[屍文]遺留者的影像: 第九章

事情擾攘了好一段時間，但走廊上的大門仍然密實緊閉，沒有一人願意站出來看看發生了甚麼事。若不是魏智楠的幫助，他與黃圭澄或許已死在喪屍之下。

富正淡明白，自私是人性，冷眼旁觀更是人之常情，比作是自己的話，也都會這樣做。

所以，他也沒有去埋怨誰。他並不覺得這是一回事。

因為一直以來，他都是過著這樣的生活。

被埋怨、被嘲笑、被排斥。





跟普通人很不同，他覺得自己沒有怨天尤人的資格。

是自悲感作祟嗎？嘛，他自己也不知道。





2016年6月22號，下午4點28分。





世界從此變得不一樣了。

街道儼如混亂的戰場，火光四起、車輛翻側。路上只剩下瘋狂的人們，在撕噬地上血肉模糊的屍體。

「對唔住……你所打嘅電話號碼無人接聽，請遲啲再打過嚟啦，嘟嘟嘟……」

唉……

望著剩餘38%電量的手機，富正淡已撥出了超過50通電話。自從智能手機興起之後，他有多久沒試過打如此大量的電話了？





忘了，因為實在太久遠了。

「阿楠……」富正淡獨自打破沉默：「唉……我依家個腦好亂……你清唔清楚依家發生緊咩事？新聞或者網上有冇咩資訊？」

魏智楠交叉雙手站在窗邊，嘴角微微抖動：「我都唔清楚。不過岩岩新聞有講，似乎有啲唔妥。照你岩岩嘅情況嚟睇，應該真係發生左啲不得了嘅事……」

富正淡沒有繼續說下去。他心知肚明，眼下是發生了非常不得了的事情。

「借個插蘇一用。」

「隨便。」得到魏智楠的許可，富正淡旋即將手機充電。手機顯示處於充電狀態，這表示至少到目前為止，電力供應仍維持正常。

「岩岩出面究竟咩事？個女仔點解會叫得咁大聲？」

富正淡搖了搖頭，嘆道：「喪屍。」





「吓？」

「我都唔清楚……不過照依家嘅情況嚟睇，就應該無錯……」

「你究竟講緊咩呀？」

「你應該知咩係喪屍？」

「我知。」

「咁就好講啦。我都唔知嗰隻係咩，但個女仔嘅老豆的確變到好似怪獸咁，個樣十足十電影裡面啲喪屍，好撚核突，又鬼咁大力。佢唔認得自己個女，仲襲擊我地，依家我比佢咬左一野。」富正淡伸出受傷的右臂，神色平靜。

「哦……」本來預想魏智楠會大失方寸，但他卻出奇地冷靜：「其實我一早睇到。我係有啲震驚……你咁坦白講出嚟……」





「哈哈！」富正淡苦笑兩聲，目光忽然變得銳利：「我……有樣緊要野想拜託你。」

「吓？會唔會太突然？講講下喪屍無啦啦講啲咁嘅野？我到依家都仲未搞清楚發生緊咩事喎……」

其實，富正淡也不知道自己接下來要做的是對或錯。

眼前這個叫魏智楠的男人，看似善良隨和，但人心暗底裡想的到底是甚麼，只有他本人才知道。富正淡是很清楚，根本不能說相信誰、要把生命託付給誰……這些沒有保證的行為。

但是當下的情況，除了魏智楠之外，富正淡也沒其他可以選擇的人。

「我直話直說……我會離開呢度。」富正淡說罷，望了眼魏智楠，見他神情有些異樣，便繼續道：「但係我想你幫我照顧個女仔。」

魏智楠的臉龐大力抽搐幾下：「吓！？我自己都顧唔掂自己……我仲搵緊我條女，你唔好搞……」

「唔該你。」此刻富正淡彎下腰低著頭，淡然說著：「我……遲早會變成喪屍……掛。我唔知佢老豆係咪喪屍，都唔知自己會唔會好似電影咁被感染。但係……我唔想傷害到佢，因為依家嘅我實在太危險……話唔定同你講講下野會變成喪屍咬死你……」





魏智楠俯視低頭的富正淡，腦海一片慌亂：「咬死我？吓？你講笑咋？」

他沉靜了一會，失笑起來道：「哈……唉得啦得啦，我盡量啦……」

他緩緩坐下，張開手掌，擋住又想說話的富正淡：「不過咁……我唔擔保我保得住佢，我自己都唔知發生緊咩事……我好亂，你咁突然……我只可以應承你，我盡量幫佢……盡量……真心，我開門放你地入嚟已經好大勇氣，我盡我所能，幫到就幫，救唔到你唔好怪我。我仲有條女，仲有屋企人，仲有好多重要嘅野。」

「咁就夠啦……」沒錯，這樣就夠了。反正，富正淡也只是黃圭澄生命中的一個過客。

一個可有可無的存在，他能為她做的事情，也只有這些。

「咁……就交比你。」富正淡放下心頭大石，心情都舒暢起來：「係呢，你有無尿袋之類嘅野……我電話無電，但我唔想係度留咁耐，我怕……」

「咪講呢啲啦好心，咩交比我呀……上戰場咩！尿袋呀嘛，我有呀……」魏智楠苦笑一聲，打開抽屜取出一個白色方塊：「我都係得兩個，比個你啦。日本野嚟架，琴晚叉過電啦，你部廢機都應該可以叉爆2次電嘅。」





「多謝，我比返錢你。」

富正淡把手伸進褲袋，卻被魏智楠輕輕捉住：「得啦唔駛啦，男人老狗婆婆媽媽咁，攞去啦，我送比你嘅！」他擺了擺手，又道：「況且，錢……依家都唔知仲有冇用……」

「實有用嘅……可能政府今日就處理好件事呢，聽朝一起身一天都光哂呢！」

「哦。」魏智楠久違地大笑出聲：「哈哈……希望啦，望就咁望啦！不過你嗰幾舊水又食得幾多餐呀！唉！唔講啦，我打比我條女呀，佢唔聽電話呀吹漲……」

魏智楠說罷漸漸走遠，場面頓時變得空寂，富正淡於是走進黃圭澄的房間。

打開房門，只見黃圭澄正安穩熟睡於床上。在昏暗的環境下，她的睡顏更顯秀氣。

唉……要一個少女接受自己的親人在眼前變成食人怪物，根本是天方夜譚。她這種時候能如此安眠，毫無疑問是潛意識在麻醉自己。

富正淡慢慢跪下，輕柔撫摸黃圭澄那滑嫩溫暖的臉頰，然後又迅速收回手掌。

痴線……在幹甚麼？自己跟她又不是甚麼關係！？這樣豈不是乘人之危嗎！

富正淡始終覺得，所以事都是他的一廂情願，黃圭澄只是一時失措把他當作救生圈。但無可否認，由見到黃圭澄的那一刻起，自己便喜歡上了她。

「對唔住，我要走啦……」富正淡摸黑從床邊站起，再次躡足離開。

甫一出門便見到提著背包的魏智楠，露出奸笑：「啊？點呀……同囡囡道別呀？」

「算係啦……都唔算係啦……」

「乜你同個女仔原本唔識架？」

「係呀。」富正淡尷尬地笑著。沒錯，二人本不相識，自己就像痴漢一樣，一直纏住少女。

「唔講唔知喎，你地咁襯，我仲以為男女朋友添，哈哈哈……」也不知魏智楠無心還是有意，反正就是哄得富正淡心裡歡喜。他爽朗一笑，將手中背包拋給富正淡：「拎住啦。裡面有一枝水同包餅，多就唔多架啦，不過你上路省啲用啦，死都要做隻飽鬼呀嘛。哈哈哈……祝你好運。」

「呵……唔該哂你……你都要好運，快啲搵番女朋友。」也許是被魏智楠樂天的性格影響，富正淡緊張的精神也有一瞬間鬆弛下來。

「多謝啦。係喎個女仔個老豆……？唉唔記得啦，總之你講嗰隻怪獸就係出面，你自己小心啲呀，幫我地引走埋佢就當然最好啦……」

「我盡量啦……咁阿楠，黃圭澄就交比你……」

驀地，頭部一陣極眩，富正淡突覺天旋地轉。視線逐漸模糊不清，全身痙攣，神經線像被扯碎一樣的痛楚慢慢散發開來，腦袋開始感到一股前所未有的劇痛……

「頭……個頭好……呀！！！！！！！！！！！！」





「嗚呀！！！！！！！！！！！！」

痛楚。撕裂腦海，劃破夢境。

「阿正！你冇事呀嘛！阿正……」臉頰被溫暖包圍，頭頂是痛不欲生。

富正淡一把從床上彈起，他用力按住太陽穴，嘗試舒緩痛楚。微弱的燈光刺入眼球，一時睜不開眼，耳邊迴響的是沙啦沙啦的雨聲，還有溫柔的燕語……

「阿正……你發惡夢呀？無事呀嘛？」

頭痛漸漸退去，麻痺的雙手透過體溫傳來冰冷。富正淡輕揉雙眼，只覺眼前臉孔與夢中倩影有七分相似：「妳係……阿綾？」

「係呀……你做咩呀，你又訓左……」紮著馬尾的伍真綾看了看手錶，喝道：「8個鐘呀！嚇死人咩！成日訓！一起身又大叫……都唔知叫乜……」

沒辦法，頭痛欲裂，那種如千針所刺的感覺，頭簡直像要爆開一樣。富正淡漸漸發現，每一次在夢境過去之後，都會發生這種異常狀況。

「呢度係馬鞍山站？」他慢慢回想這段時間以來發生的事，拍拍額頭道：「依家晏晝4點啦？」

「就嚟4點架啦……你做咩呀？傻下傻下咁，無事呀嘛？我斟杯水比你啦……」伍真綾說著斟滿了一杯水遞給富正淡。

「唔該。」水杯傳來暖和的觸感，他喝了兩啖，隨意道：「阿綾……妳一直係度？」

放眼四周，這裡是一個空間不大的藍色帳篷，闊度僅夠躺下兩人，似乎就是伍真綾專用的睡屋。

伍真綾聞言，臉一時紅起像蘋果，她別過頭說：「係呀……要照顧你呀嘛，阿牛交帶架！你咪諗多左啦！你呀……係都要幫我守夜！傻架咩，你邊夠體力呀……」

阿牛？

阿牛在哪？

對！阿牛他……

「唔好講我住！阿牛佢點呀！佢無事呀嘛，佢點呀！帶我去睇下佢！」

富正淡突如其來的叫嚷嚇得伍真綾無從反應，張大嘴巴呆坐原地。

富正淡見狀便搔了搔頭，笑笑道：「唔好意思……我大聲左。但係阿綾，我想問，阿牛佢去左邊？佢唔會已經……」

想起當時危急景況，若不是牛仁晃捨身救助，自己可能已被屍群粉身碎骨。

「阿正，你冷靜啲，阿牛佢無事。佢返上嚟之後好坦白咁同大家講佢比喪屍咬到，大佬於是將佢隔離左……」

「隔離？」沒錯！牛仁晃曾說過有個"不準進入"的禁地用來擺放屍體和隔離感染者，難道他現在就在那裡嗎？

富正淡立時躍身，快速穿上鞋子，卻被伍真綾伸手擋住去路。

「阿正，你坐低先！」

富正淡眼神堅定，語氣淡漠的道：「阿綾妳借過，我只係想搵阿牛。」

「但係……」伍真綾說到一半，突然頓了下來，露出一副楚楚可憐的樣子。

「唉……」富正淡見狀一聲長嘆，有點惱怒地說：「妳今日做咩？其實係咪有咩事？」

「有咩事？無咩事呀！無野呀……你都係快啲去啦。」

任誰都知道女人說沒事便是有事，說不在乎就是很在乎，突然笑嘻嘻的話就是在生氣。

富正淡搖頭嘆息：「阿綾……如果妳信得過我嘅，就講比我知啦。我一直都好相信妳，雖然唔識點講……」

伍真綾聽著莞爾一笑，心裡暗喜，淡淡從衣袋取出一個黑色布袋：「你拎返住先。」

富正淡接過布袋一摸，是一件堅硬、形狀不規則的東西，這種感覺似曾相識。

解開一看，果然是之前肯尼給他防身的那柄手槍。

「點解會係你度……」

伍真綾似笑非笑，把頭哄近在富正淡耳邊細語：「大佬佢唔比私藏槍械架，驚呢度有人立心不良。每次搵到槍都要先上繳，到要用嗰陣先會拎出嚟。我諗枝槍對你一定好重要，所以偷偷地收埋左囉。」

她吐出的香氣誘惑而致命，讓富正淡瞬即打了個顫。

為了幫助自己而欺瞞葉英信，這真的是出乎富正淡意料之外……

伍真綾雙掌撐地，整個身子呈小狗狀，繼續用咬耳朵的方式說話：「仲有呀，嗰度係禁地嚟……大佬好忌諱，完全唔比其他人入去。」

禁地？不就擺個屍體而已！這種情況還管他禁不禁地！

富正淡輕輕推開伍真綾，將袋中手槍放回她的懷裡：「阿綾，妳拎住旁身，有咩事起上嚟都有個保障。我知妳擔心我，但係放心我唔會搞事，我只係想睇下阿牛傷勢姐，好快番。」

話音剛落，富正淡便拉開簾幕，衝了出去。

外頭風雨交加，啪啦啪啦的雨聲教人更是心煩。

伍真綾抱著手槍，兩眼放空，看著被狂風吹得飄搖不斷的簾幕，心裡一陣亂象，難以解釋。





而這個時候，富正淡挺直身子，立於月台，任由冰冷的雨水打在軀上，停在原地沒有前進。

他之所以這個樣子，是因為眼前，出現了一個令他無比憤恨的人……

「高功利你條扑街！」剎時，他青筋暴現，怒髮衝冠，凸起全身肌肉，一個重拳照面轟去！