中三一段不可能忘記的初戀: 9.
每年平安夜我都同成班打機Friend食聖誕大餐，聽落去幾毒，但係成班friend咁樣兩個鐘吹水真係幾開心。原本諗住今日一樣可以同班兄弟食飯，都已經六點差唔多時候出發，但係……
「喂，搵邊位。」我
「五仔…你…可唔可以…黎…尖沙咀海旁。」MING嫂喊著講
「我出黎起碼九個字啵，不如你係電話到講再睇下我洗唔洗出黎。」
「我同MING…鬧交…我而家好亂…唔知點…可唔可以出黎…陪我…」
「吓…你等我九個字啦咁，我好快打番比你。」
我一路行去火車站一路諗用咩籍口推個餐，最後…
「我屋企人話想一齊食餐團年飯喎。」
「吓，平安夜團咩撚野年呀。」
「我都唔知點解阿爸叫團年，仲要去尖咀食，睇黎今日黎唔到啦。」
「屋企人冇辦法啦，今晚打機等埋你架。」
「如果我番到屋企仲精神嘅話，今晚先算啦，拜。」
之後我即刻打番比MING嫂，一路傾一路了解發生咩事，主要都係MING嫂又講起我，MING呷醋。
好快到咗尖咀搵到MING嫂坐咗係長椅。
「你無事呀嗎？」
佢一見到我就攬住我喊，咁樣就半個鐘，我一句都冇講由佢喊。
「我係咪花心呀？」MING嫂冇再喊
「唔係。」我
「點解MING唔想我同你做Friend？」MING嫂
「呷醋掛…我點知啵我又冇試過。」我
「你都廢架。」MING嫂走咗去
我當然即刻追捉住佢，「唔好嬲啦，我都好想幫你架。」
「咁做咩msn冇覆我呀，你唔係有新目標咩，我而家同你一齊好曖昧咩。」講完佢又想走。
「其實…」我考慮一陣，「真係…好曖昧。」
「咁你而家出黎…」佢語氣已經好咗少少。
「你喊曬咁，我好緊張，如果連我都唔理你我驚你做傻事呀。」
「咁你而家就唔理鍾意嗰嗰女仔啦！」
「唉，咁你想我點呀。」我「你再對我發脾氣我真係走架啦。」
「…」MING嫂好少少想喊「對唔住啦…唔好再唔理我啦好冇…」
靜咗一陣，我話 「不如去食啲野先。」
「好呀！」講完佢即刻圈住我隻手行。
我嚇一嚇，「你咁樣好似唔係幾好啵。」
「睇下成條街啲人都係成雙成對…」MING嫂
「人地真係情侶呀嘛…」我「咁同埋好對唔住阿MING。」
「我都唔介意你驚咩啵，同埋唔好同我提個衰人！」MING「你驚比你鍾意嘅女仔見到咩？」
「咁佢應該唔係度掛…」突然我感覺到個大話就快爆，因為我真係諗唔到點樣接落去。
「有個校花同你一齊行仲咁多MING嫂「話時話個女仔係邊個。」
「吓，唔講得唔得呀？」我
「咁我估吓，係咪我地班架？」
「好似係…」
「係咪同學A呢。」
「佢個樣係OK，弊在佢真係以為自己好靚，淨係啲語氣。呢啲女望吓就得，做女朋友就真係死得啦。」
「咁阿同學B呢。」
「佢係人同樣都OK，但係每次講多幾句佢就話唔得閒，話題都未開佢就CUT咗，想熟啲都唔得。」
「咁係咪呢班架？！」
「係…」我突然醒起同我講緊野係MING嫂唔係恆仔
「唔會係同學C呀…」MING嫂個樣好似諗得好辛苦。
「不如諗吓而家去邊食野啦，你知我鍾意邊個又點。」我
「我可以幫你呀！」「你想幫我不如去食啲野先。」「係啦飯桶！」「如果唔係你叫我出黎…」
「估唔到聖誕節食M記，哈！」我
「咪係囉，你個死人頭帶咁少錢，一係太多人一係唔夠錢！」MING嫂
「仲好講，你一蚊冇帶，連M記都要我請。」我
「佢原本話請我食飯架麻…」MING嫂「好啦，而家食飽啦，你肯唔肯同我講係邊個女仔呀！」
「你咁八做咩呢。」我
「咁我可以幫吓追佢呀嘛。」MING嫂「你個毒撚都唔識女仔相處。」
「你咁關心做咩，唔通…」我貼近少少「你比我英俊嘅外表吸引咗？」
「咁你咪嚇親人囉！」MING嫂「你唔肯講就算，到時唔好衰咗問我點樣補鑊呀。」
「我會衰先算…」我「唔知點解我好懷念呢個感覺…」
「我都係…」MING嫂「咪都係下囉，都唔理人嘅…」
「梳囉…」
「識咗你之後真係開心咗好多，」MING嫂「就算MING唔理我，仲有你會肯聽我講野。」
「我識咗你之後我個人都開朗咗，唔會成日係屋企咁悶。」
「你知就好啦死毒撚。」
因為時間尚早，MING嫂同我行咗燈飾，行咗少少商場，最後係個度倒數，沿路MING嫂都拖住我，佢話全世界都手拖手唔拖先奇怪啦。我笑一笑就由得佢，因為我心底唔知點解都係好開心嘅。
話咁快送到佢番屋企樓下。
「今日真係多謝你啦！」MING嫂，「唔係嘅話我可能仲係出面喊緊。」
「唔洗啦。冇你我可能都唔知原來尖沙咀咁好節日氣氛，同埋差啲趕唔到尾班火車。」
「咁…其實你鍾意邊個呀？」
「我收番我啱啱講嘅所有野…」
「其實我都估到…」MING嫂講完，我個心離一離
「貼近啲，細細聲同你講呢！」MING嫂
我好緊張貼埋少少，MING嫂突錫咗我個面一吓。我即刻縮一縮，跟住我個面紅曬。
「原來你個傻仔真係鍾意我呀！」MING嫂笑一笑
「恭喜你估中咗！」我都廢事收埋啦。「你明我點解唔同你出街啦。你以後MSN我都好，唔好搵我出街好冇。」
「咁…我都冇得話唔好架啦…」MING嫂好似有啲唔捨得。
「咁我走啦，再見啦。」
我開始明白放底一個人真係好難，原本冇同佢出街以為我都差唔多放得底，點知出一次街咩感覺都番曬黎。我個心真係好辛苦，原來鍾意一個人未必一定係開心，而真係可以好痛苦。我忍住我嘅淚水，戴起耳塞，用音樂去嘗試去沖淡我心中嘅痛。