錯的感覺對的人: Vol.4
故事未繼續之前，點算下昨夜大炒既損失先~
四位家長入到屋~~~係到四圍望~~~~心諗，賊都未有能力搞到咁亂，所以俗語講得0岩，日防夜防，家賊難防。
d 燈炟無晒，預0左架啦~
鞋櫃少左隻門，係鄭生張床上面~唔緊要~~整得返~~
整唔返既係……有兩張凳碎0左，記住，唔係爛0左，係碎0左~~~
同埋要買返 d 碗碟。
今次損失叫少，上次反轉左梳化0個鑊，要買過部電視機。
再睇下佢地生0個兩舊”叉燒”點先~~
Bryan 口邊仲有條菜，好明顯係作晚開拖之時用口接住0左，未及食落肚，但佢好安然咁訓0左係梳化，望到佢個衰樣，都知佢未笑完。
亞雅呢？佢間房好似乾淨過之前，佢著住睡衣訓0左，應該係沖過涼先訓。
四位家長突然好驚，好明顯佢地昨晚咁大鑊，都仲係理智控制下。
如果真係控制唔到理智……房署拆樓應該可以外判比佢地做。
佢地最關心，就係每次大炒後既協議書。
協議書~~~係地上。
內容如下。
張俊朗，
1你要認錯，道歉
2返黎幫亞媽執屋
3無條件借野比我
4還錢
5屋入面既野要你賠
6我除衫要有反應。
兩星期為限。
仲要有血跡添。
我地回憶下當時既情況。
當亞雅拆埋鞋櫃隻門既時間，發覺已經無乜野可掉，唯有叫停火，跟手寫協議書。
認錯，道歉：”係你0岩晒啦~~咁0岩~政府應該請你做官啦~~Sorry law ，對唔住，對不起，(跟住多國語言既對不起)，聽唔聽得明晒呀？？聽唔明都無機會聽多次，我自己都唔記得~”結果Bryan比人罰講多三十次…呢個時間仲要玩串，抵死。
返黎幫亞媽執屋，Bryan 有較激動既回應：”你有無搞錯呀？？？廳d 垃圾一半係你房掉出0黎，假公濟私！”
無條件借野比我：”你比個好聽 d 既借口自己入我房搶野 0者~”
還錢：”錢就無啦~~命就有一條，拎去啦”亞雅真係坐言起行，用坐緊張起勢咁追住Bryan0黎車，其中一張就係咁碎。
屋入面既野要你賠：”上次你賠0左個電視機……心痛 law ~~算啦~~我鯁今鋪”
我除衫要有反應：”我交足戲0架喎~~鑊鑊你除衫，我唔係大笑就好嬲，呢d唔叫反應叫平靜呀？？”
亞雅立刻拎起第二張凳追打佢 ，Bryan 終於受傷，流血，緊係啦，張凳都碎0左兩張啦，比下面流兩滴啦。Bryan 終於應承0左 亞雅，佢除衫要怕羞，拎轉面，但Bryan 都笑0左粒幾鐘先訓得著。
咁緊係亞雅沖緊涼既時候先敢笑啦，佢唔想屋企連梳化都得坐。
四位家長同時驚訝，究竟佢地係野蠻人，定文明人？？
四位一置決定，佢地對仔女係文明人，佢地識得寫協議書之餘，總活學活用，將中史所學既不平等條款套用係自己身上。
四位同時諗，太好啦，今次簽兩星期，記得一次簽五日，張太連屋都費鬼事執。
四位都心諗，如果 Bryan 唔串亞雅同無條件借野比佢……其實應該無事。
可惜，係無可能既事，特別係串亞雅，Bryan 簡直不遺餘力，鋪鋪新花式，未見過佢重複。
突然間，兩位丈夫心內麻怨兩位太太，未能持家有道。
同樣地，兩位太太又怪責丈夫，管教不力。
好兩對恩愛既夫妻，感情就係咁出裂痕，離婚都有機會0架。
Bryan 亞雅，你地話好唔好意思先？？
第二日，大戰過後。
系會內，亞雅做緊功課。
有位女仔走埋亞雅身邊問：”鄭詩雅~~~我地今年搞個Christmas sparty 呀~~~有個遊戲~~~叫”對對碰”~搵有緣人架~到時 Bryan，隔離校范志，Tommy 0個d都會出席~好多靚仔~你都0黎丫~~”
亞雅：”多謝晒呀~~我睇下情況先~~我再搵你地 o丫~~~”
亞雅心諗，原本都無興趣既 party， Bryan仲要出現，真係無乜機會去。
但世事難料。
當晚8點，Brayn 屋企，準時開飯。
Bryan問：”八婆，個 party 你去唔去呀？？”
亞雅：”人渣，浪費時間既活動，我無興趣。”
Bryan 話：”咁又係~你都無人要0架啦~同浪費時間真係無分別喎~”咁當然唔係事實啦。
亞雅 話：”你講野呀？你幾時見過我無人追呀？日日都有人問我拎電話呀！”呢個係事實喎。
Bryan 又話：”但弊在埋身都知你惡頂呢，八婆。”呢個……都係事實~亞雅即刻無聲出。小炒，在所難免。
飯後，亞雅無再逗留，立刻回家。
第日，佢地要返學，又係lift 口撞見。
Bryan又問佢：”返學呀？”係Bryan心目中，呢個簡直係比跳樓機更極級既娛樂。
亞雅真係覺得好煩。唔答佢又比佢串到暈，答佢都係比佢串死。
不過唔答佢就實死，答都仲可能撞正佢諗唔到辦法串自己既說話。
亞雅一樣”無里頭”地答：”標童呀(指神打)！”
當然，亞雅邊會咁好彩，Bryan 好似執到金咁，拿拿林開口串佢：”無用0架啦~~你”標”到西施上身都係咁，命格就係命格，你一樣無人要~~一樣無人頂得你順，鯁得落你~~哈哈哈~~”
但亞雅今次有入lift，因為當亞雅拎 Bryan 隻新 CD 出0黎，作勢掉落地，Bryan 即係唔敢出聲。
有把柄，係唔同d。
學校。
Party搞手再問亞雅：”考慮成點~~~”
亞雅：”好呀~~~反正我都無乜0野做~~~~我會出現。”
西施丫呀？？就出0黎搞破壞！同埋就趁今次機會，搵過男仔拍拖，結束從未戀愛過的單身生涯。
<待續>
故事全屬虛構~
如有雷同~實屬巧合~