我老母話我有未婚妻: 7
唔知大家有無試過...
人喊得太多既時候,就會累到訓著(?)
我唔知係唔係因為喊到累啦...但係我就係咁喊喊下訓著左...
第二朝起身返學...眼腫腫...
露露一早自己出左門口...
心裡面更加亂諗野,究竟佢係唔係想避我...
但係心裡面愈諗愈唔明.......
於是心裡面出現左一絲既怒氣...決定等露露主動搵返我講野我先同佢講野...
(唔知大家有無試過有d咁既經驗...無啦啦會將哀仇變左做怒氣...)
但係,露露無好似我所諗咁去主動同我講野.....
我地每日係屋企都無講野...只係互相用第一次見面既假笑交流...
露露除左食飯果陣時會出聲同我屋企人傾計之外...
基本上每日都係等到食飯時間先返...
而星期六日...佢都會留係房成日唔出黎咁濟.....
我阿媽問我知唔知咩事...
我就話唔知...
然後,我都開始日日唔留係屋企
日日出去同唔同既人去街食飯睇戲...
班人問起露露我都話唔好提....
其實係我唔敢提...
露露堅決要走既原因,都重未明...我根本就唔敢同佢講野...
有一晚...返到屋企..一開門,咁岩見到佢出黎廳飲水...
笑左笑,就去左廁所換衫...
洗左個面,望住塊鏡,諗緊點好既時候...
我決定..都係由我開口先好了..
一出到去,露露準備入返房,我捉住左佢隻手,露露呆左望望我
[你...幾時走..?]
露露諗左陣..
[8月頭至中...未確實....]
[果晚對唔住...我認我太唔識諗..我幼稚...希望你唔好介意...剩低既日子,
俾我陪埋你開開心心過埋去好無?]
露露呆望住我...之後突然又笑一笑,伸出手捏住我講
[好呀,傻佬.. ]
我真係開心到喊左出黎,我地實際無講野既時間大慨唔耐,但係真係一日不見如隔三秋
佢見到我喊,就拉左我入房...佢話唔想俾我屋企人見到我喊
之後坐左係床...錫左我個嘴一啖....
但係果晚,我完全無果種性慾,只係想好好抱住露露訓一晚...
我問露露可唔可以,露露只係笑住點左下頭,我就抱住佢係房訓...
(久違既床呀 )
但係個衰妹...訓訓下,訓住左我隻左手....
我第朝起身卑到仆街
但係見到有一個可愛女人,訓係自己懷抱....
真係有種掩住嘴偷笑既感覺
唔知係唔係因為近暑假,班人開始得閒左,成日約我出去玩
但係因為露露既關係,我大多推左佢地
但係有一次,個死仔包話佢地都會帶女伴出席,所以我就安安心心帶埋露露出發
問好時間點地,原來係BBQ
中學之後真係無再去過沙灘BBQ,中二, 中三果陣時,真係隔一個月就去燒一次
所以順便懷念下
咁我就小心翼翼咁行入房...
[露露大人~~~我呢我呢...約左舊同學bbq,佢地話要帶女伴啵,咁呢你呢,得唔得閒呀....]
佢張到隻眼勁大隻眼望住我
[好呀~~我都想去BBQ呀,我都無BBQ過...除左班會活動 ]
我見到佢個樣真係笑左出黎..
[去海邊喎,唔洗落水,但係你可能要短d短褲之類~因為驚著長褲會整到沙~~ ]
我扮哂溫柔咁同佢講 希望佢會中伏
[嗯好呀 多謝老公提醒]
yes!哇哈哈成功誘導佢著短褲啦
[咁你早d訓啦,後日先係去bbq~~晚安啦傻婆~~]
幫佢息埋燈,就出返房
係咁自己暗爽心裡大叫萬歲ya 之後又係到揮拳扮打boxing
唔知你地有無試過開心到咁
但係呢個時候露露原來出左房,望住我做果d傻事
佢呆左問我
[我應承同你去有無咁開心呀傻佬 ,定係你有咩陰謀呀下~~快d從實招來~~~]
我笑住同佢講無~~幾經辛苦先哄到佢訓
如是者,去到bbq果日
bbq地點 離屋企唔算遠...
坐巴士就入到去~~
同班死仔包集合哂之後,就去買埋野飲同料重有d濕碎野就入去
班人帶d女既質素都唔差 真係估唔到....
買完野,大家分開拎,就準備坐巴士
就係呢個時候,露露突然話
[點解你地要八輩子拎咁多野呀...你地幫手拎D啦..]
我聽到呆左望返轉頭見到佢d眼神好兇狠
我由中一開始,就負責做攪手,班人雖然會聽我講,幫我拎,但係有時候我又覺得自己拎到唔洗人幫手所以先自己拎 識左班人七八年,大家都係慣左
班死仔~~見到露露咁,即刻好主動幫我拎埋我果d野
結果變左我咩都唔洗拎~~
班人就話
[八輩子辛苦左你咁多年啦,今日就服侍下你啦 ]
之後露露變臉 ->
[咁咪乖囉,大家好朋友呀麻~]
我呢個時候都唔知俾咩反應好
但係又覺得好幸福
又有好朋友,又有好女友
坐車期間,露露一路都用佢果個客套模式同d女仔傾計
如果我係明星,露露做我經紀人一定一流...
而班死仔包,就偷偷同我講話露露好錫我,問我係唔係同佢己經發生左咩事
我就話無呀~都係咁之麻~~
但係因為面都紅哂,俾班人係咁笑
去到海邊,落車行入去,岩岩好有一個爐剩
露露向我點點頭,我地兩個同時起跑跳過個花槽,直接坐係個爐邊d椅到
我d朋友見到都呆左
但係我同露露既默契,愈黎愈好,呢件係事實
坐底好,我同露露同班女仔負責拆袋發野~~之後童軍隊長(一個中學做過童軍既同學 )
做返佢幾年前成日做既野-起爐 其他男仔就洗差燒烤差,拎出去插沙~~
返到黎,個個第一時間搶廚師腸燒 童軍隊長都未洗好手,班死仔就開波
好彩童軍隊長個女伴幫佢搶到個火旺位,而我都燒多左條腸俾佢
但係露露原來又燒左條腸俾我 個情況變到勁好笑
其他女伴燒好,就餵自己男伴食,但係露露全程自己食,俾我食都係扔係碗到就算
攪到我都幾葡萄,我偷望露露見佢又無咩反應
點知呢個時候露露好似意識到d野
佢就餵我食魚蛋~
之後班死仔係到wowowowow
之後我
[你地都有女伴餵啦 wow咩鬼~]
點知食食下...發現粒丸苦苦地...
原來佢燒焦左我又唔知....吐出黎又好似落去面咁...(話哂有其他女仔係到)
於是呢鋪真係啞子吃黃蓮
吞完我重對住露露笑左下...寧轉頭就飲杯可樂算數
咁有燒開野食既巴打絲打都知,去得海邊燒,食野都係其次,玩先係主要
於是打左個肚底,就開始拎個排球衝落沙灘開始今日既活動啦~~~
但係班女仔話去換衫先
我地成班男仔係沙灘,畫好個閃避球場,就坐係到等佢地出黎...
其他女仔我唔講,但係露露佢紮起左個頭做高馬尾
著左條淺藍色小短褲
上身著左件小吊帶
我都估佢唔到
其他女仔都差唔多打扮,但係唔知點解咁樣一睇其他女仔完全俾露露比下去
連班死仔都向住露露吹口哨
雖然露露平時白白痴痴,但係講到勝負慾我同佢真係不相伯仲
10個人,5男5女,猜剪刀石頭布分組
同左童軍隊長,露露,童軍隊長女伴,同埋高佬一組
呢個組合雖然奇怪但係都幾屈機
一開波
on9高佬因為自己女伴係對面隊,所以乖乖俾佢女伴扔左出場
我同童軍一齊屌左佢一聲
然後到童軍個女伴出手(下稱海草頭)
一開波就一個假身秒左高佬女伴 動作快到痴線
有時候女人,可能唔想令自己男人落面,爆發既力量重大過男人
基本上我同童子軍無咩出手,避波多過出波
對面都係咁
基本4個女人自己係到玩,我地就係到幫下手
點不知,對面個屈機佬!一出手秒左童子軍女伴
好快,童子軍因為我避開左個波,而擊中左佢 out埋...
最後得返我同露露...對對面4個...
露露企前面,向後示意向我點頭.同我講左加油,win左我錫你一啖
之後成班又係到wow
對面基本上無咩威脅,但係要win又有點兒勉強
但係基於勝負慾之下...就算每次接唔實波,
我地都會幫對方接返實然後反擊,過左一兩次既攻守之後,終於out左對面兩個女仔...
呢個時候,露露同我講一陣佢會突登撞個波,叫我接實即刻反擊殺佢一個措手不及
當我未答應佢又未諗好點算既時候個波己經開左..
露露一拄到個波,個波右左飛,我成個人撞左落沙到接實再扔返俾露露接住
露露一拳打落個波到 個波[沖]一聲飛向屈機佬個肚到,之後重要撞埋落另個男仔個大腿到
真係快到痴線...
如是者,勝利者係我地 連今次bbq費都慳返(獎品係佢地夾死剩種果份錢)
之後見肚餓,班友仔又話返去燒下野食先再玩~~
燒燒下,好死唔死屈機佬問露露
[咦,你唔係要錫八輩子既咩 ]
露露咬咬下麵包係到傻笑...
之後錫左我面夾一啖
之後我都錫返佢一啖回禮
雖然只係小事一椿,但係都勁甜
食飽飽~~~
有去開呢d聚會既巴打絲打都知~~~
誠實與大膽,父母斷雙腳既6樓後座傳統無人唔識嫁啦
就係太陽準備西下既時候,一行又走返出去沙灘圍圈圈坐
例牌啦,啤酒樽
之後轉
轉到邊個既,咪問句true or dare
一開始,大家未在狀態,都係揀下true ,問下對方個男伴/女伴係唔係佢地既男朋友/女朋友
咁老老實實啦,唔係男女朋友都係曖昧關係啦~~
咁海草頭,轉到露露,露露揀true,問露露我係佢邊個
露露諗左陣,海草頭開誘導佢
[男朋友?知己?曖昧對像?朋友?]
露露聽到呢4個關係,佢就答
[錯錯錯 佢係我老公]
全場d人都真係呆左望住佢,包括我 咁勁爆既發言真係不可思議
之後童子軍呀高佬成班追問我對人地做過咩 我話咩都無做過
佢地又話我一定食左人地隻豬,唔係既話人地做咩認你做老公
露露出現呢段時間,令我跳落黃河都洗唔清既事件真係多到我自己都數唔到
但係佢又唔係有心果下先好笑
之後班友仔放棄問我,直接問露露,露露只係笑笑口講
這是個不能說的秘密呀
d女仔全部都笑左,但係d男仔我肯定佢地心裡面屌左聲
當又轉左幾圈班人熱身完,好似黎料...
又咩除褲跑沙灘呀 問路人借安全套呀
問警察 幾多歲果d on9野
但係好彩次次都轉唔中我同露露,基本上我地兩個係到笑多過玩
點知班人話我地兩個係到食花生,唔洗玩,要我地兩個一人揀一樣做
我同露露講不如你揀true啦
但係露露話唔好,佢話驚班人同我熟,會叫我做埋d唔知咩野
佢話佢同班人唔算太熟,所以應該唔會叫佢做d咩
所以佢叫我揀true
想保護佢反而俾佢保護返既感覺真係好奇怪,但係又好開心
之後班人見我揀true,就緊係問我食左露露隻豬未啦
咁答案當然係未啦
但係班人又唔撚信 係到不停講父母斷雙腳
我就堅持話無(咁真係無麻 )
之後高佬好衰唔衰..
[你係唔係嫁,你講大話小心露露離開你呀 ]
聽到呢句,我同露露都靜左...
童軍見到我地兩個個表情唔對路,就話好啦好啦信你啦放過你啦
之後到露露,班友真係
[你揀個人錫 只要係異性就得]
露露聽到,環望左一下,望黎望去,佢望住我,嘆左口氣
[你做咩嘆氣姐,我好失禮你咩 ]
[唔係呀,我重以為班人會叫我除衫果d tim 我見佢地只係話錫一啖,所以咪放心咁呼一口氣囉~]
哇大佬露你個腦諗咩
班仔聽到全部都即刻改口話咁除衫啦除衫啦
之後我即刻抱住露露話唔得呀,錫咪錫囉可~~~
之後露露點點頭就撲低左我係到錫
班人望住自女伴,真係百般感覺在心頭
到最後~~~ 火星撞地球
你地有無人玩過,我地中學玩到好似玩無雙咁
姐係一班人圍圈坐,
手牽手,
之後一開始1個人斬開兩個人其中一個隻手,
之後要牽住自己另一邊既人向反方向跑一圈,
之後鬥快坐返低,
之後如此類推
咁一開始 ,剪刀石頭布我輸左
咁就由我決定斬邊個啦,咁唔洗問阿貴
邊個拖住露露我緊係斬邊個啦
我將童軍同露露隻手一斬
露露拖住海草頭向反方向我跑
我快快趣坐返低
之後露露一坐,我就拖住佢隻手
之後童子軍同高佬輸左,到佢地斬~~
童子軍將露露同海草頭中間斬開,我拖住露露起勢咁跑 一野撞開左海草頭個用伴-屈機佬
之後又坐返低
屈機佬
點知個死人頭屈機佬又斬開左我同露露,
我拖住屈機佬個女伴,
露露拖住左童子軍
我一撞,童子軍俾我撞開左,
但係露露趁機特擊拖住童子軍條屍返埋位
我即刻拉住露露,扔左屈機佬女伴返埋位先
勝負慾之下,兩公婆都無計傾
之後露露反手一下打左我一拳
之後但係童子軍太重 露露失平衡,
我上前接實佢,兩條友都仆左落沙
之後童子軍死死下話
[你兩公婆 搵命博,痴線,同你地一組一陣死左都唔知咩事]
大家玩又玩完,累到仆街
最尾都係例牌圍係到吹下水,講下鬼故
本身諗住可以嚇下露露...點撚知呢個傻婆
咁樣係輪流一人講一個故事既~~
咁我地4個男仔都講完,班人都無咩反應
露露重係到打喊露
有一兩個女仔都驚驚地,但係無叫出黎
咁到露露講啦
露露起身拍拍屎忽d沙~~
咳咳左兩聲
佢開始講
(唔知你地有無聽過一個童軍鬼故,講得同唔得果個有手勢既鬼故)
佢最恐怖,係要扮埋童軍d動作同表情...
好似真係親歷其境咁
當講到最尾高潮位果陣時,
露露做左果動作出黎嚇海草頭,
點知海草頭驚到尖叫再加個頭向旁邊撞
之後好似骨牌咁,你撞佢,佢撞第二個,如此類推,結果成堆女仔頭撞埋一齊
我地4個男仔笑到仆街
而露露個樣只係好滿足咁坐底,我真係唔知呢個女人諗咩
有人想知個鬼故我先講