錯的感覺對的人: Vol.3
當晚，Bryan 房的 Walking Talking 響起。
Walking Talking？今時今日有手提唔用？
講一講點解有部 Walking Talking 既原因先啦。
四五年前，亞雅同Bryan 成日傾通宵電話，而0個時手提仲未盛行。
鄭太同張太都成日鬧佢地傾電話傾到咁夜。(當時，張太鄭太對佢地仲係非常嚴謹。)
有日，佢地一齊放學返屋企，就見到呢對 Walking Talking 。
亞雅道： "如果有0左呢樣野~~~我地咪唔會比人鬧 law"(當時，亞雅對Bryan無依家咁無禮貌。)
Bryan：”但收唔收到0架？？？”(當時，Bryan對亞雅都未有依家咁串。)
亞雅："試下先啦。。。。。。。好想試呀~~~"
Bryan：”但係無用0架喎~~~夜，亞媽都會鬧~~~”
亞雅：”我地兩個秘秘密密咪得 law ~”
結果，這對Walking Talking，就成為0左佢地秘密交談之用。
縱然手提流行，呢個仍然係佢地既秘密……天生一對既秘密。
講返依家。
Bryan："做乜事呀？？"
亞雅超級溫柔向 Bryan 問："你係唔係買0左 J 隻新碟？？我想聽呀……哥哥~"
呢把聲比其他男仔聽到，叫佢去死都仲可以，但Bryan 聽到之後，毛骨悚然："無呀~"
亞雅繼續溫柔既語氣： "但我聽到你聽緊喎~~~"
Bryan 道： "係咩？？等我熄0左部 hifi 先~"音樂停0左，再講："無呀~"
亞雅終於改變其語氣："張俊朗~~你好野~~我實會係你間房搵到~"
Bryan 奸笑："鄭詩雅~~睇下點？？"跟住 Walking Talking 再無聲。
不過，亞雅係 Bryan 房"搵寶物"，長期佔上風，正確 d 講，係Bryan 未贏過。
其實……Bryan一直都將 d"寶物"放係難搵但亞雅又必定估到既地方。事實上，Bryan雖然口硬，其實好0錫亞雅。
第二日，佢地要返學，係lift 口撞見。
Bryan ："返學呀？"
亞雅想講"廢話"，但實比佢串返轉頭，所以佢要答得越"無里頭"越好。
亞雅 ："去打仗呀~"亞雅諗住可以頂住Bryan 啦…點知…
Bryan ："打仗？？唔好笑大人個咀啦~~你做軍妓都無人要啦~~哈哈哈~~"
唔比Bryan串人，相信慘過世界末日。lift 到，Bryan 入，亞雅無入，好平常既事。
Lift 門一閂，Bryan即係拉返條褲鍊，其實晨早流流，真係唔想同亞雅鬧交，不過係佢講"返學呀？"既時候，發現自己無拉褲鏈，為0左唔比亞雅知，佢要激到亞雅唔入 lift ， 自己係 lift 入面拉返好佢。
原來，拉褲鏈都要有咁多學問。
但 Bryan 點都估唔到，今朝呢單野，係大炒既先兆……
巴士站，兩人再撞到。
亞雅出0左街，就會回復"冷若冰"既狀態，就算 Bryan ，都唔易接近。
巴士上，Bryan 坐亞雅對面，聽住歌。
今日Bryan 無用 MP3 機，帶0左 Discman ，一路哼住 J 新碟既歌，一路睇歌詞。"銀"腳，態度勁輕挑，囂張。
呢個係 Bryan 既習慣，佢無心聊亞雅。呢個習慣亞雅係知0既，不過火遮眼既雅姐，已經完全唔記得佢有呢個習慣。
雖然亞雅表面上若無其事，其實佢一顆雄雄既心，已經好想走去Bryan 面前打佢一鑊甘。
再次強調，Bryan 係無心。
時光飛舞中……
下午，Canteen。
亞雅同一班組員傾緊 project ， 食緊飯，閒談緊。
亞雅見到Bryan身邊有一班女，又火滾。
亞雅都唔知點解會咁火滾。
可能佢見到 Bryan 對其他女仔咁溫柔，而自己……根本唔當自己係女仔，除晒衫都無反應咁………此刻既亞雅滾到爆。
不過面子要緊，亞雅有幾滾，都收埋係個心，無表現出樣。
組長：”咁好啦喎，大家照分配既工作行事啦喎，知道。”
其時，Bryan 向亞雅方向走過去，把口開下閂口咁，雖然無出聲，但係到狂講”軍妓”。“你仲講你仲講”???亞雅好似好冷靜，實際忍得好辛苦，想爆咁濟。
掉返轉頭，亞雅繼續講："嗯，我會努力0架啦，個project可以拉返高個 GDP。"
眾組員驚訝道：” GDP！！！！！！！”
大鑊！亞雅知道自己講錯野，即刻以笑遮醜：" Sorry 呀~係 GPA~唔好意思。"
成個 Canteen 靜晒，亞雅呢個校花，呢個小龍女，呢個冷若冰，終於露出第一個笑容。
好多男仔恨自己無隨身帶相機，機會難能可貴。
全個 Canteen 得一個男仔，無驚訝既反應，係 Bryan。
Bryan 向亞雅擺出一個勝利既笑容。
亞雅完全 get 到佢係講乜，佢想話："我終於打破0左你冷若冰既完美身份啦~"Hi冰"~~哇哈哈哈~~~~~~~"
亞雅好想將佢手上既餐具，全部擲向Bryan。但佢無咁做，因為一錯，唔可以再錯。
唔知情既人，完全以為佢地係眉目傳情。
無錯，亞雅呢一刻都仲係好溫柔，不過一定係殺死你的溫柔。
時光再飛舞……
8 點，亞雅屋企。
今日好人齊，鄭生張生都係到。
亞雅坐係梳化睇電視，雖然開行冷氣，但鄭生都唔敢坐近佢，因為相信亞雅依家既體溫超過 攝氏45度。
四位父母都知今日將會有一星期一度既"大炒"發生。
鄭太張太忙著收埋d "架生"同埋重要物品，包括刀，鎖鏈，雙截棍(警察屋企有唔奇)，流星鎚(亞雅新買0既，希望佢唔記得)。神主牌，關二哥，結婚相，同埋張太鄭太多年儲落0黎既 FXXK 周刊。
8 點 3 ，Bryan 入0左鄭家，態度，勁輕挑。
Bryan 間房仲要大大聲開住 J 隻新碟，聽到與聽唔到之間。
亞雅其實既體溫已經係50度左右。
開飯期間，鴉雀無聲，無他0既，係"大炒"既壓力下，無人敢出聲，父母都係咁話。
第一個開聲既，竟然係 Bryan：" 鄭爸爸，家陣d 經濟係唔係好差呀？？"條友擺明想搞事。
鄭生呢個時候點敢亂講野，扮晒慈父feel ： "係呀~~所以你地兩個要比心機讀書，做社會既棟樑……"
突然檯面一個劇震，震央，係一坐超過地球核心溫度既活火山。
Bryan 見係時候啦，再加多兩句："係啦~~快d叫你個女返房做功課啦~~拉高香港既 GDP 呀~"跟手，Bryan 笑到拍檯拍凳。
百忙中，Bryan 都仲有留意亞雅既右手同筷子上既肉片。正當Bryan 想講， "舊招，無新意"，個"舊"字未出口之時，一碗飯擊中佢塊面。
亞雅依家既姿勢，標準過職業棒球投手。
四位家長同時驚訝道："哇！！！新招！！！！"
鄭生先發言："當年周伯通既左右互搏之術，我今日有幸目睹，仲要係我個女發揮得淋漓盡致，武學天份奇高，勁！！"
張生再發言："要你地用膠碗呢個決定係正確既！我幾時都係英明既父親。”
張太跟住：" d 飯我煮得好有心機0架！一杯米用0。889654266266556635杯水，我度0左成日架啦~~"
鄭太最開心："好野~~~有人拖地~~~唔理你地~~今晚搵人搞掂佢~~"
另外三位家長同時道："大鑊！你講錯0野啦！"
亞雅起身拍晒檯，發晒爛渣："係都呢個死人頭拖啦~~~~~~~~last touch！"
Bryan 仲未笑完，笑住講：" 我 last touch 0丫嘛，我食晒臉上d飯咯，但地就你拖。屋企你0既，碗飯你掉0既，發皮四又係你，唔串得0個又係你，講錯野都係你喎，要我拖？？你個腦生係屎忽0架？？你唔好讀大學啦~~一 d common sence 都無~讀返幼稚園啦~~不過唔好跳彈床啦~~嚇親d 小朋友就無為啦。到時高材生啦，廿六個英文字母你識晒啦，Aeroplane 記唔記得點串呀？？ A-e-r-o-p-l-a-n-e 呀，大笨象我都唔記得0左點串啦。記住串熟晒d動物同生果先入返去啦~~~係喎~~到時你考第一，香港經濟咪會起飛？？香港經濟睇你頭0架嘛~~讀得好d GDP 即刻高晒啦~~~~鄭生鄭太，快d"的"你個女入幼稚園啦~~學費平過大學呀~~為自由愛自由~萬歲~Yeah。講完。 "
亞雅立晒架生，都唔知佢算唔算有禮貌，問Bryan 一句：”講完啦嘛？？”
跟手檯面碟咖哩雞飛離餐桌之外。
雖Bryan仲未笑完，但佢都仲閃得到。
唔洗驚無，碟菜心炒牛肉車緊過0黎。
此時，四位家長心靈相通，一齊講：”閃！！！”
鄭生：”你唔夠英明啦~~下次所有碗碟都要用膠~~~”
張生：”唔好講咁多廢話，好彩部 PS2 放定係門口，入面係唔係 Winning 7？？唔係我唔玩0架~~~”
鄭太：”我唔理呀~~~今鑊野你個仔都有份攪，你聽日過0黎同我執屋呀~~”
張太：”你痴線0架？？？上次係我屋企張梳化反轉0左，咪又係我自己一個人抬返好，唔好講咁多住，帶0左 FXXK 周 未？？睇個勢應該打通宵~~”
四人未出門口，碟白菜已經飛中0左個門鎖。
四人回頭一望，檯面d野無晒，係時候擲雜物。
四人同時心諗，戰況非常激烈，早走早著。
呢四位家長，究竟有無諗過乜野叫責任？？
有無諗過生出得佢出0黎，就要教佢地點做人？？？
生佢地0個時唔知~~依家一定無。
因為四位家長，依家剩係諗緊逃生方法。
<待續>
故事全屬虛構~
如有雷同~實屬巧合~