我老母話我有未婚妻: 8
講完鬼故~~
大家行埋去個爐到執野...
但係露露就拉住我,叫我陪佢行下海邊
咁我無所謂~
兩個手拖手,佢又好似小學生咁係咁fing我隻手
之後行到去一個位,佢突然停左,問我5蚊護身符係唔係到
我係銀包到拎左出黎
佢仔細望左兩下,之後同我講
[哇,真係同我果日俾你果個一樣啵 ]
當我好奇緊佢係邊到做左記認果陣時,佢又係佢自己個散銀包到拎左5蚊銀俾我,叫我袋實個5蚊銀
佢話今日開始,希望個5蚊可以保護到我
之後我好奇問佢
[咁你想拎我個5蚊做咩?]
佢 同我講
[許願,我地一人一個許一個願,唔講出黎,之後扔個5蚊落海]
之後佢話大家依家開始用5分鐘諗一個願望
諗左又諗,願望係咩...
我估大家都知啦?
扔左5蚊落去
露露無問我許左咩願
我都無問佢...
但係大慨我都估到佢既願望...
然後我地就手拖住手行返去執野..
然後走果陣時
露露話要騎馬咁返屋企
雖然好累,但係好遇不可求,就背住佢~~慢慢行返屋企
回家途中...
一路背住露露,一路行,露露間唔中玩下我d頭髮,又攪下我隻耳仔,又係到傾下計
相信大家都知,女人最鍾意問咩問題 既十大裡面
1.你鍾意我d咩 2.你愛唔愛我 3.我同你阿媽跌落海你救邊個先
呢3條問題長居三甲之內
見咁無聊,我又無得走
佢緊係捉緊時機問我啦
但係佢又只係問左兩條咋啵
[傻佬,你鍾意我d咩?] .....
[你估下.....]
一唔識答我就會咁講,因為趁女方估既時候,我就會即刻諗答案。
[唔估快d講,係唔係唔識答呀?]
咁都俾你知道,抵我鍾意你啦。
[唔係...我呀?無話鍾意你d咩嫁啵..話鍾意你個樣靚,唔通你老左就唔鍾意你咩?
話鍾意你把聲甜,唔係嫁麻~唔通你啞左我就唔鍾意你咩
話鍾意你活潑,唔通你行動不便果陣時就唔鍾意你咩?
所以我話,我鍾意你全憑感覺嫁咋...]
自己講完都覺on9,大家唔洗估,係呀,呢d對白的確係抄返黎,我都唔記得左係邊到睇返黎
但係此時此刻面臨危險我唔搬呢d對白出黎我一陣間分分鐘耳仔都俾佢扭甩...
[呵呵,算你啦,見你都答得唔錯...]
之後佢又靜左,我好奇佢點解唔問埋另外兩條問題,於是忍唔住出聲問
[點解你唔問救邊個同埋愛唔愛你呢兩條問題?]
佢聽到即刻係到笑,d口水重整到我條頸
之後佢慢慢講
[我知你實愛我嫁,我知你實會救我先嫁啵~~洗咩問姐~]
之後我無好氣同佢講
[係啦係啦,你叻啦,你肯定我會救你先呀可~~]
之後佢靜一靜,突然抱到緊一緊...
我完全feel到起伏位
[你...真係唔會救我?]
我心突然一荒知自己講錯野
[講笑咋~~講笑咋....對唔住呀....]
之後佢突然又大笑
[你好易呃呀,我搵到你既弱點啦!你係唔係驚女仔喊同埋嬲!? ]
我心諗呢鋪大獲俾佢知道我重洗打算重奪權力!?
[這..這是個不能說的秘密啦 ]
露露聽到,用右手捏我塊面
[學我講野~~~捏你一下罰你 ]
傾下傾下,就行到返屋企個區~
返屋企個區之前,要經過條橋
橋旁邊係輕鐵路,而另一邊係對住個海
橋既面,有上下兩條路,上路其實只係d蓋鋪成既路
上斜波我背住露露真係累到仆街 但係又唔捨得要佢自己行,於是就頂硬上
行到咁上下,露露話放佢去上面條路,佢要企係上面
我放低佢係上路,我自己係下路,拓高頭望住佢問佢咩事
露露背住我,望住個海講
[果日呢...你做咩要上台唱歌?]
我心裡面諗兩諗....
其實我係唔想你拎到箱蘋果扔我...所以先希望搏一搏單車變摩托
點知我唱完你喊到根本無上台唱,早知就唔洗咁煩啦
但係唔通我咁答佢咩
[無呀..見你果日係家政室整野食咁辛苦...咪唱首歌慰勞下你囉 ]
[真係~ ]
[緊係啦..唔係無啦啦上台唱咩鬼歌..]
之後佢dup低頭望住地下,用腳踢左兩下個水蓋...
之後係到傻笑
[我....依家唱首歌俾你聽呀..你肯唔肯做我聽眾 ]
我 ->
露露好似好緊張咁
但係我又好期待咁望住佢,心諗佢會唱d咩呢..
[我要開始啦~~~俾d掌聲啦 ]
呢個女友真係...
[好好~~~](拍手)
[咳咳...我真係要唱嫁啦啵!你留心聽呀!留意歌詞呀!]
[係啦係啦,你唱啦,我聽緊呀]
露露呢個時候,渣實隻右手,用拳頭扮mic 放係口邊
我見到忍唔住笑左出黎
之後露露
[聽唔聽嫁,唔聽就算返屋企嫁啦~~ ]
我見到佢d眼神真係勁驚...分分鐘係到扔我落海都有份
[嗯嗯...你唱啦你唱啦,唔笑唔笑..]
露露再新開始,將右手既拳頭放係口邊...
[等待...一點一滴你對我感到安心....]
咦,呢首咁熟既,又係Tank?
果陣時無講出黎啦..打算聽埋先講
但係當佢唱到
[只握在喜歡的人手上~~~]果陣時,用左手指住我係到
之後到
給我你的愛讓我陪著你去未來
給我你的愛手拉著手不放開
佢自己舉高隻左手~之後係揮 扮哂歌手開演唱會帶動氣氛
見到真係掩住嘴偷笑左下
基本上呢首歌...己經聽過好多次,自己都唱過好多次...
叫給我你的愛,同如果我變成回憶係同一個歌手
但係露露唱,我覺得特別甜(?
姐係假設你鍾意高達
你自己買無咩感覺
但係如果係你女友買俾你,你分分鐘重開心過見到超級巨聲終於肯完咁
露露唱完,佢笑笑口問我
[係唔係好好聽呢~~係唔係好感動呢~~~ ]
我只係係下面笑住拍手掌,然後走埋去抱住佢對腳係到原地轉 (差d自己暈到仆街 )
佢驚到係上面大叫 ,我一放低佢,佢係到拍打我個心口 ,彭彭聲on99
之後佢問我,有無留意歌詞,又問我聽唔聽得明
我扮哂野話聽唔明,之後佢想一句一句歌詞用廣東話讀返俾我聽果陣時
我牽住佢,慢慢拉住佢行返屋企果陣時
開口由頭唱返一次成首歌佢聽...
佢一聽到就[咦 ]
之後急步跟住我行
然後我地就係咁, 一路行一路唱給我你的愛就返到屋企
是次活動都完結啦~~
時間又來到某日假期
唔知大家有無去開唱k,去開都知新方向少台灣歌唱
但係綠盒同紅盒d台灣歌反而多
我同露露都係台灣歌既fans
話說有一日,班同學話好耐無唱K,問我地去唔去
住屯門既巴打應該都知道
綠盒係大慨5,6年因為裝修而裝修到依家都未裝修好,重要變埋做SPA既鋪頭
得返間新方向,無奈要出元朗或者出面先唱得
班人又約到倒塌咁早,晨早流流,同露露兩個係商場買完麵包,忠下忠下上左巴士出旺角
你問我點解唔約遲d,因為我同班人一樣都無錢
只係夠唱k lunch
所以無奈被迫早出去...
全程車,我同露露訓覺多過講野
兩個頭頂頭...捱下捱下就訓著左...
去到新世紀...班仆街都重未到...早知唔洗早起身...
同露露兩個,落左書局行下...
好死唔死....
死神咁岩出左新一期(好似係,因為露露話佢未買... )
咁迫於無奈買俾佢,之前promise左,但係我又驚佢一陣掛住睇,唔唱k...
於是就同佢勾手指尾,適當時候做適當既野好無?
佢諗左陣, 住同我勾手指尾點頭
[你肯買俾我,我就聽哂你話啦 ]
之後就拉住我出去俾錢
俾完錢,班仆街終於黎左一兩個,上返去,我真係理得未到果d人死,成日遲到
於是就開左房入去先
入到去,例牌套返個套先
唔知有無巴打試過早去果陣時,就算你開5人,佢都俾10人房你
果日就係撞正咁既情況~~入到去見到間房勁長開心死
一坐低,cut左條煩膠既走火廣告,就開始睇下有咩新歌
一直我見露露都只係好乖咁坐左係到望電視,但係佢同時又不停望自己個袋(死神漫畫係裡面 )
咁佢條尾都露左出黎...都估到佢想做咩
之後我同學就撩露露傾下計
露露又轉換左客套模式
同班人有講有笑,引開班人注意,而我趁機點自己想唱果d
我問露露想唱咩,佢話隨便
我問佢係唔係真係隨便 佢話係
我點左首BB保你大,露露隻眼好似發光咁
[呢首正呀!!]
我同另外兩位友人見到佢既反應都笑左下
點點下歌~~ 唱左幾首,其他果4條友黎埋,一黎到,佢地就同露露打招呼~
然後話我地咁快點左咁多歌
之後當到露露首bb保你大果陣時,突然俾我同學插左首歌上去
露露即刻由 -> ->
我同學見到即刻say sorry 點返首bb保你大
但係佢...
[我...我無心嫁sorry呀...首歌我知係兒歌黎嫁,阿邊個唱嫁麻...我知呀我知呀我幫你點返,
你唔好喊呀..你等我一陣我搵緊俾你 ]
我同其他人見佢緊張到咁笑到死,但係露露只係嘆左口氣就坐低左
但係當插返首歌上去果陣時,露露又企返起身 -> ->
[Yeah~~bi~ba~bibabi~]
我相信在場既大家心裡一定諗緊點解一個女仔既心情可以變咁快
基本上,呢班同學唱歌都好好聽,比起唱歌,我比想同露露一齊聽下歌笑下
但係班人今日好似神打上身咁爆哂seed,攪到我都熱血沸騰
而露露都俾果種氣氛帶動到 唱到企起沙發唱 cookies首一擊即中
全場氣氛勁激昂
佢重要扮埋d動作先正
然後我同班朋友都不甘示弱,唱左首棒棒堂既Yes
之前一班男仔,唱親都係D傷情歌 成班係到灰
但係今日一反常態,唱哂快歌
你見我連棒棒堂都拎埋出黎唱就知啦
露露唱唱下...話唔舒服,要去去廁所
但係佢拎埋個袋出去
咁我起初問佢有無事,洗唔洗返屋企,佢又話唔洗,去個廁所就夠
咁我地無理啦,又唱左幾首
見佢成十幾分鐘都未返黎,我有少少擔心,於是就去個廁所順便望望
去完廁所,企係廁所門口,打俾露露
露露隔左陣先聽
佢一聽就話肚痛,所以要耐少少
但係聽到D揭野既聲 (你地有無試過單手揭書 因為好難揭,所以要好大力,你地試下就知)
我就話
[你睇緊漫畫 ?]
佢即刻連續下左幾聲
[我.....俾你發現左tim 我只係因為好想知道一護有無事...唔係因為覺得悶呀對唔住呀 ]
我心裡面無嬲,只係覺得佢好白痴
[無事啦,你出黎啦,返房睇啦,你一陣阻住人地去廁所呀低b妹]
[係唔係嫁..我一出黎你會唔會罵我嫁 ]
[唔會啦,我應承你 ]
[真係?唔準罵我喎 最多我返到去唔睇啦..]
[唔罵呀,而且俾你返去入房睇好無~~]
[啦~~咁係嫁啦 我最愛你啦~~~拜拜]
我一收線無奈,就見到露露拎住本漫畫笑住係女廁出黎
[呵呵,打沉你!露露星人!]
佢 ,[點解你係到既,你突登企係到捉住我!?]
我心諗邊個咁得閒
[我擔心你所以企係到睇下你有無事咋~~]
[對唔住呀 要你擔心我.. 我無事呀...]
見到佢內疚個樣,我決定食住上
[唉...枉我咁擔心你..原來只係睇漫畫...]
之後扮哂失望咁閉埋眼
佢然後拉住我衣袖同我講sorry
我即刻攬住佢條腰錫左落佢到..
錫左幾秒,見到有人既反射係遠處慢慢靠近 即刻放手拖住佢返房
露露成個人呆左,只係跟住我行
返到房門...
露露拉住我唔俾入
我問佢咩事
[我...我.... 你可唔可以錫多我一啖呀... ]
我見到佢塊面紅哂
怕怕羞羞,勁可愛~~
但係我認我係仆街
[唔~~~制~~~入去唱K lu~~~ 我想唱多幾首呀~哈哈]
佢即刻由 ->
[哼!],之後想衝入房
我即刻拉住佢,望住佢講對唔住
[唔想錫咪算囉..哼~衰人 ]
見到佢咁...我真係
然後輕輕錫左啖就入返房
入房前...我聽到露露講...
[乖乖地聽話咪好囉,係要我要脅你既 正一傻佬黎]
呢個女人果然好了解我呀下..
入到房,我想唱果 一兩首都俾人唱哂
無限怨念咁坐左係到,點知班人原來後面點左勁多男女合唱歌,
九成九係我去左廁所果陣時班仆街點嫁啦
當到首滄海遺珠果陣時,成班仔想同露露唱
但係露露拎左一枝咪之後,再問佢地拎多枝,之後俾左枝我
我本身後悔緊帶露露出黎果陣時 佢突然俾枝咪我,我都呆左呆,皆因狀況外
[我呢我呢,想同八輩子唱咋,到"滾"先同你地唱啦 ]
班人聽到露露咁講,無奈放下個mic,怨念咁望住我地兩個合唱
重要唱滾先肯同佢地唱
心裡暗爽完一陣,心知要係露露面前見到自己深情既一面啦
當我扮哂深情唱果陣時,露露突然唱唱下大笑
佢之後斷斷續續笑住咁講左句野
[你...你個深...情樣...好好笑呀 唔好扮啦傻佬]
我即刻成個好似艾沙雲俾兩條友夾住舉高隻手果張圖咁無奈企係到望住佢
之後佢見到重笑得犀利左
我無好氣捏左佢一下就正正經經唱落去~~
唱到
要是別人 都不愛你 有我這邊等你
果陣時,我地兩個不自覺對望左下
之後露露好怕羞咁笑住望返電視唱
成班人見到又係到wow
我自己都即刻笑到唱唔到落去...
心裡面好小鹿亂撞我果一刻
唱完之後,同班人分手之後,露露問我可唔可以陪佢去睇下野
我話可以,起初以為佢可能想去行下朗豪坊之類
你知啦,d 女仔唔知點解係唔係出親旺角都要去一去無印買枝筆
我重以為露露都有咁既虛榮心
無印文具係名牌黎嫁麻!
行向目的地中途,佢同我講,其實想睇衫...
我即刻
露露終於醒覺了
點知佢帶左我去一座(?)商場,果到有好多模形呀,扭蛋呀既野賣(唔係信和)
我心諗...咩事?呢到會有咩衫買..
入到去...露露開始 搵佢既想要既衫...
原來係cosplay服...
我真係
但係我都好少去呢個商場,我買親玩具去信和多因為
雖然我唔反感而且無咩感覺,但係我發現d衫原來都整得幾似
因為我自己其實都有睇下漫畫咁
我見到有真選組件衫,幾型 但係勁貴
露露主攻睇死神既玩具 我都一路去係咁問佢關於死神既野
我發現只要問佢鍾意既野,佢就會好耐心講解俾我聽
佢重叫我望住公仔,然後估我鍾意邊個
點知佢真係估到我鍾意戴帽果個木鞋大叔
開鋪頭果個,唔記得左名突然之間
之後我都見到有死神d衫買
重有d刀,真係幾型棍
而且我發現都幾多人cosplay係果間商場
有d人可能岩岩買完順便著埋返屋企
露露突然問我想唔想試
我心諗我可以扮咩?技安定叮噹呀...
於是就話唔啦
佢就問我
[其實你覺得我扮露棋亞似唔似 ]
我即時問佢拎本漫畫出黎望望,
之後將佢條陰扮哂露棋亞咁係雙眼之間
笑到我死
[唔似,除左你同佢差唔多矮之外 ]
之後佢打左我一下叫我去死,仆街一掌打到我勁痛
但係當我話想返屋企果陣時..
佢好似唔識累咁,問我去唔去打機,佢請
我心諗你無啦啦打咩機 於是就話是但,點知....
佢打機既意思原來同我腦海所謂既打機完全唔同...