《易容師》: 第十二章-犯人自首
「係咪......好似我咁樣？」
教授轉左過黎，好清楚睇到，佢紅冷衫入面，確實穿有白色恤衫。
而佢手上攞著既......唔係咩鋒利既手術刀，反之係岩先未飲完既個杯茶。
「係......係也。」呼，鬆左口氣！
「咁奇怪？咁你搵教授解夢之前，你地本身認唔認識？」
「唔識。」熊教授同我異口同聲咁講。
「點解......你一開始冇同我講？」
雖然預左熊教授會咁問，但我真係唔知點答佢。唔通照直講：冇呀，我怕
你係犯人嘛！
你估劉SIR同熊教授會唔會即刻開片呀啦？痴線！
「我......怕......」忍住呀，唔好爆響口呀！
「無論點都好啦，熊教授，我想你答返一開始，我搵你問既個問題。」
呢個時候，劉SIR插嘴截停左我：「昨日，即係5月2號。凌晨既1點到3
點期間，你到底係邊？」
咩事幹？做咩審犯咁審呀？莫非熊教授比劉SIR斷正！？
「我講左啦，我係我自己屋企。我單身，一個人住。你唔信既，大可以向
我樓下保安，拎走CCTV慢慢睇！」
「唔好意思，就係你岩先幫汪震催眠個陣，我已經打左電話叫我班伙計去
你元朗既住所到查。樓梯既CCTV，我地的確發現唔到教授你出入既記錄。但
同時樓下看更表示，琴晚12點到凌晨3點期間，經你樓層個兩部升降機既閉路
電視，咁岩需要維修。所以，我係到再三問多一次──熊教授，昨日凌晨既1
點到3點期間，你，到底係邊！？」
「我要搵我律師......」
「你咪玩野呀！」劉SIR一手揪起熊教授個衫領，熊教授手上既杯都應時
跌左落地。
「劉SIR，到底......咩事呢？」
「又一單失蹤案，事主歐陽美琪，前日5月1號，下午2點半離開左荃灣
屋企之後，到今日下就足足四十八個小時。據我地警方接報後調查，佢正正係
o靚仔你昨日凌晨遇到被面具人捉去個個短髮女仔，英文名May。」
「咁又關教授咩事呢？你又唔可以單靠我個夢......」
「歐陽美琪，同三個月前失蹤既程小芳一樣──都係熊德倫教授，心理學
科既學生！」
講完，劉SIR鬆開手，熊教授反應唔切，坐低左係地下到。
「總之，咩程小芳、乜歐陽美琪我唔識！你亦無權扣留我，我要搵我律
師！」熊教授發火，企左起身大聲咁講。
「唔識？好......咁當我請求教授你，陪一陪我呢位阿SIR，去見一見失蹤左
多時既程小芳。」
咩話？玩到咁大！熊教授係犯人既話，佢又會去咩？
「芳芳？佢......你地搵返佢？」教授既反應，同我預期中完全唔同。
「係，就係三日前，即係4月27號，凌晨2點幾個陣，我地警方係公路附
近發現到佢。」
「哦......好呀。佢冇事就好啦......」教授既反應，由方才極到關心，漸漸平
息落黎。
「但佢依家，係小欖啵。」教授聽到「小欖」呢兩個字，個樣又即刻變返
頭先極之緊張個樣。
「你真係......唔去睇下佢？」劉SIR循循善誘之下，熊教授終於軟化。點點
頭，示意冇問題就佢去咁解。
2015年5月3日，下午7點02分。新界屯門，小欖精神病治療中心門外。
劉SIR揸住佢部GTR，好神速咁車左我同熊教授黎到小欖。
劉SIR擔心我又好似上次咁又發癲，又亂咁嘔整污糟人地地方，就留左我
係車上面。而佢，就同熊教授兩個人入去。
只係由入去到依家，差唔多過左成個鐘。
明明上次入去，半個鐘左右就出返黎，今次到底做咩事呢？熊教授係咪中
途反抗？
抑或熊教授同我一樣，第一次見到咁既程小芳嚇到暈左呢？無理由呀，暈
左都應該有職員即時送返出黎架。
又過多五分鐘左右，係車上既我實在太無聊，開始用我部單反不斷同小欖
影相留念。
其實講真，真係冇咩好留念。唉！但鬼叫我依家悶咩！
影多陣間，我透過單反鏡，離遠望到小欖外圍既情況。
鏡頭內，隱約見到Ｄ職員好焦急。唔會監倉入面出咩事呀？唔通之前話要
屌我老母個痴佬衝左出黎，打鳩熊教授？
「呀！！Why！！Tell me why！！！！」
忽然小欖入面傳出熟悉既咆哮聲，我即刻再Zoom近個鏡頭埋去。
見到既係，劉SIR帶頭，跟手後面係被手扣鎖著既熊教授，兩邊各有一名
執槍既獄警！
而岩先既咆哮，正正係依家比人鎖起，發左癲要人押解既熊教授發出！
我即刻走落車，衝上去劉SIR個到，但係比小欖出面個閘格住左。
「做乜事呀？入左個成個鐘，依家......依家搞乜鬼捉著熊教授？」
劉SIR冇即刻應我，只係郁一郁個頭，示意叫Ｄ職員先行帶走熊教授，然
後佢先走埋黎：
「岩先，熊教授見到程小芳之後，佢就認左罪啦......」
認罪？認咩罪呀？唔會真係.....所有野都係佢做架下！？
(to be continued...)