇下點樣可以救到力宏,有咩事我地再電聯啦!」



於是我停下來,並致電剛才細輝哥給我的電話號碼。







「DO……DO…….」電話在接駁著。



「喂!邊個呀?」一把很雄厚的聲音接聽著電話。



「你好,我係細輝哥介紹架,我…….」







「撞鬼呀?細輝介紹既都係呢啲野架啦!你撞鬼定係你朋友撞鬼呀?」那男人說。



「係我朋友撞鬼呀,我地而家唔知點做好。」我很激動,感覺像看到救星似的。



「你定啲,話俾我知你地而家響邊,仲有你朋友而家既情況係點樣先啦!」



於是我一五一十的把所有知道的事情都告訴給那男人聽。







「睇情況唔多對路,你個朋友之前化到成個紙紮公仔咁,好明顯係隻女鬼想搵替死鬼啦!好在你地搵到你地既朋友,唔係佢死左啦!而家情況好危險,你地一定要搵辦法送佢去我度先得,因為要響我處先開到壇!」



「但係佢而家好似俾鬼上左身咁,我地好難送佢去你度。」



「好簡單,你地而家上網下載又好,買CD又好,播一啲佛音俾佢聽,咁佢聽到之後應該會迷迷糊糊咁,到時你叫細輝車你地去我度就得啦!」