[刺客教條][長篇故] 果晚玩完刺客教條，家姐同我講……: 第57章：變節

 第57章：

在我們聯盟軍和解放軍的第一次交戰過後，我們漸漸型成一隊軍隊，而艦長就被推舉成為我們軍隊的大將軍。雖然其實事情發展得有些不自然，不過現在已經騎虎難下，兵來將擋，水來土掩。

「喂，你地有冇見過阿純啊﹖」在大家到技術組人員面前報上名字的期間，我到處尋找阿純的跡影。

「頭先佢喺上面天台喎，佢係咪食煙啊﹖你去勸下佢戒煙啦。」在天台花園走下來的家姐說。

「唔該家姐。」





在上面天台的，阿純在一個寧靜的角落果然一邊抽煙一邊在用電話交談。

「10分鐘後見，好啦。」

「阿……」我正想叫著他，可是卻給我聽到一句讓我很震驚的話。

「願認知之父指引我們。」

阿純轉過身，看見發呆的我，也跟著我發了呆。





「阿純，我有冇聽錯，你頭先講嘅係……」

「冇錯，你聽到曬，我今晚就會係一個聖殿佬喇，頭先嘅無理取鬧都係假咖。」（願認知之父指引我們是聖殿騎士的座右銘。）

「點解﹖點解咁突然嘅，你會唔會係咩臥底咁樣﹖」我問。

「車，邊有咁多臥底，但係你唔覺得宜家件事發展得好唔正常咩﹖突然間軍階又剩咁。出面係咁鬧緊我地但係宜家我地就喺度自high，仲有，你唔覺我地兄弟會雖然係同大家配合得好好，好強勢，但係唔覺得好唔對路，好唔似我地刺客呢個身份咩﹖」

「我都覺，但係我地宜家都係隱藏喺人群當中咖，我地都只係幫手推翻呢個由聖殿佬控制嘅社會咋嘛。」





「我覺得由艦長成為左刺客大師之後，好多奇怪嘅事情出現左，首先兄弟會總部佢地被人爆左啦，教主同其他人消失曬啦，小丑國啦，到宜家，好似佢自己想建立一個勢力咁。」

「你意思即係話……艦長係鬼﹖……但係阿健都有時有和應咖喎……啊﹖﹗」

阿純點了一下頭。

「其實呢啲係佢地嘅常見戰略，艦長、阿健、女神、甚至聰明豆都有可能係。」

「咁你又知我唔係﹖同埋既然係咁你仲要去果邊﹖」

「因為一黎，你係刺客後代，二黎，我信你囉兄弟。」他繼續：「至於點解仲要去……始終我覺得，宜家呢個刺客兄弟會已經變左質，此處不留人，自有留人處，你自己都要小心，可能隨時都會有危險。萬事皆虛，萬事皆允，我自然有自己嘅方法……」

「突突突」螺旋槳聲音瞬間在我們旁邊響起，阿純亦踏上直升機。

「咁你都唔使走，可能繼續同我拍住上咖……」





螺旋槳翻起了一陣陣強風，阿純只是搖搖頭，只是做了「萬事皆虛，萬事皆允」的口型，就隨著直升機離去了。

這時候，小丑國士兵才留意到直升機，可是在他們想開火之前，他們早已消失在眼前。