我老母話我有未婚妻: 6
但係奈何...
女仔始終唔係太鍾意果類野...而且屋企又唔係真係日日都無人...
所以有時候KISS都要突登出街,或者係廚房偷錫一下
但係係我心目中,咁樣己經好足夠...
但係時間己經黎到距離林姨姨所講既半年好近...
而我都聽到林姨姨打俾我媽媽既次數愈黎愈密....
我愈黎愈驚...
有時候重會驚到忍唔住抱住露露...
晚晚沖涼都會偷偷喊....
我真係......
好無用...
時間又己經去到大到五月尾(好似係
果陣時天氣己經開始熱
露露d衣著都重係秋天果類
我問佢,你唔會熱咩?
佢又話唔會呀~~
女仔係唔係唔怕熱
但係因為真係驚佢會熱親,於是決定捉佢去買衫
但係同時我都好後悔同佢去買衫
佢揀衫同揀老公有得揮
佢出門口之前,己經同我討論過買咩
佢話想買套工作服(?)姐係黑色短褲仔,有吊帶果種,之前上身著件著通白色t-shirt咁
(你地明唔明)
去到,明明我眼見好多佢想要既類形,但係佢又話唔係唔係,結果揀左好耐,都未買到~
之後行到去商場尾果幾間鋪仔,佢終於好似搵到
拎住好高興咁同我講終於搵到條同佢心目中所諗既一模一樣
我問佢呢條同前果幾間鋪頭既有咩分別
佢同我講呢個褲袋果到有一個銀色既扭扣
我聽到無發脾氣,因為我同佢係同一種人
我都係果種會為一粒扭而行一條街既人
我謝師宴套衫都分左4日去買
第4日重要連續行左7個鐘
班仆街係到叫哂救命叫我放過佢地諗起好好笑
然後,當露露試完出黎之後,真係好可愛
對腳完全露左出黎,然後著住對黑色vans
之後佢兩隻手比v咁向住我,問我好唔好睇...
緊係好睇啦我就係想睇你著短褲先帶你去買衫咋
然後俾錢果陣時~~~要104定103$
露露問我有無散銀
於是我拎左果幾蚊出黎
之後個女售貨員話
[哎也~人地男朋友仔,幫人地俾埋果100蚊啦]
之後我笑笑口,諗兩諗,準備係銀包拎錢俾果陣時
露露突然推開左我隻手
[唔得,我話要買嫁麻..我又唔係無錢俾..]
個女sales拎起張一百蚊,拉一拉直~
[好,呢到104$~多謝哂]
之後露露就拉左我走..
一出到門口,我就問露露咩事
佢話希望我陪佢買衫,但係唔希望我俾錢~
但係我一直都諗唔明(其他巴打知點解一陣答答我)
之後我話好啦~咁去食野好無?
但係佢竟然話,想買甜品外賣,去海旁食
我就話ok啦,之後就買完向海旁出發...
去到海旁,坐底左,我拎左我個刨冰出黎食...
真係爽歪歪,又有涼風,又有美女相伴
但係露露佢只係一路拎住碗野...
望住個海,無開黎食...
我都覺得佢有d唔對路....
我都放低左個刨冰..問佢係唔係有咩想講...
露露微笑寧寧頭...
佢又望返個海...然後佢突然開口...
[八輩子,你重記唔記得我一開始咪好惡既...?]
呀...?露露想講咩
[我記得我中一岩岩入學...因為我單親,總係覺得自己比人地差d野...]
聽到呢句,我就知露露打算將佢一直收收埋既野講俾我聽...
於是我就牽住佢隻手,靜心聽佢講
以下都係露露所講既野
一開始,我個樣重係亂糟糟...唔會打扮唔會打理...每日都只會睇鍾意睇既動畫同漫畫..
但係我發現咁樣會令同學唔鍾意我...而且重笑我...
我問媽媽點算好...媽媽話隨時對住人笑同埋有禮貌,人地就會鍾意自己
同埋人靠衣妝,所以一定要俾人睇到自己好睇既一面....
所以果日開始...我日日都會對住鏡練假笑..
八輩子..我知你因為屋企同好多親戚都有d交際,所以你都識好似我咁樣笑,
因為第一日我係電梯大堂見到你笑己經知道…(聽到呢到我心寒左下)
本身接觸你...我好驚你...我根本唔知你個心諗緊咩
你好似好想趕我走咁..因為我果陣時又住你間房...
而你媽媽又要你幫我做呢樣果樣....
而且你重要照顧埋我...
所以我一直好驚你地一家人會討厭我...
所以我一直係你屋企人面前好有禮貌
但係你你面前,我知道要壓過你..所以之前一直對你惡言惡語....
但係我後來...同你開始熟...我都己經無再理呢d野..
完完全全俾你見到我平時既一面...
係學校...同學唔知...佢地見到係我客套既一面...
而D男仔,只係見到我扮可愛既一面...
(其實我心裡面講緊我真係覺你好可愛)
當你知道,D人接觸自己係有目的..你就會好睇唔起果種人
我就係呢D咁既人...
你覺得d男仔接觸我,真係關心我?真係想照顧我?
定係只係想呃我上床..然後破我處,隔兩星期就扔我走?
(佢呢個時候,隻眼mi到好細咁望住我...但係之後又張返大眼,對住我微笑..)
所以我一直無同男仔拍過拖...
反而....我同過一個女仔拍拖...
除左佢,你係第二個錫我既人....
但係我同佢,只係一齊左一個月就無再一齊...
因為我地都明白...我地只係想係對方身上找一絲既慰藉
找一絲既寄託同動力....
比起戀人,我同佢更似姐妹...
為左唔想媽媽擔心....
我一直係學校都保持住唔錯既成績...
而且因為好彩有林姨媽...
所以我地屋企既生活先過得去...
但係奈何....
有一日上上下堂,校務處叫我落去聽電話
原來係醫院打黎....媽媽入左院....
係香港,我唯一既親人就係媽媽...
係果刻,我好無助,完全唔知可以搵邊個幫手....
好彩..
班主任知道我係單親家庭而且係香港無親戚,所以陪埋我去...
去到....
媽媽己經奄奄一息...
露露無講係醫院既詳情....
大慨係佢根本連諗都唔想諗起...
就好似當日我爺爺過生,我坐住的士趕出去...
點知出到去爺爺己經無哂意識咁...
我爸爸係我旁邊同阿爺講
[阿爸,你個孫阿八黎左啦,快d醒醒啦,阿八好擔心你呀...]
但係爺爺都無醒過....然後係我地一班子孫陪同下...當晚就去世...
聽到親人離世呢段...我自己都眼濕濕望住佢...
露露拍左我一下大脾..
問我
[傻佬,你點解要喊呀?]
我諗都無諗,即時回答
[因為我愛既人都喊緊囉傻婆...]
之後抱實佢....佢係我耳邊同我講
[嘻,你終於肯同我講愛我啦咩~~男朋友大人...]
我即刻推開佢望一望佢塊面
見佢又喊又笑
之後我見到佢呢個表情忍唔住笑左出黎,問佢有無事...
佢寧寧頭擦擦眼淚...一啖錫左落我到..
雖然輕輕一吻,但係威力大過之前既舌頭交纏....
兩個互相對望,好害羞咁樣乾笑
然後我就拖住佢行返屋企....
就係果日我同佢,終於成為正式既男女朋友啦
講之後又一次既燒烤,時間線又跳一跳去到6月中...
林姨姨己經攪好手續....
準備8月左右就接露露過去(點解咁快嫁可以
然後就攪埋入學....9月直接開學...
時間己經定左...
而且因為露露既公公(原來未死係新加坡住緊)
希望照顧露露,所以都希望露露返新加坡....
當露露聽到我阿媽同佢交代完之後...
媽媽問露露點諗(屋企人唔知我地既關係..)
露露..諗都無諗,只係講左句無問題....
我聽到佢咁講之後............................
完全唔明佢諗咩............
點解佢唔拒絕...?
聽到佢咁講,我即刻捉佢入房,問佢點解要走
露露只係苦笑左一下....
[我...希望可以陪係公公身邊,而且我住係香港,你養我..?]
露露正當想推我出去果陣時,我同佢講
[好呀好呀,我養你...]
露露啤一啤我...
[係你父母養我咋...唔係你呀八先生...你自己都重要父母養,你憑咩話養我....你今晚好好諗清楚...]
之後就趕左我出房....
整夜無語....我成晚坐係沙發.....
我開始係到諗...露露係唔係真係鍾意自己...
我又係到諗...如果我真係自己養緊自己,佢會唔會肯留低...
我知嫁..我愛佢...
但係唔知點解我開始懷疑佢唔愛我...
[但係應該唔會..我相信佢]
我不停loop住係咁講呢句....
但係都頂唔住...個鼻酸到仆街.....
個心又唔知做咩抽下抽下...
好辛苦....
然後眼淚一粒粒滴出黎...
我認我眼淺....但係果種不安感真係好強烈.....