《易容師》: 第十一章-三方會談
2015年5月2日，凌晨5點31分。某公屋內，碌格床下層。
「哇屌！」
我中左槍？
我殺死左隻爬爬？
同時又比劉SIR殺埋？
「仆街，你又黎......真係唔洗訓咩......」係比我細佬屌鳩我嘈到佢同周公捉
棋既同時，我確實左自己身上係冇中彈。
唉！又黎了......現實同夢境既交接。
咩係虛幻，咩係現實？
虛幻既係劉SIR根本冇射殺我，人形蜈蚣都冇出現係我屋企。
但現實係......隻人形蜈蚣實實在在出現左！仲要我真係係大街大巷入面比佢
追殺！
點解我咁肯定？
因為我睇返我部相機嘛！
呀！！點解會發生Ｄ咁既事架！！依家又連阿May都比人捉埋！！
死啦，程小芳同頭先隻裸女蜈蚣，都係短髮女性。阿May會唔會出事架？
佢唔會都比個犯人捉左，搞到成個怪物咁呀？
屌！！！！個犯係咪變態架！！！！
呼────
忽然有風聲吹過，我心嚇到離一離。我唔理得咁多，真係拿拿聲訓過。
再唔係，我真係驚Ｄ短髮怪物黎搵我！
天呀！如果有個特異功能，我唔要咩野飛天、噴火、隱形......你賜我可以安
眠既能力就心滿意足架啦！
2015年5月3日，下午3點56分。某大學，足球場外。
痴線，呢兩晚都無教好訓！
琴日返工遲大到，今朝又拎留野比老闆屌。唉！
真係，唔理教授係咪咩嫌疑犯啦！快脆搵佢幫我脫離發呢Ｄ惡夢既情況，
查案呢家野都係交返比劉SIR。
「喂！汪震！」
大鍋，今日我都專登約教授遲半個鐘先開始。點解，咁都比我撞到佢！？
Wendy，我之前心目中既女神。
扮聽唔到，扮聽唔到。
我有我行我光明路，你有你走你淫賤道。
「喂也！汪震，你企係到呀！」
「哦，你呀？」做咩係都要截住我姐！我真係唔知點面對你呀！
「點解既......點解你愈叫愈走既......」你仲問點解既？
我呢個毛聞，係咪要答返佢一句「巧神奇牙」或者「巧打耳牙」咁呀？
「有Ｄ野......大家無謂講咁白啦！拜拜！」我輕輕力推開佢，等仍退出條路
比我，然後競步咁急速走去熊教授個到！
唉！點解，呢排究竟搞Ｄ咩？連續幾日Ｄ經歷都大起大跌。
面對呢幾日既野，要係以前既我，一定會好中二病咁答：Woo......好刺激
呀！咁先係人生架嘛！
人生？我個人就黎死添啦！
快快快！去搵完熊教授之後，Call下劉SIR件事查到真相未。
查到既話，拜託佢幫我查下Wendy個底，了左個心結去先！
叩叩！咔啦──
岩先諗得太入神，就咁叩完門，就直接開門入去。
「你黎啦？」
「喂，o靚仔。」日頭真係唔好講人。
一打開門，我就見到岩先諗起個兩位人兄。
劉SIR，熊教授。
兩位，一齊出現呀！
「Hi，咁......岩呀？」呢個時候，教授拎著杯茶飲左啖。而劉SIR雙手橋埋
一齊，視線由我身上，帶到熊教授既方向去。
「劉SIR，唔介意我幫左我朋友，做左個夢境評估先嘛？」
「唔介意，我都有興趣知道，你呢位朋友既夢境。」劉SIR腰部一郁，轉
動張椅向後，對著教授房中間張黑色長椅。
劉SIR，你玩鳩我咩！要我當面爆熊教授出黎？
我慢慢咁走埋去，好似平時咁訓係張長椅上。
同時間，我完全feel一樣野。
一個極之嚴峻既氣氛！
一間房，三個人。
教授，警察，小市民。
就好似電影中，鬥智片入面既正邪角力咁！
更令我可怕既係，我前晚發左既新夢境，會唔會令劉SIR懷疑埋我？
點算呀......眼前兩個人，無論夢境又好，現實又好，都好似好想置我於死地
咁呀！
真係好學下《頭D》既杜汶澤講句：爸爸！我──想──返──屋──
企──呀──！！
2015年5月3日，下午4點39分。某大學，熊教授房間中。
「你話夢中，有一男一女，你認唔認識？」教授好似平時咁問我。
「唔認識。」我一張開眼，就見到劉SIR坐左左旁邊，而熊教授就背住我
地，唔知做緊乜。
「咁你講到個個短髮女性，係一位少女。咁個男士呢？係老，定年青？抑
或係中年？」劉SIR問完，雙眼就投向教授。
「我唔知，但從佢衣著睇......似係一個上左年紀既衣著打扮。」
「你話......個男人身穿紅色冷衫，咁見唔見到佢，入面係著住白色恤衫？」
喂，咪住！D對白咁熟面口既？
呢個時候，即係睇下我雙手......好彩冇比野綁實。
再望實熊教授個背脊，睇著佢慢慢咁轉過黎。
而劉SIR好似睇到我有D唔妥，雙手都按左係把槍上面。
我，劉SIR，兩個人都一齊留意著，正轉過黎既熊教授，佢雙手究竟拎住
左Ｄ乜野......
(to be continued...)